Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Libro ndrígóʼ náa na̱ʼkha̱ raʼthí ga̱jma̱a̱ numuu Biblia

 HISTORIA 44

Rahab narkaʼwun xa̱bu̱ bi̱ nuñama

Rahab narkaʼwun xa̱bu̱ bi̱ nuñama

XA̱BEKHA bigi̱ guáʼdáá mbá xkujndu. Gíʼmaa rí magañún mu xúradíin. Bi̱ nuñama ni̱ndxu̱ún israelitas, ga̱jma̱a̱ a̱ʼgu̱ bi̱ nambáñun ni̱ndxu̱u̱ Rahab. Rahab xtáa náa mbá guʼwá rí kayóo ga̱jma̱a̱ xtátsí ndrígóo xuajin Jericó. Guʼyáá xú káʼnii nirígá xúgíʼ rígi̱.

Israelitas itháan má tigo̱o̱ rí manújngun náa mañu Jordán mu matu̱ʼu̱u̱n náa Canaán. Mú nákha xóó tsítu̱ʼu̱u̱n ikhiin, Josué nakuʼmiin a̱jmi̱i̱n xa̱bekha bi̱ muñama. Naʼthúún: ‹Gu̱ya̱a̱ ku̱ba̱ʼ ga̱jma̱a̱ xuajin ndrígóo Jericó›.

Índo̱ rí xa̱bu̱ bi̱ nuñama natu̱ʼu̱u̱n náa Jericó, nagún náa goʼwóo Rahab. Mú xtáa tsáa bi̱ naʼthúu̱n rey ndrígóo Jericó: ‹Nákha wakiʼ niguwáʼ a̱jmi̱i̱n israelitas mu muñama ku̱ba̱ʼ›. Índo̱ niʼdxuun rígi̱, rey nakunguinʼ náa Rahab tikhun xa̱bu̱. Ikhiin nutháán: ‹¡Atrawíin xa̱bu̱ bi̱ kuwa náa guʼwáaʼ!›. Mú Rahab nirkaʼwun xa̱bu̱ náa tsu̱du̱u̱ goʼwóo. Ikha jngó naʼthí: ‹Tikhun xa̱bu̱ niguwáʼ náa goʼwóoʼ, mú tseyóo náa eguwáʼ. Nigúun nákha xtáa rakrína, nákha xóó tsírugua̱a̱ xkrugua ndrígóo xuajin. ¡Á mu nagayalaʼ, muxkamin!›. Ikhú xa̱bu̱ nagáñun mu muxkamin.

Índo̱ rí xa̱bu̱ nagúun, Rahab natsimuu ragáyúu náa tsu̱du̱u̱ goʼwóo. Naʼthúún xa̱bu̱ bi̱ nuñama: ‹Ikhúúnʼ nda̱yo̱o̱ rí Jeobá maxnalaʼ ku̱ba̱ʼ rígi̱. Nidxáwinxu rí ikhaa niʼni mujndoʼ lamáa Maña̱ʼ índo̱ rí ikháanʼ nigájnalaʼ náa Egipto, ga̱jma̱a̱ rí ikháanʼ niradíin reyes Sehón ga̱jma̱a̱ Og. Numuu rí ikhúúnʼ ninindxu̱ʼ májánʼ a̱jkiu̱nʼ ga̱jma̱á nindxa̱laʼ, gu̱ni̱ péñu, guthu̱nʼ rí manindxa̱laʼ májánʼ a̱jkia̱la ga̱jma̱á ni̱ndxu̱ʼ. Gunikríyaʼ anu̱ʼ ga̱jma̱a̱ ru̱dúʼ, a̱ngui̱nʼ jiama ga̱jma̱a̱ a̱ngui̱nʼ gu̱ʼu̱›.

Xa̱bu̱ bi̱ nuñama nuthi rí xúʼko̱ gúní, mu Rahab rígá mbá rí maʼni. Xa̱bu̱ bi̱ nuñama nuthi: ‹Ayá ñuu maña̱ʼ rígi̱ mu matandrájka náa ventana ndrígáʼ, ga̱jma̱a̱ atagímbíin náa guʼwáaʼ xúgínʼ bi̱ xtañun. Ga̱jma̱a̱ índo̱ gatangáanʼxu xúgiáanʼ mu muxmíjnaxu gajmiuxu xa̱bu̱ bi̱ kuwa náa Jericó, xuxíyáaxu nimbáa bi̱ kúwi̱i̱n náa guʼwáaʼ›. Índo̱ rí xa̱bu̱ bi̱ nuñama natangi̱i̱n náa Josué, nutháán xúgíʼ dí nirígá.

Josué 2:1-24; Hebreos 11:31.