¡ATAYÁÁ rí xtáa raʼdumaʼa xa̱bu̱ bugi̱ náa goʼwóo! Mbá xtíin mitsaan, ga̱jma̱a̱ mbá xuíʼtóo oro ma̱ngaa tikhuu plata. Rígi̱ niguwíi náa Jericó. Mú, ndiéjunʼ lá gíʼni̱ ga̱jma̱a̱ xúgíʼ rígi̱ rí na̱ʼkha̱ náa Jericó rá. Lá narmáʼáan a̱jkia̱nʼ ráʼ.

Xúgíʼ dí rígá náa xuajin gíʼmaa rí munigámbáa, i̱ndó oro ga̱jma̱a̱ plata gíʼmaa rí magun kudun náa rígá dí gíʼdoo wéñuʼ numuu náa tabernáculo ndrígóo Jeobá. Xa̱bu̱ bugi̱ túnimbu̱u̱n náa Dios. Ni̱ni̱ kuʼwáaʼ rí kaʼyoo Dios. Xa̱bu̱ bugi̱ nagumbiʼyuu Acán, bi̱ xtáa gajmíi̱n ni̱ndxu̱ún tikhun bi̱ kuwa náa goʼwóo. Guʼyáá ndiéjunʼ erígá.

Nda̱wa̱á rí Acán niʼni kúwáʼ rígi̱, Josué nakunguinʼ tikhun xa̱bekha mú muxmijná gajmiún xa̱bu̱ bi̱ kuwa náa xuajin Hai. Mú na̱nguá eʼngu̱u̱n. Tikhun nakháñun, ga̱jma̱a̱ eʼwíínʼ nagáñun. Josué naxtáa gíná wéñuʼ. Ikhú nasmbáti̱go̱o̱ mbayííʼ, naʼtakháñu Jeobá ga̱jma̱a̱ naʼthí: ‹Náa numuu etatsiñaʼ marigá rígi̱ rá.›

Jeobá eriʼña: ‹¡Araxu̱nʼ! Xa̱bu̱ Israel nixudami̱jna̱ náa aʼkhá. Ndi̱ya̱ tikhuu rí gíʼmaa maguma gámbáa o mixná náa tabernáculo ndrígóo Dios. Asndu xóó tsethi rí ni̱ni̱ kuʼwáʼ mbá xtíin rí mitsaan. Xáni tsajkuráminʼ asndu índo̱ gúni̱gámbáa xtíin ga̱jma̱a̱ xa̱bu̱ bi̱ ndiyá oro ga̱jma̱a̱ plata›. Jeobá naʼthúu̱n Josué rí masngájmaa tsáa xa̱bíi ni̱ndxu̱u̱ bi̱ ra̱májánʼ.

Josué nagímbíin xúgínʼ xa̱bu̱ xuajin, ga̱jma̱a̱ Jeobá nasngájmariyaʼ Acán xóo xa̱bu̱ bi̱ ra̱májánʼ. Acán eʼthí: ‹Nikieʼkunʼ. Ndi̱yo̱o̱ mbá xtíin mitsaan, ga̱jma̱a̱ mbá xuíʼtóo oro ga̱jma̱a̱ tikhuu plata. Ra̱ʼkhá tháán nindoʼ rígi̱ ikha jngó ni̱jkhá kaguʼ. Ma̱ndoo muxkamaa náa awúu̱n goʼwóo ikhí kidumaʼa xúgíʼ›.

Índo̱ nuxkamaa rí kidumaʼan, naguwáʼ ku̱ñu̱u̱n náa Josué, ikhaa naʼthúu̱n Acán: ‹Náa numuu rí ni̱dxa̱ʼ jchaaʼ gaʼkhu náa ikháanʼxu rá. ¡Rí xúgi̱ Jeobá ma̱ʼkha̱ kayóo gaʼkhu náa ikháánʼ!›. Ikhú xúgínʼ xa̱bu̱ nuxnáá ga̱jma̱a̱ itsí Acán gajmíi̱n bi̱ kuwa náa goʼwóo asndu náa nakháñun. Lá tsesngájma rígi̱ dí ragíʼmaa muyeʼgua nimbá miʼtsú dí raʼkháa ndríguluʼ ráʼ.

Nda̱wa̱á Israel nagájnuu mbu̱júu̱ gaxmínaʼ ga̱jma̱a̱ Hai. Rí xúgi̱ Jeobá nambáyuu xuajñu, ga̱jma̱a̱ ikhiin naʼngu̱u̱n nuxmijná.