Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Libro ndrígóʼ náa na̱ʼkha̱ raʼthí ga̱jma̱a̱ numuu Biblia

 HISTORIA 30

Xtáʼdu̱u̱ iná rí gíʼdoo agiuʼ

Xtáʼdu̱u̱ iná rí gíʼdoo agiuʼ

MOISÉS ni̱ʼkha̱ asndu náa kúbá rí mbiʼyuu Hored mu mbayáaʼ iná mu̱phu̱ mugiu̱u̱. Gi̱i̱ ndiʼyoo mbá xtáʼdu̱u̱ rí nagájnuu agiuʼ, ¡mú na̱nguá ekha!

‹¡Nimbá miʼtsú na̱nguá e̱yo̱o̱ rígi̱!› nindxa̱ʼwáminaʼ Moisés. ‹Itháan májánʼ gáʼni rí maʼgá gáyóo.› Índo̱ ni̱jkha̱nú mijngii, asndu náa xtáʼdu̱u̱ iná niwan mbá aʼwá rí niʼthí: ‹Ní xádxáʼ kanuu itháan. Atrawíi chádaʼ, numuu rí xtaa náa ku̱ba̱ʼ mikaʼwu›. Dios niʼni rí mbáa ángel maʼthí ga̱jma̱a̱ numuu, ikha jngó Moisés nirogoo inuu.

Ikhú Dios niʼthí: ‹Nda̱yo̱o̱ rí xuajñunʼ najma gínáa náa Egipto. Manikáwíin, ikha jngó nakuʼnguánʼ ikháánʼ mu matrawíin ikhí›. Jeobá nindoo maʼga̱ kagu̱u̱n xuajñu náa xuajin mitsaan ndrígóo Canaán.

Mú Moisés niʼthí: ‹Nda̱wa̱a̱ tsáa ni̱ndxu̱ʼ ikhúúnʼ. Xú káʼnii gándoo gani rígi̱ rá. Á mu rí na̱jkhá muthunʼ: “Tsáa nikunguánʼ rá”. Ndiéjunʼ gatha ikhú rá.›

‹Rígi̱ ni̱ndxu̱u̱ dí marata̱›, niriʼña Dios. ‹“JEOBÁ Dios ndrígóo Abrahán, Dios ndrígóo Isaac ga̱jma̱a̱ Dios ndrígóo Jacob bi̱ nikungunʼ náa ikháanʼla”.› Ikhú, Jeobá niʼthí: ‹Rígi̱ ni̱ndxu̱u̱ mbiʼyuuʼ asndu kámuu mbiʼi’›.

‹Mú, rígáa á mu ikhiin tsénimbu̱ún kuyoʼ rí ikháánʼ nitaxúngunʼ rá’.› Niriʼña Moisés.

‹Ndiéjunʼ lá rí jchá náa ñawanʼ rá.› Niraxi Dios.

Moisés niriʼña: ‹Mbá ixi̱›.

‹Atatíga̱ mbayííʼ›, niʼthí Dios. Índo̱ Moisés niʼni xúʼko̱ kaʼnii, ixi̱ rí kayá nirtaximínáʼ a̱bu̱nʼ. Ikhú, Jeobá nisngájmuu Moisés imbo̱o̱ milagro. Niʼthí: ‹Ataxúmáʼ ñawáanʼ náa xtíñaaʼ›. Moisés niʼni xúʼko̱, índo̱ niríyaʼ ñawúunʼ, ¡niʼni miʼxá xóo idiʼ! Nikujmaa rí ikhaa xtáa nakháñuu, ga̱jma̱a̱ lepra. Ikhú Jeobá nixnúu tsiakii Moisés mu maʼni ragajtsú milagro. Nda̱wa̱á kayuʼ niʼthí: ‹Milagro rígi̱ gáʼni rí israelitas munimbu̱ún rí ikhúúnʼ nikuʼnguán’›.

Nda̱wa̱á, Moisés nitanga̱a̱ náa goʼwóo ma̱ngoo niʼthúu̱n Jetro: ‹Mbá péñu, atatsíñuʼ maʼgáaʼ Egipto mu mba̱yo̱o̱ xú káʼnii kuwa a̱ngui̱nʼ›. Ikhú Jetro niʼtangawuu Moisés, ikhú nigíʼdu̱u̱ ni̱jkha̱ mitsinguánʼ wéñuʼ mu mata̱nga̱a̱ asndu náa Egipto.

Éxodo 3:1-22; 4:1-20.