Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Libro ndrígóʼ náa na̱ʼkha̱ raʼthí ga̱jma̱a̱ numuu Biblia

 HISTORIA 14

Nakujmaa fe ndrígóo Abrahán

Nakujmaa fe ndrígóo Abrahán

LÁ NANDOO natayáá rí xtáa raʼni Abrahán ráʼ. Kayá mbá chílú, nakujmaa rí maxíyáa a̱ʼdióo. Náa numuu rá. Ginii, guʼyáá xú káʼnii Abrahán ga̱jma̱a̱ Sara niguáʼdaa aʼdiún.

Garmáʼáan a̱jkia̱nʼ, rí Dios nikudaminaʼ rí maguaʼdáa mbáa ada̱. Mú rakáʼnii marigá xúʼko̱, numuu rí Abrahán ga̱jma̱a̱ Sara niʼni wanii. Mú Abrahán niʼnimbo̱o̱ rí Dios ma̱ndoo maʼni dí rakáʼnii marigá. Ikha jngó, ndiéjunʼ nirígá rá.

Nda̱wa̱á rí Dios nixná ajngóo, ninújngoo mbá tsiguʼ kañiʼ. Ikhú, índo̱ rí Abrahán gíʼdoo 100 tsiguʼ ga̱jma̱a̱ Sara 90, niguáʼdaa mbáa ada̱ bi̱ nigumbiʼyuu Isaac. ¡Dios niʼnimbánuu rí nikudaminaʼ!

Mú índo̱ Isaac nigiʼdoo itháan tsiguʼ, Jeobá niʼni rí Abrahán masngájma fe ndrígóo. Nindxa̱ʼóo: ‹¡Abrahán!›. Ma̱ngaa Abrahán niriʼña: ‹¡Gi̱i̱ xtáá!›. Ikhú Dios niʼthí: ‹Ayáa a̱ʼdiáaʼ, bi̱ mbáwijtsíi, Isaac, ga̱jma̱a̱ ayuʼ náa kúbá rí masngajmáʼ. Ikhí gátaxíyáa a̱ʼdiáaʼ ga̱jma̱a̱ araxnáxi̱i̱ xóo tsigijñaʼ›.

¡Ra̱ʼkhá tháán gíná niʼniuu rígi̱ Abrahán, numuu rí Abrahán nindoo kaʼyoo wéñuʼ a̱ʼdióo! Ma̱ngoo gakumaʼ, Dios nikudaminaʼ rí e̱ji̱i̱n Abrahán makuwá náa ku̱ba̱ʼ ndrígóo Canaán. Mú, xú káʼnii lá gándoo garigá rúʼko̱ á mu rí Isaac nikháñu rá. Abrahán na̱nguá nikro̱ʼo̱o̱, mú niʼnimbo̱o̱ xóó náa Dios.

Índo̱ ni̱jkha̱nú náa kúbá, Abrahán niroʼóo ñawúunʼ Isaac ma̱ngoo nitámáʼ náa nuxnaxi̱ tsigijñaʼ rí ikhaa má niʼni. Ikhú niríyaaʼ chílú mu maxíyáa a̱ʼdióo. Mú núkhu má ikhú ángel ndrígio̱o̱ Dios nindxa̱ʼóo: ‹¡Abrahán, Abrahán!› Ikhú Abrahán niriʼña: ‹¡Gi̱i̱ xtáá!›.

‹Nda̱a̱ rí gátani̱i̱ nditháan dxámá›, niʼthí Dios. ‹Rí xúgi̱ nda̱yo̱o̱ rí xtaʼdáá fe náa ikhúúnʼ, numuu rí niraxnáa a̱ʼdiáaʼ, bi̱ mbáwijtsíi, náa ikhúúnʼ.›

¡Ra̱ʼkhá tháán mba̱a̱ fe nigiʼdoo Abrahán náa Dios! Ikhaa niʼnimbo̱o̱ rí Jeobá ma̱ndoo maʼni xúgíʼ, ga̱jma̱a̱ rí Jeobá ma̱ndoo makuxi̱i̱ Isaac náa tapún xa̱bu̱ bi̱ nikháñun. Mú Dios táʼndoo gajkhun rí Abrahán maxíyáa Isaac; niʼni rí mbáa mugu̱ mambraʼaminaʼ náa xtáʼdu̱u̱ iná dí rígá mijngii ikhí ma̱ngaa niʼthúu̱n Abrahán rí maxnáxi̱i̱ ikhaa xóo tsigijñaʼ raʼkháa Isaac.

Génesis 21:1-7; 22:1-18.