Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Libro ndrígóʼ náa na̱ʼkha̱ raʼthí ga̱jma̱a̱ numuu Biblia

 HISTORIA 6

Mbáa ada̱ májánʼ, ga̱jma̱a̱ mbáa bi̱ mixkawiʼ a̱jkiu̱u̱n

Mbáa ada̱ májánʼ, ga̱jma̱a̱ mbáa bi̱ mixkawiʼ a̱jkiu̱u̱n

RÍ XÚGI̱ atayáá Caín ga̱jma̱a̱ Abel. Nájmii̱n niʼni guanii. Caín nañajunʼ náa ku̱ba̱ʼ. Ikhaa naʼdu tsígáʼ, xndú taun ga̱jma̱a̱ mbaʼa enii ya̱ʼu̱.

Abel gíʼdiin mugu̱. Ikhaa nanigu̱ʼ mañewu̱u̱n e̱jín múgú. Mugu̱ bugi̱ naganun naguanu naʼni mbaʼwi̱i̱n, nacha̱ má Abel gíʼdiin mbaʼin mugu̱ mu mañewu̱u̱n.

Mbá mbiʼi Caín ga̱jma̱a̱ Abel nigún ku̱ñu̱u̱n tsigijñaʼ náa inuu Dios. Caín ni̱jkha̱ kagu̱u̱ ganitsu rí ikhaa má eʼdu. Ga̱jma̱a̱ Abel niraʼwíín mugiu̱u̱ bi̱ itháan míjínʼ mu maʼga̱ kagu̱u̱n. Jeobá nanigu̱ʼ kaʼyoo Abel ga̱jma̱a̱ tsigijñaʼ ndrígóo. Mú tsénigu̱ʼ kaʼyoo Caín ga̱jma̱a̱ tsigijñaʼ ndrígóo. Lá natayáá náa numuu ráʼ.

Raʼkháa i̱ndó tsigijñaʼ ndrígóo Abel itháan májánʼ ki rí xóo Caín. Rí phú numuu rí Abel májánʼ a̱jkiu̱u̱n. Nandoo kaʼyoo Jeobá ga̱jma̱a̱ ndxájuu. Mú Caín ra̱májánʼ a̱jkiu̱u̱n; tsíyoo kaʼyoo ndxájuu.

Ikha jngó Dios naʼthúu̱n Caín rí gíʼmaa mariʼkuminaʼ. Mú Caín táʼnimbo̱o̱. Ra̱ʼkhá tháán kiʼnáa numuu rí Dios nandoo kaʼyoo itháan Abel. Caín naʼthúu̱n Abel: ‹Guʼgua̱ xanáá›. Ikhí, índo̱ rí kúwi̱i̱n ndajkúun, Caín naxnúu ndxájuu. Naxnúu gakhi̱i̱ wéñuʼ rí asndu naxiyáa. Lá raʼkháa mixkawiʼ wéñuʼ rí niʼni Caín tayaa ikháánʼ ráʼ.

Maski ajndu Abel nikháñu, Dios narmáʼáan a̱jkiu̱u̱n kaʼyoo. Abel ninindxu̱u̱ májánʼ a̱jkiu̱u̱n, nimbá miʼtsú tsémbrumuu kaʼñúún Jeobá bi̱ ni̱ndxu̱ún xúʼko̱ kaʼnii. Ikha jngó Jeobá Dios maʼni rí Abel matuxi̱i̱. Mbiʼi rúʼko̱ Abel ní xákhañuu kayuʼ. Ma̱ndoo maxtáa kámuu gi̱jyooʼ náa tsu̱du̱u̱ Ku̱ba̱ʼ. Lá raʼkháa májánʼ gáʼni rí muniʼnúnʼ xa̱bu̱ xóo ikhaa xáʼ.

Mú Dios tsénigu̱ʼ kaʼñúún xa̱bu̱ xóo Caín. Ikha jngó, nda̱wa̱á rí Caín nixíyáa ndxájuu, Dios niʼni rí mamínuʼ ikha jngó nikuʼmaa maʼga̱ mitsinguánʼ náa nánguá kúwi̱i̱n a̱ngui̱i̱n. Índo̱ rí Caín ni̱jkha̱ gáxtáa i̱mba̱ níʼkhá Ku̱ba̱ʼ, ni̱jkha̱ kayáa mbáa ndxájuu a̱ʼgu̱, ikhaa ni̱jkha̱nú niʼni a̱ʼgiu̱u̱.

Nda̱wa̱á Caín ga̱jma̱a̱ a̱ʼgiu̱u̱ nigi̱ʼdi̱i̱ niguáʼdiin e̱ji̱n. Eʼwíínʼ jiama ga̱jma̱a̱ waʼxaʼ e̱ji̱i̱n Adán ga̱jma̱a̱ Eva nidamijná ma̱ngoo niguáʼdiin e̱jñún. Nacha̱ nikúwi̱i̱n mbaʼin xa̱bu̱ náa tsu̱du̱u̱ Ku̱ba̱ʼ. Guniʼnuunʼ tikhun dí ikhiin.

Génesis 4:2-26; 1 Juan 3:11, 12; Juan 11:25.