Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Gusngún e̱jña̱la

 KÍXNUU 3

Rahab niku̱mu̱u̱ kaʼyoo Jeobá

Rahab niku̱mu̱u̱ kaʼyoo Jeobá

Lá nandaʼ ma̱ta̱ya̱a̱ rí nirígá wajyúúʼ ráʼ. Atatsaʼwáminaʼ rí na̱jkua̱ náa xuajin Jericó, náa ku̱ba̱ʼ rí kaʼyoo xuajin Canaán. Náa xuajin rúʼko̱ nimbáa xa̱bu̱ tsíku̱mu̱u̱ kaʼyoo Jeobá. Mú xtáa mbáa a̱ʼgu̱ bi̱ naku̱mu̱u̱ kaʼyoo. Ikhaa mbiʼyuu Rahab.

Asndu nákha chíʼgíʼ Rahab, mbaʼa dí niʼdxuun ga̱jma̱a̱ numuu Jeobá. Niʼdxuun xú káʼnii nimbáyúu xuajñu Israel mu muxmijná gajmiún xa̱bu̱ bi̱ nakiʼníin kuñún. Muʼgíiʼ mbá xkri̱da, Jeobá nijmiuu Moisés mu maguwíin xa̱bu̱ israelita náa xuajin Egipto. ¡Asndu nimbáʼtoo tapo̱o̱ lamáa Maña̱ʼ mu ma̱ndoo makidiin xa̱bi̱i̱ ikhí! ¡Rí xúgi̱ Rahab naʼdxun rí israelita kuwa mijngii náa xuajin Jericó!

Rahab nimbáñun xa̱bu̱ bi̱ niyama numuu rí niku̱mu̱u̱ kaʼyoo Jeobá

Mbóo wakhíʼ, a̱jmi̱i̱n xa̱bu̱ israelita nitu̱ʼu̱u̱n guyama náa xuajin Jericó. Niguánu náa goʼwóo Rahab, ga̱jma̱a̱ ikhaa niʼthúún rí ma̱ndoo maguanún ikhí. Wakhíʼ rúʼko̱, rey bi̱ xtáa náa xuajin Jericó niʼdxuun rí niguwáʼ xa̱bu̱ guyama ga̱jma̱a rí kuwa náa goʼwóo Rahab. Ikha jngó nikunguinʼ xa̱bi̱i̱ mu magún gúñiinʼ. Ndiéjunʼ niʼni Rahab rá. Nirkaʼwiin náa tsu̱du̱u̱ goʼwóo ga̱jma̱a̱ niʼthúún xa̱bi̱i̱ rey: “Nigúu̱n má xa̱bu̱ bi̱ niguwáʼ guyama. Mú á mu najkua ruxkún, maʼngalaʼ muxkamiin”. ¡Xúʼko̱ Rahab niñe̱wu̱u̱n xa̱bu̱ israelita! Lá manigua̱ʼ ma̱ta̱ya̱a̱ náa numuu rí nimbáñun xáʼ... Numuu rí ikhaa naʼnimbo̱o̱ kaʼyoo Jeobá. Ndaʼyoo rí ikhaa mambáñun xa̱bu̱ israelita matu̱ʼu̱u̱n náa xuajin Jericó ga̱jma̱a̱ náa mbayuʼ Canaán.

Nákha xóó tsigájni̱i̱n náa goʼwóo Rahab, xa̱bu̱ bi̱ nuyama nithi rí índo̱ Dios gáʼni gámbáa xuajin Jericó, ikhaa gajmíi̱n bi̱ kaʼñúún makáwíin. Mú á mu nandoo Rahab makríyaʼ rígá mbá rí eyóoʼ maʼni. Ndiéjunʼ nindxu̱u̱ rúʼko̱ rá... Xa̱bu̱ bi̱ nuyama nitháán: “Gíʼmaa matrajkhá ñuu maña̱ʼ náa ventana ga̱jma̱a̱ atagímbíin xúgínʼ bi̱ xtañún náa guʼwáa”. Rahab niʼni xó má nitháán xa̱bu̱ bi̱ nuyama. Lá nandaʼ matha̱nʼ ndiéjunʼ nirígá nda̱wa̱á ráʼ...

Jeobá niʼnikríyaʼ Rahab ga̱jma̱a̱ xúgínʼ bi̱ kaʼñúún

Nguáthá mbiʼi nda̱wa̱á, xa̱bu̱ israelita nagún tua̱ʼa̱n mbaʼa nuthu náa xuajin Jericó. Mbá majun mbiʼi rí nigún mbájndi xuajin, mbá miʼtsú rí mbá mbiʼi, ga̱jma̱a̱ túndxa̱ʼwa̱ kañúnʼ, mbóó wíí kri̱ga̱ egún. Mú índo̱ maʼni juwan mbiʼi nagún tua̱ʼa̱n mbá juwan nuthu, ga̱jma̱a̱ ikhú nindxa̱ʼwa̱ gakhi̱i̱ wéñuʼ. Mbá nacha̱á nirígá mbá rí taku̱mún marigá: ¡Jeobá niʼni rí majngudiri̱ga̱a̱ xtátsí rí naruguamúʼúun  xuajin Jericó! Mú, ndiéjunʼ nigíʼnuu goʼwóo Rahab rá. Nda̱a̱ rí nigíʼnuu numuu rí wrajka mbá ñuu maña̱ʼ náa ventana. Natayáá ñuu náa xtiʼkhu ráʼ... ¡Xúʼko̱ nikríyaʼ Rahab gajmíi̱n bi̱ kaʼñúún!

Nitayáá dí Rahab nikríyaʼ numuu rí niʼnimbo̱o̱ rí niʼthúu̱n Jeobá ráʼ... Ikhaa ndaʼyoo má rí Dios má gañe̱wu̱u̱n, ikha jngó niku̱mu̱u̱ kaʼyoo. Índo̱ nitháán xúgíʼ rí Dios niʼni, ikhaa nijmañuu maku̱mu̱u̱ kaʼyoo Jeobá. Ikháánʼ mangáán mbaʼa rí xtaa rajmañaʼ ga̱jma̱a̱ numuu ikhaa. Lá matanimbaʼ rí eʼtháanʼ Jeobá xó má rí niʼni Rahab ráʼ... ¡Xúʼko̱!

GURAXNUU NÁA BIBLIA:

  • Josué 2:1-24; 6:1-5, 14, 15, 20-25

  • Hebreos 11:31