Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Najuixtiʼña̱a̱ 10 graxe̱ rí nuni jiáma jma̱a̱ wa̱ʼxa̱ʼ

 GRAXE 8

Xú káʼnii eni bi̱ nutsijmin eʼwíínʼ rá.

Xú káʼnii eni bi̱ nutsijmin eʼwíínʼ rá.

NDÍJKHA GÍʼDOO NUMUU

Mámbá tsiguʼ mbaʼin wéñuʼ xa̱bu̱, mu itháan jiáma ga̱jma̱a̱ wa̱ʼxa̱ʼ, bi̱ nutsijmin, nuniu̱u̱n ga̱jma̱a̱ tsiakii mu mubu̱nʼ gajmiún. *

NDIÉJUNʼ GÁTANI IKHÁÁNʼ RÁ.

Bi̱ niʼni gínáa Annette nidaaʼ mbayííʼ rí asndu ikhaa má táʼyoo ndiéjunʼ rí xtáa rarígá. Annette naʼthí: “Nini xúgíʼ asndu xó má eʼngoʼ, nigíʼ mandxa̱ʼwa̱ mú tagajnuu aʼwóoʼ. Nikudínguanʼ, nijngapráʼaa, ni̱xnu̱u̱ ga̱jma̱a̱ nixijtíi... asndu índo̱ niʼni gawúunʼ ga̱jma̱a̱ mbá chílú. Ikhú, na̱nguá ndi̱yo̱o̱ rí mani ga̱jma̱a̱ nánguá niʼngo̱ʼ mambáyuminaʼ itháan”.

Ndiéjunʼ gátani ikháánʼ á mu natagíʼnii xúʼko̱ kaʼnii rá.

ATATSAʼWÁMINAʼ MBÉGU̱ʼ

Maski ajndu matiewumínaʼ, mbá xkri̱da, índo̱ gagajnáʼ mbruʼun, ma̱ndoo matagíʼniin dí ra̱májánʼ. Náa Biblia naʼthí rí nguáná bi̱ nagañún itháan nacha̱ tséʼngu̱u̱n gúdaaʼ ga̱jma̱a̱ bi̱ najmañún wéñuʼ raʼkháa xúgíʼ rí nuni nagájnuu májánʼ, “numuu rí na̱jkha̱nú mbiʼi ga̱jma̱a̱ gamiéjunʼ rí na̱nguá kuaʼti̱i̱n naguaʼnii xúgiáanʼ” (Eclesiastés 9:11).

Bi̱ niʼni gínáa Annette, ninindxu̱u̱ mbáa bi̱ tsíniniiʼ. Nguáná ni̱ndxu̱ún xa̱bu̱ bi̱ kuwa mijngii o bi̱ kuñún. Noelia gíʼdoo gu̱wa̱ʼ tsiguʼ índo̱ mbáa dxámá bi̱ xtáa mijngii nitsíjmaa. Noelia naʼthí: “Nimíñuʼ wéñuʼ ga̱jma̱a̱ niti̱yu̱ʼ rí nákha ikhú táthúun nimbáa”.

 IKHÁÁNʼ NA̱NGUÁ XTAʼDÁÁ AʼKHÁNʼ

Annette xóó nagawúunʼ ga̱jma̱a̱ numuu rí nigíʼnuu. Ikhaa naʼthí: “Nángi eʼni naku̱ma̱ʼ rí nigíʼnuʼ mbruʼun rúʼko̱, ga̱jma̱a̱ nandxa̱ʼwa̱mínáʼ rí ndiyóoʼ mayambáminaʼ itháan májánʼ. Gajkhun má rí índo̱ niʼni gawúunʼ ga̱jma̱a̱ chílú na̱nguá ndi̱yo̱o̱ rí mani, mu natha má xúʼko̱ rí ndiyóoʼ mani itháan”.

Noelia ma̱ngaa nagawúunʼ ga̱jma̱a̱ rí nigíʼnuu. Ikhaa naʼthí: “Ndiyóoʼ mañewumínaʼ itháan. Anu̱ʼ i̱ndó nuniñuxuʼ mutsíin rexa̱a̱ á mu ikhúúnʼ ga̱jmu̱ʼ ndxájuʼ naguanúxuʼ mbóó, mú tánimbooʼ. Ikha jngó naku̱mu̱ʼ dí ramíʼskhoo niʼniuu xa̱bu̱ bi̱ xtáa mijngii náa kúwáanʼxu. Bi̱ kuwa náa goʼwóoʼ nimíniʼ wéñuʼ ga̱jma̱a̱ naku̱mu̱ʼ rí ikhúúnʼ gúʼdoo aʼkhúnʼ. Rúʼko̱ rí itháan nagawúunʼ”.

Á mu naku̱ma̱ʼ xóo Annette ga̱jma̱a̱ Noelia, xámbumaʼ rí xa̱bu̱ buʼko̱ nuni ga̱jma̱a̱ tsiakii. Tikhun nduyáá rí na̱nguá gíʼdoo numuu rígi̱ índo̱ nuthi rí ikhaa má ndiyáaʼ. Mú nimbáa na̱nguá kaʼyoo magíʼnuu xúʼko̱ kaʼnii. Á mu ikháánʼ nitsijmáán, ga̱ku̱ma̱ʼ rí ikháánʼ na̱nguá niraʼdáá aʼkhánʼ.

Ramíʼskhaa rí muʼthá, mú rí matatsimbaʼ nindxu̱u̱ mingíjyúuʼ. Tikhun tsethi rí nigíʼniin ga̱jma̱a̱ ndajkúun eraʼníí dí naʼni gawúunʼ o i̱ʼwáʼ rí nundxa̱ʼwa̱a̱ edxu̱ún. Mú tsáa embáyúu rí xárata, ikháánʼ o xa̱bu̱ bi̱ nitsíjmáán ráʼ. Lá tséku̱ma̱ʼ rí itháan májánʼ mataʼyááʼ rí mixtambáyaʼ ráʼ.

ARATHÁ RÍ NIRÍGÁ

Náa Biblia naʼthí, índo̱ nirígá wéñuʼ tsingíná, mbáa xa̱bu̱ jmbii bi̱ nigumbiʼyuu Job niʼthí: “Makiʼnún wéñuʼ índo̱ mata” (Job 10:1). Mbáa májánʼ á mu nathani xúʼko̱ kaʼnii. Rí maratha̱a̱n mbáa bi̱ nambáxa̱ʼ májánʼ ga̱jma̱ʼ ma̱ndoo mambáyaʼ ga̱jma̱a̱ rí nitagíʼnii ma̱ngaa mu maraxtaa itháan májánʼ.

Náa numuu rí tseratamíjná ga̱jma̱ʼ mbáa bi̱ ma̱ndoo mambáyaʼ rá. Rí gíwanʼ náa a̱jkia̱nʼ mani̱ndxu̱u̱ mba̱a̱ wéñuʼ á mu nada i̱ndó ikháánʼ.

Annette niʼni rúʼko̱ ga̱jma̱a̱ nimbáyúu. Ikhaa naʼthí: “Nitamíjná ga̱jmu̱ʼ mbáa bi̱ nambáxuʼ májánʼ ga̱jmu̱ʼ ga̱jma̱a̱ nimbáyuʼ mu mathu̱u̱n a̱ngiu̱lú bi̱ kuya̱ edxu̱u̱ náa congregación. Nadxuʼ rí nini xúʼko̱ kaʼnii. Nitamijná mbaʼa nuthu ga̱jma̱á ni̱ndxu̱ʼ ga̱jma̱a̱ nithu̱nʼ rí ndayóoʼ madxawun: Rí ikhúúnʼ na̱nguá nigúʼdoo aʼkhúnʼ nditháan”.

Noelia niʼthún anu̱u̱ rí nirígá. Ikhaa naʼthí: “Nimbayúúʼ wéñuʼ. Ma̱ngaa nixnuʼ tsiakii mu mata ga̱jma̱a̱ numuu rúʼko̱, ga̱jma̱a̱ rúʼko̱ nimbáyuʼ mu xákiʼnún ga̱jma̱a̱ xáxtáá gíná”.

Ma̱ngaa nimbáyúu wéñuʼ rí maʼtájkáan. Ikhaa naʼthí: “Rí matamíjná ga̱jmu̱ʼ Dios nimbáyuʼ wéñuʼ, itháan índo̱ niku̱mu̱ʼ rí xándoo mathu̱u̱n eʼwíínʼ ga̱jma̱a̱ numuu rí nigíʼnuʼ. Índo̱ natajkáan, nandoo na̱thu̱u̱n Dios xúgíʼ rí naku̱mu̱ʼ ga̱jma̱a̱ rúʼko̱ naʼni maxtáá tsímáá”.

Ikháánʼ mangáán ma̱ta̱ya̱a̱ dí rígá mbiʼi ‹rí maʼninʼ› (Eclesiastés 3:3). Atiewumínaʼ mu xáʼniaʼ nandii ga̱jma̱a̱ mu xaxmiéjuanʼ wéñuʼ ga̱jma̱a̱ ayáa xa̱ʼ. Mú itháan gíʼdoo numuu: Atayáaʼ Jeobá, Dios bi̱ naxnúlú tsiakii (2 Corintios 1:3, 4).

 LÁ XTAʼDÁÁ TSIGUAʼ MAGAJNÁʼ GA̱JMA̱ʼ MBÁA RÁʼ.

Á mu novio ndrígáʼ natsudáán mu matani mbá dí ra̱májánʼ, aratháán mbájmbu: “¡Xátani rúʼko̱!” o “¡Xataxkajmúún!”. Xatruguáá rawanʼ numuu rí namíñaʼ matanimbáti̱ga̱a̱. Á mu naniñaʼ nandoo gáʼthi rí na̱nguá gíʼdoo numuu. Ikháánʼ kaʼyaʼ mbáa bi̱ itháan májáánʼ: Mbáa bi̱ mbaʼyamajkuaʼ ga̱jma̱a̱ rí mbaʼyamajkuu rí naku̱ma̱ʼ.

LÁ NANDOO MABÓOʼ GA̱JMA̱Á NI̱NDXA̱ʼ XÁʼ.

“Índo̱ gúʼdoo gu̱wa̱ʼ i̱jtsu̱ o gu̱wa̱ʼ i̱jkhu̱ tsiguʼ, náa primaria jiáma nuxuma̱a̱ brasier ndrígóʼ ga̱jma̱a̱ nuthu̱nʼ ajngáa xkawiiʼ wéñuʼ. Nuthu̱nʼ rí ikhúúnʼ manigu̱ʼ á mu na̱bo̱ʼ gajmíi̱nʼ ikhiin” (Coretta).

Lá marata̱ rí jiáma bugi̱ kuwa...

  1. ... runi xiaʼwun ráʼ.

  2. ... rajñéʼgun ráʼ.

  3. ... raʼndúún mubúúnʼ gajmiún xáʼ.

“Náa autobús, mbáa dxámá nigíʼdu̱u̱ niʼthúnʼ ajngáa xkawiʼ ga̱jma̱a̱ nixkajmún. Ni̱xnu̱u̱ ñawúunʼ ga̱jma̱a̱ ni̱thu̱u̱n rí matsíngunʼ. Ndiʼyoʼ xóo mbáa bi̱ nakágunʼ” (Candice).

Lá marata̱ rí dxámá bugi̱ xtáa...

  1. ... raʼni xiaʼwun ráʼ.

  2. ... rajñéʼgúu ráʼ.

  3. ... randoo mabóoʼ ga̱jma̱a̱ xáʼ.

“Mbáa dxámá niʼthúnʼ má xúʼko̱ kañiʼ tsiguʼ rí naniguʼ eni ga̱jma̱a̱ rí nandoo magajnúu ga̱jma̱á ni̱ndxu̱ʼ. Ikhúúnʼ na̱thu̱u̱n má xúʼko̱ rí na̱nguá. Nguáná, naxkajma nawúnʼ. Na̱thu̱u̱n rí xáʼni mú ikhaa tséʼnimbo̱o̱. Mbá mbiʼi índo̱ xtáá raro̱ʼo̱o̱ raxtóoʼ, nixnúu ixtunʼ” (Bethany).

Lá marata̱ rí dxámá bugi̱ xtáa...

  1. ... raʼni xiaʼwun ráʼ.

  2. ... rajñéʼgúu ráʼ.

  3. ... randoo mabóoʼ ga̱jma̱a̱ xáʼ.

Nájtsu dí naxtiʼña̱a̱ nindxu̱u̱ letra C.

Xú káʼnii mixtiʼkhu nindxu̱u̱ ajngáa rí maʼndoo mabóoʼ ga̱jma̱a̱, rí majñéʼgúu ma̱ngaa rí maʼni xiaʼwun xá.

Rí mbáa maʼndoo mabóoʼ ga̱jma̱á ni̱ndxa̱ʼ, maʼniuu tsiánguá a̱jkia̱nʼ. Xkujndu rígi̱ na̱jkha̱ ragiʼi má xúʼko̱ maski ajndu maratha̱a̱n rí maniñuʼ raʼni xúʼko̱ kaʼnii.

Rígi̱ nindxu̱u̱ mitsáʼkháan wéñuʼ: Mbáa maʼga̱nú maʼniaʼ tsiakii mataba̱ʼ ga̱jma̱ʼ.

^ párr. 4 Maski ajndu ajngáa rígi̱ na̱jkha̱ náa inún wa̱ʼxa̱ʼ, mu xtágabu ma̱ngaa ma̱ndoo mambáñún jiáma.