Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Guni rí Dios ma̱ndoo kaʼyala

 CAPÍTULO 17

“Guguaʼdáá mba̱a̱ fe rí nindxu̱u̱ mikaʼwu”

“Guguaʼdáá mba̱a̱ fe rí nindxu̱u̱ mikaʼwu”

“Guguaʼdáá mba̱a̱ fe rí nindxu̱u̱ mikaʼwu, [...] guni má xúʼko̱ rí nandoo Dios mu ikhaa ma̱ndoo kaʼyalaʼ.” (JUDAS 20, 21.)

1, 2. Xú káʼnii nindxu̱u̱ ñajunʼ rí nuʼni ga̱jma̱a̱ ndíjkha rí gíʼdoo numuu muñewa̱a̱n mu magajnúu májánʼ rá.

IKHÁÁNʼ xtaʼdáá wéñuʼ ñajunʼ náa naguma mbá guʼwá mba̱a̱. Ra̱ʼkhá tháán mba̱yu̱ʼ má tiejunʼ ikhí ga̱jma̱a̱ xóó matiejunʼ mba̱yu̱ʼ. Ñajunʼ rígi̱ nindxu̱u̱ mingíjyúuʼ, mú naʼni maraxtaa tsímáá. Tséʼniuu má dí gárígá, ikháánʼ tséku̱ma̱ʼ matatsiʼñáánʼ ratiejunʼ ni má tsítani ga̱jma̱a̱ a̱jma̱ a̱jkia̱nʼ. Nandaʼ matani mbá ñajunʼ májánʼ, numuu rí ikhí maraxtaa nda̱wa̱á. Mú mbáa natraximínáʼ: “Xú káʼnii guʼwá eʼthá ga̱jma̱a̱ numuu rá.” Ga̱jma̱a̱ numaʼ ikháánʼ.

2 Discípulo Judas naʼthí ga̱jma̱a̱ numuu mbá ñajunʼ rí mámbáa má eʼni náa ikhaa. Guʼyáá texto náa naʼthúún cristianos muni “má xúʼko̱ rí nandoo Dios mu ikhaa ma̱ndoo” kaʼñún. Ikhí naʼthí rí mu maʼngu̱u̱n muni rígi̱, rígá mbá rí ndayóoʼ muni: “Guguaʼdáá mba̱a̱ fe rí nindxu̱u̱ mikaʼwu” (Judas 20, 21). Mú xú káʼnii gándoo muʼni rí fe ndrígúlú maʼni itháan gujkhuʼ mu Dios ma̱ndoo kaʼyulú má xúʼko̱ rá. Guʼyáá ajtsú enii ñajunʼ rí naʼni mambaxúlúʼ itháan gajmiúlú Dios.

GAKUMULÚ KUʼYÁÁ ITHÁAN IKHA RÍ JMBU NDRÍGÓO DIOS

3-5. a) Xú káʼnii minduwaʼ eyoo muʼnimbulúʼ Satanás ga̱jma̱a̱ numuu rí na̱nda̱ʼa̱ Jeobá rá. b) Atasngájma xú káʼnii gíʼmaa mbuʼyáá rí na̱nda̱ʼa̱ Dios ga̱jma̱a̱ xú káʼnii gakumulú á mu nduʼyáá xúʼko̱ kaʼnii.

3 Timbá ñajunʼ rí naʼni mambaxúlúʼ itháan gajmiúlú Dios  nindxu̱u̱ rí makumulúʼ kuʼyáá xtángoo ndrígóo Jeobá. Náa libro rígi̱ ndiʼyáálu mbaʼa rí na̱nda̱ʼa̱ Dios ga̱jma̱a̱ rí xú káʼnii gúʼni̱lu. Graxe̱ nindxu̱u̱: Mú xú káʼnii eʼyáá ikháanʼ rá. Satanás naniguuʼ makumulúʼ rí xtángoo ga̱jma̱a̱ ikha ndrígóo Jeobá tseniñulú muʼni rí nandulúʼ. Numuu rí ndiʼyoo rí tsáʼkhá rígi̱ nimbáyúu wéñuʼ náa ixi̱ ri̱ʼi̱ Edén, tséniñuuʼ rajmuu (Génesis 3:1-6). Mú, lá maʼni majpátriguáanʼ mangáanʼ ráʼ. Mambáyulúʼ wéñuʼ á mu nduʼyáá rí nindxu̱u̱ májánʼ rí na̱nda̱ʼa̱ Dios muʼni.

4 Guʼgíʼ mbá xkri̱da. Índo̱ kuwáanʼ rajkua náa mbá parque mitsaan, nartumulú náa mbá gúláa mitsidanʼ rí narikhulu mu xanújngulú náa rí itháan mitsaan. Timbá rí muʼni, makiʼnáanʼ numuu rí gúláa rígi̱ narikhulú mu manújngulú itháan ñuʼún. Mú índo̱ nuyexilú awúu̱n, nduʼyáá mbáa i̱ndi̱i̱ʼ bi̱ najmanguʼ wéñuʼ. Ah, rí xúgi̱ nakru̱ʼu̱lú náa numuu wíji̱ gúláa: Mu mañewu̱nlú. Mú guʼyáá rí xtáa rarígá xúgi̱. Lá xtáa mbáa bi̱ nandoo mikhulú ráʼ. Xúʼko̱, numuu rí Ajngá rawunʼ Dios naʼthí: “Gajmañala mundxaʼwáá májánʼ edxa̱la, gakuwáanʼ xawii. Gixa̱a̱ bi̱ sia̱nʼ gajmiála, jngruigo̱o̱ mbájndi xóo i̱ndi̱i̱ʼ bi̱ nandxaʼwá, bi̱ nda̱yáaʼ mikhu̱u̱ mbáa” (1 Pedro 5:8).

5 Gajkhun, Satanás nindxu̱u̱ mbáa bi̱ naʼni gíníi wéñuʼ xa̱bu̱. Ga̱jma̱a̱ mu xajngutíguáanʼ náa mbaʼa ‹tsáʼkhá› ndrígóo, Jeobá naxnúlú xtángoo rí mañewu̱nlú (Efesios 6:11). Ikha jngó, índo̱ gundxaʼwamíjna̱ ga̱jma̱a̱ numuu xtángoo, guʼnimi̱jna̱ mbuʼyáá xó má kaʼnii, xóo mbá náa nasngájma dí nandoo kaʼyulú Anu̱lú bi̱ xtáa mekhuíí. Índo̱ nduʼyáá xúʼko̱, nakru̱ʼu̱lú dí rígá mu mañewu̱nlú ga̱jma̱a̱ mu makuwáanʼ tsímáá. Ikha jngó discípulo Santiago niʼnirámáʼ rí “bi̱ ndaʼyoo tsumáá xtángoo rí jmbu náa xúgíʼ rí na̱ʼkha̱, náa na̱nguá kaxtuʼwájmáanʼ ga̱jma̱a̱ naʼnimbánuu, [...] maxtáa tsímáá” á mu naʼni (Santiago 1:25).

6. Xú káʼnii gándoo gakumulú kuʼyáá itháan xtángoo jmbu ga̱jma̱a̱ ikha ndrígóo Dios rá. Atagíʼ mbá xkri̱da.

6 Mbá rí xóo ma̱ndoo makumulúʼ kuʼyáá itháan xtángoo  ndrígóo Jeobá, bi̱ Naʼni itháan májánʼ Xtángoo, ga̱jma̱a̱ makumulúʼ kuʼyáá ikhaa, nindxu̱u̱ rí muʼnimbánii tsejtsí mbiʼi rí naʼtáñajunʼ. Rígi̱ nandoo gáʼthúu̱n rí matatsimbaʼ “xtángoo ndrígóo Cristo”, ma̱ngaa rí muʼnimbulúʼ rí niʼtáñajunʼ Jesús índo̱ niʼthí gunimbánii “xúgíʼ rí ikhúúnʼ nitañejuanla” (Gálatas 6:2; Mateo 28:19, 20). Bi̱ ni̱ndxu̱lú cristianos nduʼyáá rí gíʼdoo wéñuʼ numuu rí magimbáanʼ mu mbuʼyamajkuíí Dios ga̱jma̱a̱ rí mambaxúlúʼ májánʼ (Hebreos 10:24, 25). Imbo̱o̱ rí niʼtáñajunʼ Dios nindxu̱u̱ rí muʼtájkáan nángi eʼni ga̱jma̱a̱ xúgíʼ a̱jkiu̱lú (Mateo 6:5-8; 1 Tesalonicenses 5:17). Índo̱ nuʼnimbulúʼ rígi̱, na̱jkua̱nú nduʼyáá rí nindxu̱u̱ itháan májánʼ wéñuʼ. Naʼni makuwáanʼ itháan gagi ga̱jma̱a̱ tsímáá rí náa numbaaʼ xándoo maxnúlúʼ. Nakumulú kuʼyáá itháan xtángoo ndrígóo Dios índo̱ nundxa̱ʼwa̱míjna̱ rí nambáyulúʼ índo̱ nuʼnimbulúʼ.

7, 8. Xú káʼnii eʼni Ajngá rawunʼ Dios maʼni̱i̱ a̱jkiu̱ún bi̱ namiñun rí xáguajun jmbu índo̱ ganújngoo mba̱yu̱ʼ tsiguʼ rá.

7 Nguáná tikhun naxmiéjúnʼ numuu rí nakumu̱ún rí maʼniún mingíjyúuʼ munimbu̱ún xúgíʼ tsiguʼ xtángoo ndrígóo Jeobá, ga̱jma̱a̱ namiñun makiéʼkhun. Á mu xúʼko̱ kumulú, garmáʼáan a̱jkiu̱lú ajngáa rígi̱: “Ikhúúnʼ, Jeobá,  ni̱ndxu̱ʼ Dios ndrígáʼ, bi̱ naʼsngáaʼ xú káʼnii mambáyaʼ [...], bi̱ naʼtháanʼ náa kamba̱a̱ gíʼmaa majngruigaʼ. ¡I̱ndó á mu natagíiʼ edxa̱ʼ náa rí natañájunʼ! Ikhú maraxtaa tsímáá xóo mbá mañu, ga̱jma̱a̱ jmbu rí natani mani̱ndxu̱u̱ xóo olas ndrígóo lamáa” (Isaías 48:17, 18). Lá ni̱jkuánú nindxa̱ʼwa̱míjna̱ rí naʼni maʼni̱i̱ a̱jkiu̱lú texto rígi̱ ráʼ.

8 Gi̱jyooʼ Jeobá nakudaminaʼ rí á mu nuʼnimbulúʼ, marigá a̱jma̱ rí mambáyulúʼ. Timbá, rí makuwáanʼ tsímáá maʼni xóo mbá mañu: Na̱jkha̱ mañúú, mba̱ji̱nʼ ga̱jma̱a̱ na̱jkha̱ má xúʼko̱. Raga̱jma̱, dí jmbu rí guʼni mani̱ndxu̱u̱ xóo olas ndrígóo lamáa. Xú káʼnii nindxu̱u̱ rá. Á mu nduʼyáá má xúʼko̱ xóo e̱ʼkha̱ olas asndu náa rawuunʼ lamáa, naʼni mundxaʼwáá edxu̱lúʼ rí tséʼniuu má nguáthá tsiguʼ ganújngoo mambuxu̱u̱ má xúʼko̱ olas. Náa texto rígi̱ nasngájma dí jmbu rí nuʼnilú ma̱ndoo mbajyúuʼ xó má eʼni olas. Á mu nuʼnimi̱jna̱ manindxu̱lúʼ jmbii náa Dios, ikhaa xániñuʼ majngutíguáanʼ (atraxnuu Salmo 55:22). Gajkhun, índo̱ nuraxnuu mbu̱júu̱ rí ekudaminaʼ maʼni Jeobá naʼni makumulúʼ kuʼyáá itháan ga̱jma̱a̱ rí na̱nda̱ʼa̱ muʼni nindxu̱u̱ jmbu.

“GAJMAÑULÚ ITHÁAN”

9, 10. a) Náa numuu rí xúgiáanʼ ma̱ndoo muʼgíʼ manindxu̱lúʼ cristiano bi̱ nandxa̱ʼóo májánʼ edxu̱u̱ rá. b) Xú káʼnii eyambáá makuwáanʼ gagi á mu nuʼni itháan májánʼ ñajunʼ Dios rá.

9 Raga̱jma̱ enii ñajunʼ rí muʼni mú mambáxulúʼ itháan gajmiúlú Dios najuiʼthá náa ajngáa rígi̱: “Gajmañulú itháan” (Hebreos 6:1). Rí mbiʼi xúgi̱ xáʼngo̱o̱ muxkamaa rí manindxu̱lúʼ xa̱bu̱ jmbii, rí mundxaʼwamíjna̱ májánʼ nindxu̱u̱ rí ma̱ndoo muʼni xúgiáanʼ. Ga̱jma̱a̱ índo̱ gúʼgua̱ rundxaʼwáá itháan májánʼ edxu̱lúʼ, itháan gakuwáanʼ tsímáá rí muʼni ñajunʼ Jeobá. Náa numuu rá.

10 Cristiano bi̱ nandxa̱ʼóo májánʼ edxu̱u̱ naʼniminaʼ maʼni itháan májánʼ ñajunʼ Dios ga̱jma̱a̱ mbaʼyoo xóo eʼyoo Jeobá (Juan 4:23). Pablo niʼthí dí “numuu rí bi̱ kuwa ga̱jma̱a̱  numuu xuwiʼ i̱ndó nundxa̱ʼwa̱míjna̱ ga̱jma̱a̱ numuu xuwiʼ, mú bi̱ nakuwa xó má espíritu, nuni xó má eyoo espíritu” (Romanos 8:5). Bi̱ nundxa̱ʼwa̱míjna̱ xóo xa̱bu̱ numbaaʼ, xándoo makuwá gagi numuu rí i̱ndó nundxa̱ʼwa̱míjna̱ ga̱jma̱a̱ numún ikhiin, tséyáá xóo gíʼmaa ga̱jma̱a̱ nandún muguaʼdáá wéñuʼ. Mú xa̱bu̱ bi̱ nuni itháan májánʼ ñajunʼ Dios nakuwa tsímáá, numuu xúgíʼ rí nuni, nuni ga̱jma̱a̱ numuu Jeobá, ‹bi̱ nindxu̱u̱ mbáa Dios gagi› (1 Timoteo 1:11). Nandún muni rí nandoo ikhaa ga̱jma̱a̱ nakuwa gagi índo̱ naguáʼdáá xkujndu ga̱jma̱a̱ numuu fe ndrígu̱ún. Xú káʼnii erígá rígi̱ rá. Numuu rí nduyáá xí mu naguáju̱n jmbu musngajma rí Satanás naʼninduwaʼ ga̱jma̱a̱ muni maxtáa gagi Anu̱lú mekhuíí (Proverbios 27:11; atraxnuu Santiago 1:2, 3).

11, 12. a) Arathá rí niʼthí muʼni Pablo mu “majmañulúʼ mundxaʼwáá májánʼ edxu̱lúʼ”, ga̱jma̱a̱ ndiéjunʼ eyoo gáʼthúu̱n ajngáa ‹muʼniratáá› rá. b) Xú káʼnii gíʼmaa magumaratáá mu majmañuu maʼbañiminaʼ itháan májánʼ mbáa rá.

11 Á mu nuʼni má xúʼko̱ ñajunʼ Dios, muʼni itháan májánʼ ñajunʼ ikhaa. Xúʼko̱ esngájma náa versículo rígi̱: “Mú ganitsu gujkhuʼ kaʼñún xa̱bu̱ wanuu, bi̱ najmañún mundxa̱ʼwa̱a̱ májánʼ edxu̱ún mu muraʼwíí rí májánʼ ga̱jma̱a̱ dí ra̱májánʼ” (Hebreos 5:14). Pablo niʼthí rí mu majmañulúʼ mundxaʼwáá májánʼ edxu̱lúʼ, ndayóoʼ ‹muʼniratáá›. Ga̱jma̱a̱ najmuu mbá ajngáa griego rí nijmaʼnuʼ nákha siglo timbá náa gimnasios ndrígóo Grecia, rí phú nandoo gáʼthúu̱n “nuniratamijná xóo mbá gimnasta”. Guʼyáá xúgi̱ rí eyóoʼ mu muniratamijná.

Gimnasta ndayóoʼ maʼnirataminaʼ

12 Nimbáa tsíjma̱ñuu maʼba̱a̱n xuyuʼ índo̱ nagumaa. E̱ji̱n majkhinʼ tsíjmañún majmúún ñawúunʼ ga̱jma̱a̱ asndu nuxnáá inún, ga̱jma̱a̱ ikhú nakiʼníin ma̱ngaa naʼniún tsiánguá. Mú mañúú mañúú, índo̱ najmún má xúʼko̱ ñawúunʼ ga̱jma̱a̱ rajkúún najmún itháan májánʼ: Ginii nuxmajtamijná, nda̱wa̱á nagún chíjtaa nda̱wa̱á kayuʼ asndu nagáñun. Rí naʼngo̱o̱ naʼni mbáa xa̱bu̱ nakujmaa náa mbáa gimnasta.  Índo̱ nduʼñún rí asndu mitsaan enguxi̱i̱n náa inuu giñánʼ, nduʼyáá májánʼ rí ndiyóoʼ mba̱yu̱ʼ mbiʼi mu majmañún muba̱a̱n májánʼ xuñúnʼ. Mú rúʼko̱ tákumu̱u̱ ikháá: Ndiyóoʼ muniratamijná mba̱yu̱ʼ mbiʼi. Náa Biblia naʼthí rí mataniratáá xuyaʼ mayambáá mu ‹maraxtaa májánʼ›, maski ajndu naʼthí rí itháan nayambáá rí mbuʼyáá xú káʼnii muʼni itháan májánʼ ñajunʼ Dios (1 Timoteo 4:8).

13. Xú káʼnii gándoo gajmañulú muʼniratáá májánʼ edxu̱lúʼ rá.

13 Náa libro rígi̱ nijmañulúʼ mbaʼa enii rí nambáyulúʼ majmañulúʼ muraʼwíí mu manindxu̱lúʼ xa̱bu̱ bi̱ naʼni itháan májánʼ ñajunʼ Dios ga̱jma̱a̱ rí muguajún jmbu náa Jeobá. Mámbá mbiʼi dí xóó tsíraʼwíí rí muʼni, guʼtájkáan mu mbuʼyáá xú káʼnii nindxu̱u̱ ikha ga̱jma̱a̱ xtángoo ndrígóo Dios. Guraximíjna̱: “Xú káʼnii xtángoo ga̱jma̱a̱ ikha ndrígóo Biblia kagujtuminaʼ ga̱jma̱a̱ rígi̱ rá. Xú káʼnii gándoo gájmuʼ rá. Lá maniguuʼ Anu̱ʼ bi̱ xtáa mekhuíí rí nandxa̱ʼo̱o̱ edxu̱ʼ mani ráʼ.” (Atraxnuu Proverbios 3:5, 6; Santiago 1:5.) Á mu naguʼwunlú nuraximíjna̱ xúgi̱ kaʼnii, majmañulúʼ muʼniratáá rí mundxaʼwáá edxu̱lúʼ. Xúʼko̱ gáʼni rí muʼni itháan májánʼ ñajunʼ Dios.

14. Mú mundxaʼwáá májánʼ edxu̱lúʼ, ndiéjunʼ rí gíʼmaa muʼni ga̱jma̱a̱ dí ragíʼmaa muʼni rá.

14 Maski ajndu nundxa̱ʼwáá májánʼ edxu̱lúʼ, ndayóoʼ muʼni xóó itháan. Mú xáguanúlú, ndayóoʼ muñewa̱a̱n rí naphulú. Ndiʼyáá má rí Pablo niʼthí: “Mú ganitsu gujkhuʼ kaʼñún xa̱bu̱ wanuu”. Ikha jngó mu fe maʼni itháan gujkhuʼ gíʼmaa mu̱ʼphu̱ májánʼ xúgíʼ ganitsu rí na̱ʼkha̱ náa Dios.  Ma̱ngaa, gíʼmaa maʼndulú majmañulúʼ itháan, xóo muʼthá, muʼgíʼ muʼni rí nduʼyáálu. Ga̱jma̱a̱ rúʼko̱ gíʼdoo wéñuʼ numuu, xó má eʼsngáa náa Biblia, ‹rí majmañulúʼ gíʼdoo itháan numuu›. Ikha jngó gaʼndulúʼ majmañulúʼ rí mitsaan dí naʼsngúlúʼ Anu̱lú (Proverbios 4:5-7; 1 Pedro 2:2). Mú, maski ajndu kuaʼdáá wéñuʼ ku̱ma̱ ga̱jma̱a̱ najmañulúʼ wéñuʼ, nda̱a̱ numuu muʼni mbaʼumíjna̱lú náa inún eʼwíínʼ. Gíʼmaa mbuʼyáá xúgíʼ mbiʼi á mu a̱jkiu̱lú tseʼnimbamínaʼ o i̱ʼwáʼ rí naʼni gachúu. Ikha jngó Pablo naʼthí: ‹Guyajmamijná mu mbuʼyáá á mu kuaʼdáá fe› ga̱jma̱a̱ “gusngajmá má xúʼko̱ rí xú káʼnii ni̱n[dxu̱lú]” (2 Corintios 13:5).

15. Ndíjkha rí gíʼdoo wéñuʼ numuu muguaʼdáá ngajua mu muʼni itháan májánʼ ñajunʼ Dios rá.

15 Índo̱ naguáxi mbá guʼwá, ndayóoʼ maguma májáánʼ ga̱jma̱a̱ maguma̱a̱ itháan mba̱a̱ á mu ndayóoʼ. Xúʼko̱ má rígá ga̱jma̱a̱ rí muʼni ñajunʼ Dios. Ndiéjunʼ eyóoʼ mu muñewa̱a̱n ga̱jma̱a̱ mbaja̱a̱ rá. Itháan ndayóoʼ rí muguaʼdáá ngajua. Rí maʼndulú kuʼyáá itháan Jeobá ga̱jma̱a̱ maʼndulú kuʼñúún itháan a̱ngiu̱lú mámbá mbiʼi. Á mu na̱nguá kumulú rígi̱, xúgíʼ ku̱ma̱ ndrígúlú ga̱jma̱a̱ rí nuʼni mani̱ndxu̱u̱ ndíí (1 Corintios 13:1-3). Xúʼko̱ kaʼnii, ngajua gíʼdoo wéñuʼ numuu mu mundxaʼwáá májánʼ edxu̱lúʼ ga̱jma̱a̱ muʼni itháan májánʼ ñajuunʼ Dios.

GUYEXI MÁ XÚʼKO̱ NÁA RÍ KUAʼTI̱I̱N MAXNÁ JEOBÁ

16. Ndiéjunʼ ejmañuu maʼni Satanás, ga̱jma̱a̱ xú káʼnii eñewunlú Jeobá rá.

16 Guʼyáá ragajtsú enii ñajunʼ rí muʼni mú mambáxulúʼ itháan gajmiúlú Dios. Mu manindxu̱lúʼ mbáa cristiano májáánʼ, gíʼmaa muñewa̱a̱n rí xóo e̱ndxa̱ʼwáá edxu̱lúʼ. Satanás, Xa̱bu̱ Ñajunʼ náa numbaaʼ rígi̱, najmañuu wéñuʼ maʼni rí xa̱bu̱ mundxaʼwamíjna̱ rí xájmiin muni nditháan, rí xúnimbu̱ún ga̱jma̱a̱ rí xáʼngo̱o̱ a̱jkiu̱ún (Efesios 2:2). Ga̱jma̱a̱ rúʼko̱ nindxu̱u̱ migamíi wéñuʼ náa ikháanʼ  xóo xujkhúʼ bi̱ naʼphu̱ ixi̱ náa mbá guʼwá rí niguma ga̱jma̱a̱ ixi̱. Mú núma̱a̱ Jeobá, rígá rí mañewu̱nlú: Rí kuaʼti̱i̱n marigá nda̱wa̱á.

17. Xú káʼnii xkri̱da ejmaa náa Biblia mu mbuʼyáá rí gíʼdoo wéñuʼ numuu rí kuaʼti̱i̱n nda̱wa̱á rá.

17 Náa Biblia naʼthí rí kuaʼti̱i̱n makáwáanʼ nda̱wa̱á nañewu̱nlú mu maʼngulú muʼni gaʼduunʼ tsáʼkhá ndrígóo Satanás ga̱jma̱a̱ numbaaʼ ndrígóo. Rígi̱ nambriguii ga̱jma̱a̱ yelmo, o casco, rí na̱ʼkha̱ náa mbá armadura (1 Tesalonicenses 5:8). Soldado bi̱ xtáa nákha wajyúúʼ najmuu mbá casco ajua̱nʼ, rí grigu tsu̱du̱u̱ mbá gorro rí ki̱ʼni̱ ga̱jma̱a̱ xtá, mu índo̱ gúxnún xágawúunʼ wéñuʼ; ndaʼyoo rí á mu tséjmuu índo̱ na̱jkha̱ gaxmínaʼ xáxtáa mba̱yu̱ʼ. Xó má ajua̱nʼ rígi̱ nañewu̱u̱n edxu̱u̱, xúʼko̱ má rí muguaʼthi̱i̱n nda̱wa̱á mañewu̱u̱n rí nundxa̱ʼwáá edxu̱lúʼ.

18, 19. Xú káʼnii nisngájma Jesús rí eyoo gáʼthúu̱n rí muguaʼthi̱i̱n nda̱wa̱á, ga̱jma̱a̱ xú káʼnii gándoo guʼyaridáá xá.

18 Jesús nisngájma kaʼwu rí eyoo gáʼthúu̱n rí muguaʼthi̱i̱n nda̱wa̱á. Garmáʼáan a̱jkiu̱lú xúgíʼ rí nimínuuʼ iwáá mbruʼun rí nixtáa náa tsu̱du̱u̱ Ku̱ba̱ʼ. Mbáa bi̱ nambáxu̱u̱ májánʼ nigujua̱a̱. Imba̱a̱ niʼthí rí tsíniniiʼ. Ga̱jma̱a̱ eʼwíínʼ niniñaaʼ ma̱ngaa nigáñún. Xa̱bu̱ xuajñu nikiʼníin kuyáá ga̱jma̱a̱ ninda̱ʼa̱ rí soldados romanos muxi̱ya̱a̱. Nduʼyáá májánʼ rí ikhaa niraʼnuu xkujndu itháan gakhi̱i̱ ki xóo rí muraʼníí ikháanʼ. Ndiéjunʼ nimbáyúu mu maʼngo̱o̱ xá. Hebreos 12:2 nariʼña̱a̱: “Ga̱jma̱a̱ gagi rí nigiʼdoo niʼngo̱o̱ náa ixi̱, ga̱jma̱a̱ tatiyuʼ, ga̱jma̱a̱ nigi̱ʼi̱ náa ñawun mújúnʼ náa trono ndrígóo Dios”. Xó má eʼyáá nimbá míʼtsú tandati̱go̱o̱ “gagi rí nigiʼdoo”.

19 Mú ndiéjunʼ ninindxu̱u̱ gagi rúʼko̱ rá. Índo̱ ndiʼyoo ndiéjunʼ gárígá á mu nawi̱ji̱ jmbu, ndiʼyoo rí mayambáá mu maguma kaʼwi̱i̱ mbiʼyuu Dios ga̱jma̱a̱ masngájma májánʼ wéñuʼ rí Satanás nindxu̱u̱ minduwaaʼ. ¡Na̱nguá nirígá imbo̱o̱ rí maʼni maxtáa gagi wéñuʼ Jesús! Ma̱ngaa ndiʼyoo rí  imbá chíʼgíʼ Anu̱u̱ bi̱ xtáa mekhuíí maʼni tsajkurámaaʼ wéñuʼ ma̱ngaa rí maxtáa ga̱jma̱a̱ mbu̱júu̱. Índo̱ nigíʼnuu dí phú gakhi̱i̱, Jesús tániñuʼ randxa̱ʼóo edxu̱u̱ rí makhánúu nda̱wa̱á. Ga̱jma̱a̱ mangáanʼ gíʼmaa muʼni rúʼko̱. Nditháan xandátigulú gagi xó má niʼni Jesús, rí Jeobá naʼthí maxnúlúʼ. Ikhaa naxnúlú mbá ñajunʼ dí rakáʼyulú mu muyambáá maguma kaʼwi̱i̱ mbiʼyuu ga̱jma̱a̱ musngajmá rí Satanás naʼni nduwaʼ. Xú káʼnii gándoo gúʼni rá. Xúniʼñáʼ Anu̱lú bi̱ kaʼyoo maʼtáñajunʼ náa xúgíʼ tsu̱du̱u̱ numbaaʼ ga̱jma̱a̱ muniʼñáaʼ rí ikhaa maʼndoo kaʼyulú, tséʼniuu má asndu xú káʼnii xkujndu gúraʼníí.

20. Ndiéjunʼ gambáyulú mu mundxaʼwáá májánʼ edxu̱lúʼ rá.

20 Jeobá raʼkháa i̱ndó xtáa xawii mu maʼni tsajkurámáánʼ numuu rí naguajún jmbu, ikhaa nandoo maʼni (Isaías 30:18; atraxnuu Malaquías 3:10). Naniguuʼ wéñuʼ maxnún xa̱bi̱i̱ xúgíʼ rí nandún rí nindxu̱u̱ jmbu (Salmo 37:4). Ikha jngó, gundxaʼwamíjna̱ rí muguaʼthi̱i̱n nda̱wa̱á. Nditháan xákumulú rí xájmáanʼ muʼni nditháan, xúʼni̱ rí mitsaga ga̱jma̱a̱ xúʼni̱ rí nandoo numbaaʼ ndrígóo Satanás. Á mu nakumulú rí nuʼni xóo eni ikhiin, gunda̱ʼa̱a̱ Jeobá rí maxnúlúʼ “tsímáá rí [...] itháan gíʼdoo tsiakii”, rí mañewu̱u̱n a̱jkiu̱lú ga̱jma̱a̱ rí nundxa̱ʼwáá edxu̱lúʼ (Filipenses 4:6, 7).

21, 22. a) Ndiéjunʼ rí májánʼ guáʼthi̱i̱n bi̱ “ra̱ʼkhá tháán mbaʼin xa̱bu̱” rá. b) Ndiéjunʼ rí itháan gíʼdoo numuu xtaʼti̱i̱n ikháánʼ marigá nda̱wa̱á, ga̱jma̱a̱ ndiéjunʼ eyóoʼ mataʼgíiʼ matani rá.

 21 ¡Ra̱ʼkhá tháán mitsaan dí kuaʼti̱i̱n marigá nda̱wa̱á! Á mu ni̱ndxu̱lú bi̱ “ra̱ʼkhá tháán mbaʼin xa̱bu̱”, bi̱ makáwíin náa “majphú mba̱a̱ ga̱ʼkhu̱”, gundxaʼwamíjna̱ náa xúgíʼ rí kuaʼthi̱i̱nlú nda̱wa̱á (Revelación 7:9, 14). Naʼni mingíjyúuʼ mundxaʼwamíjna̱ xú káʼnii gakuwáanʼ tsímáá índo̱ ní xákuwáanʼ náa majñu̱ʼ Satanás gajmíi̱n xa̱bu̱ wéñiʼ. Xúgiáanʼ má nuraʼníí tsáʼkhá ndrígóo Gixa̱a̱. Índo̱ gándati̱ga̱a̱ xúgíʼ rí naʼni Satanás, ra̱ʼkhá tháán májánʼ rí muʼni̱i̱ mitsaan xúgíʼ Ku̱ba̱ʼ índo̱ gáxná ikha Cristo gajmíi̱n 144,000 bi̱ mutañajunʼ mekhuíí gajmíi̱n ikhaa. ¡Ra̱ʼkhá tháán eyulú mbuʼyáá rí ni xárígá nandii, rí mundríguíin a̱ngiu̱lú bi̱ nikháñun ga̱jma̱a̱ rí makuwáanʼ tsímáá xó má Dios nindoo asndu nákha ginii! Índo̱ ní xánindxu̱lú xa̱bu̱ aʼkhá, xájyúuʼ má Jeobá maʼni tsajkurámáánʼ itháan: ‹Rí manindxu̱lúʼ e̱ji̱i̱n Dios› (Romanos 8:21).

22 Jeobá nandoo rí ikháánʼ maguma kríñanʼ. Ga̱jma̱a̱ mu maguma kríñanʼ ndayóoʼ matatsimbaʼ. Ikha jngó, lá ragájkhun dí gíʼdoo wéñuʼ numuu muʼni tsiakimijna muʼnimbulúʼ kuʼyáá Jeobá mámbá mbiʼi ráʼ. Á mu xúʼko̱, ¡guguaʼdáá mba̱a̱ fe rí nindxu̱u̱ mikaʼwu mu xúʼko̱ ma̱ndoo kaʼyulú Dios kámuu mbiʼi!