Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Guni rí Dios ma̱ndoo kaʼyala

 CAPÍTULO 8

Dios nandoo kaʼñúún xa̱bu̱ bi̱ mikaʼwun

Dios nandoo kaʼñúún xa̱bu̱ bi̱ mikaʼwun

“Ikháánʼ maʼni májánʼ a̱jkia̱nʼ náa bi̱ nakuwa kaʼwu.” (SALMO 18:26.)

1-3. a) Ndíjkha rí gu̱ʼu̱ nduyáá á mu mikaʼwiin e̱jñún ga̱jma̱a̱ nakujmiin májánʼ xá. b) Náa numuu rí Jeobá nandoo rí bi̱ ni̱ndxu̱lú xa̱bi̱i̱ manindxu̱lúʼ mikaʼwáanʼ, ga̱jma̱a̱ ndíjkha gíʼmaa muʼni rá.

NÁKHA xóó tsigájnuu náa guʼwá ada̱, ru̱dúu̱ ndaʼyoo á mu niwan ga̱jma̱a̱ á mu mikaʼwu xtíñuu ma̱ngaa á mu naʼkuinʼ májánʼ. Náa numuu rá. Ikhaa ndaʼyoo rí á mu mikaʼwii naʼni rí mbaja̱a̱ májánʼ rí xáʼniuu nandii, ma̱ngaa ndaʼyoo rí xa̱bu̱ nuta numún xa̱bu̱ buanii rí xú káʼnii kujmiin e̱jñún.

2 Ma̱ngaa Anu̱lú bi̱ xtáa mekhuíí nandoo rí bi̱ ni̱ndxu̱lú xa̱bi̱i̱ maʼni mikaʼwáanʼ. Náa Biblia naʼthúlúʼ rí ikhaa maʼni májánʼ a̱jkiu̱u̱n náa “bi̱ nakuwa kaʼwu” (Salmo 18:26). * Ndíjkha rí  na̱nda̱ʼa̱ wéñuʼ Jeobá rígi̱ rá. Timbá, numuu rí nandoo kaʼyulúʼ ga̱jma̱a̱ ndaʼyoo rí mambáyulúʼ má ikháanʼ. Raga̱jma̱, rí xú káʼnii nakujmáanʼ bi̱ ni̱ndxu̱lú Testigos ndrígóo naʼni rí xa̱bu̱ mundxaʼwamíjna̱ rí xú káʼnii nindxu̱u̱ ikhaa. Ikháanʼ tsíyulú muríyaʼ gamajkuu Dios ni má mbiʼyuu rí nindxu̱u̱ kaʼwu. Nandulúʼ muʼni mba̱a̱. Ikha jngó gíʼmaa makujmáanʼ kaʼwáanʼ ikháanʼ, dí muʼni ga̱jma̱a̱ dí muʼthá (Ezequiel 36:22; atraxnuu 1 Pedro 2:12).

3 Ndíjkha rí gíʼmaa makuwáanʼ kaʼwu rá. Nduʼyáá má rí Dios nandoo kaʼñún xa̱bu̱ kaʼwi̱i̱n. Ma̱ngaa, ikháanʼ nandulúʼ kuʼyáá Jeobá ga̱jma̱a̱ nandulúʼ mbuʼyamajkuíí mbá xúgíʼ rí xú káʼnii kuwáanʼlu. Nandulúʼ rí maʼndoo kaʼyulúʼ má xúʼko̱. Ikha jngó guʼyáá tikhuu rí maʼni mikaʼwu: Náa numuu rí ndayóoʼ, ndiéjunʼ eyoo gáʼthúu̱n ga̱jma̱a̱ xú káʼnii gándoo makuwáanʼ má xúʼko̱ mikaʼwu. Rígi̱ maʼni mbuʼyáá á mu rígá mbá náa ma̱ndoo muʼni̱i̱la itháan májánʼ.

NDÍJKHA RÍ NDAYÓOʼ MANINDXU̱LÚʼ MIKAʼWÁANʼ RÁ.

4, 5. a) Ndiéjunʼ nindxu̱u̱ mbá rí phú itháan gíʼdoo numuu mu maguma káwáanʼ náa xúgíʼ rí tsaga rá. b) Xú káʼnii esngájma dí naniguuʼ dí kaʼwu Jeobá náa xúgíʼ rí niʼni rá.

4 Rígá mbaʼa enii xóo eʼsngúlúʼ Jeobá. Mbá dí ikhaa nindxu̱u̱ xkri̱da ndrígóo. Náa Biblia naʼthúlúʼ rí gíʼmaa ‹mbuʼyaridáá Dios› (Efesios 5:1). Xó má ndiʼyáá ginii, ndíjkha rí gíʼdoo numuu maguma káwáanʼ náa xúgíʼ rí tsaga rá. Numuu rí nduʼyamajkuíí mbáa Dios bi̱ ra̱ʼkhá tháán kaʼwii (atraxnuu Levítico 11:44, 45).

5 Jeobá kaʼwii, xóo xa̱bu̱ nindxu̱u̱ ga̱jma̱a̱ rí naʼni, nakujmaa kaʼwu náa xúgíʼ rí niʼni (Romanos 1:20). Mbá xkri̱da nindxu̱u̱ Ku̱ba̱ʼ náa kuwáanʼlu. Jeobá má niʼni mújúnʼ mu xáʼni tsaga náa kuwáanʼlu. Xúʼko̱ má niʼni rí giñánʼ maguma kaʼwii ga̱jma̱a̱ iyaʼ. Jeobá niʼnii xujkhú majkhinʼ bi̱ tséʼñún mu muni kaʼwii dí mitsaga. Científicos najmiún xujkhú majkhinʼ bi̱ tséʼñún mu muni kaʼwii mar náa rígá petróleo ga̱jma̱a̱ i̱ʼwáʼ rí nuni tsagá xa̱bu̱ bi̱ nundxa̱ʼwa̱míjna̱ i̱ndó ga̱jma̱a̱ numún ikhiin ga̱jma̱a̱  bi̱ nandún maguaʼdáá. Bi̱ “Niʼni ku̱ba̱ʼ” naxmiéjunʼ wéñuʼ mu maʼni kaʼwu (Jeremías 10:12). Xúʼko̱ má gíʼmaa muʼni mangáanʼ.

6, 7. Xú káʼnii niniñuuʼ kaʼwu Xtángoo rí niwaxnáá Moisés rí xa̱bi̱i̱ Jeobá gíʼmaa maʼni mikaʼwiin rá.

6 Ndiéjunʼ nindxu̱u̱ i̱mba̱ numuu rí kuaʼdáá mu maʼni mikaʼwáanʼ rá. Jeobá, bi̱ gíʼdoo itháan numuu, na̱nda̱ʼa̱ má xúʼko̱ rí xa̱bi̱i̱ mani̱ndxu̱ún mikaʼwiin. Mbá xkri̱da, Xtángoo rí nixnúún xuajen Israel niʼthí rí mbríguu nindxu̱u̱ rí mikaʼwu ga̱jma̱a̱ rí mbiʼyamajkuíí. Xúʼko̱, nixtanda̱ʼa̱a̱ ndxajkun rí muwan a̱jma̱ nuthu nákha xóo tsíxnáxi tsigijñaʼ Mbiʼi rí najngudi̱i̱ aʼkhá (Levítico 16:4, 23, 24). Ma̱ngaa xúgínʼ ndxajkun gíʼmaa rí mujñáa ñawúunʼ ga̱jma̱a̱ rajkúún mámbá rí muxnaxi̱ tsigijñaʼ náa Jeobá (Éxodo 30:17-21; 2 Crónicas 4:6). Ma̱ngaa nijuiʼthá mbá 70 nuthu náa naʼni tsaga̱a̱ mbáa israelita, rí xóo ekujmaa mbájnii ga̱jma̱a̱ índo̱ ndaʼyamajkuu Dios náa templo. Índo̱ naxtáa xúgi̱ kaʼnii tséniñaaʼ —nguáná asndu nuxiyáa— maʼni asndu ndiéjunʼ má ñajunʼ rí mbaʼyamajkuu Dios (Levítico 15:31). Ma̱ngaa, náa Xtángoo naʼthí rí asndu tsáa xa̱bíi bi̱ gáʼni tsaga̱a̱ gíʼmaa rí maʼni kaʼuminaʼ rí nandoo gáʼthúu̱n rí muwan ga̱jma̱a̱ maʼjñáa xtíñuu; á mu tséʼni xúʼko̱ “gíʼmaa makhañúu mu ni xáxtáa náa congregación” (Números 19:17-20).

7 Maski ajndu Xtángoo rí niwaxnáá Moisés nánguá ejmaa xúgi̱, naʼni makru̱ʼu̱lú xú eʼyoo Dios. Nakujmaa kaʼwu, rí náa xtángoo rígi̱ niʼthí dí ra̱ʼkhá tháán eyóoʼ maʼni mikaʼwiin bi̱ gúyamajkuíí Dios. Ga̱jma̱a̱ ikhaa táriʼkuminaʼ (Malaquías 3:6). Xó má nákha wajyúúʼ xúʼko̱ má xúgi̱, ikhaa nagruigú i̱ndó “gamajkhu rí mikaʼwu” (Santiago 1:27). Mbáa májánʼ gáʼni rí mbuʼyáá ndiéjunʼ eyoo gáʼthúu̱n rí mbiʼi xúgi̱.

NDÍ EYOO GÁʼTHÚU̱N RÍ MARAXTAA KAʼWU NÁA IDUU DIOS RÁ.

8. Ndiéjunʼ nindxu̱u̱ tikhuu mikaʼwu dí gíʼthu̱u̱n Jeobá muʼni rá.

8 Náa Biblia tséʼthi i̱ndó rí maraxtaa kaʼwu. Naʼthí rí mu makuwáanʼ kaʼwu náa iduu Dios gíʼmaa maʼni xúʼko̱ asndu  ndiéjunʼ má dí gúʼni. Jeobá gíʼthu̱u̱n rí musngajmá a̱jkhu̱ enii rí mikaʼwu: Xú káʼnii muʼni ñajunʼ Dios, xuxuʼdámi̱jna̱ aʼkhá, rí mundxaʼwamíjna̱ ga̱jma̱a̱ rí maʼni mikaʼwáanʼ. Guʼyáá ndiéjunʼ eyoo gáʼthúu̱n mámbá rígi̱.

9, 10. Ndiéjunʼ eyoo gáʼthúu̱n rí kaʼwu gúʼni ñajunʼ Dios, ga̱jma̱a̱ ndiéjunʼ dí tséʼni bi̱ ni̱ndxu̱lú cristianos gajkhun rá.

9 Kaʼwu gúʼni ñajunʼ Dios. Nandoo gáʼthúu̱n dí xátandáwaʼ religión dí gajkhun ga̱jma̱a̱ dí ragájkhun. Garmáʼáan a̱jkiu̱lú rí israelitas bi̱ ni̱jkha̱ kiʼdiin náa xuajen Babilonia. Índo̱ gágúun náa Jerusalén gíʼmaa munimbu̱ún kiʼtáñajunʼ rígi̱: “Agajnalá ikhí, xurugua̱ nditháan rí mixkawiʼ, [...] gakuwáanʼ mikaʼwu” (Isaías 52:11). Ikhiin matangi̱ín náa mbañúúnʼ mu mugíʼ mbuyamajkuíí mbu̱júu̱ Jeobá. Gamajkhu dí gúxna gíʼmaa maʼni mikaʼwu ragíʼmaa marigá dí mitsaga dí maʼni gawúunʼ Dios xó má kiʼsngáa, dí nuni ga̱jma̱a̱ costumbre ndrígóo religión dí rígá náa Babilonia.

10 Rí mbiʼi xúgi̱, ma̱ngaa cristianos gajkhun gíʼmaa muñewa̱a̱n wéñuʼ rí xúndawamíjna̱ ga̱jma̱a̱ religión dí ragájkhun (atraxnuu 1 Corintios 10:21). Ra̱ʼkhá tháán gíʼmaa muñeumíjna̱ mu xáʼni gacháanʼ religión dí ragájkhun numuu rí asndu náa rígá. Religión dí ragájkhun naʼthí dí ndaʼya xóó mbáa xa̱bu̱ nda̱wa̱á rí nakháñuu, numuu rí xa̱bu̱ nunimbu̱ún rígi̱ nagún kudúún ganitsu náa xa̱bu̱ bi̱ nikháñun ga̱jma̱a̱ nutsikha ndélá náa xándú ma̱ngaa naʼsngáa i̱ʼwáʼ dí ragájkhun (Eclesiastés 9:5, 6, 10). Mú, ikháanʼ bi̱ ni̱ndxu̱lú cristianos gajkhun tsíyulú muʼni nimbá costumbre rí na̱ʼkha̱ náa religión dí ragájkhun. * Ikha jngó, gíʼmaa muʼnimbulúʼ rí eʼthulúʼ Dios náa Biblia rí gíʼmaa mani̱ndxu̱u̱ kaʼwu rí mbuʼyamajkuíí, ragíʼmaa muʼni rí gúthulúʼ xa̱bu̱ (Hechos 5:29).

11. Ndiéjunʼ eyoo gáʼthúu̱n rí maraxtaa mikaʼwu rí xátaxuʼdáminaʼ aʼkhá, ga̱jma̱a̱ ndíjkha rí gíʼdoo numuu rá.

11 Gakuwáanʼ kaʼwu xuxuʼdámi̱jna̱ aʼkhá. Mbá xkri̱da gíʼmaa  rí maʼni mikaʼwáanʼ dí ragíʼmaa muxuʼdámi̱jna̱ aʼkhá gajmiúlú mbáa, rígi̱ gíʼdoo numuu mu maʼndoo kaʼyulúʼ má xúʼko̱ Dios (atraxnuu Efesios 5:5). Xó má gúʼyáá imbo̱o̱ capítulo, phú ndayóoʼ wéñuʼ rí cristianos ‹xúxudami̱jna̱ aʼkhá gajmiún mbáa›. Bi̱ nuxuda̱mi̱jna̱ aʼkhá rúʼko̱ ga̱jma̱a̱ tsetanga̱a̱ a̱jkiu̱ún “xátaʼa̱a̱n náa reino ndrígóo Dios” (1 Corintios 6:9, 10, 18). Jeobá ndaʼñún rí ‹mitsagiin wéñuʼ› ga̱jma̱a̱ i̱ndó á mu tséni kaʼumijná, ikhaa maʼni rí makhañún “rí maʼni a̱jma̱ nuthu” (Revelación 21:8).

12, 13. Ndiéjunʼ exkaxánʼ muʼni rí nundxa̱ʼwa̱míjna̱, ga̱jma̱a̱ ndiéjunʼ gambáyulú mu mundxaʼwamíjna̱ dí kaʼwu rá.

12 Ganindxu̱u̱ kaʼwu rí gundxa̱ʼwámi̱jna̱. Numuu rí nundxa̱ʼwa̱míjna̱ na̱jkha̱ kaguáanʼ muʼni, á mu nuniʼñáanʼ dí maʼga̱ rajoo dí xkawiʼ náa edxu̱lúʼ ga̱jma̱a̱ náa a̱jkiu̱lú, nda̱wa̱á asndu maʼga̱ kaguáanʼ muʼni mbá dí ra̱májánʼ (Mateo 5:28; 15:18-20). Mú á mu nuʼni marigá náa edxu̱lúʼ dí májánʼ ga̱jma̱a̱ dí kaʼwu, ma̱ndoo muʼni dí kaʼwu o dí májánʼ (atraxnuu Filipenses 4:8). Mú, ndiéjunʼ gambáyulú mu xúʼni̱ gachíí edxu̱lúʼ rá. Timbá, muʼni gaʼduunʼ rí muʼni gagimijná ga̱jma̱a̱ dí ra̱májánʼ rí maʼni gachúu edxu̱lúʼ. * Rí maʼni raga̱jma̱, ma̱ndoo mundxaʼwamíjna̱ rí májánʼ índo̱ nuraxnuu Ajngá rawunʼ Dios (Salmo 19:8, 9).

13 Xó má ndiʼyáá, mu maʼndoo kaʼyulúʼ má xúʼko̱ Dios, ndayóoʼ muʼni kaʼwu ñajunʼ ndrígóo, xuxuʼdámi̱jna̱ aʼkhá ga̱jma̱a̱ ganindxu̱u̱ kaʼwu rí gundxa̱ʼwámi̱jna̱. Ajtsú enii rí kaʼwu rígi̱ na̱ʼkha̱ raʼthí náa i̱ʼwáʼ capítulo ndrígóo libro rígi̱. Guʼyáá dí a̱jkhu̱ enii: Rí maʼni mikaʼwáanʼ.

XÚ KÁʼNII GÁNDOO GÁKUWÁANʼ MIKAʼWÁANʼ RÁ.

14. Arathá ndíjkha rí makuwáanʼ mikaʼwáanʼ rakáʼyulú i̱ndó ikháanʼ rá.

14 Gíʼdoo wéñuʼ numuu rí maʼni mikaʼwu xuyulúʼ ga̱jma̱a̱ xúʼko̱ má náa kuwáanʼ. Tikhun nakumu̱ún rí mbáwíi xa̱bu̱  kaʼyoo maʼthí xú káʼnii maxtáa rí nimbáa ragíʼmaa maʼthúu̱n. Mú nimbáa cristiano ragíʼmaa mandxaʼwáminaʼ xúʼko̱. Xó má nijuiʼthá ginii, Jeobá tsendu̱ʼu̱lú rí maʼni mikaʼwáanʼ i̱ndó mu makuwáanʼlu májánʼ, asndu ma̱ngaa índo̱ nakujmáanʼlu naʼni mundxaʼwamíjna̱ xa̱bu̱ rí xú káʼnii nindxu̱u̱ Jeobá. Garmáʼáan a̱jkiu̱lú eʼni ada̱ bi̱ nijuiʼthá náa timbá kutriga̱: Á mu jngruigo̱o̱ má xúʼko̱ mitsaga̱a̱ o tséʼni rataminaʼ májánʼ, lá ragájkhun rí naʼni mundxaʼwamíjna̱ dí xúʼko̱ má nindxu̱u̱ anu̱u̱ ga̱jma̱a̱ ru̱dúu̱ xáʼ. Xúʼko̱ má ma̱ngaa á mu rígá mbá dí ra̱májánʼ náa ikháanʼ o rí xú káʼnii kuwáanʼ, lá ragájkhun rí asndu maʼni rí ní xágiʼdoo numuu Anu̱lú bi̱ xtáa mekhuíí ga̱jma̱a̱ ajngáa rí nuʼtáraʼa ráʼ. Gíʼmaa rí marmáʼáan má xúʼko̱ a̱jkiu̱lú ajngáa rígi̱: “Asndu nditháan tséʼni mbá dí mangrádiinʼ eʼwíínʼ, mu xákujmaa nimbá dí ra̱májánʼ náa nuʼtáraʼa; náa xúgíʼ dí nunixu, nusngajmá dí ñajunxu xa̱bi̱i̱ Dios” (2 Corintios 6:3, 4). Guʼyáá náa gándoo ganindxu̱lú mikaʼwáanʼ.

15, 16. Ndiéjunʼ nindxu̱u̱ tikhuu rí gíʼmaa muʼni mu maʼni kaʼwáanʼ, ga̱jma̱a̱ xú káʼnii gíʼmaa maʼkuaánʼ ga̱jma̱a̱ xtíñúlú rá.

 15 Rí muʼna ga̱jma̱a̱ xú káʼnii kujmáanʼ mbájníí. Tséʼniuu má xóo mixtiʼkhuu kúwi̱i̱n náa mámbá xuajen, gíʼmaa muʼna tsejtsí mbiʼi. Xúgiáanʼ kuaʼdáá iyaʼ ga̱jma̱a̱ xábú mu muʼna xúʼko̱ má ejñulú ma̱ngaa. Rígi̱ eyoo gáʼthúu̱n rí gíʼmaa mujñáa ñawúunʼlú nákha xóó tsipiʼtsu o tsírugua ganitsu, ga̱jma̱a̱ nda̱wa̱á rí ni̱jkua̱ gúmixúlú o niriʼkui̱i̱ pañal ndrígóo ada̱. Á mu nuʼni xúʼko̱ nuʼni rí xákúwi̱i̱n virus ga̱jma̱a̱ eʼwíínʼ microbios, náa na̱ʼkha̱ wéñuʼ nandii xó má diarrea, asndu naʼni káwáanʼlu. Á mu xuajen náa kuwáanʼlu na̱nguá rígá tubo náa maʼga̱ dí tsaga, itháan májánʼ gáʼni dí muʼdu índo̱ na̱jkua̱ gúmixúlú, xó má nini xa̱bu̱ bi̱ nikuwa nákha wajyúúʼ náa xuajen Israel (Deuteronomio 23:12, 13).

16 Ma̱ngaa gíʼmaa mujñáa tsejtsí xtíñúlú. Rí phú itháan gíʼdoo numuu rí maʼni mikaʼwu xtíñúlú ga̱jma̱a̱ mbá rí makujmaa májánʼ, tséyóoʼ má maʼni minumuu o dí ndiʼkhún egájnuu (atraxnuu 1 Timoteo 2:9, 10). Tséʼniuu má náa mbi̱ʼi̱i̱ ga̱jma̱a̱ tséʼniuu má náa kuwáanʼ nandulúʼ rí maʼni mikaʼwáanʼ ga̱jma̱a̱ rí xóo ekujmáanʼ maʼni “mitsaan kiʼsngáa ndrígóo bi̱ Niʼni káwáanʼ, Dios” (Tito 2:10).

17. Náa numuu rí gíʼmaa muʼni kaʼwi̱i̱ ga̱jma̱a̱ makujmaa májánʼ guʼwúlú o i̱ʼwáʼ rí kuaʼdáá rá.

17 Guʼwá ga̱jma̱a̱ i̱ʼwáʼ rí kuaʼdáá. Gíʼmaa maʼni mikaʼwu má xúʼko̱ ga̱jma̱a̱ makujmaa májánʼ guʼwá, tséʼniuu á mu mitsaan o na̱nguá. Xúʼko̱ má kaʼwu gíʼmaa maʼni carro ndrígúlú, asndu awúu̱n, itháan á mu najmulú mu mu̱ʼgua̱ reunión ga̱jma̱a̱ mu̱ʼgua̱ gúʼtaraʼa. Gíʼmaa maʼni mikaʼwu xúgíʼ rí kuaʼdáá. Á mu xúgíʼ kaʼwu, xa̱bu̱ muthi rí májánʼ. Numuu rí nuʼsngúún xa̱bu̱ rí Jeobá naniguuʼ rí kaʼwu, ikha jngó maʼni “gámbíin bi̱ nuni gámbáa ku̱ba̱ʼ” ga̱jma̱a̱ majmuu Reino ndrígóo mu maʼni̱i̱ mitsaan ku̱ba̱ʼ (Revelación 11:18; Lucas 23:43). Ikha jngó, á mu nuñewa̱a̱n guʼulúʼ ga̱jma̱a̱ i̱ʼwáʼ rí kuaʼdáá gíʼmaa masngájma rí kuwáanʼ ruʼni ratamijná índo̱ gáʼnii nuxi̱ʼ numbaaʼ.

Rí maʼni mikaʼwáanʼ nandoo gáʼthúu̱n rí maʼni kaʼwu xuyulúʼ ga̱jma̱a̱ dí kuaʼdáá

18. Xú káʼnii eʼni mu mbuʼyamajkuíí guʼwá náa nagimbáanʼ rá.

 18 Guʼwá náa nagimbáanʼ. Nduʼyamajkuíí wéñuʼ guʼwá rígi̱, numuu rí ikhí nuxnáá gamajkhu Dios ndrígúlú bi̱ nandulúʼ kuʼyáá. Índo̱ gáguwáʼ bi̱ nuxinʼ, nandulúʼ mbuyáá májánʼ náa nagimbáanʼlú. Mu xáʼchúu, gíʼmaa dí muʼni kaʼwii má xúʼko̱ ga̱jma̱a̱ maguma májáánʼ náa nachúu. Índo̱ nuyambáá náa ñajunʼ rígi̱, nusngajmá rí gíʼdoo wéñuʼ numuu mbuʼyamajkuíí Dios. Ra̱ʼkhá tháán májánʼ rí muʼni kaʼwii ga̱jma̱a̱ muʼni májáánʼ náa nagimbáanʼ (2 Crónicas 34:10). Xúʼko̱ má eʼnilú ma̱ngaa náa narígá asamblea.

GUʼNI GAʼDUUNʼ XÚGÍʼ RÍ MAʼNI GACHÚU XUYULÚʼ

19. Ndiéjunʼ rí gíʼmaa muʼni gaʼduunʼ mu xúʼni̱ gachíí xuyulúʼ, ma̱ngaa ndiéjunʼ eʼthúlú muʼni Biblia ga̱jma̱a̱ numuu rígi̱ rá.

19 Ndiéjunʼ eyoo gáʼthúu̱n itháan rí maʼni mikaʼwáanʼ rá. Gíʼmaa muʼni gaʼduunʼ xúgíʼ rí maʼni gachúu xuyulúʼ. Ikha jngó tsetsiʼkalu ndíí, majngáanʼlu, muʼwa̱a̱nʼlú wéñuʼ thana rí tséxnulu médico o naʼni rí xákuwáanʼ májánʼ. Gajkhun má náa Biblia tséʼthi ga̱jma̱a̱ mbiʼyuu xúgíʼ vicio dí rígá mbiʼi xúgi̱, mú rígá ikha náa naʼni makru̱ʼu̱lú náa numuu rí Jeobá ndaʼyoo rí xkawiʼ ga̱jma̱a̱ naʼni mawiyuuʼ. Guʼyáá xúgi̱ witsu ikha rí nandulúʼ muʼnimbánii numuu rí nandulúʼ kuʼyáá Dios ga̱jma̱a̱ rúʼko̱ maʼni rí mbaʼyulú májánʼ.

20, 21. Ndiéjunʼ rí tsíyoo Jeobá muʼni, ga̱jma̱a̱ ndiéjunʼ nindxu̱u̱ mbá numuu rí tséxnulú muʼni xá.

20 “Ikha jngó, numuu rí ikháanʼlu kuaʼti̱i̱n rígi̱, ikháanʼ rí nandoʼ ka̱ya̱la, guʼni kaʼwumijnáanʼlu xúgíʼ rí mitsaga rí nagua̱ʼa̱ náa xuwiʼ ga̱jma̱a̱ espíritu, guʼni jmbu̱u̱ má xúʼko̱ rí kaʼwu numuu rí nduʼyamajkuíí Dios.” (2 Corintios 7:1.) Xó má eʼyáá, Jeobá nandoo rí muʼni gaʼduunʼ xúgíʼ rí maʼni tsagoo xuyulúʼ o rí maʼni gachúu edxu̱lúʼ o rí xú káʼnii endxaʼwamíjna̱lú. Ikha jngó ragíʼmaa muʼwa̱a̱n o mu̱ʼphu̱ xúgíʼ rí maʼni gacháanʼ.

21 Náa Biblia naʼthúlúʼ dí gíʼmaa ‹muʼni kaʼwumijnáanʼlu náa xúgíʼ rí mitsaga›. Guʼyáá náa 2 Corintios 7:1 nagi̱ʼdu̱u̱ raʼthí: “Numuu rí ikháanʼlu kuaʼti̱i̱n rígi̱”. Ndiéjunʼ rí kuaʼti̱i̱n rá.  Xó má nijuiʼthá náa versículos ginii, Jeobá nakudaminaʼ: “Ikhúúnʼ magruíguanʼla. Ga̱jma̱a̱ ikhúúnʼ mani̱ndxu̱ʼ ana̱ʼla” (2 Corintios 6:17, 18). ¡Ra̱ʼkhá tháán májánʼ! Nakudaminaʼ dí mañewu̱nlú xó má eʼni mbáa xa̱bu̱ bi̱ gíʼdaa a̱ʼdióo bi̱ nandoo kaʼyoo wéñuʼ. Mú na̱nda̱ʼa̱ rí muʼni gaʼduunʼ “xúgíʼ rí mitsaga rí nagua̱ʼa̱ náa xuwiʼ ga̱jma̱a̱ espíritu”. Manindxu̱lúʼ skágunʼ á mu ga̱jma̱a̱ numuu mbá vicio dí xkawiʼ náa iduu Jeobá, mandáti̱gu̱lú rí mambaxúlúʼ gajmiúlú ikhaa.

22-25. Ndiéjunʼ ikha rí na̱ʼkha̱ náa Biblia mambáyulúʼ mu xájngutíguanʼ náa vicio rá.

22 “Gíʼmaa maʼnda̱ʼ xtayáá Jeobá Dios ndrígia̱ʼ ga̱jma̱a̱ xúgíʼ a̱jkia̱nʼ, ga̱jma̱a̱ xúgíʼ nímia̱nʼ ga̱jma̱a̱ xúgíʼ ku̱ma̱ ndrígáʼ.” (Mateo 22:37.) Jesús niʼthí dí xtángoo rígi̱ gíʼdoo itháan numuu ki xóo xúgíʼ dí rígá (Mateo 22:38). Jeobá kaʼyoo rí maʼndulú kuʼyáá mbá xúgíʼ dí xóo xa̱bu̱ ni̱ndxu̱lú, dí endxaʼwamíjna̱ ga̱jma̱a̱ rí nakumulú. Mu muʼni xúʼko̱, gíʼmaa rí muʼni gaʼduunʼ xúgíʼ vicio rí xáʼni makuwáanʼ mba̱yu̱ʼ o maʼni gachúu rí endxaʼwamíjna̱lú dí nixnúlú Dios.

23 “[Jeobá] naxnún xúgínʼ xa̱bu̱ rí mbuya ga̱jma̱a̱ xi̱ʼ ma̱ngaa xúgíʼ dí rígá.” (Hechos 17:24, 25.) Numuu rí vida nindxu̱u̱ mbá regalo rí nixnúlú Dios bi̱ nandulúʼ kuʼyáá, bi̱ ni̱ndxu̱lú cristianos nduʼyamajkuíí wéñuʼ. Ikha jngó nuʼni gaʼduunʼ xúgíʼ dí ra̱májánʼ dí gamíi maʼniulú nandii. Á mu tséʼni xúʼko̱ musngajmá rí tséʼyamajkuíí vida rí nikhánulú (Salmo 36:9).

24 “Gíʼmaa maʼnda̱ʼ xtayáá xa̱bu̱ numbaaʼ ga̱jma̱ʼ xó má eyaʼ xtayaminaʼ ikháánʼ.” (Mateo 22:39.) Nguáná bi̱ guaʼdáá mbá vicio, raʼkháa i̱ndó ikhiin eni gachimíjna, ma̱ngaa asndu bi̱ kuwa gajmiún. Xúʼko̱ má erígá índo̱ mbá xa̱bu̱ natsiká ndíí náa inún eʼwíínʼ. Bi̱ naʼni xúʼko̱ nanújngorámuʼ mbá xtángoo ndrígóo Dios náa naʼthí rí gíʼmaa maʼndoo kaʼñúún eʼwíínʼ ga̱jma̱a̱ nasngájma rí tsíyoo kaʼyoo Dios (1 Juan 4:20, 21).

25 “Gíʼmaa munimbu̱ún ga̱jma̱a̱ gíʼmaa muni dí guthi Xa̱bu̱ Ñajunʼ ga̱jma̱a̱ bi̱ nuyegun edxu̱u̱ xóo Xa̱bu̱ Ñajunʼ.” (Tito 3:1.) Numuu rí náa mbaʼa xuajen ra̱májánʼ nindxu̱u̱ rí maraʼdáá  droga ga̱jma̱a̱ rí matatsikha, bi̱ ni̱ndxu̱lú cristianos gajkhun tséʼnilu (Romanos 13:1).

26. a) Ndiéjunʼ gíʼmaa muʼni mu ma̱ndoo kaʼyulúʼ má xúʼko̱ Dios rá. b) Náa numuu rí nandoo nuʼthá rí itháan májánʼ maraxtaa kaʼwu náa iduu Dios rá.

26 Mu maʼndoo kaʼyulúʼ má xúʼko̱ Dios, raʼkháa i̱ndó makuwáanʼ kaʼwu náa tikhuu rí muʼni, gíʼmaa mani̱ndxu̱u̱ kaʼwu náa xúgíʼ xóo gákuwáanʼ. Gajkhun má dí mingíjyúuʼ muniʼñáaʼ mbá vicio ga̱jma̱a̱ dí xátangáanʼlu muʼni; mú maʼngulú muniʼñáaʼ. * Itháan májánʼ makuwáanʼ mikaʼwu. Mambáyulúʼ má ikháanʼ numuu rí Jeobá na̱ndu̱ʼu̱lú (atraxnuu Isaías 48:17). Nakuwáanʼ gagi índo̱ nduʼyáá rí nuthi dí májánʼ ga̱jma̱a̱ numuu Dios bi̱ nandulúʼ kuʼyáá ma̱ngaa bi̱ nandoo kaʼyulúʼ.

^ párr. 2 Xó má xtílóo, náa ajngáa hebreo “kaʼwu” na̱nguá eyoo gáʼthúu̱n i̱ndó rí makujmáanʼ kaʼwáanʼ, ma̱ngaa nandoo gáʼthúu̱n xuxuʼdámi̱jna̱ aʼkhá o kaʼwu gúʼni ñajunʼ Dios.

^ párr. 10 Náa capítulo 13 ndrígóo libro rígi̱ naʼthí ga̱jma̱a̱ numuu mbaʼa enii ndxa̱a̱ ga̱jma̱a̱ costumbre rí tséni mbá kayuʼ cristianos bi̱ gajkhun.

^ párr. 67 Nixtiʼkhuu mbiʼyuu.