Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Guni rí Dios ma̱ndoo kaʼyala

 APÉNDICE

Nguáná gíʼmaa matruguáá edxa̱ʼ ga̱jma̱a̱ náa numuu rá.

Nguáná gíʼmaa matruguáá edxa̱ʼ ga̱jma̱a̱ náa numuu rá.

Ga̱jma̱a̱ xi̱ʼ kaʼwu, Pablo niʼthí dí nguáná bi̱ cristianas ndayóoʼ muruguáá edxu̱ún mu muni ñajuunʼ Jeobá. Nguáná gíʼmaa miʼni ga̱jma̱a̱ náa numuu rá. Guʼyáá ndiéjunʼ niʼthí apóstol náa 1 Corintios 11:3-16 mu mbuʼyáá tikhuu ikha rí mambáñún mbuyáá nguáná gíʼmaa muruguáá edxu̱ún mu xúʼko̱ muxnáá gamajkhu Dios. Pablo niʼthí ajtsú enii dí ragíʼmaa mambumulú: 1) Ñajunʼ náa ndayóoʼ muruguáá edxu̱ún; 2) asndu náa má kúwi̱i̱n runi ñajunʼ rúʼko̱, ga̱jma̱a̱ 3) dí naxkaxi̱i̱n munimbaníí ikha rígi̱.

Ñajunʼ. Pablo niʼthí a̱jma̱ numuu: Miʼtájkháan ga̱jma̱a̱ miʼtáriyaʼ (versículos 4, 5). Miʼtájkháan nindxu̱u̱, dí mbiʼyamajkuíí Jeobá; ma̱ngaa, miʼtáriyaʼ nandoo gáʼthúu̱n ñajunʼ rí musngáa ga̱jma̱a̱ numuu Biblia bi̱ ni̱ndxu̱ún cristianos. Lá nandoo gáʼthi Pablo rí a̱ngiu̱lú gu̱ʼu̱ gíʼmaa muruguáá má xúʼko̱ edxu̱ún índo̱ gutajkáan o índo̱ gusngáa ga̱jma̱a̱ numuu Biblia xáʼ. Na̱nguá. Gíʼmaa mbaʼyoo dí raga̱jma̱: Náa xtáa raʼni ñajunʼ rúʼko̱.

Asndu náa má kúwi̱i̱n. Apóstol niʼthí a̱jma̱ náa maraxtaa: Náa mbá guʼwíin ga̱jma̱a̱ náa congregación. Ikhaa niʼthí: “Xa̱biya̱ kayá edxu̱u̱ náa a̱ʼgu̱; [...] xúgínʼ gu̱ʼu̱ bi̱ tsiruguáá edxu̱ún mu mutajkáan o mutariyaʼ nuriyaʼ gamajkuu xa̱biya̱ bi̱ kayá edxu̱u̱” (versículos 3, 5). Náa mbá guʼwíin, Jeobá nigíiʼ xa̱biya̱ mu mayéʼga edxu̱u̱ náa a̱ʼgu̱. Ikha jngó, ndiéjunʼ gárígá á mu a̱ʼgu̱ eʼni ñajunʼ rí Jeobá nixnúu maʼni mbáa xa̱biya̱ rá. I̱ndó á mu ikhaa  ndaʼyamajkuu rí ajmbio̱o̱ kayá edxu̱u̱, a̱ʼgu̱ maríyaaʼ gamajkuu ajmbio̱o̱ á mu naʼni ñajunʼ rí Jeobá nixnúu ajmbio̱o̱ maʼni. Guʼyáá mbaʼa xkri̱da. Mbáa ndxájulú a̱ʼgu̱ xtáa ga̱jma̱a̱ ajmbio̱o̱ náa goʼwóo ga̱jma̱a̱ ndayóoʼ rí maʼsngóo ga̱jma̱a̱ numuu Biblia mbáa xa̱bu̱. Numuu rí ndaʼyamajkuu rí ajmbio̱o̱ kayá edxu̱u̱, gíʼmaa marugoo edxu̱u̱. Tséʼniuu á mu ikhaa nijngúun iyááʼ o na̱nguá, numuu rí ikhaa kayá edxu̱u̱ náa mbá guʼwíin. * Ndiéjunʼ gíʼmaa maʼni mbáa ndxájulú a̱ʼgu̱ á mu ndayóoʼ maʼtájkáan ga̱jma̱a̱ maʼsngáa náa inuu mbáa a̱ʼdióo bi̱ chíʼgíʼ bi̱ nijngúun má iyááʼ rá. Maski ajndu raʼkháa a̱ʼdióo kayá edxu̱u̱ náa mbá guʼwíin, ru̱dúu̱ ada̱ gíʼmaa marugoo edxu̱u̱. Náa numuu rá. Numuu rí ndaʼyamajkuu autoridad dí nindrigú xa̱bekha bi̱ nijngún má iyááʼ bi̱ kuwa náa congregación.

Pablo nindoo gáʼthi dí maʼni raga̱jma̱, náa má xtaa, náa congregación, índo̱ niʼnirámáʼ: “Á mu mbáa xa̱bu̱ nakiʼnáa ga̱jma̱a̱ numuu i̱mba̱ costumbre, ikháanʼ na̱nguá kuaʼdáá imbo̱o̱, ni má congregación ndrígóo Dios” (versículo 16). Náa congregación, Jeobá nigruigi̱i̱n xa̱bekha bi̱ nijngún má iyááʼ (1 Timoteo 2:11-14; Hebreos 13:17). I̱ndó nagruigi̱i̱n xa̱bekha mu muñe̱wu̱u̱n xa̱bi̱i̱ xóo bi̱ kuya̱ edxu̱u̱ ga̱jma̱a̱ siervos ministeriales (Hechos 20:28). Mú nguáná ndayóoʼ rí mbáa cristiana maʼni ñajunʼ rí i̱ndó kaʼyoo maʼni mbáa xa̱biya̱ bi̱ nijngúun má iyááʼ ga̱jma̱a̱ najmañuu naʼni májánʼ ñajunʼ. Mbá xkri̱da, mbáa ndayóoʼ mayéʼga edxu̱u̱ náa reunión dí narígá mu magajnún gútaraʼa numuu rí nda̱wa̱a̱ nimbáa ndxájulú bi̱ najmañuu. Reunión rígi̱ nindxu̱u̱ ikháá má kiʼsngáa dí narígá náa congregación, ga̱jma̱a̱ gíʼmaa rí mayéʼga edxu̱u̱ mbáa ndxájulú xa̱biya̱. Xúʼko̱ má gíʼmaa maʼni mbáa ndxájulú a̱ʼgu̱ náa inuu mbáa xa̱biya̱ bi̱ nijngúun má iyááʼ índo̱ maʼsngóo ga̱jma̱a̱ numuu Biblia mbáa xa̱bu̱ bi̱ mba̱yu̱ʼ má xtáa raʼsngóo. * Ikha jngó, ndxájulú a̱ʼgu̱ gíʼmaa rí marugoo edxu̱u̱ numuu rí ndaʼyoo rí xtáa raʼni mbá ñajunʼ dí kaʼyoo maʼni mbáa xa̱biya̱.

 Mú ndxájulú a̱ʼgu̱ tséyóoʼ marugoo má xúʼko̱ edxu̱u̱ índo̱ gáʼni i̱ʼwáʼ ñajuunʼ Dios. Mbá xkri̱da, índo̱ maxná mbá comentario náa reunión, dí maʼtáraʼa náa mámbá guʼwá (maski ajndu maʼga̱ ga̱jma̱a̱ ajmbio̱o̱ o imba̱a̱ xa̱biya̱ bi̱ nijngúun má iyááʼ) ga̱jma̱a̱ rí maʼtájkáan o maʼnigajmaa gajmíi̱n e̱ji̱i̱n bi̱ xóó tséjngún iyááʼ. Mú ndiéjunʼ gándoo maʼni á mu tsíkro̱ʼo̱o̱ tikhuu rí maʼni xá. Timbá numuu, mandxaʼwáminaʼ májánʼ rí maʼni. * Á mu xóó tséʼyoo májánʼ rí maʼni, ga̱jma̱a̱ naʼni gawúunʼ conciencia ndrígóo, nda̱a̱ má rí gáʼniuu marugoo edxu̱u̱ xóo má eʼni ndxájulú a̱ʼgu̱ bi̱ kamaa náa xtiʼkhu.

Dí naxkaxi̱i̱n. Náa versículo 10 nuxkamaa a̱jma̱ dí maxkaxi̱i̱ mbáa cristiana mu maʼnimbánuu ikha rígi̱: “Ikha jngó mbáa a̱ʼgu̱ gíʼmaa marugoo edxu̱u̱ xóo tsinuʼ rí kiʼtáñajuínʼ, numuu rí xtáa náa inún ángeles”. Timbá numuu nindxu̱u̱ ajngáa rí na̱ʼkha̱ náa naʼthí “tsinuʼ rí kiʼtáñajuínʼ”. Xtíin rí narugoo edxu̱u̱ ndxájulú a̱ʼgu̱ nindxu̱u̱ mbá rí nasngájma rí ndaʼyamajkuu autoridad ndrígu̱ún xa̱bekha bi̱ nigruigi̱i̱n Jeobá náa congregación. Xúʼko̱ nasngájma rí nandoo kaʼyoo Dios ga̱jma̱a̱ rí nawi̱ji̱ jmbu náa ikhaa. Ndiéjunʼ nindxu̱u̱ raga̱jma̱ numuu rá. Xó má eʼthí versículo rí guámbulúʼ ndiʼyáá, “numuu rí xtáa náa inún ángeles”. Mú ndiéjunʼ gárígá náa ángeles bi̱ guáʼdáá tsiakii á mu narugoo edxu̱u̱ a̱ʼgu̱ rá.

Ángeles nduñún xúgínʼ bi̱ kuwa náa organización ndrígóo Jeobá, xó má mekhuíí ga̱jma̱a̱ náa Ku̱ba̱ʼ, ga̱jma̱a̱ kuwa xawii mu mbuyáá xóo esngajma rí nunimbánii autoridad ndrígóo Jeobá. Nambáñun índo̱ nduyáá rí nunimbu̱ún xa̱bu̱ aʼkhá. Numuu rí ángeles bugi̱ mangiin gíʼmaa rí munimbaníí awan rí nagruiga Dios, mbá rí na̱nguá nini xúgínʼ nákha wajyúúʼ (Judas 6). Rí mbiʼi xúgi̱ nundrigú mbá xkri̱da májánʼ índo̱ mbáa cristiana ndaʼyamajkuu ga̱jma̱a̱ xúgíʼ a̱jkiu̱u̱n autoridad ndrígóo  mbáa ndxájulú bi̱ nijngúun iyááʼ, maski ajndu ikhaa najmañuu wéñuʼ o gíʼdoo ku̱ma̱. Mú itháan naguanún tsiánguá índo̱ mbáa ndxájulú a̱ʼgu̱ bi̱ maʼga̱ mekhuíí ndaʼyamajkuu autoridad. Náa numuu rá. Numuu rí nda̱wa̱á ndxájulú a̱ʼgu̱ maxtáa gajmíi̱n bi̱ mutañajunʼ gajmiún Cristo mekhuíí, mbá ñajunʼ dí gíʼdoo itháan numuu ki xóo dí guáʼdáá ángeles. Xó má eʼyáá, cristianas guaʼdáá mbá dí ra̱ʼkhá tháán gíʼdoo numuu. Índo̱ nuni rí jmbu ni̱ndxu̱ún xa̱bu̱ gua̱bi̱nʼ ga̱jma̱a̱ índo̱ nunimbu̱ún nuniñaaʼ mbá xkri̱da májánʼ náa inún mbaʼin ángeles.

^ párr. 3 Ndxájulú a̱ʼgu̱ naʼtájkáan mañúú náa inuu ajmbio̱o̱ bi̱ naʼnigajmaa̱, i̱ndó ma̱ndoo maʼtájkáan gakhi̱i̱ á mu ajmbio̱o̱ ni̱jkha̱ ajngóo ga̱jma̱a̱ numuu mbá nandii.

^ párr. 1 Mbáa ndxájulú a̱ʼgu̱ tséyóoʼ marugoo edxu̱u̱ índo̱ gáʼsngóo ga̱jma̱a̱ numuu Biblia bi̱ na̱jkha̱ raʼyoo má xí xtáa náa mbáa ndxájulú xa̱biya̱ bi̱ xóó tséjngúun iyááʼ á mu ra̱ʼkhá ajmbio̱o̱.

^ párr. 1 Mu ma̱ta̱ya̱a̱ itháan, atayáá La Atalaya rí 15 ñajunʼ gu̱nʼ julio tsiguʼ 2002 ináa 26, 27 ga̱jma̱a̱ rí 15 ñajunʼ gu̱nʼ julio tsiguʼ 1977 ináa 445-448.