Atambaʼtaa mu matraxnuu

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

Atraʼwíí ajngáa me̱ʼpha̱a̱

 KÍXNUU 5

Ndiéjunʼ eyoo maʼni Dios náa tsu̱du̱u̱ Ku̱ba̱ʼ rá.

Ndiéjunʼ eyoo maʼni Dios náa tsu̱du̱u̱ Ku̱ba̱ʼ rá.

1. Náa numuu niʼni Dios Ku̱ba̱ʼ rá.

Jeobá nixnúún Ku̱ba̱ʼ xa̱bu̱ mu makuwá. Gi̱jyooʼ kaʼyulúʼ makuwáanʼ. Ikha jngó, timbáa xa̱bu̱ Adán ga̱jma̱a̱ Eva, na̱nguá nigumiin mu makuwa mekhuíí. Dios niʼnii ángeles mu makuwa mekhuíí (Job 38:4, 7). Jeobá nigíwanʼ timbáa xa̱bu̱ náa mbá ku̱ba̱ʼ mitsaan rí nigumbiʼyuu ixi̱ ri̱ʼi̱ Edén (Génesis 2:15-17). Jeobá niʼni rí Adán gajmíi̱n e̱ji̱i̱n makuwa gagi má xúʼko̱ náa tsu̱du̱u̱ Ku̱ba̱ʼ. Atraxnuu Salmo 37:29 ga̱jma̱a̱ 115:16.

Nákha ginii, i̱ndó ixi̱ ri̱ʼi̱ Edén nindxu̱u̱ mbá Ku̱ba̱ʼ mitsaan. Adán ga̱jma̱a̱ Eva, timbíin xa̱bu̱ ndiyóoʼ rí muguaʼdiin ejñún mu maʼni mbaʼin náa tsu̱du̱u̱ Ku̱ba̱ʼ. Nda̱wa̱á, ikhiin muñewa̱a̱n ga̱jma̱a̱ muñajunʼ náa xúgíʼ Ku̱ba̱ʼ mu maʼni̱i̱ mitsaan (Génesis 1:28). Ku̱ba̱ʼ xaʼganú mambáa. Ku̱ba̱ʼ maʼni náa makuwa má xúʼko̱ xa̱bu̱. Atraxnuu Salmo 104:5.

2. Ndíjkha rí xúgi̱ nánguá ñajunʼ mbá Ku̱ba̱ʼ mitsaan rá.

Adán ga̱jma̱a̱ Eva na̱nguá ninimbu̱u̱n náa Dios, ikha jngó Jeobá nixkawíín náa ixi̱ ri̱ʼi̱. Ku̱ba̱ʼ mitsaan nindátiga̱a̱, ga̱jma̱a̱ nimbáa xa̱bu̱ na̱nguá eʼngo̱o̱ maʼni̱i̱ ku̱ba̱ʼ mitsaan mbu̱júu̱. Asndu nákha Adán ga̱jma̱a̱ Eva na̱nguá ninimbu̱u̱n náa Dios, náa Ku̱ba̱ʼ nijtíin xa̱bu̱ bi̱ ra̱míjínʼ (Job 9:24). Atraxnuu Génesis 3:23, 24.

Lá nandoo gáʼthi rí xárígá rí eʼthí maʼni Jeobá náa tsu̱du̱u̱ Ku̱ba̱ʼ rá. Na̱nguá, maʼganú marigá. Ikhaa nindxu̱u̱ mbáa bi̱ gíʼdoo xúgíʼ tsiakii. Xúgíʼ rí naʼthí mambanúu (Isaías 45:18). Ikhaa maʼni rí xa̱bu̱ makuwá xóo má nixtáa Adán ga̱jma̱a̱ Eva. Atraxnuu Salmo 37:11, 34.

3. Xú káʼnii gáʼni̱i̱ mbu̱júu̱ Ku̱ba̱ʼ mitsaan rá.

Ku̱ba̱ʼ mitsaan maʼni̱i̱ índo̱ Jesús gáʼtañajunʼ xóo Rey ndrígóo Dios. Náa guerra rí nagumbiʼyuu Armagedón, Jesús gajmíi̱n ángeles ndrígóo maʼni gámbíin xa̱bu̱ sia̱nʼ bi̱ tsiñun guyaa Dios. Ikhú Jesús madamaʼa̱a̱n Satanás náa iñá mbiiʼ 1,000 tsiguʼ. Jesús mañewu̱u̱n xabi̱i̱ Dios ga̱jma̱a̱ maxnún ikha índo̱ gáʼni  gámbíin xa̱bu̱ bi̱ ra̱míjínʼ mu ikhiin makuwa tsímáá kámuu mbiʼi náa tsu̱du̱u̱ Ku̱ba̱ʼ. Atraxnuu Rí huasjŋgajma Juan 20:1-3 ga̱jma̱a̱ 21:3, 4.

4. Nguáná gáʼganú mambáa tsingíná rá.

Mbaʼin xa̱bu̱ nuraximijna, nguáná gáʼni gámbáa Dios dí ra̱májánʼ náa tsu̱du̱u̱ Ku̱ba̱ʼ rá. Jesús nixná mbá tsinaʼ mu masngájma rí na̱jkha̱ ratumuu mbiʼi náa tsu̱du̱u̱ Ku̱ba̱ʼ. Á mu narígá má xúʼko̱ xúgíʼ rí xtáa rarígá náa tsu̱du̱u̱ Ku̱ba̱ʼ, asndu maʼni rí xa̱bu̱ makhañún. Rígi̱ nasngájma dí na̱jkha̱ mambáa xúgíʼ dí ra̱májánʼ dí rígá náa tsu̱du̱u̱ numbaaʼ. Atraxnuu Mateo 24:3, 7-14, 21, 22.

Índo̱ Jesús gaʼtañajunʼ 1,000 tsiguʼ asndu náa mekhu, maʼni gámbáa xúgíʼ dí ra̱májánʼ rí naʼni gíníín xa̱bu̱ (Isaías 9:6, 7; 11:9). Jesús nindxu̱u̱ rey, ma̱ngaa manindxu̱u̱ xóo bi̱ kayá edxu̱u̱ náa ndxajkun, ikhaa maʼni gámbáa xúgíʼ aʼkhá ndrígu̱ún xa̱bu̱ bi̱ nandún kuyáá Dios. Xúʼko̱, Dios majmiuu Jesús mu maʼni gámbáa xúgíʼ nandii, rí naganun xa̱bu̱ ga̱jma̱a̱ rí nakháñun. Atraxnuu Isaías 25:8 ga̱jma̱a̱ 33:24.

5. Tsíin gakuwa náa Ku̱ba̱ʼ mitsaan rá.

Náa Guʼwá nagimbáanʼ, ikháánʼ matatsiʼnuʼ xa̱bu̱ bi̱ nandún kuyáá Dios ga̱jma̱a̱ nandún majmañún xú gúni rí nandoo ikhaa

I̱ndó xa̱bu̱ bi̱ nunimbu̱u̱n náa Dios gakuwa náa Ku̱ba̱ʼ mitsaan (1 Juan 2:17). Jesús nikuʼmiin xabi̱i̱ rí mbuñíinʼ xa̱bu̱ mbo májánʼ a̱jkiu̱ún mu musngúún rí gíʼmaa muni mu Dios ma̱ndoo kaʼñúún. Rí mbiʼi xúgi̱, Jeobá xtáa raʼsngúún mbaʼin xa̱bu̱ xú káʼnii eyoo ikhaa makuwáanʼ náa Ku̱ba̱ʼ mitsaan (Sofonías 2:3). Xa̱bu̱ bi̱ nagún náa guʼwá rí nagimbíi̱n bi̱ nutaraʼa numuu Jeobá najmañún manindxu̱u̱n míjínʼ gajmiún guʼñún ga̱jma̱a̱ xúʼko̱ má gu̱ʼu̱ bi̱ guaʼdiin ajmbiuún. Ma̱ngaa naguanu nanindxuún májánʼ a̱jkiún gajmiún ejñún. Ikhiin gajmiún e̱jñún nduyamajkuíí mbá kambáxu̱u̱n Jeobá, ga̱jma̱a̱ kuma rí na̱ʼkha̱ náa Biblia ma̱ndoo mambáñún makuwa itháan májánʼ. Atraxnuu Miqueas 4:1-4.