Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Ajngáa rí májánʼ na̱ʼkha̱ náa Dios

 KÍXNUU 12

Xú káʼnii gándoo muʼguanú itháan mijngii náa Dios rá.

Xú káʼnii gándoo muʼguanú itháan mijngii náa Dios rá.

1. Lá naʼdxun Dios xúgíʼ rí nutajkháan xa̱bu̱ ráʼ.

Dios naʼthúún xúgínʼ enii xa̱bu̱ bi̱ kuwa náa xúgíʼ numbaaʼ rí ma̱ndoo maguanu itháan mijngii náa ikhaa á mu nuta káñí (Salmo 65:2). Mú ikhaa tseʼdxun xúgíʼ rí nutajkháan xa̱bu̱. Mbá xkri̱da, Dios tseʼdxun rí naʼtájkháan mbáa xa̱bu̱ á mu xa̱bu̱ bugi̱ naxnúu a̱ʼgiu̱u̱ (1 Pedro 3:7). Ma̱ngaa, índo̱ israelitas nini má xúʼko̱ dí raʼkhí, Dios na̱nguá niʼdxuun índo̱ ikhiin nitajkháan. Ra̱ʼkhá tháán májánʼ rí Dios naxnulu mu muʼgua̱nú mijngii náa ikhaa. Dios asndu naʼdxun rí nutajkháan xa̱bu̱ bi̱ nixudami̱jna̱ aʼkhá dí ra̱májánʼ wéñuʼ, i̱ndó á mu ikhiin natanga̱a̱ a̱jkiún náa Dios. Atraxnuu Isaías 1:15 ga̱jma̱a̱ 55:7.

2. Xú káʼnii gíʼmaa muʼthá káñí Dios rá.

Rí muʼtájkáan ñajunʼ mbá rí xú káʼnii mbuʼyamajkuíí Dios, ikha jngó gíʼmaa rí muʼthá káñí i̱ndó bi̱ Niʼniáanʼ, bi̱ nagumbiʼyuu Jeobá (Mateo 4:10; 6:9). Ma̱ngaa, ikháanʼ ñajunlú xa̱bu̱ aʼkhá, gíʼmaa rí muʼtájkáan ga̱jma̱a̱ mbiʼyuu Jesús, numuu rí ikhaa nikháñu ga̱jma̱a̱ aʼkhá ndrígúlú (Juan 14:6). Jeobá na̱nguá eyoo rí muʼthá kikháá ajngáa índo̱ nuʼthá káñí asndu má na̱nguá eyoo rí muraxnuu náa mbá i̱yi̱i̱ʼ o muʼthá i̱ndó rí gídáʼ edxu̱lúʼ. Ikhaa nandoo rí magajnúu asndu náa a̱jkiu̱lú rí muʼthán. Atraxnuu Mateo 6:7 ga̱jma̱a̱ Filipenses 4:6, 7.

Bi̱ Niʼniáanʼ naʼdxun índo̱ nuʼthá káñí mañúú (1 Samuel 1:12, 13). Ikhaa naʼtulúʼ rí muʼthá káñí asndu náa má mbiʼi, xóo má índo̱ nagi̱ʼdu̱u̱ ga̱jma̱a̱ índo̱ nayembá mbiʼi, ma̱ndoo muʼni índo̱ nuphiʼtsu o índo̱ nuraʼní xkujndu rí mingíjyúu. Atraxnuu Salmo 55:22 ga̱jma̱a̱ Mateo 15:36.

3. Ndíjkha nawi̱i̱n cristianos rá.

Rí mu̱ʼgua̱ kanuu náa Dios naʼni gakhi̱i̱ numuu rí kuwáanʼ náa tapu̱u̱n xa̱bu̱ bi̱ na̱nguá guáʼdáá fe náa Dios ga̱jma̱a̱ asndu nunduʼwa o nutsijma rí maʼni̱i̱ tsímáá Dios náa tsu̱du̱u̱ Ku̱ba̱ʼ (2 Timoteo 3:1, 4; 2 Pedro 3:3, 13). Índo̱ nawáanʼ  gajmiulú eʼwíínʼ a̱ngiu̱lú cristianos nuxnulu tsiakii ga̱jma̱a̱ xúʼko̱ má ikhiin mangiin. Atraxnuu Hebreos 10:24, 25.

Rí mambaxulúʼ gajmiulú xa̱bu̱ bi̱ nandún kuyáá Dios mambáyuluʼ muʼguanú itháan mijngii náa Dios. Ra̱ʼkhá tháán májánʼ mu̱ʼgua̱ náa guʼwá rí nagimbíi̱n bi̱ nutaraʼa numuu Jeobá numuu rí xúʼko̱ ma̱ndoo mambáyuluʼ fe ndrígu̱ún iʼwíínʼ. Atraxnuu Romanos 1:11, 12.

4. Xú káʼnii gándoo ikháánʼ mi̱dxu̱ʼnú itháan mijngii náa Dios rá.

Ikháánʼ ma̱ndoo mi̱dxu̱ʼnú mijngii náa Dios índo̱ gatandxaʼwaminaʼ rí xtaa ra̱jma̱ñaaʼ náa Biblia. Índo̱ nuʼgíiʼ nduʼyáá májánʼ xúgíʼ rí niʼni, consejo ndrígóo, ga̱jma̱a̱ rí naʼthí maʼni. Índo̱ nundxaʼwamijna májánʼ ga̱jma̱a̱ nuʼthá káñí Jeobá naʼni rí maʼndulúʼ kuʼyáá itháan ga̱jma̱a̱ dí ra̱ʼkhá tháán ndaʼyoo wéñuʼ. Atraxnuu Josué 1:8 ga̱jma̱a̱ Salmo 1:1-3.

Ikháánʼ ma̱ndoo mi̱dxu̱ʼnú mijngii náa Dios i̱ndó á mu nakumaʼ xtayáá má xúʼko̱, ma̱ngaa á mu xtaʼdáá fe náa ikhaa. Mú fe nindxu̱u̱ asndu xóo mbóo ixi̱ rí ndayóoʼ ma̱jnu̱ʼ iyaʼ. Ma̱ndoo matani rí maʼga̱ rajoo fe ndrígáʼ á mu ikháánʼ natatsaʼwáminaʼ rí xtaa ratatsimbaʼ ga̱jma̱a̱ numuu Dios. Atraxnuu Mateo 4:4 ga̱jma̱a̱ Hebreos 11:1, 6.

5. Xú káʼnii embáyaʼ rí mi̱dxu̱ʼnú mijngii náa Dios rá.

Jeobá naxmiéjunʼ kaʼñúún xa̱bu̱ bi̱ nandún kuyáá. Ikhaa nañewu̱u̱n xa̱bi̱i̱ náa xúgíʼ rí ma̱ndoo maʼni gachúu fe ndrígu̱ún ga̱jma̱a̱ maʼni rí makuwíin kámuu mbiʼi (Salmo 91:1, 2, 7-10). Ikhaa naxnulu consejo rí nambáyulúʼ mu muñewumíjna̱ mu xáʼñulu nandii ga̱jma̱a̱ rí makuwáanʼ gagi. Jeobá naʼsngúlúʼ rí makuwáanʼ phú májánʼ wéñuʼ. Atraxnuu Salmo 73:27, 28 ga̱jma̱a̱ Santiago 4:4, 8.