Atambaʼtaa mu matraxnuu

Anújngaaʼ náa imbo̱o̱ ináa

Bi̱ nutaraʼa numuu Jeobá

me̱ʼpha̱a̱

Informe ndrígóo reunión dí narígá mámbá tsiguʼ rí 2014

Naʼni cien tsiguʼ rí xtáa raʼtáñajunʼ Reino ndrígóo Dios

Informe ndrígóo reunión dí narígá mámbá tsiguʼ rí 2014

Nákha 4 ñajunʼ gu̱nʼ octubre tsiguʼ 2014, mbá 19,000 xa̱bu̱ nigún náa reunión dí narígá mámbá tsiguʼ dí niʼni número 130 ndrígóo Watch Tower Bible and Tract Society of Pennsylvania. Reunión nirígá náa guʼwá náa narígá Asamblea ndrígu̱ún bi̱ nutaraʼa numuu Jeobá náa xuajen Jersey (Nueva Jersey, Estados Unidos) ga̱jma̱a̱ nini rí mbuyáá mbu̱júu̱ eʼwíínʼ bi̱ kuwa náa eʼwáʼ xuajen.

Mark Sanderson, mbáa bi̱ nindxu̱u̱ Cuerpo Gobernante ndrígu̱ún bi̱ nutaraʼa numuu Jeobá, ikhaa niyéjkha̱ edxu̱u̱ náa reunión rígi̱. Nigíʼdu̱u̱ raʼthí rí nindxu̱u̱ mbá mbiʼi rí xágumati̱go̱o̱ numuu rí nagumariyaʼ rí mbá cien tsiguʼ rí xtáa raʼtáñajunʼ Jesucristo náa Reino dí rígá mekhuíí.

Ndxájulú Sanderson niʼthí rí niʼngo̱o̱ niʼni Reino xúgíʼ tsiguʼ rígi̱:

  • Mbá ñajunʼ rí najuiʼsngáa náa xúgíʼ numbaaʼ. Numuu rí Jeobá nambáñun, bi̱ testigos nuni mbá mba̱a̱ tsiakii mu magún gútaraʼa ajngáa ndrígóo Reino náa xúgíʼ tsu̱du̱u̱ Ku̱ba̱ʼ. Nákha 1914 káaʼ mbá nguáthi̱i̱n publicadores nikuwa, mú ñajunʼ rí niguma tsiguʼ 2014 niʼni mbaʼin wéñuʼ publicadores rí ni̱jkha̱nú niʼni asndu migiñuʼ millón. Ga̱jma̱a̱ muʼtáraʼa má xúʼko̱ ga̱jma̱a̱ gagi asndu índo̱ Jeobá gáʼthi rí niguámbá ñajunʼ.

  • Naxtiewu̱u̱n bi̱ kuwa náa tsu̱du̱u̱ ku̱ba̱ʼ bi̱ nuni ñajunʼ Reino. Bi̱ nutaraʼa numuu Jeobá nimíniʼ wéñuʼ ga̱jma̱a̱ numuu mbaʼa xkujndu rí nuni marigá bi̱ kuya̱ edxu̱u̱ náa religión mangiin Xa̱bu̱ Ñajunʼ. Asndu tikhun nindúún muni gámbíin. Mú, Jeobá niña̱wu̱u̱n má xúʼko̱ xa̱bi̱i̱. Ga̱jma̱a̱ naʼngu̱u̱n náa xkujndu, xó má dí niʼngo̱o̱ náa Tribunal Supremo ndrígóo Estados Unidos ga̱jma̱a̱ náa Tribunal Europeo ndrígóo Derechos Humanos, nasngájma rí Jeobá naña̱wu̱u̱n má xúʼko̱ xa̱bi̱i̱.

  • Kambáxu̱u̱n mbá xúgínʼ xa̱bu̱. Reino ndrígóo Dios naʼni rí makuwá mbá kambáxu̱u̱n xúgínʼ xa̱bu̱ bi̱ mixtiʼkhu xóo nikuwa, tséʼniuu má náa xuajñún, ajngáa dí nuthi, ga̱jma̱a̱ nambáñun muraʼníí mbaʼa enii xkujndu. “Rígi̱ nindxu̱u̱ mbá milagro rí i̱ndó Jeobá eʼngo̱o̱ eʼni”, xúʼko̱ niʼthí Mark Sanderson. Ga̱jma̱a̱ niʼthí dí ra̱ʼkhá tháán májánʼ nindxu̱u̱ rí xúgínʼ nigimbíin náa reunión rí gíʼdoo numuu.

Mbaʼa video Gambaxáʼ májánʼ ga̱jma̱ʼ Jeobá.

 

Náa programa má rígi̱ nijuiʼthá ga̱jma̱a̱ numuu mbaʼa video, rí naʼni má a̱jma̱ tsiguʼ rí xtáa ragájnuu. Timbá, ndxájulú Sanderson nixnáxe̱ mbá video náa nixtaxu̱u̱n e̱ji̱n bi̱ kuwa náa xúgíʼ tsu̱du̱u̱ numbaaʼ, ikhiin nithi dí nijmañún. Xúgíʼ rí nithi e̱ji̱n nigájnuu asndu náa a̱jkiu̱ún ga̱jma̱a̱ niʼni rí mumbiyaʼ bi̱ kuwa ikhí.

Nda̱wa̱á nigájnuu mbá video nuxi̱ʼ rí nigumbiʼyuu “Jeobá gámbáyaʼ mu xámiñaʼ”, rí ndajyúuʼ 12 minutos náa naʼni ma̱ta̱ya̱a̱ xóo nigíʼnuu ndxáʼgú israelita bi̱ na̱ʼkha̱ raʼthí náa Biblia bi̱ támiñuu maʼthúu̱n a̱ʼgiu̱u̱ Naamán ga̱jma̱a̱ numuu Jeobá (2 Reyes 5:1-14). Video nigájnuu náa jw.org na̱ʼkha̱ lunes 6 ñajunʼ gu̱nʼ octubre tsiguʼ 2014, ga̱jma̱a̱ rígá náa itháan dí 20 ajngáa.

Aplicación JW Language.

 

Ndxájulú Sanderson niʼthí rí aplicación nuxi̱ʼ rígi̱ ma̱ndoo majmaa náa teléfonos, computadoras ga̱jma̱a̱ tabletas, rí ma̱ndoo mambáñun bi̱ nandún majmañún mbá ajngáa mu mutaruʼun itháan xa̱bu̱. Aplicación rígi̱ gíʼdoo itháan dí 4,000 tsinaʼ náa 18 ajngáa. Ga̱jma̱a̱ naguma ratháá mu marigá i̱ʼwáʼ tsinaʼ ga̱jma̱a̱ presentación mu majmaa miʼtáraʼa, xó má i̱ʼwáʼ.

JW Broadcasting.

 

Bi̱ kuwa ikhí niguanún tsiánguá índo̱ nijuiʼthá rí marigá mbá nuxi̱ʼ canal ndrígu̱ún bi̱ nutaraʼa numuu Jeobá rí ma̱ndoo ma̱ta̱ya̱a̱ náa Internet. Nindxu̱u̱ mbá canal dí rígá niʼcho̱o̱ náa ajngáa inglés. Asndu náa guʼwá dí nuxna ikha náa Brooklyn (Nueva York, Estados Unidos), náa canal rígi̱ manújngoo videos, ajmúú ga̱jma̱a̱ aʼwá rí nigixi̱i̱ rí nagájnuu náa Biblia. Ma̱ngaa, mámbá gu̱nʼ ma̱ndoo ma̱ta̱ya̱a̱ mbá programa kiejunʼ rí naxná mbáa ndxájulú bi̱ nindxu̱u̱ Cuerpo Gobernante o mbáa bi̱ nambáñun comités.

A̱ngiu̱lú nindoo ndiyáá náa programa rí mámbá igu̱nʼ xú káʼnii nigidoʼ timbá ñajunʼ dí niguma, rí nixná Stephen Lett, ndrígóo Cuerpo Gobernante, náa niʼni manújngoo mbóo video náa naʼthí ga̱jma̱a̱ numuu ñajunʼ dí nirígá mu maguma canal rígi̱. JW Broadcasting nigíʼdu̱u̱ nirígá nákha 6 ñajunʼ gu̱nʼ octubre tsiguʼ 2014 ga̱jma̱a̱ nandoo ma̱ta̱ya̱a̱ náa tv.jw.org.

“El Reino: cien años y sumando.”

Samuel Herd, bi̱ nindxu̱u̱ mbáa bi̱ Cuerpo Gobernante, nigájnuu náa mbá video dí naʼthí xú káʼnii Reino ndrígóo Dios nañambá mámbá mbiʼi mu miʼtáraʼa itháan májánʼ. Náa video rígi̱ na̱ʼkha̱ foto rí nirawíi wajyúúʼ, video ndrígóo kixnáxe̱ ndaʼya ga̱jma̱a̱ experiencia dí nigíʼniin Testigos bi̱ nduyáá wéñuʼ. Ma̱ngaa niʼthí ndiéjunʼ nijmaa nákha ikhú mu miʼtáraʼa, rí xú káʼnii nini mu mbuyáá mbaʼin xa̱bu̱ “Foto-Drama de la Creación”, dí nijmún gramófonos ga̱jma̱a̱ tarjetas dí nijmún mutaraʼa, rí nijngruigu̱u̱n kudúún pancartas ga̱jma̱a̱ carro dí kagu̱ bocina rí naxná discurso. Ma̱ngaa, niʼthí mbaʼa escuelas rí najuiʼsngáa ga̱jma̱a̱ numuu Biblia rí nirígá mu miʼsngáa xú káʼnii miʼtáraʼa.

Ndiéjunʼ embáyulúʼ índo̱ nundxaʼwamíjná dí niʼngo̱o̱ niʼnii Reino náa cien tsiguʼ rígi̱ rá. Nduʼyáá kaʼwu dí Reino xtáa ga̱jma̱a̱ naʼni dí makuwáanʼ gagi dí maʼni nda̱wa̱á.

Ajmúú mu mbiʼyamajkuíí Jeobá.

Xúgínʼ bi̱ nigimbúun nikuwa gagi índo̱ David Splane, bi̱ nindxu̱u̱ Cuerpo Gobernante, niʼthí rí libro ndrígúlú Cantemos a Jehová maguma̱a̱. Ajmúú gíʼdoo wéñuʼ numuu mu mbuʼyamajkuíí Jeobá, cántico maguma ga̱jma̱a̱ material dí itháan májánʼ. Xtóo mani xú káʼnii Biblia, ga̱jma̱a̱ rawunʼ maʼni ngidiʼ.

Ndxájulú Splane niʼthí rí marigá i̱ʼwáʼ ajmúú nuxi̱ʼ. Mú xáʼyóoʼ muguaʼthi̱i̱n asndu maguma imprimir cántico nuxi̱ʼ mu muʼni ajmúú, numuu dí magajnúu náa jw.org xóo gáʼga ragájnuu.

Náa reunión dí narígá mámbá tsiguʼ nini ajmúú ajtsú cántico nuxi̱ʼ, dí ninigajmaa ma xmáná rúʼko̱ bi̱ kuwa náa Betel. Ndxájulú Splane niyéjkha̱ edxu̱u̱ náa mbá coro bi̱ nini ajmúú dí mbiʼyuu ¡Qué venga el Reino establecido por Dios!, dí niguma mu magumariyaʼ cien tsiguʼ dí nigíʼdu̱u̱ nirígá Reino. Nda̱wa̱á xúgínʼ bi̱ kuwa ikhí nini ajmúú gajmiún coro. Nda̱wa̱á, nini ajmúú cántico nuxi̱ʼ dí mbiʼyuu Danos fuerzas y valor.

Entrevista.

Gerrit Lösch, ndrígóo Cuerpo Gobernante, ndiyá edxu̱u̱ náa nini manújngoo mbá entrevista rí nigumiin grabar ajtsíin bi̱ nidamijná bi̱ kúwi̱i̱n mba̱yu̱ʼ tsiguʼ nuyambáá náa Betel. Nithi ga̱jma̱a̱ numuu mbá dí nixtiʼkhuu náa xúgíʼ tsiguʼ rí ninújngoo, dí nasngájma rí nda̱joo xuajñu Dios. Ndxájulú Lösch niʼthí rí Biblia niʼtáriyaʼ dí maʼga̱ raʼni itháan májáánʼ organización ga̱jma̱a̱ niʼthún xúgínʼ dí mumbayíí xuajñu Jeobá (Isaías 60:17).

“Tipos ga̱jma̱a̱ antitipos.”

Ndxájulú Splane niʼthí náa discurso rígi̱ náa numuu dí nánguá ejmaa náa i̱yu̱lúʼ ajngáa tipos ga̱jma̱a̱ antitipos.

Nákha ginii nuthi rí mbaʼin xa̱bi̱i̱ Dios bi̱ nikuwa nákha wajyúúʼ nindoo gáʼthúu̱n cristianos bi̱ kuwaa xúgi̱. Ma̱ngaa nikumu̱ún dí xúgíʼ rí na̱ʼkha̱ raʼthí náa Biblia nandoo gáʼthúu̱n ga̱jma̱a̱ numún bi̱ nutaraʼa numuu Jeobá. Ndayóoʼ mbuʼyáá dí ra̱ʼkhá tháán májánʼ miʼnigajmaa dí nirígá nákha wajyúúʼ. Mú, ndíjkha rí náa i̱yu̱lúʼ na̱nguá ethi ga̱jma̱a̱ numuu tipos ga̱jma̱a̱ antitipos rá.

Gajkhun má dí náa Biblia naʼthí rí tikhun xa̱bu̱ ga̱jma̱a̱ dí nirígá nandoo gáʼthúu̱n mbá o mbáa bi̱ giʼnii. Índo̱ Escrituras nasngájmaa dí mbá relato nindxu̱u̱ mbá rí kiʼtáriyaʼ, nundrígú ga̱jma̱a̱ xúgíʼ a̱jkiu̱lú. “Mu á mu Biblia nda̱a̱ dí eʼthí, xúʼko̱ má mangáanʼlu”, niʼthí ndxájulú Splane. Ikha jngó, ragíʼmaa mbuʼyááʼ kuduun kayuʼ ndiéjunʼ e̱yo̱o̱ gáʼthúu̱n mámbá relato. Á mu nuʼni, ma̱ndoo mandátigulú dí naʼsngúlúʼ relato dí na̱ʼkha̱ náa Biblia, tséʼniuu á mu maraxtaa mekhuíí o makuwáanʼ náa tsu̱du̱u̱ ku̱ba̱ʼ (Romanos 15:4).  *

“Lá ma̱ngaa maraxtaa xawii ikháánʼ ráʼ.”

Náa discurso rígi̱, ndxájulú Lett niʼthí xóo gíʼmaa makru̱ʼu̱lú xkri̱da ndrígu̱ún gu̱wi̱nʼ wa̱ʼxa̱ʼ bi̱ xóó tsínuju̱nʼ (Mateo 25:1-13). Rí xúgi̱ nakru̱ʼu̱lú mixtiʼkhu xkri̱da rígi̱: Novio nindxu̱u̱ Jesús, ga̱jma̱a̱ wa̱ʼxa̱ʼ bi̱ tsínuju̱nʼ ni̱ndxu̱ún xa̱bi̱i̱ Jesús bi̱ kaxtaʼwíin (Lucas 5:34, 35; 2 Corintios 11:2). Xkri̱da naʼthí ga̱jma̱a̱ numuu rí iwáá mbiʼi ma̱ngaa rí ma̱mbá índo̱ gáʼkha̱nú gaʼkhu rí majphú mba̱a̱. Índo̱ niʼthí rí witsuun wa̱ʼxa̱ʼ bi̱ xóó tsínuju̱nʼ tsénimbu̱ún, o bi̱ tséndxa̱ʼwa̱a̱ májánʼ edxu̱ún, Jesús na̱nguá nindoo gáʼthi rí mbaʼin bi̱ kaxtaʼwíin xáguajun jmbu ga̱jma̱a̱ rí maxtiʼkhu̱u̱n. Rí phú niʼni, niʼthún rí muñeumíjna̱. Mámbíin bi̱ kaxtaʼwíin guáʼdáá a̱jma̱ eni rí muni: Muniratamijná ga̱jma̱a̱ makuwá xawii xó má witsuun wa̱ʼxa̱ʼ bi̱ xóó tsínuju̱nʼ bi̱ nundxa̱ʼwa̱a̱ májánʼ edxu̱ún, o rí xáguajun jmbu xó má witsuun gu̱ʼu̱ bi̱ xóó tsínuju̱nʼ bi̱ túndxa̱ʼwa̱a̱ májánʼ edxu̱ún.

Xó má nijuiʼthá náa discurso rí ninújngoo, ragíʼmaa mbuʼyááʼ xúgíʼ rí eyoo gáʼthi xkri̱da rígi̱. Itháan májánʼ rí mundxaʼwamíjna̱ rí eʼsngúlúʼ ikhí. Xúgiáanʼ ikháanʼ, á mu ni̱ndxu̱lú mbáa bi̱ kaxtaʼwíin o “iʼwíínʼ mugu̱”, gíʼmaa muʼni rí mambiʼi aguʼ ndrígúlú ga̱jma̱a̱ makuwáanʼ xawii. (Juan 10:16; Marcos 13:37; Mateo 5:16) Nimbáa xándoo mawiji̱ jmbu ga̱jma̱a̱ numulúʼ. Mámbáa cristiano gíʼmaa dí maraʼwíí maxtáa. Xú káʼnii rá. Rí maxtáa xawii ga̱jma̱a̱ rí maʼtáraʼa ga̱jma̱a̱ gagi (Deuteronomio 30:19).

“Xkri̱da ndrígóo talentos.”

Nda̱wa̱á, ndxájulú Anthony Morris, ndrígóo Cuerpo Gobernante, nimbañúún bi̱ kuwa ikhí mú makru̱ʼu̱u̱n imbo̱o̱ nuxi̱ʼ kiʼsngáa ga̱jma̱a̱ numuu xkri̱da ndrígóo talentos (Mateo 25:14-30). Dí xúgi̱ nafraʼalo rí bi̱ kaʼyoo xkri̱da rúʼko̱ nindxu̱u̱ (Jesús) ikhaa maʼni tsajkurámiinʼ ñumbáá ndrígóo (ñumbáá ndrígóo bi̱ kaxtaʼwíin bi̱ ñajunʼ jmbiin náa tsu̱du̱u̱ ku̱ba̱ʼ) rí nda̱wa̱á, índo̱ gáʼga̱nú mbiʼi ikhaa maxnún mbiʼi kámuu náa mekhuíí. Índo̱ niʼthí ndiéjunʼ gágíʼnuu esclavo bi̱ ra̱májánʼ ga̱jma̱a̱ bi̱ naskhún, mu Jesús tándoo gáʼthi dí xúgínʼ bi̱ kaxtaʼwíin xánindxu̱ún jmbiin. Mú, niʼtámuʼún dí gíʼmaa muni: Muni tsumáá ga̱jma̱a̱ xáguaʼdáá mbá ku̱ma̱ dí ra̱májánʼ.

Ndiéjunʼ eʼsngúlúʼ xkri̱da rígi̱ rá. Bi̱ ndrígóo nixnúún mbá ñajunʼ dí ra̱ʼkhá tháán gíʼdoo numuu muni ñumbáá ndrígóo. Xúʼko̱ ma Jesús, ma̱ngaa nixnúún ñajunʼ muni xa̱bi̱i̱ dí ra̱ʼkhá tháán gíʼdoo numuu: Rí miʼtáruʼun xúgínʼ xa̱bu̱. Ikhaa gíʼthu̱u̱n dí xúgínʼ muyambáá májánʼ náa ñajunʼ rígi̱, muʼni xúgíʼ asndu xó ma eʼngulú muʼni. Nda̱wa̱á ndxájulú, Morris nixnúún tsiakii mbá xúgínʼ ga̱jma̱a̱ ñajunʼ rí runi numuu Reino.

“Tsáa gáʼni gínáa xuajñu Dios nguáthá mbiʼi nda̱wa̱á rá.”

Título ndrígóo discurso dí niguámbá ga̱jma̱a̱, dí nixná ndxájulú Geoffrey Jackson, mbáa bi̱ nindxu̱u̱ Cuerpo Gobernante, niʼni dí bi̱ kuwa ikhí maʼndún mbuyáá itháan. Ikhí niʼthí dí mbégu̱ʼ má Gog de Magog maʼni gínáa xuajñu Dios. Ezequiel 38:14-23.

Nákha ginii nijuiʼthá dí Gog nindxu̱u̱ Satanás nda̱wa̱á rí nixkruiguíi mekhuíí. Mú, ndxájulú Jackson niʼthí dí kiʼsngáa rígi̱ naʼni dí maguaʼdáá mbaʼa graxe̱ dí gíʼdoo wéñuʼ numuu. Mbá xkri̱da, Jeobá niʼtáriyaʼ rí índo̱ Gog gaguma gámbáa, mani̱ndxu̱u̱ ganitsu ndrígu̱ún ‹xúgínʼ ñu̱ʼu̱ bi̱ naʼphu̱ xuwiʼ ga̱jma̱a̱ xujkhúʼ bi̱ kuwa xanáá› (Ezequiel 39:4). Jeobá ma̱ngoo niʼtáriyaʼ dí “Gog gajmíi̱n xúgínʼ xa̱bi̱i̱” majuiʼdiín náa ku̱ba̱ʼ (Ezequiel 39:11). Ikha jngó, lá ma̱ndoo magíʼnuu rígi̱ mbáa bi̱ na̱nguá xú mbuʼyáá ráʼ. Satanás midama̱ʼa̱n náa abismo mbá mil tsiguʼ, nimbáa xándoo mikhu̱u̱ ni má xándoo majuiʼdi̱i̱ (Revelación [Apocalipsis] 20:1, 2). Índo̱ gáramuʼ mil tsiguʼ, Satanás muniñaʼ magajnáa náa abismo ga̱jma̱a̱ “magajnúu maʼninduwiinʼ xuajin mba̱ʼu̱ dí rígá náa mbájndi tsu̱du̱u̱ ku̱ba̱ʼ, Gog ga̱jma̱a̱ Magog” (Revelación 20:7, 8). Xó má eʼyáá, Satanás xándoo maʼni nduwaʼ Gog á mu dí ikhaa má nindxu̱u̱ Gog.

Ndxájulú Jackson niʼthí rí Gog ndrígóo Magog bi̱ najuiʼthá ga̱jma̱a̱ numuu náa dí niʼtáriyaʼ Ezequiel xándoo gánindxu̱u̱ Satanás, nindxu̱u̱ mbaʼa xuajen mba̱ʼu̱ rí muni gínáa xuajñu Dios nda̱wa̱á. Ma̱ngoo, rí Gog maʼni gíníi xuajñu Dios ikhaa má nindxu̱u̱ rí maʼni ‹rey bi̱ xtáa norte› ga̱jma̱a̱ ikhaa má nindxu̱u̱ dí muni ‹reyes bi̱ kuwa náa xúgíʼ tsu̱du̱u̱ ku̱ba̱ʼ› (Daniel 11:40, 44, 45; Revelación 17:12-14; 19:19).

Mú tsáa nindxu̱u̱ ‹rey bi̱ xtáa norte› rá. Mbaʼyóoʼ muguaʼthi̱i̱n mu mbuʼyáá tsáa. Mú, índo̱ nduʼyáá dí nakru̱ʼu̱lú itháan májánʼ dí marigá nda̱wa̱á índo̱ inu má mambanúu naʼni itháan gujkhuʼ fe ndrígúlú. Xuajñu Dios na̱nguá emíñuu dí maʼni Gog ndrígóo Magog numuu dí índo̱ gárígá, Gog maguma gámbáa. Ikhú ikháanʼ makuwáanʼ kámuu mbiʼi. *

Rí naguámbá.

Ndxájulú Sanderson niʼthí rí Traducción del Nuevo Mundo rí niguma májáánʼ marigá ma̱jkha̱ʼ rí ma̱ndoo matrajkuáa náa búxáʼ. Ma̱ngaa niʼthí rí kuwa runi májáánʼ aʼwá ndrígóo Biblia rí magi̱xi̱i̱. Gi̱jyooʼ majmaa mbá aʼwá mixtiʼkhu náa mámbáa xa̱bu̱ bi̱ na̱ʼkha̱ raʼthí náa Biblia. Aʼwá rígi̱ maʼga̱ ragájnuu náa jw.org ga̱jma̱a̱ magi̱ʼdu̱u̱ ga̱jma̱a̱ libro ndrígóo Mateo.

Nijuiʼthá rí texto ndrígóo tsiguʼ 2015 maʼni Salmo 106:1: “Guxna̱a̱ núma̱aʼ Jeobá, numuu rí ikhaa nindxu̱u̱ májáánʼ”. Ikhú, ndxájulú Sanderson niʼthún bi̱ kuwa ikhí rí guyááʼ mámbá mbiʼi mbá numuu mu muxna̱a̱ núma̱aʼ Jeobá.

Mu ma̱mbá reunión, mbá juwi̱i̱n bi̱ ni̱ndxu̱ún Cuerpo Gobernante niwi̱i̱n náa coro mu muni ajmúú gajmiún xúgínʼ bi̱ kuwa ikhí mbá nuxi̱ʼ ajmúú rí nagumbiʼyuu El gran nombre de Jehová. ¡Mbá ajmúú dí ra̱ʼkhá tháán májánʼ ma̱mbá ga̱jma̱a̱ reunión rígi̱ rí gíʼdoo wéñuʼ numuu!

^ párr. 25 Discurso rígi̱ ga̱jma̱a̱ a̱jma̱ rí na̱ʼkha̱ nda̱wa̱á, maʼthí xóó itháan náa revista Bi̱ Nayejngoo rí 1 ñajunʼ gu̱nʼ marzo tsiguʼ 2015

^ párr. 33 Naʼthí xóó itháan ga̱jma̱a̱ numuu discurso rígi̱ náa revista Bi̱ Nayejngoo rí 1 ñajunʼ gu̱nʼ mayo tsiguʼ 2015.