Atambaʼtaa mu matraxnuu

Anújngaaʼ náa imbo̱o̱ ináa

Bi̱ nutaraʼa numuu Jeobá

me̱ʼpha̱a̱

Cuerpo Gobernante naxnún tsiakii Testigos bi̱ kuwa Rusia ga̱jma̱a̱ Ucrania

Cuerpo Gobernante naxnún tsiakii Testigos bi̱ kuwa Rusia ga̱jma̱a̱ Ucrania

“¡Nindoo ndiya̱a̱xu dí ra̱ʼkhá tháán eñún kuyuxu!” Xúʼko̱ niʼthí mbáa a̱ʼgu̱ ucraniana índo̱ niguámbá nigixnuu mbá carta dí gíʼdoo wéñuʼ numuu ndrígóo Cuerpo Gobernante ndrígu̱ún bi̱ nutaraʼa numuu Jeobá. Stephen Lett, mbáa bi̱ nindxu̱u̱ Cuerpo Gobernante, niguxnuu carta rígi̱ índo̱ ni̱jkha̱ Ucrania mbiʼi sábado ga̱jma̱a̱ domingo nákha niʼni 10 ga̱jma̱a̱ 11 ñajunʼ gu̱nʼ mayo tsiguʼ 2014. Mbá 165,000 bi̱ nutaraʼa numuu Jeobá nidxawíín.

Nigixnuu carta rígi̱ ga̱jma̱a̱ mbaʼa discurso dí nagájnuu náa Biblia náa mbá witsu ajngáa, ma̱ngaa nigrigu mbu̱júu̱ dí niguma grabar, náa mbá 700 Salón ndrígóo Reino (guʼwá dí nagimbíi̱n Testigos mu muxná gamajkhu Dios) náa xúgíʼ Ucrania.

Ikhaa má sábado ga̱jma̱a̱ domingo rúʼko̱, Mark Sanderson, imba̱a̱ bi̱ nindxu̱u̱ Cuerpo Gobernante, niguxnuu ikhaa carta náa mbá reunión dí nirígá náa xuajen Rusia. Reunión rígi̱, nirawíi ajngáa náa mbá 14 ajngáa ga̱jma̱a̱ mbá 180,413 Testigos náa mbá 2,500 congregación dí rígá náa Rusia ga̱jma̱a̱ Bielorrusia nindoo nidxawíín.

Carta ndrígóo Cuerpo Gobernante ni̱jkha̱ náa congregación rí rígá náa Rusia ga̱jma̱a̱ Ucrania. Ndxájulú Sanderson niguxnuu náa ajngáa ruso, ga̱jma̱a̱ sucursal ndrígu̱ún Testigos bi̱ kuwa Rusia niʼnirámáʼ: “Dí naxmiéjunʼ Cuerpo Gobernante kaʼyoo congregación dí rígá ge̱jyooʼ, niʼni dí a̱ngiu̱lú makuwá gagi wéñuʼ. Nindoo ndiyáá rí Cuerpo Gobernante nandoo kaʼñúún wéñuʼ”.

Nigumaraʼmáʼ carta rígi̱ numuu dí maxnún tsiakii Testigos bi̱ kuwa náa xuajen rúʼko̱, numuu dí xa̱bu̱ político tséniñúnʼ muni ñajunʼ Dios. Niʼthún a̱ngiu̱lú rí maguajún jmbu ga̱jma̱a̱ rí munimbaníí ikha dí na̱ʼkha̱ náa Biblia náa naʼthí dí ragíʼmaa muxuʼdámi̱jna̱ náa política dí rígá numbaaʼ rígi̱. (Juan 17:16).

Ikha jngó, Cuerpo Gobernante niʼni marmáʼáan a̱jkiu̱ún a̱ngiu̱lú dí gíʼdoo numuu rí mutajkáan, rí munigajmaa ga̱jma̱a̱ mundxaʼwamíjna̱ dí eraxnuu náa Ajngá rawunʼ Jeobá mú xúʼko̱ mambaxúún gajmiún. Ma̱ngaa niʼthún dí munimbu̱ún rí nakudaminaʼ maʼni Dios dí naʼthí náa Isaías 54:17: “Tséʼniuu má ndiéjunʼ nindxu̱u̱ rí gátuxuu ga̱jma̱a̱ numaʼ, xáʼga̱nú marigá”.

Náa naguámbá carta naʼthí: “Nanduxuʼ kuyalaʼ wéñuʼ xúgiáanʼ. Gajkhun dí na̱nguá embumuxu kuyalaʼ ga̱jma̱a̱ nutakáñiixu má xúʼko̱ Jeobá ga̱jma̱a̱ numala”.

Sucursal dí rígá Ucrania niʼthí xú káʼnii nikumu̱ún a̱ngiu̱lú ga̱jma̱a̱ numuu visita rígi̱: “A̱ngiu̱lú ra̱ʼkhá tháán gagi kuwa numuu rí Cuerpo Gobernante naxmiéjunʼ kaʼñúún. Rí ndxájulú Sanderson ni̱jkha̱ Rusia ikhaa má mbiʼi rí ndxájulú Lett ni̱ʼkha̱ Ucrania nasngájma rí náa xuajñu Dios kuwa mbá kambáxu̱u̱n ma̱ngaa nisngájmun a̱ngiu̱lú rí Jeobá ga̱jma̱a̱ Jesús nandún kuñún. Xúgiáanʼxu nakumuxu dí ra̱ʼkhá tháán májánʼ rí niguwaʼ índo̱ phú ndayúxuʼ. Dí xúgi̱ guáʼdááxu tsiakii mu muraʼnííxu asndu xú káʼnii xkujndu ga̱jma̱a̱ munixu má xúʼko̱ ñajunʼ Jeobá”.