Atambaʼtaa mu matraxnuu

Anújngaaʼ náa imbo̱o̱ ináa

Bi̱ nutaraʼa numuu Jeobá

me̱ʼpha̱a̱

Náa xaxi ndrígóo Amazonas narígá imbo̱o̱ nuxi̱ʼ Guʼwá náa narígá Asamblea

Náa xaxi ndrígóo Amazonas narígá imbo̱o̱ nuxi̱ʼ Guʼwá náa narígá Asamblea

Náa tapo̱o̱ xaxi ndrígóo Amazonas niguma mbóo Guʼwá náa narígá Asamblea ndrígu̱ún bi̱ nutaraʼa numuu Jeobá rí naʼni manigu̱nʼ mbaʼin xa̱bu̱. Rígi̱ rígá náa norte ndrígóo xuajen Manaos (Brasil), náa mbaaʼ rígi̱ gíʼdoo 52 hectáreas (128 acres) ma̱ngaa náa rawunʼ rígá wéñuʼ ixi̱ maxaʼ. Kúwi̱i̱n mbaʼin guacamayos, tucán ga̱jma̱a̱ eʼwíínʼ ño̱ʼo̱ bi̱ nundxa̱ʼwa̱ asndu náa ixi̱, Xó má náa ixi̱ ndrígóo tsídaa o rajtsi dí rígá Brasil, ixi̱ ndrígóo cupuarana ga̱jma̱a̱ ixi̱ rí mbiʼyuu angelim pedra. Náa numuu rí niguma mbá Guʼwá náa narígá Asamblea ikhí rá.

Xuajen Manaos —naguanúu 1,450 kilómetros (900 millas) náa na̱jkha̱nú mañu ndrígóo Amazonas— itháán maʼni dos millones xa̱bu̱ kúwi̱i̱n ikhí. Guʼwá náa narígá Asamblea rígi̱ naʼngo̱o̱ najchún mbá 7,000 Testigos bi̱ kúwi̱i̱n náa Manaos ga̱jma̱a̱ bi̱ kúwi̱i̱n mijngii má ikhí ma̱ngaa xa̱bu̱ bi̱ na̱nguá kúwi̱i̱n náa mijngii Amazonas. Xuajen dí itháan mitsinguánʼ nindxu̱u̱ São Gabriel da Cachoeira, naʼni itháán dí 800 kilómetros (500 millas) náa oeste ndrígóo Manaos. Mu maguánu náa guʼwá náa narígá Asamblea rígi̱, tikhun Testigos ndayóoʼ maguwáʼ ajtsú mbiʼi ga̱jma̱a̱ lancha.

Mu maguma Guʼwá náa narígá Asamblea náa tapoo Amazonas ndiyóoʼ mba̱a̱ tsiakii. Ndiyóoʼ dí mbá 13 carros magajnúu asndu náa puerto ndrígóo xuajen Santos (São Paulo) mu maguwáʼ kudúún dí majmaa náa maguma guʼwá, niguwáʼ mbá rawunʼ iyaʼ asndu náa na̱jkha̱nú mañu ndrígóo Amazonas nda̱wa̱á ndiyóoʼ manújngún mañu mu maguánu náa naguma guʼwá.

Ga̱jma̱a̱ dí niguma rígi̱, naʼni má 27 Guʼwá náa narígá Asamblea náa Brasil. Nákha domingo 4 ñajunʼ gu̱nʼ mayo tsiguʼ 2014 nini ndxo̱o̱ numuu rí niguámbá ga̱jma̱a̱ nikúwi̱i̱n mbá 1,956 xa̱bu̱. Mbaʼin nidxún wéñuʼ numuu dí timbáa aʼphu̱ ewi̱i̱n náa mbá Guʼwá náa narígá Asamblea.

Bi̱ nikúwi̱i̱n raʼkháa i̱ndó nidxawíín ma̱ngaa nindoo ndiyáá bi̱ naxná discurso. Ninindxu̱u̱ kiejunʼ numuu dí nákha ginii raʼkháa xúgínʼ nandoo nduyáá plataforma ní má bi̱ naxná discurso. Mbáa Testigo niʼthí: “Mba̱yu̱ʼ tsiguʼ na̱ʼkhá asamblea mú nimbá míʼtsú tándoo mba̱yo̱o̱ kixnáxe̱ ndaʼya; i̱ndó nandoo nadxawun”. Mú dí xúgi̱, xúgínʼ nandoo nduyáá plataforma.