Náa México ga̱jma̱a̱ witsu xuajen mba̱ʼu̱ ndrígóo Centroamérica, niñambá mbá 290 xa̱bu̱ mu murawíi ajngáa i̱yi̱i̱ʼ dí naʼthí ga̱jma̱a̱ numuu Biblia ndrígu̱ún bi̱ nutaraʼa numuu Jeobá náa mbá 60 ajngáa. Náa numuu rí ndayóoʼ murawíi ajngáa i̱yi̱i̱ʼ rúʼko̱ rá. Numuu rí índo̱ xa̱bu̱ nuraxnuu náa ajngún i̱yi̱i̱ʼ rígi̱, tséʼniún mingíjyúuʼ makru̱ʼu̱u̱n ga̱jma̱a̱ dí na̱ʼkha̱ raʼthí na̱jkha̱nú asndu náa a̱jkiu̱ún (1 Corintios 14:9).

Mu ma̱ndoo murawíi ajngáa itháan májánʼ, tikhun bi̱ nurawíi ajngáa bi̱ nuñajunʼ náa oficina ndrígu̱ún bi̱ nutaraʼa numuu Jeobá dí rígá xuajen México nigún gákuwá náa xuajen dí nuthi ajngáa ndrígu̱ún. Rí xúgi̱, bi̱ nurawíi ajngáa nandoo nutamijná gajmiún xa̱bu̱ bi̱ nuthi ajngún, rígi̱ nambáñun murawíi ajngáa i̱yi̱i̱ʼ rí asndu xáʼniun mingíjyúuʼ makru̱ʼu̱u̱n xa̱bu̱.

Ndiéjunʼ ethi bi̱ nurawíi ajngáa ga̱jma̱a̱ numuu dí nixtiʼkhuu rígi̱ rá. Federico, bi̱ naguwíi ajngáa náa náhuatl ndrígóo Guerrero, niʼthí: “Itháán maʼni gu̱wa̱ʼ tsiguʼ dí nixtáá náa xuajen México, i̱ndó mbáa xa̱biya̱ gajmíi̱n e̱ji̱i̱n ga̱jma̱a̱ a̱ʼgiu̱u̱ nixkamin bi̱ nuthi ajngóʼ. Mú náa xuajen dí rígá mijngii náa oficina náa nuráwíixu ajngáa, xúgínʼ xa̱bu̱ nuthi”.

Karin, bi̱ naguwíi ajngáa náa bajo alemán bi̱ ni̱jkha̱a̱ náa estado ndrígóo México dí mbiʼyuu Chihuahua, naʼthí: “Dí maxtáá náa kuwa menonitas nambáyuʼ mba̱yo̱o̱ náa biʼyaa ajngáa ejmúún. Kuwáanʼxu ga̱jma̱a̱ nuñajunʼxu náa mbá xuajen chíʼgíʼ, índo̱ nuyexixu náa ventanas, ndu̱ñu̱u̱nxu xa̱bu̱ bi̱ mambáñun ñajunʼ rí nunixu”.

Neyfi, bi̱ naguwíi ajngáa maya bi̱ xtáa Mérida (México), naʼthí: “Índo̱ nusngáaxu ga̱jma̱a̱ numuu Biblia náa maya, nandoo ndu̱ya̱xu náa biʼyaa ajngáa na̱nguá ekru̱ʼu̱u̱n májánʼ xa̱bu̱. Ikhú, nandoo najmuxu i̱ʼwáʼ ajngáa rí najmún”.

Xú káʼnii embáñun bi̱ nuraxnuu i̱yi̱i̱ʼ náa ajngún rá. Gúʼgíʼ mbá xkri̱da. Mbá a̱jma̱ skíñúʼ tsiguʼ, Elena, bi̱ naʼthí ajngáa tlapaneco asndu nákha chíʼgíʼ, ni̱jkha̱ mámbá xmáná náa reunión ndrígu̱ún bi̱ nutaraʼa numuu Jeobá náa nuthi xtílo̱o̱. Mú na̱nguá ekro̱ʼo̱o̱ dí nusngáa ikhí. Ikhaa naʼthí: “Na̱jkhá náa nagimbíin numuu dí nakumuʼ dí gíʼmaa maxtáá ikhí”. Mú índo̱ nigíʼdu̱u̱ raʼnigajma̱a̱ Biblia ga̱jma̱a̱ tikhuu folleto dí rígá me̱ʼpha̱a̱, nindoo kaʼyoo Dios rí asndu nijngún iyááʼ mu maxnáximinaʼ ikhaa nákha tsiguʼ 2013. Elena naʼthí: Naxna̱a̱ núma̱aʼ Jeobá numuu dí nimbáyuʼ makro̱ʼo̱o̱ rí gajkhun”.