Tséniʼñáaʼ rambáxuxu gajmiúxu̱ bi̱ niniñaʼ rutaraʼa ga̱jma̱a̱ bi̱ nánguá egún náa nagimbáanʼ bi̱ nijngún má iyááʼ xóo xa̱bi̱i̱ Jeobá. Rí phú nunixu, nunimijnaxu mumbáñuun mu matangi̱i̱n náa Dios ga̱jma̱a̱ muni má xúʼko̱ ñajunʼ ndrígóo.

Índo̱ mbáa xa̱bi̱i̱ Jeobá nijngúun má iyááʼ nakudaminaʼ mbá aʼkhá mba̱a̱, ma̱ndoo magumaa expulsar náa congregación. Mú tsegumaa expulsar núkhu má ikhú. Á mu xa̱bu̱ naʼni má xúʼko̱ aʼkhá ga̱jma̱a̱ tséʼnimbánuu rí na̱ʼkha̱ náa xtángoo ga̱jma̱a̱ tsetanga̱a̱ a̱jkiu̱u̱n, ikhú dí nagumaa expulsar, ga̱jma̱a̱ congregación nuniñaʼ rambáxu̱u̱n gajmiún. Náa Biblia naʼthí kaʼwu: “Guríyala xa̱bu̱ xkawiʼ buʼko̱ náa ikháanʼla” (1 Corintios 5:13).

Ndiéjunʼ erígá á mu mbáa xa̱biya̱ nagumaa expulsar, mú a̱ʼgiu̱u̱ gajmíi̱n e̱ji̱i̱n ni̱ndxu̱ún má xúʼko̱ xa̱bi̱i̱ Jeobá rá. Maski ajndu nixtiʼkhuu rí nambáxu̱u̱n gajmiún Dios, mú tsixtiʼkhuu xóo kuwa mbá guʼwíin. Rí nambáxu̱u̱ ga̱jma̱a̱ a̱ʼgiu̱u̱ ma̱ngaa rí maʼndoo kaʼñúún e̱ji̱i̱n tsixtiʼkhuu.

Bi̱ nigún expulsado ma̱ndoo magún náa nagimbáanʼ, ga̱jma̱a̱ á mu nandún bi̱ kuya̱ edxu̱u̱ náa congregación ma̱ndoo mumbañún. Rí phú nandulúʼ rí mugíʼ munimbánii rí naxtanda̱ʼa̱ mu mani̱ndxu̱ún mbu̱júu̱ xa̱bi̱i̱ Jeobá. Expulsado bi̱ nuni gaʼduunʼ aʼkhá rí xkawiʼ ga̱jma̱a̱ nusngajma rí nandún munimbánii ikha rí tsixtiʼkhuu rí na̱ʼkha̱ náa Biblia ma̱ndoo makuwá mbu̱júu̱ náa congregación.