Xúʼko̱, bi̱ ñajunxu xa̱bi̱i̱ Jeobá numbañúnxu eʼwíínʼ xa̱bu̱ índo̱ narígá gamiéjunʼ. Nuxnu̱u̱nxu rí nda̱ñúnʼ xa̱bi̱i̱ Jeobá ga̱jma̱a̱ eʼwíínʼ xa̱bu̱, xó má eʼthí náa Gálatas 6:10: “Uʼñu ri mejanʼ ajndo xoguinʼ xabu, itanla naʼ su angunluʼ su huaʼda siaquiyu aʼcuñu”. Ma̱ngaa nuxnu̱u̱nxu tsiakii índo̱ nda̱ñúnʼ itháan (2 Corintios 1:3, 4).

Organización

Índo̱ narígá mbá gamiéjunʼ, bi̱ kuya̱ edxu̱u̱ náa congregación nuni mbá tsiakii mutún xúgínʼ mu mbuyáá xóo kúwi̱i̱n ga̱jma̱a̱ ndiéjunʼ eñúnʼ. Ikhú nuthi náa sucursal xú káʼnii rígá ga̱jma̱a̱ xú káʼnii kuwa rumbañún a̱ngiu̱lú.

Á mu congregación dí rígá mijngii tseʼngu̱u̱n gumbañúún a̱ngiu̱lú, Cuerpo Gobernante ndrígu̱ún bi̱ nutaraʼa numuu Jeobá naríyaʼ awan mu mixtambáñuun. Sucursal nagruigi̱i̱n comité mu mbu̱ya̱ edxu̱ún ga̱jma̱a̱ eʼwíínʼ xa̱bi̱i̱ Jeobá bi̱ kuwa i̱mba̱ níʼkhá nuriyaʼ mbiʼi ga̱jma̱a̱ mbújkha̱a̱ mu muruguambáá (Proverbios 17:17). Nákha siglo timbá nini xúʼko̱ kaʼnii índo̱ mbaʼin cristianos niraʼníí ewiʼ (1 Corintios 16:1-4).

Mbújkha̱a̱

Mbá chíʼgíʼ mbújkha̱a̱ rí na̱jkha̱ náa sucursal ndrígu̱ún xa̱bi̱i̱ Jeobá najmaa mu mixtambáñuun bi̱ nuraʼníí gamiéjunʼ (Hechos 11:27-30; 2 Corintios 8:13-15). Numuu rí bi̱ nuruguambáá tsédaʼ, xúgíʼ mbújkha̱a̱ rúʼko̱ najmaa mu mixtambáñuun bi̱ niguaʼnii gamiéjunʼ. Ma̱ngaa xúgíʼ mbújkha̱a̱ rúʼko̱ najmaa tsumáá wéñuʼ (2 Corintios 8:20).