Daniel 5:1-31

5  Rü nüma ga Berchachá ga nüxí Babiróniaanecüã̱xarü ãẽ̱xgacü ixĩcü, rü nüxna naxu ga 1,000 ga ãẽ̱xgacügü ga yema nachixü̃anecüã̱xgü naxca̱x ga wüxi ga õna ga taxü̃. Rü yema chibüwa rü nüma ga ãẽ̱xgacü rü yema nüxna naxuxü̃ rü poraãcü wíũ nayaxaxgü.  5:2-3 Rü yema wíũmaxã nax nangãxü̃xü̃ ga ãẽ̱xgacü ga Berchachá rü norü duü̃xü̃güxü̃ namu nax yanuxü̃ãxü̃ca̱x ga yema naxpáxü̃gü ga úirunaxca̱x rü diẽrumünaxca̱x ga nanatü ga Nabucudonochó Yerucharéü̃wa yexmane ga tupaucawa ne naxü̃. Rü nayanuxü̃ ga yema naxpáxü̃gü ga üünexü̃ rü nawa naxaxegü ga ãẽ̱xgacü rü naxma̱xgü rü naxü̃taxü̃gü rü guxü̃ma ga yema chibüwa yéma ĩxü̃.  Nüü̃ nadau 5:2  Rü guxü̃ma ga yema yéma yexmagüxü̃ rü wíũ nixaxgü rü nüxü̃ nicua̱xüxü̃gü ga norü tupanachicüna̱xãgü ga úirunaxca̱x, rü diẽrumünaxca̱x, rü brṍchenaxca̱x, rü férunaxca̱x, rü nainaxca̱x rü nutanaxca̱x ixĩgüxü̃.  5:5-6 Rü yexguma ínaxaxegüyane rü yema ucapuarü ĩxtapü̱x ga cómüxü̃wa nango̱x ga wüxi ga naxme̱x ga omüema ĩxtapü̱xgu ínachixü̃wa iwüacüxü̃ne. Rü gumá naxme̱x ga yéma iwüacüxünexü̃ nada̱xgux ga gumá ãẽ̱xgacü rü naba̱i̱xãchi rü nanacho̱xõchi rü norü muü̃maxã niyoyaxü̃ne.  Nüü̃ nadau 5:5  Rü nhu̱xũchi tagaãcü aita naxü ga ãẽ̱xgacü ga Berchachá, rü naxca̱x nangema ga yema norü ucu̱xẽruü̃gü ga ẽxü̃guxü̃xü̃ cua̱xgüxü̃, rü yema cua̱x nüxü̃́ yexmaxü̃, rü yema Babiróniaanecüã̱xgü ga woramacuriwa ngúexü̃. Rü nhanagürü nüxü̃: —Rü yíxema nüxü̃ daumatüxe i ngẽma ngẽxma ümatüxü̃ rü nüxü̃ ixuxe nax ta̱xacüchiga yixĩxü̃, rü naxchiru i dauxracharaxü̃gu tá tüxü̃ chicu̱xẽxẽ, rü úirunaxca̱x ya curẽchimaxã tá tüxü̃ chaxüchagü, rü tüma tá tixĩ i chaweama i norü tamaepü̱xwa taxüxü̃ nax ãẽ̱xgacü tixĩxü̃ —nhanagürü.  Rü guxü̃ma ga yema norü ucu̱xẽruü̃gü ga nüxü̃ icua̱xüchixü̃ ga yéma yexmagüxü̃ rü nichocu nawa ga yema ucapu. Notürü taxuxü̃ma ga yema yatügü ga nüxü̃ cua̱xüchigüxü̃ rü nüxü̃ nacua̱xgü nax ãẽ̱xgacümaxã nüxü̃ yaxugüxü̃ nax ta̱xacüchiga yixĩxü̃ ga yema yexma ümatüxü̃.  Rü yexguma nüma ga ãẽ̱xgacü ga Berchachá rü poraãcü namuü̃ rü nanacho̱xõchi. Rü yema natanüxü̃ ga ãẽ̱xgacügü rü tama nüxü̃ nacua̱xgü nax ta̱xacü tá naxügüxü̃. 10  Notürü ga naé rü yéma inha, yerü nüxü̃ ixĩnü ga aita nax naxüxü̃ ga gumá ngĩne rü yema ãẽ̱xgacügü ga namaxã yexmagüxü̃. Rü yemaca̱x yéma ixũ rü ngĩgürügü nüxü̃ ga ngĩne ga Berchachá: —¡Guxü̃guma namaxü̃, Pa Ãẽ̱xgacüx! ¡Rü tauxü̃́ i cuxoégaãẽxü̃ rü tauxü̃́ i cuba̱i̱xãchixü̃! 11  Erü nua cuxme̱xwa nangexma i wüxi i yatü ya Tupana ya Üünecüãxẽ nawa ngẽxmaxü̃. Rü yexguma gumá cunatü ya Nabucudonochó ãẽ̱xgacü ixĩxgu, rü yema yatü inanawe̱x nax tupanagürüxü̃ aixcuma naãxẽxü̃ nacuáxü̃. Rü yemaca̱x ga gumá cunatü rü guxü̃ma ga norü ucu̱xẽruü̃güeru nayaxĩxẽxẽ. 12  Rü nüma rü Danié nixĩ. Rü nüma ga gumá cunatü rü Betachágu nanaxüéga. Rü ngẽma yatü rü poraãcü cua̱x nüxü̃́ nangexma rü nüxü̃́ natauxcha nax nango̱xẽẽãxü̃ i wüxi i nanegü, rü nango̱xẽẽãxü̃ i ta̱xacü icúxü̃, rü namexẽẽãxü̃ i taxü̃ i guxchaxü̃gü. ¡Rü naxca̱x nangema ya yimá yatü ya Danié! Rü nüma tá nixĩ i cumaxã nüxü̃ yaxuxü̃ nax ta̱xacüchiga yixĩxü̃ i ngẽma ngẽxma ümatüxü̃! —ngĩgürügü. 13  Rü yexgumatama ãẽ̱xgacüpe̱xewa Daniéxü̃ nagagü. Rü nüma ga ãẽ̱xgacü rü nüxna naca, rü nhanagürü: —¿Cuma quixĩxü̃ i Danié i Yudéu quixĩxü̃ ga chaunatü ga Nabucudonochó Yudáanewa pexü̃ ne gagüxü̃? 14   -- 15   -- 16  Rü nüxü̃ chaxĩnüchiga rü cuma rü cuxü̃́ natauxcha nax cunango̱xẽẽxü̃ i wüxi i nanegü rü cunamexẽẽxü̃ i taxü̃ i guxchaxü̃gü. Rü ngẽxguma chi cha̱u̱xca̱x nüxü̃ cudaumatügu i ngẽma ore i ĩxtapü̱xgu ümatüxü̃ rü chamaxã nüxü̃ quixuxgu nax ta̱xacüchiga yixĩxü̃, rü chama rü naxchiru i dauxracharaxü̃gu tá cuxü̃ chicu̱xẽxẽ, rü úirunaxca̱x ya curẽchimaxã tá cuxü̃ chaxüchagü, rü cuma tá quixĩ i chautüü̃wa norü tamaepü̱xwa cuxüxü̃ nax ãẽ̱xgacü quixĩxü̃ —nhanagürü. 17  Rü yexguma ga nüma ga Danié rü nanangãxü̃ rü nhanagürü: —Pa Ãẽ̱xgacüx, tama chanaxwa̱xe i ngẽma ãmaregü. ¡Rü togüxü̃mare naxuneta nax cumaxã ãẽ̱xgacüxü̃ cupatawa nangexmaxü̃ca̱x! Notürü, Pa Ãẽ̱xgacüx, rü tá cumaxã nüxü̃ chixu i ta̱xacüchiga yixĩxü̃ i ngẽma dexagü i ĩxtapü̱xgu ümatüxü̃. 18  Rü nüma ya Tupana ya guxãétüwa ngẽxmacü, rü cunatü ga Nabucudonochóna nanaxã nax nüma ãẽ̱xgacü ga poracü rü cua̱x nüxü̃́ ngẽxmacü nax yixĩxü̃ca̱x. 19  Rü yema pora ga Tupana nüxna ãxü̃gagu rü guxü̃ma ga ĩanecüã̱xgü rü nachixü̃anecüã̱xgü naguxü̃raxü̃xü̃ ga nagawa idexagüxü̃ rü naga naxĩnüe rü nüxü̃ namuü̃e. Rü naxme̱xwa nayexma nax tüxü̃ yamáxü̃ rüe̱xna tüxü̃ namaxẽẽxü̃ ga guxema norü me ixĩxe. Rü tümáxe rü tüxü̃ nataxẽxẽ, rü toguxe rü tüxü̃ naxãneexẽxẽ. 20  Notürü yexguma nügü yacua̱xüxü̃gu rü taxúegama naxĩnügu, rü Tupana rü nüxna nanayaxu ga norü pora, rü ínanata̱xüchi ga ãẽ̱xgacü nax yixĩxü̃. 21  Rü duü̃xü̃güna nixũgachi rü yema norü ĩnü rü naxü̃nagüarü ĩnü nixĩ. Rü naixnecücüã̱x ga búrugütanüwa namaxü̃. Rü wocagürüxü̃ maxẽ nanangõ̱x rü cherenamaxã niwaixine. Rü yemaacü nüxü̃ nangupetü nhu̱xmata düxwa nüxna nacua̱xãchi nax yimá Tupana ya guxãétüwa ngẽxmacü nüxü̃́ ngẽxmaxü̃ i pora nax namaxã inacuáxü̃ i guxü̃ma i ãẽ̱xgacügü i nhama i naanewa ngẽxmagüxü̃. Rü nüma rü ãẽ̱xgacüxü̃ tüxü̃ nixĩxẽxẽ ya yíxema nüma norü me ixĩxe nax ãẽ̱xgacü tixĩxü̃ca̱x. 22  Rü cumax, Pa Berchacháx nax nachicüxü quingucuchixü̃ ga cunatü ga Nabucudonochó, rü nüxü̃ cucua̱x ga yema nüxü̃ ngupetüxü̃. Notürü cuma rü ta narüü̃tama cugü quicua̱xüxü̃. 23  Dücax, Pa Ãẽ̱xgacüx, cuma rü Cori ya Tupana ya dauxü̃wa ngẽxmacügu quidauxcüraxü̃. Erü curü duü̃xü̃güxü̃ cuyanuxü̃xẽxẽ i ngẽma naxpáxü̃gü ga Tupanapataarü ixĩxü̃. Rü ngẽma nüxna cuxuxü̃maxã wüxigu ngẽma naxpáxü̃güwa peyaxaxü ga wíũ, rü nüxü̃ pecua̱xüxü̃gü i ngẽma perü tupanachicüna̱xãgü i úirunaxca̱x, rü diẽrumünaxca̱x, rü brṍchenaxca̱x, rü férunaxca̱x, rü nainaxca̱x rü nutanaxca̱x i ngearü maxü̃ã́xü̃, rü tama tüxü̃ dauxü̃, rü tama tüxü̃ ĩnüxü̃ rü taxuxü̃ma cuáxü̃. Notürü tama nüxü̃ quicua̱xüxü̃ ya yimá Tupana ya naxme̱xwa nangexmacü i curü maxü̃ rü namaxã icuácü i guxü̃ma i ta̱xacü icuxüxü̃. 24  Rü ngẽmaca̱x nixĩ i nüma ya Tupana i cuxca̱x nango̱xẽxẽãxü̃ ya yimá naxme̱x i ĩxtapü̱xgu naxümatüne i ngẽma dexagü. 25  Rü nhaagü nixĩ i ngẽma dexagü: MÉNE rü MÉNE rü TEKÉL rü PÁRSIN. 26  Rü ngẽma dexagü rü nhaxü̃chiga nixĩ: MÉNE: Tupana rü marü nayaxugü nax nhuxre i ngunexü̃ tá ãẽ̱xgacü quixĩxü̃, Pa Ãẽ̱xgacüx, rü marü nüxü̃ naxuneta i ngẽma ngunexü̃ i tá nagu cuyuxü̃. 27  TEKÉL: Pa Ãẽ̱xgacü, rü Tupana rü norü ngugüruü̃wa cuxü̃ inangu, rü ngẽma curü chixexü̃ rü mexü̃xü̃ narüyamae. 28  PÁRSIN: Rü ngẽma cuchixü̃ane, Pa Ãẽ̱xgacüx, rü marü niyauxye rü tá Médiaanecüã̱xgüna rü Pérchiaanecüã̱xgüna nanaxã —nhanagürü ga Danié. 29  Rü yexgumatama ga nüma ga ãẽ̱xgacü ga Berchachá rü norü duü̃xü̃güxü̃ namu nax Daniéxü̃ dauxracharaxü̃ ga naxchirugu yacu̱xẽẽgüaxü̃ca̱x, rü wüxi ga curẽchi ga úirunaxca̱xmaxã naxüchagügüaxü̃ca̱x. Rü guxãmaama nüxü̃ nixu nax nüma ya Danié yixĩxü̃ ga norü tamaepü̱xwa naxüxü̃ nax ãẽ̱xgacü yixĩxü̃. 30  Rü yema chütaxü̃gu nixĩ ga yama̱xgüaxü̃ ga Berchachá (ga Babiróniaanecüã̱x) ga Caudéutanüxü̃güarü ãẽ̱xgacü ixĩcü. 31  Rü Daríu ga Médiaanecüã̱xgüarü ãẽ̱xgacü rü Berchacháchicüxü nixücu nax ãẽ̱xgacü yixĩxü̃ca̱x. Rü nüma ga Daríu rü 62 ga taunecü nüxü̃́ nayexma ga yexguma.

Notas