Romacü̃ãʼ 9:1-33

9  Dücax, Pa Chaueneẽgüx, rü pemaã tá nüxü̃ chixu i wüxi i ore. Rü ngẽma ore i pemaã tá nüxü̃ chixuxü̃ rü aixcuma nixĩ erü Cristuarü duü̃xü̃ chixĩ. Rü tama chidora. Rü chauãẽwatama nüxü̃ chacua̱x na aixcuma na jiĩxü̃ i ngẽma ore erü Tupanaãẽ i Üünexü̃ nixĩ i chauãẽmaã icuáxü̃.  Rü poraãcü changechaü̃, rü choxü̃́ nangúecha i chauãẽwa, erü tama najaxõgü i chautanüxü̃gü i Judéugü.  Rü aixcuma pemaã nüxü̃ chixu rü guxü̃guma ngẽma chautanüxü̃gu charüxĩnü, rü poraãcü chanaxwa̱xe na Cristuaxü̃́ jaxõgüãxü̃. Rü chama rü aixcuma íchamemare na pocuwa choxü̃ namuxü̃ ja Tupana rü Cristuna choxü̃ jaxũgachixẽẽxü̃ ega ngẽmaãcü chi nüxü̃ chajaxõgüxẽẽgu rü chanamaxẽxẽẽgu i ngẽma chautanüxü̃gü i Judéugü.  Rü nümagü rü chauxrüü̃ Judéugü nixĩgü. Rü Tupana rü nuxcümaxü̃chima namaã inaxuneta na naxãcügü jixĩgüxü̃ca̱x. Rü norü o̱xigü rü nüxü̃ nadaugü na nhuxãcü namexẽchixü̃ ga Tupana ga jexguma naxca̱x nango̱xgux. Rü Tupana rü norü o̱xigümaã inaxuneta rü nhanagürü nüxü̃:“Rü ngẽxguma chauga pexĩnüẽgu rü tá pexü̃ charüngü̃xẽẽ”, nhanagürü nüxü̃. Rü Tupana rü nüxna nanaxã ga jema mugü ga Muĩsé ümatüxü̃. Rü nanangúexẽẽ na nhuxãcü nüxü̃ jacua̱xüü̃güxü̃ca̱x. Rü meãma namaã inaxuneta na Cristu rü naxca̱x núma tá namuãxü̃ na namaxẽxẽẽãxü̃ca̱x rü nüxna na naxããxü̃ca̱x i maxü̃ i taguma gúxü̃.  Rü jema nuxcümaxü̃güxü̃ ga tórü o̱xigütaa nixĩgü i ngẽma Judéugü, rü ngẽmaca̱x naxca̱x ta nixĩ ga jema uneta ga tórü o̱xigümaã nüxü̃ jaxuxü̃ ga Tupana. Rü ngẽma Judéugütanüxü̃watama nixĩ ga nabuxü̃ ga Cristu ja Tupanaxü̃chi ixĩcü ja guxü̃ẽ́tüwa ngẽxmacü. Rü tanaxwa̱xe i guxü̃guma nüxü̃ ticua̱xüü̃gü. Rü ngẽmaãcü jiĩxü̃.  Rü nhu̱xma rü woo tama guxü̃ i Judéugü na jaxõgüxü̃, notürü taxucürüwama texé nüxü̃ tixu na Tupana rü tama janguxẽẽãxü̃ i ngẽma norü uneta. Erü ngẽma Judéugü rü tama aixcuma guxü̃ma Tupanaãrü duü̃xü̃gü nixĩgü.  Rü tama guxü̃ma i duü̃xü̃gü i Abrã́ũtaagü ixĩgüxü̃, rü aixcuma Abrã́ũtanüxü̃ nixĩgü i Tupanape̱xewa. Jerü ga Tupana rü Abrã́ũmaã nüxü̃ nixu, rü nhanagürü:“Rü cune ja Isaquitanüxü̃gü tá nixĩ i aixcuma cutanüxü̃gü ixĩgüxü̃ i chape̱xewa”, nhanagürü. Rü jemaãcü namaã inaxuneta woo na najexmaxü̃ ga togü ga Abrã́ũxãcügü.  Rü ngẽmawa meãma nüxü̃ tacua̱x rü tama ngẽma na Abrã́ũtaa tixĩgüxü̃ca̱x nixĩ i Tupanaxãcügü tixĩgüxü̃. Notürü jíxema aixcuma Tupanaãrü uneta nüxü̃ ixuxü̃rüü̃ãcüma jaxõgüxe waxi tixĩ ja aixcuma Abrã́ũtaa ixĩgüxe i Tupanape̱xewa.  Jerü naxü̃pa ga na nabuxü̃ ga Abrã́ũ nane, rü jema Tupanaãrü uneta ga Abrã́ũmaã nüxü̃ jaxuxü̃, rü nhanagürü:“Rü naĩ ja taunecüarü nhúxgumaãcü tá wena nuã chaxũ, rü cuxma̱x i Chara rü tá ixãxãcü i ngẽxguma”, nhanagürü. 10  Notürü tama Abrã́ũmaãxĩcatama nixĩ ga jemaãcü jadexaxü̃ ga Tupana. Jerü tórü o̱xi ga Isaqui nama̱x ga Rebecamaã rü ta nidexa ga Tupana. Rü ngĩma rü ngĩteaxü̃́ ixãxãcü rü nataxree̱xpü̱x ga ngĩne. 11  9:11-13 Notürü jexguma taũta nabuegu rü taxuü̃ma ga mexü̃ rü e̱xna chixexü̃ naxüegu ga jema ngĩnegü, rü Rebecamaã nidexa ga Tupana, rü nhanagürü:“Rü ngẽma nüxĩra buxü̃ i cune, rü ngẽma wixweama buxü̃ãrü duü̃xü̃ tá nixĩ”,nhanagürü ngĩxü̃. Rü jema dexa rü namaã nawüxigu i Tupanaãrü ore i ümatüxü̃ i nhaxü̃:“Marü chanajaxu ja Jacú, notürü nüxü̃ chaxo ja Echaú”,nhaxü̃. Rü jemaãcü ga Tupana rü ngĩmaã nanango̱xẽẽ na name̱xwa nangẽxmaxü̃ na tüxü̃ jadexechixü̃ ja jíxema woetama nüxü̃́ ngúchaü̃xẽ na tümaca̱x nac̱axü̃ tama nagu naxĩnüãcüma i ṯacü na taxüxü̃. 12  Nüü̃ nadau 9:11 13  Nüü̃ nadau 9:11 14  ¿Rü nhuxũ nhagüxü̃ i nhu̱xmax? ¿Pexca̱x rü Tupana rü chixexü̃ naxüxü̃ ga jexguma tama Jacúxü̃ nangechaü̃xü̃rüü̃ nüxü̃ na nangechaü̃gu ga Echaú? Rü dücax, tama chixexü̃ naxü. 15  Jerü norü orewa rü Tupana rü Muĩséxü̃ nhanagürü:“Rü ngẽxguma chi texémaã chamecümachaü̃gu, rü tümamaã tá chamecüma. Rü choxü̃́ tá tangechaü̃tümüü̃ ja jíxema choxü̃́ ngechaü̃tümüü̃chaü̃xẽ”, nhanagürü. 16  Rü ngẽmaãcü tama ngẽma tümatama tanaxwa̱xexü̃gagu rü e̱xna ngẽma taxüxü̃gagu nixĩ i Tupana tüxü̃ jaxuxü̃ ja texé. Notürü tüxü̃ najaxu erü nüxü̃́ tangechaü̃tümüü̃. 17  Rü jexgumarüü̃ ta ga Tupana rü norü ore i ümatüxü̃wa rü nhanagürü nüxü̃ ga Ejituaneãrü ãẽ̱xgacü:“Rü ãẽ̱xgacüxü̃ cuxü̃ chingucuchixẽẽ na cuwa duü̃xü̃güxü̃ nüxü̃ chadauxẽẽxü̃ca̱x i nhuxãcü na chaporaxü̃. Rü ngẽmaãcü chanaxü na guxü̃ i duü̃xü̃gü i guxü̃ i naãnewa ngẽxmagüxü̃, nüxü̃ na cuáxü̃ca̱x i chauchiga”, nhanagürü. 18  Rü ngẽmaãcü ja Tupana rü nüxü̃́ tangechaü̃tümüü̃ ja jíxema nüxü̃́ ngechaü̃tümüü̃chaü̃xẽ. Rü ngẽxguma tüxü̃ nataiãchiarü maxü̃ã̱xẽẽchaü̃gu rü tüxü̃ nanataiãchiarü maxü̃ã̱xẽẽ ja jíxema tama nüxü̃ cuáxchaü̃xẽ. 19  Notürü bexmana tá nhacurügü choxü̃: “Rü ngẽxguma chi ngẽmaãcü jixĩgu ja Tupana, ¿rü tü̱xcüü̃ nüxü̃ nixu na tagagu jiĩxü̃ na chixexü̃ ixügüxü̃ rü tama naga ixĩnüẽxü̃? ¿Rü texé tapora na itajanaxoxẽẽxü̃ca̱x i Tupanaãrü ngúchaü̃?” nhacurügü tá. 20  Notürü Pa Duü̃xü̃x, ¿texé cuixĩ i cuma rü ngẽmaca̱x ngẽmaãcü Tupanaxü̃ cujaxũgaxü̃? ¿Cuxca̱x rü e̱xna wüxi i tü̃xü̃ i waixü̃müwa üxü̃ rü namexü̃ i ngẽma norü üruü̃maã na nhaxü̃? “¿Rü tü̱xcüü̃ ngẽmaãcü choxü̃ cuxü na ngẽmaãcü chixĩxü̃ca̱x i nhu̱xmax?” nhaxü̃. 21  Rü ngẽma tü̃xü̃ãrü üruü̃ rü waixü̃müwa nanaxü i ṯacü i nüma naxüxchaü̃xü̃. Rü ngẽxguma nanaxwa̱xegu, rü ngẽma waixü̃müwa nanaxü i wüxi i tü̃xü̃ na norü meruü̃ jiĩxü̃ca̱x. Rü ngẽxguma nanaxwa̱xegu, rü ngẽmatama waixü̃müwa nanaxü i wüxi i tü̃xü̃ na norü guxchirechixü̃ jiĩxü̃ca̱x. 22  Rü ngẽxgumarüü̃tama nixĩ i naxüãxü̃ ja Tupana. Erü tüxü̃ nanawéxchaü̃ na nhuxãcü naporaxü̃ i nüma rü nhuxãcü napocueãxü̃ i ngẽma duü̃xü̃gü i chixexü̃ ügüxü̃, notürü poraãcü jaxna namaã naxĩnü i ngẽma duü̃xü̃gü, rü tama paxa nanapocue i ngẽma ímemaregüxü̃ na napocuexü̃. 23  Notürü ga Tupana rü inanawéxchaü̃ na nhuxãcü poraãcü tamaã namecümaxü̃ i jixema na jaxõgüxü̃. Rü ngẽmaca̱x nixĩ i nüxü̃́ ingechaü̃tümüü̃güxü̃, rü nuxcümamatama tüxü̃ jadexechixü̃ na naxü̃tawa ingẽxmagüxü̃ca̱x i dauxü̃guxü̃ i naãnewa i ngextá ínamexẽchixü̃wa. 24  Rü ngẽmaãcü i jixema na Judéugü ixĩgüxü̃, rü tatanüwa Tupana tüxü̃ nidexechi ja nhuxre na norü duü̃xü̃gü tixĩgüxü̃ca̱x. Rü ngẽxgumarüü̃ ta i ngẽma tama Judéugü ixĩgüxü̃tanüwa rü najadexechi i togü. 25  Rü ngẽmaca̱x rü Tupanaãrü ore ga Ochéa ümatüxü̃wa rü nhanagürü:“Rü ngẽma duü̃xü̃gü i tama chorü duü̃xü̃güchire̱x ixĩgüxü̃, rü: ‘Pema rü chorü duü̃xü̃gü peixĩgü i nhu̱xmax’, nhacharügü tá nüxü̃. Rü ngẽma duü̃xü̃gü i tama Judéugürüü̃ nüxü̃ changechaü̃chiréxü̃, rü: ‘Pexü̃ changechaü̃ i nhu̱xmax’, nhacharügü tá nüxü̃. 26  Rü noxri ga Tupana rü jema duü̃xü̃gü ga tama Judéugü ixĩgüxü̃maã nüxü̃ nixu, rü nhanagürü nüxü̃: ‘Pema rü tama chorü duü̃xü̃gü peixĩgü’, nhanagürü nüxü̃. Notürü jematama nachica ga ngextá nüxü̃ íjemanhaxü̃wa, rü wenaxãrü jema duü̃xü̃gü ga tama Judéugü ixĩgüxü̃maã nidexa ga Tupana ja Maxẽxẽẽruü̃, rü nhanagürü nüxü̃: ‘Pema rü chauxacügü tá peixĩgü’, nhanagürü nüxü̃”. Rü jema nixĩ ga Tupanaãrü ore ga Ochéa ümatüxü̃. 27  9:27-28 Rü Judéugüchiga rü ta nidexa i Tupanaãrü ore, jerü nuxcümaxü̃cü ga norü orearü uruü̃ ga Ichaía rü nhanagürü:“Rü woo namuxũchichire̱x i Judéugü jima naxnücü ja taxtüpechinüwa jimacürüü̃, notürü noxre tátama nixĩ i aixcuma najauxgüxü̃ i maxü̃ i taguma gúxü̃. Rü paxa tá ínangu ja tórü Cori na napocueãxü̃ca̱x i guxü̃ma i ngẽma tama noxrü ixĩgüxü̃”,nhanagürü ga Ichaía. 28  Nüü̃ nadau 9:27 29  Rü nümatama ga Ichaía, rü nhanagürü ga ü̃pa:“Rü ngẽxguma chi nüma ja tórü Cori ja guxü̃ i naãneãrü jora rü tau chima íjaxügüxẽẽãgu i nhuxre i tatanüxü̃gü i Judéugü, rü chi itajarüxoxochi, jexgumarüü̃ ga na ijanaxogüxü̃ ga guma ĩãnegü ga Chodoma rü Gomora namaã ga guxü̃ma ga jema duü̃xü̃gü ga jéma jexmagüxü̃”, nhanagürü ga Ichaía. Judéugü rü tama najaxõgüchaü̃ i ore i mexü̃ i Cristuchiga 30  ¿Rü nhuxũ nhagüxü̃ i nhu̱xmax? Rü pemaã nüxü̃ chixu rü ngẽma duü̃xü̃gü i tama Judéugü ixĩgüxü̃ ga tama Tupanaca̱x daugüxü̃ ga noxrix, rü ngẽmatama duü̃xü̃gü nixĩ i nhu̱xma Tupanape̱xewa imexü̃ jerü najaxõgü. 31  Notürü jema Judéugü ga nagu ĩxchaü̃xü̃ ga jema Muĩséarü mugü na Tupanape̱xewa jamexü̃ca̱x, rü ínatüe. 32  ¿Rü nhuxãcü ínatüe? Dücax, ínatüe jerü jema mugüguama naxĩ na Tupanape̱xewa jamexü̃ca̱x, rü tama Ngechuchuaxü̃́ najaxõgüchaü̃. Rü jemaãcü ga Ngechuchu rü jema duü̃xü̃güca̱x rü wüxi ga guxchaxü̃ nixĩ. 33  Rü ngẽmachiga nixĩ i Tupanaãrü ore i ümatüxü̃ i nhaxü̃:“Chama rü Judéugütanüwa chanamu ja Cristu. Rü nüma rü ngẽma Judéugüca̱x rü wüxi i guxchaxü̃ tá nixĩ erü ngẽxguma tama nüxü̃́ jaxõgüãgu rü tá inajarütauxe. Notürü ngẽma duü̃xü̃gü i nüxü̃́ jaxõgüxü̃, rü aixcuma tá namaxẽ”, nhanagürü.

Notas