Romacü̃ãʼ 8:1-39

8  Rü nhu̱xma ja Tupana rü marü taxuü̃ca̱xma nanapocue i ngẽma duü̃xü̃gü i Ngechuchu ja Cristuarü duü̃xü̃gü ixĩgüxü̃.  Erü Tupanaãẽ i Üünexü̃ i Ngechuchu ja Cristugagu tüxü̃ maxẽxẽẽxü̃, rü nüxna tüxü̃ ínanguxü̃xẽẽ i pecadu na tama juwa tüxü̃ nagagüxü̃ca̱x.  Rü jema taxüneãrü ngúchaü̃gü rü marü nüxü̃ narüjexera ga jema mugü ga Muĩsé ümatüxü̃. Rü jemaca̱x ga jema mugü rü taxucürüwa mexü̃ tüxü̃ naxüxẽẽ. Notürü nüma ga Tupana rü marü nanaxü ga jema taxucürüwa naxüxü̃ ga jema mugü. Jerü ga Tupana rü nhama ga naãnewa nanamu ga Nanexü̃chi. Rü woo taxüne i pecaduã́xü̃rüü̃ nixĩ ga naxü̃ne, notürü nüma ga Nane rü taguma napecaduã̱x. Rü nüma ga Nane rü tórü pecaduca̱x naju, rü jemaãcü inajanaxoxẽẽ ga norü pora ga jema pecadu ga taxünewa jexmaxü̃.  Rü jemaãcü nanaxü ga Tupana na tüxü̃́ na natauxchaxü̃ca̱x na janguxẽẽxü̃ i ngẽma tüxü̃ namuxü̃ i ngẽma mugü. Erü nhu̱xma rü tama nhama i taxüne naxwa̱xexü̃ãcüma tamaxẽ, notürü Tupanaãẽ i Üünexü̃ naxwa̱xexü̃ãcüma nixĩ i imaxẽxü̃.  Rü jíxema tümaxü̃ne naxwa̱xexü̃ãcüma maxẽxẽ, rü naxca̱x tadaugü i ngẽma nhama i naãnecü̱̃ã̱x naxwa̱xexü̃. Notürü jíxema Tupanaãẽ i Üünexü̃ naxwa̱xexü̃ãcüma maxẽxẽ, rü ngẽma Tupanaãẽ i Üünexü̃ naxwa̱xexü̃ nixĩ i naxca̱x tadaugüxü̃.  Rü jíxema Tupanaãẽ i Üünexü̃ naxwa̱xexü̃ca̱x daugüxe rü tataãẽgü, rü tá tüxü̃́ nangẽxma i tümaãrü maxü̃ i taguma gúxü̃. Notürü jíxema tümaxü̃ne naxwa̱xexü̃ca̱x daugüxe rü ngẽma rü tá juwa tüxü̃ nagagü.  Rü jíxema tümaxü̃ne naxwa̱xexü̃ca̱x daugüxe rü Tupanaãrü uwanü tixĩgü. Rü tama Tupanaga taxĩnüẽchaü̃ erü taxucürüwama naga taxĩnüẽ.  Rü ngẽmaca̱x ja jíxema tümaxü̃neãrü ngúchaü̃we rüxĩxẽ, rü taxucürüwa Tupanaãrü ngúchaü̃ taxügü.  Notürü ngẽxguma aixcuma pewa nangẽxmagu i Tupanaãẽ i Üünexü̃ rü tama pexeneãrü ngúchaü̃ pexü, notürü Naãẽ i Üünexü̃ãrü ngúchaü̃ nixĩ i pexüxü̃. Rü jíxema tama tüxü̃́ nangẽxmaxẽ i Tupanaãẽ i Üünexü̃ i Cristu tüxna ãxü̃, rü tama Cristuarü duü̃xü̃ tixĩ. 10  Notürü ngẽxguma pewa namaxü̃gu ja Cristu, rü woo pecadugagu tá naju̱xgu i pexene, notürü peãẽ rü namaxü̃, erü Tupana pexü̃ nadau na pemexü̃. 11  Rü ngẽxguma pewa namaxü̃gu i Naãẽ ja jima Tupana ga Ngechuchu ja Cristuxü̃ írüdaxẽẽcü, rü nümatátama ja jima Cristuxü̃ írüdaxẽẽcü tá wena nanamaxẽẽ i pexene i juxwa̱xexü̃, rü Naãẽ i Üünexü̃ i pewa maxü̃xü̃ tá nixĩ i naxüxü̃ i ngẽma. 12  Rü ngẽmaca̱x, Pa Chaueneẽgüx, rü tanaxwa̱xe i Tupanaãrü ngúchaü̃ taxü, rü tama tanaxwa̱xe i taxüne i pecaduã́xü̃ãrü ngúchaü̃ taxü. 13  Erü ngẽxguma chi pexeneãrü ngúchaü̃ pexü̱xgu rü tá ipejarütauxe. Notürü ngẽxguma Tupanaãẽ i Üünexü̃ãrü ngü̃xẽẽmaã ipejanaxoxẽẽgu i ngẽma pexene üxchaü̃xü̃, rü aixcuma tá pexü̃́ nangẽxma i maxü̃ i taguma gúxü̃. 14  Erü guxãma ja jíxema Tupanaãẽ i Üünexü̃ tümamaã icuáxe, rü aixcuma Tupanaxãcügü tixĩgü. 15  Noxri rü Tupanaxü̃ pemuü̃ẽ ga jexguma pepecaduã̱xgügu, notürü i nhu̱xma rü Tupanaxãcügü peixĩgü erü Naãẽ i Üünexü̃ rü naxãcügüxü̃ pexü̃ nixĩgüxẽẽ. Rü Naãẽ i Üünexü̃ i pema pejaxuxü̃ rü pemaã namecüma rü tama pocumaã pexü̃ namuü̃xẽẽ. Rü ngẽmatama Naãẽ i Üünexü̃ nixĩ i tüxü̃ rüngü̃xẽẽxü̃ na tama imuü̃ẽxü̃ca̱x na Tupanana ingaicamagüxü̃ rü: “Pa Tonatüx”, nhagüxü̃ nüxü̃. 16  Rü ngẽmatama Naãẽ i Üünexü̃ nixĩ i aixcuma tüxü̃ nüxü̃ cua̱xẽẽxü̃ na Tupanaxãcügü na ixĩgüxü̃. 17  Rü nhu̱xma na Tupanaxãcügü ixĩgüxü̃ i jixema, rü nüxü̃ tacua̱x rü dauxü̃guxü̃ i naãnewa tá tanajaxu i ngẽma mexü̃gü i Tupana tüxna ãxchaü̃xü̃. Rü ngẽmaãcü Cristumaã tá tüxü̃́ nangẽxma i tachica i mexü̃ i Tupanaxü̃tawa, erü Cristurüü̃ ngúxü̃ tingegü na jixcüra wüxigu namaã mexü̃wa ingẽxmagüxü̃ca̱x. Ngẽma mexü̃ i jixcüra tá nüxü̃ idauxü̃chiga 18  Rü dücax, rü chama nagu charüxĩnü rü ngẽma ngúxü̃ i nhu̱xma nhama i naãnewa ingegüxü̃, rü taxuü̃ma nixĩ i ngẽxguma nagu nanguxgu i ngẽma mexü̃ i jixcüra tá nüxü̃ idauxü̃ i ngẽxguma Cristumaã ingẽxmagügu i dauxü̃guxü̃ i naãnewa. 19  Rü nhu̱xma rü guxü̃ma i ṯacü i Tupana üxü̃ rü taxü̃ i norü ngúchaü̃maã ínanaṉg̱uxẽẽgü i ngẽma ngunexü̃ i nagu tá nataeguxü̃ ja Cristu na Tupana guxü̃pe̱xewa naxãcügüxü̃ iwéxü̃. 20  Rü nüxü̃ tacua̱xgü rü jexguma pecadu naxü̱xgu ga guma nüxĩraü̃cü ga jatü rü jexguma nixĩ ga nachixexü̃ ga guxü̃ma ga jema Tupana üxü̃. Rü tama jema Tupana üxü̃ãrü ngúchaü̃ nixĩ ga jema, notürü jemaãcü nüxü̃ naxüpetü jerü ga Tupana rü jemaãcü inaxuneta ga jexguma pecadu naxü̱xgu ga guma jatü. Notürü i nhu̱xma rü guxü̃ma ga jema Tupana üxü̃ rü ínanaṉg̱uxẽẽ na ngẽma chixexü̃wa ínanguxü̃xü̃ca̱x. 21  Erü ngẽma ngunexü̃ i Tupana tá nagu nadexü̃ i naxãcügü na naxü̃tawa nangẽxmagüxü̃ca̱x, rü ngẽxguma tá ta nixĩ i chixexü̃wa ínanguxü̃xẽẽãxü̃ i guxü̃ma ga jema nümatama naxüxü̃. Rü ngẽmaãcü wenaxãrü noxrirüü̃ tá name i guxü̃ma. 22  Rü nüxü̃ tacua̱x rü guxü̃ma ga jema Tupana üxü̃, rü noxritama chixexü̃ nüxü̃ üpetügu rü poraãcüxü̃chima nanaxwa̱xeecha na wenaxãrü noxrirüü̃ namexü̃. 23  Rü tama ngẽmaxĩcatama nixĩ i poraãcü nanaxwa̱xegüxü̃ na wenaxãrü noxrirüü̃ namexü̃. Notürü jixema na jaxõgüxü̃ rü ta tanaxwa̱xe na ínanguxü̃ ja Tanatü na naxãcügüxü̃ tüxü̃ na nadexü̃ca̱x rü ngexwacaxü̃xü̃ i taxünegü tüxna naxãxü̃ca̱x. Rü woo tüxü̃́ na nangẽxmaxü̃ i Tupanaãẽ i Üünexü̃ i tüxü̃ nüxü̃ cua̱xẽẽxü̃ na nhuxãcü tá jiĩxü̃ i dauxü̃guxü̃ i naãnewa, notürü tanaxwa̱xe na paxa ngẽ́maxü̃chi ingugüxü̃. 24  Cristu tüxna nanaxã i maxü̃ i taguma gúxü̃, notürü ítanaṉg̱uxẽẽgümare na naxü̃tawa ingugüxü̃ na najauxgüxü̃ca̱x i ngẽma maxü̃. Notürü nüxü̃ tacua̱x rü ngẽxguma chi marü nüxü̃ idaugügu i ngẽma írüṉg̱uxẽẽgüxü̃, rü taxuü̃ca̱xma tü̱xcüü̃ ítanaṉg̱uxẽẽgü. Erü ngẽma marü nüxü̃ idauxü̃, rü taxuü̃ca̱xma ítanaṉg̱uxẽẽ. 25  Notürü ngẽxguma taũta nüxü̃ idaugügu i ngẽma írüṉg̱uxẽẽgüxü̃, rü tanaxwa̱xe i meã ítanaṉg̱uxẽẽgüecha nhu̱xmatáta nüxü̃ idaugü. Rü ngẽmaãcü nixĩ i Cristuxü̃ írüṉg̱uxẽẽgüxü̃. 26  Rü Tupanaãẽ rü tüxü̃ narüngü̃xẽẽ ta na iporaexü̃ca̱x i ngẽxguma guxchaxü̃gü tüxü̃ üpetügu. Rü jixema rü tama nüxü̃ tacua̱x na nhuxãcü Tupanamaã idexagüxü̃ rü ṯacüca̱x ijumuxẽgüxü̃. Notürü Naãẽ i Üünexü̃ rü naxauxãcüma ore i tama nüxü̃ icuáxü̃maã Tupanamaã nidexa rü taxca̱x najumuxẽ. 27  Rü Tupana ja meã tüxü̃ cuácü rü nüxü̃ nacua̱x na nhuxũ nhaxü̃chiga jiĩxü̃ i ngẽma Naãẽ i Üünexü̃ nüxü̃ ixuxü̃. Erü ngẽma Naãẽ i Üünexü̃ rü Tupana naxwa̱xexü̃ãcüma Tupanaxü̃ naca̱a̱xü̃ tümaca̱x ja jíxema Tupanaãrü duü̃xü̃gü ixĩgüxe. Cristu rü tüxü̃ naporaexẽẽãma na taxuü̃ma i guxchaxü̃gü tüxü̃ narüjexeraxü̃ca̱x 28  Rü nüxü̃ tacua̱x rü tümaãrü mexü̃ca̱x nixĩ i Tupana ínanguxẽẽxü̃ i guxü̃ma i ngẽma tüxü̃ üpetüxü̃ ja jíxema nüxü̃ ngechaü̃güxe ga nüma nanaxwa̱xexü̃ãcüma tüxü̃ jadexechixe. 29  Rü woetama nuxcümama ga Tupana rü marü tüxü̃ nacua̱x na texégü tá tixĩgüxü̃ ja jíxema noxrü ixĩgüxe. Rü noxritama naãne ixügügumama tüxü̃ nidexechi na Nanerüü̃ timexü̃ i nape̱xewa, rü jima Nane rü tümamaã inacuáxü̃ca̱x ja guxãma ja jíxema naẽneẽgü ixĩgüxe. 30  Rü guxema noxri naãne ixügügumama Tupana tüxü̃ idexechixe, rü tümaca̱x naca na noxrü tixĩgüxü̃ca̱x. Rü guxema tümaca̱x nac̱axe, rü nügüca̱x tüxü̃ nimexẽẽgü. Rü guxema nügüca̱x tüxü̃ jamexẽẽgüxe, rü dauxü̃wa tá tüxü̃ nagagü na guxü̃gutáma naxü̃tawa tangẽxmagüxü̃ca̱x. 31  ¿Rü nhuxũ nhagüxü̃ tá i nhu̱xma i ngẽmachiga? Rü ngẽxguma Tupana taétüwa chogügu, ¿rü texé tá tüxü̃ rüjexeraxü̃? 32  Jerü nüma ga Tupana rü tama tüxna najanuxü̃ ga Nanexü̃chi. Notürü taxca̱x inanamu ga Nane na taxca̱x najuxü̃ca̱x i guxãma i jixema. Rü nhu̱xma na jemaãcü taxca̱x inamuãxü̃ ga Nane, ¿rü taux e̱xna tüxna naxããxü̃ i guxü̃ma i ṯacü i inaxwa̱xexü̃ na naxca̱x imaxẽxü̃ca̱x? 33  Rü Tupana tüxü̃ nidexechi rü tüxü̃ nixu na nape̱xewa imexü̃. Rü ngẽmaca̱x ¿rü texé tá nape̱xewa tüxü̃ tixugü na ichixexü̃? Erü Tupanatama nixĩ ja tüxü̃ ixucü na tüxü̃́ nataxuü̃ma i chixexü̃. 34  ¿Rü texé tá pocuwa tüxü̃ tamugü i nhu̱xmax? ¿Pexca̱x rü Cristu tá jiĩxü̃? Dücax, taxucürüwama ngẽmaãcü nixĩ jerü Cristu nixĩ ga taxca̱x jucü na tüxü̃ namaxẽxẽẽxü̃ca̱x. Rü tama ngẽxĩcatama taxca̱x naxü, notürü wenaxãrü ínarüda. Rü nhu̱xma rü Tupanaxü̃tawa nangẽxma rü ngẽ́ma ãẽ̱xgacü nixĩ. Rü ngẽ́ma taétüwa nachogü rü Tupanaxü̃ taxca̱x naca̱a̱xü̃. 35  ¿Rü nhu̱xma rü ṯacü tá Cristuna tüxü̃ ixĩgachixẽẽxü̃ na tama tüxü̃ nangechaü̃xü̃ca̱x? Rü woo ngúxü̃ ingegügu, rü e̱xna guxchaxü̃gü tüxü̃́ ngẽxmagu, rü e̱xna duü̃xü̃gü Cristugagu tachi aiegu, rü e̱xna itaijaegu, rü e̱xna ingexchirugügu, rü e̱xna ãũcümaxü̃wa ingẽxmagügu, rü e̱xna duü̃xü̃gü tüxü̃ daixchaü̃gu, notürü woo guxü̃ma i ngẽma tüxü̃ üpetügu, notürü ja Cristu rü tãũxü̃táma nüxü̃ narüchau na tüxü̃ nangechaü̃xü̃. 36  Notürü guxü̃guma ãũcümaxü̃wa tangẽxmagü, ngẽma Tupanaãrü ore i ümatüxü̃ nüxü̃ ixuxü̃rüü̃. Erü ngẽma ore rü nhanagürü:“Rü cugagu duü̃xü̃gü toxü̃ nadaixchaü̃ rü duü̃xü̃güpe̱xewa rü nhama carnerugü i daiwa ĩxü̃rüü̃ tixĩgü”, nhanagürü i ngẽma ore. 37  Notürü woo guxü̃ma i ngẽma tüxü̃ na ngupetüxü̃, rü Ngechuchu ja Cristu ja tüxü̃ ngechaü̃cü, rü tüxü̃ naporaexẽẽãma na taxuü̃ma i guxchaxü̃gü tüxü̃ narüjexeraxü̃ca̱x, rü bai i ṯacü. 38  8:38-39 Rü ngẽmaca̱x aixcuma chajaxõ na taxucürüwama ṯacü Tupanana tüxü̃ ixĩgachixẽẽxü̃ na ngẽmaãcü tama tüxü̃ nangechaü̃xü̃ca̱x. Rü woo iju̱xgu rü woo imaxẽgu, notürü Tupana tá tüxü̃ nangechaü̃ẽcha. Rü taxucürüwama Tupanana tüxü̃ nixĩgachixẽẽ i ṯacü i norü orearü ngeruü̃gü, rü e̱xna ṯacü rü ṉg̱oxogü rü e̱xna ṯacü i to i poraxü̃. Rü bai i ṯacü i nhu̱xma tüxü̃ üpetüxü̃, rü bai i ṯacü i jixcüra tá ngẽxmaxü̃, rü bai i ṯacü i dauxü̃wa ngẽxmaxü̃, rü bai i ṯacü i naãnetüü̃wa ngẽxmaxü̃, rü bai i ṯacü i to i Tupana üxü̃, rü taxucürüwama Tupanana tüxü̃ nixĩgachixẽẽ na tama tüxü̃ nangechaü̃xü̃ca̱x. Rü ngẽmaãcü nixĩ i tüxü̃ nangechaü̃xü̃ ja Tupana nagagu ja tórü Cori ja Ngechuchu ja Cristu. 39  Nüü̃ nadau 8:38

Notas