Romacü̃ãʼ 6:1-23

6  Rü nhu̱xma na Tupanaãxü̃́ ingechaü̃tümüü̃güxü̃, ¿rü nhuxãcü tá imaxẽxü̃ i nhu̱xmax? ¿Rü pexca̱x rü namexü̃ na pecadu ixügüechaxü̃ na jexeraãcü Tupanaãxü̃́ ingechaü̃tümüü̃güxü̃ca̱x?  Rü dücax, tama ngẽmaãcü nixĩ. Erü nhu̱xma pecaduchaxwa rü nhama ijuexü̃rüü̃ tixĩgü, erü marü tama naga taxĩnüẽ. Rü ngẽmaca̱x tama name i jeü̃cürü pecadu taxügüecha.  ¿Tama e̱xna nüxü̃ pecua̱x na ṯacüca̱x jiĩxü̃ na íibaiü̃xü̃? Rü ítabaiü̃ na ngẽmaãcü duü̃xü̃güxü̃ nawéxü̃ca̱x na aixcuma Ngechuchu ja Cristuarü duü̃xü̃gü na ixĩgüxü̃. Rü jexguma íibaiü̃gu, rü nüma najuxü̃rüü̃ jexma naju ga tacüma ga nuxcümaü̃xü̃.  Rü jexguma íibaiü̃gu, rü Cristu juxü̃rüü̃ jexma naju ga tacüma ga nuxcümaü̃xü̃, rü Cristu itáxü̃rüü̃ inata̱x ga jema tacüma ga nuxcümaü̃xü̃. Rü jemaãcü naxüpetü na wena imaxẽxü̃ca̱x rü tüxü̃́ nangẽxmaxü̃ca̱x i maxü̃ i ngexwacaxü̃xü̃, jexgumarüü̃ ga Ngechuchu na juwa írüdaxü̃ rü wena namaxü̃xü̃ ga jexguma Nanatü ga Tupana norü poramaã ínadaxẽẽgu.  Rü nhu̱xma na Cristumaã wüxigu najuxü̃ ga tacüma ga nuxcümaü̃xü̃, rü nüxü̃ tacua̱x na aixcuma Cristumaã tüxü̃́ nangẽxmaxü̃ i maxü̃ i ngexwacaxü̃xü̃.  Rü nüxü̃ tacua̱x rü jema tórü maxü̃ ga nuxcümaü̃xü̃ rü Cristumaã wüxigu curuchagu naju na jexma janaxoxü̃ca̱x ga jema tacüma ga chixexü̃. Rü nhu̱xma rü tama pecadutüü̃wa tangẽxmagü, rü ngẽmaca̱x marü tama naga taxĩnüẽ.  Erü jíxema júxe rü marü tama pecadutüü̃wa tangẽxma na jeü̃cürü pecadu taxüechaxü̃ca̱x.  Rü nhu̱xma na Cristumaã najuxü̃ ga tórü maxü̃ ga nuxcümaü̃xü̃, rü nüxü̃ tacua̱x na Cristurüü̃ tüxü̃́ nangẽxmaxü̃ i maxü̃ i ngexwacaxü̃xü̃.  Rü nüxü̃ tacua̱x rü nhu̱xma na juwa ínadaxü̃ ja Cristu, rü tagutáma wena naju. Jerü nüma rü marü juxü̃ narüjexera. 10  Rü jexguma naju̱xgu ga Cristu rü pecaduca̱x nixĩ ga najuxü̃, rü noxtacüma jexma wüxicana ningutanü ga guxü̃ma ga duü̃xü̃güarü pecadugü. Notürü nhu̱xma na namaxü̃xü̃, rü Tupanaca̱x nixĩ i namaxü̃xü̃ na Tupanaãrü ngúchaü̃ naxüxü̃ca̱x. 11  Rü ngẽxgumarüü̃ ta i pema rü name nixĩ i pegügu perüxĩnüẽ na marü pejuexü̃ pecaduchaxwa rü Tupanaca̱x pemaxẽxü̃, erü Ngechuchu ja Cristuarü duü̃xü̃gü peixĩgü. 12  Rü ngẽmaca̱x rü tama name i pecadutüü̃wa pegü pengẽxmagüxẽẽ na pemaã inacuáxü̃ca̱x. Rü tama name i penaxüchica i pecadu na pexeneãrü ngúchaü̃gü i chixexü̃ pexü̃ naxüxẽẽxü̃ca̱x. 13  Rü tama name i pecaduna penaxãgü i pexene na ngẽmamaã chixexü̃ pexügüxü̃ca̱x. Rü name nixĩ i Tupanana pegü pexãgü, erü nhama duü̃xü̃gü i juexü̃ rü wena maxẽxü̃rüü̃ peixĩgü. Rü ngẽmaca̱x name nixĩ i Tupanana penaxãgü i pexene na ngẽmamaã mexü̃ pexügüxü̃ca̱x. 14  Rü nhu̱xma rü tãũxü̃táma pecadutüü̃wa pengẽxmagü na pemaã inacuáxü̃ca̱x. Rü jexguma jema mugü ga Muĩsé ümatüxü̃we perüxĩxgu, rü pemaã inacua̱x ga pecadu. Notürü i nhu̱xma rü Cristugagu Tupana pemaã namecüma, rü nüma nixĩ i pemaã inacuáxü̃ i nhu̱xmax. Ngẽxguma wüxi i corime̱xẽwa jigü ingẽxmagüxẽẽgu, rü ngẽmaga nixĩ i ixĩnüẽxü̃ 15  Rü nhu̱xma na tama jema Muĩsé ümatüxü̃ ga mugütüü̃wa ingẽxmagüxü̃, rü nhu̱xma na Tupana rü Cristugagu tamaã mecümaxü̃, ¿rü nhuxãcü tá imaxẽxü̃? ¿Rü pexca̱x namexü̃ na jeü̃cürü pecadu ixügüechaxü̃? Rü dücax, tama name na ngẽmaãcü imaxẽxü̃. 16  Rü pema nüxü̃ pecua̱x rü ngẽxguma wüxi i corime̱xẽwa pegü pengẽxmagüxẽẽgu na naga pexĩnüẽxü̃ca̱x rü ngẽma tá nixĩ i perü cori ixĩxü̃, rü pema rü norü duü̃xü̃gü tá peixĩgü i ngẽma cori i naga pexĩnüẽxü̃. Rü nhu̱xma rü pema tá nüxü̃ pedaugü ngoxi ngẽxü̃rüüxü̃ perü me jixĩ na ngẽmaga pexĩnüẽxü̃ca̱x. Rü ngẽxguma pecadu i juwa tüxü̃ gagüxü̃ perü me jixĩgu, rü ngẽma tá nixĩ i pemaã icuáxü̃. Rü ngẽxguma perü me jixĩgu na Tupanaga na pexĩnüẽxü̃, rü jimaga tá pexĩnüẽ na nape̱xewa pemexü̃ca̱x. 17  Notürü Tupanana moxẽ chaxã, jerü woo pecaduga na pexĩnüẽchiréxü̃, notürü i nhu̱xma rü aixcuma naga pexĩnüẽ i ngẽma ngu̱xẽẽtae i marü pejaxuxü̃ i Cristuchiga. 18  Rü nhu̱xma rü Tupanaãrü duü̃xü̃gü peixĩgü erü nüma rü chixexü̃na pexü̃ ínanguxü̃xẽẽ na tama pecadu pexügüechaxü̃ca̱x. Rü ngẽmaãcü pexü̃ narüngü̃xẽẽ na nape̱xewa pemexü̃ca̱x rü meã naxca̱x pemaxẽxü̃ca̱x. 19  Rü nhama i naãnecü̱̃ã̱x i duü̃xü̃gümaã chidexarüü̃ nixĩ i tauxchaxü̃ i oremaã pemaã chidexaxü̃ i nhu̱xmax, erü pema rü woetama taguma nüxü̃ pexĩnüẽ i nhaã ore, rü ngürüãchi tãũxü̃táma nüxü̃ pecua̱x i ṯacüchiga na jiĩxü̃ i ngẽma pemaã nüxü̃ chixuxü̃. Rü dücax, rü nuxcüma rü ipenaxã ga pexene na namaã penaxügüxü̃ca̱x ga nagúxü̃raü̃xü̃ ga chixexü̃. Notürü i nhu̱xma rü name nixĩ i Tupanana pegü pexã na aixcuma nape̱xewa pexüünegüxü̃ca̱x rü naxca̱xicatama pemaxẽxü̃ca̱x. 20  Rü jexguma pecadutüü̃wa pejexmagügu, rü taxucürüwama Tupanape̱xewa mexü̃ pexügü ga jexguma. 21  ¿Notürü ṯacüwa pexü̃́ namexü̃ ga jema chixexü̃ i nhu̱xma rü wüxi i ãne pexna ãxü̃? Jerü jema chixexü̃ rü juwamare pexü̃ nagagü, rü tama i maxü̃wa. 22  Notürü marü tama pecadutüü̃wa pengẽxmagü i nhu̱xmax, erü marü nüxna ípenguü̃ rü marü Tupanaãrü duü̃xü̃gü peixĩgü. Rü ngẽma waxi nixĩ i poraãcü pexü̃́ mexü̃ erü ngẽmagagu penajaxu i maxü̃ i Tupanape̱xewa üünexü̃ rü ngẽmawena tá penajaxu i maxü̃ i taguma gúxü̃. 23  Rü ngẽma natanü na pecadu ixüxü̃, rü ju nixĩ. Notürü jíxema tórü Cori ja Ngechuchuaxü̃́ jaxõgüxe, rü Tupana tüxna nanaxãmare i maxü̃ i taguma gúxü̃.

Notas