Romacü̃ãʼ 3:1-31

3  ¿Rü nhu̱xma rü ṯacüwa tüxü̃́ namexü̃ na Judéugü ixĩgüxü̃? ¿Rü ṯacüwa namexü̃ na íiwiecha̱xmüpe̱xechiraü̃güxü̃?  Rü poraãcüxü̃chima tüxü̃́ name na Judéugü ixĩgüxü̃. Jerü nüma ga Tupana rü tüxnaxü̃chi nixĩ ga naxããxü̃ ga norü mugü i ümatüxü̃.  ¿Rü ṯacü tá ngupetüxü̃ i nhu̱xma ega nhuxre i tatanüxü̃ i Judéugü rü tama meã janguxẽẽgüãgu i ngẽma Tupana tüxü̃ muxü̃? ¿Rü pexca̱x rü ngẽmaca̱x tãũxü̃táma janguxẽẽãxü̃ ja Tupana i ngẽma tamaã inaxunetaxü̃?  Rü tama ngẽmaãcü nixĩ. Erü woo guxü̃ i duü̃xü̃gü rü jadorata̱a̱xgügu, notürü Tupana rü taguma nidora rü guxü̃guma najanguxẽẽ i ngẽma nüma tamaã inaxunetaxü̃. Rü jemaca̱x norü ore ga Dawí ümatüxü̃wa rü nhanagürü:“Cumax, Pa Tupanax, rü aixcuma nixĩ i curü ore i nüxü̃ cuixuxü̃. Rü ngẽxguma cuxü̃ tangugügügu rü nüxü̃ tadaugü na aixcuma cumexü̃”, nhanagürü.  Notürü duü̃xü̃gü rü ínatüe erü nhanagürügü: “Rü nüẽ́tama nixĩ na chixexü̃ ixügüxü̃ erü ngẽmaãcü jexeraãcü nango̱x na namexü̃ ja Tupana”, nhanagürügü. Rü nhanagürügü ta: “Rü ngẽxguma chi tórü chixexü̃gagu jexeraãcü nango̱xgu na aixcuma namecümaxü̃ ja Tupana, rü maneca tama name ja Tupana ega tórü chixexü̃ca̱x tüxü̃ napocuegu”, nhanagürügü.  Notürü ngẽma nhaxü̃gu na naxĩnüẽxü̃ i duü̃xü̃gü rü poraãcü ínatüe, erü tama ngẽmaãcü nixĩ. Erü ngẽxguma chi tama namexgu ja Tupana, ¿rü nhuxãcü chi i meã duü̃xü̃güxü̃ jacagüxü̃ i naãneãrü gu̱xgu?  Notürü i duü̃xü̃gü rü nhanagürügü: “Rü ngẽxguma chi chorü chixexü̃gagu jexeraãcü nango̱xgu na nhuxãcü aixcuma namexü̃ ja Tupana, ¿rü tü̱xcüü̃ jiĩxü̃ i choxna nac̱axü̃ naxca̱x i chorü chixexü̃ rü choxü̃ napocuxü̃ naxca̱x i ngẽma?” nhanagürügü.  Notürü ngẽma nhaxü̃gu na naxĩnüẽxü̃ i duü̃xü̃gü rü poraãcü ínatüe. Erü ngẽxguma chi aixcuma jixĩgu i ngẽma nagu naxĩnüẽxü̃ i duü̃xü̃gü, rü chi narümemaẽ nixĩ na jexeraãcü chixexü̃ naxügüxü̃ na jexeraãcü mexü̃ na ínguxuchixü̃ca̱x. Rü dücax, Pa Chaueneẽgüx, nangẽxma i chixexü̃ i duü̃xü̃gü i choxü̃ ügagümarexü̃ i nüxü̃ ixugüexü̃ na ngẽma jiĩxü̃ i chorü ngu̱xẽẽtae i duü̃xü̃güxü̃ namaã changúexẽẽxü̃. Notürü ngẽma duü̃xü̃gü i ngẽma nhagüxü̃ rü nagagu tátama napocue. Guxãma i jixema rü tipecaduã̱xgü  ¿Rü nhuxãcü nixĩ i nhu̱xmax? ¿Pexca̱x rü jixema i Judéugü rü togü i duü̃xü̃güarü jexera Tupanape̱xewa imexü̃? Pemaã nüxü̃ chixu rü tama ngẽmaãcü nixĩ. Erü guxü̃ma i duü̃xü̃gü i Judéugü ixĩgüxü̃ rü guxü̃ma i duü̃xü̃gü i tama Judéugü ixĩgüxü̃, rü pecadutüü̃watama nangẽxmagü. 10  Erü Tupanaãrü ore i ümatüxü̃wa rü nhanagürü:“Rü tataxuma ja texé ja aixcuma Tupanape̱xewa mexẽ, rü bai ja wüxie. 11  Rü tataxuma ja texé ja aixcuma nüxü̃ cuáxe i Tupanaãrü ore na nhuxãcü nanaxwa̱xexü̃ na naxca̱x imaxẽxü̃. Rü tataxuma ja texé ja aixcuma Tupanaca̱x dauxe. 12  Rü guxãma ítatüe, rü guxãma itajarütauxe rü chixexü̃ taxügü i Tupanape̱xewa. Rü tataxuma ja texé ja aixcuma mexü̃ üechaxe, rü bai ja wüxie. 13  Rü tümaã̱x rü wüxi i juetamaxü̃ i ingenaxü̃rüü̃ nixĩ erü ngẽ́ma ítanaxũxũxẽẽ i nagúxü̃raü̃xü̃ i dexa i chixexü̃. Rü tümaãrü conümaã rü poraãcü tidorae. Rü ngẽma tümaãrü dexa rü nhama ãxtapegupütachatarüü̃ nixĩ erü togüxü̃ nachixexẽẽ. 14  Rü chixexü̃ i ore i duü̃xü̃güãẽwa ngúxü̃maãxĩcatama tidexagü. 15  Rü ítamemare na duü̃xẽxü̃ timáxü̃. 16  Rü ngextá ítaxĩxü̃wa rü togüxü̃ tachixexẽẽ rü tanangechaü̃xẽẽ rü chixexü̃gu tanajixẽẽ. 17  Rü tama nüxü̃ tacua̱x na nhuxãcü togü i duü̃xü̃güxü̃ tangechaü̃güxü̃ rü meã natanüwa tamaxẽxü̃. 18  Rü tama nüxü̃ tacuáxchaü̃ na Tupanaxü̃ tamuü̃ẽxü̃”, nhanagürü i ngẽma ore i ümatüxü̃wa. 19  Rü nüxü̃ tacua̱x ga Tupana rü Judéugüna nanaxã ga norü mugü na naxauregüãxü̃ca̱x rü tama nügü ínatagüxü̃ca̱x. Notürü taxúema aixcuma naga taxĩnü i ngẽma mugü. Rü ngẽmaca̱x taxucürüwa texé Tupanape̱xewa tügüétüwa tachogü i ngẽxguma Tupana tüxü̃ icagügu i tümaãrü pecaduchiga. 20  Rü nhu̱xma na taxúema aixcuma naga ĩnüẽxü̃ i ngẽma mugü, rü ngẽmaca̱x taxucürüwama texé tügü tixu na ngẽma mugü taxaurexü̃gagu Tupanape̱xewa tamexü̃. Erü ngẽma mugü tüxü̃ nüxü̃ cua̱xẽẽxü̃ nixĩ na poraãcü ipecaduã̱xgüxü̃. Tórü õgagu nixĩ i Tupana tüxna naxãxü̃ i maxü̃ 21  3:21-22 Rü nhu̱xma na taxucürüwama Tupanape̱xewa tüxü̃ jamexẽẽxü̃ i ngẽma mugü, rü ngẽmaca̱x ja Tupana rü tüxü̃ nüxü̃ nacua̱xẽẽ na nhuxãcü jiĩxü̃ i tüxü̃ jamexẽẽxü̃ na nape̱xewa imexü̃ca̱x. Rü pemaã nüxü̃ chixu rü Ngechuchu ja Cristuaxü̃́ na jaxõgüxü̃gagu nixĩ i tüxü̃ jamexẽẽxü̃ ja Tupana na aixcuma nape̱xewa imexü̃ca̱x. Rü jema mugü ga Muĩsé ümatüxü̃ rü jema ore ga nuxcümaxü̃güxü̃ ga orearü uruü̃gü ümatüxü̃ rü tüxü̃ nüxü̃ nacua̱xẽẽ i ngẽma. Rü jema mexü̃ ga Tupana taxca̱x üxü̃ ga jexguma núma namuãgu ga Nane na tórü pecadu naxütanüxü̃ca̱x, rü guxü̃ i duü̃xü̃gü i jaxõgüxü̃ca̱x nixĩ, erü Tupanape̱xewa rü nawüxigu i guxü̃ma i ngẽma duü̃xü̃gü. 22  Nüü̃ nadau 3:21 23  Rü guxãma tipecaduã̱xgü rü nüxna tajaxü̃gugü ja Tupana ja tüxü̃ maxẽxẽẽcü. 24  Notürü ga Tupana rü poraãcü tamaã namecüma rü jemaca̱x tüxü̃́ nangetanüãcüma tüxü̃ nimexẽẽgü na nape̱xewa imexü̃ca̱x. Rü nhu̱xma rü tüxü̃́ nangẽxma i maxü̃ i taguma gúxü̃, jerü Ngechuchu ja Cristu rü marü tüxü̃́ nanaxütanü ga tórü pecadugü. 25  3:25-26 Rü Tupana rü aixcuma núma nanamu ga Cristu na najuxü̃ca̱x rü jemaãcü tórü pecadu naxütanüxü̃ca̱x na Tupana tüxü̃́ nüxü̃ ngechaü̃xü̃ca̱x i ngẽxguma aixcuma Cristuaxü̃́ jaxõgügu. Rü jemaãcü nanaxü ga Tupana na tüxü̃ nüxü̃ nadauxẽẽxü̃ca̱x na nhuxãcü nüma nügüca̱x tüxü̃ jamexẽẽxü̃ na aixcuma nape̱xewa imexü̃ca̱x. Rü nuxcüma ga Tupana rü jaxna namaã naxĩnü ga duü̃xü̃gü ga jexguma chixexü̃ naxüegu, rü tama paxa nanapocue. Rü nhu̱xma rü ta tüxü̃ nanawe̱x na nhuxãcü aixcuma namexü̃ i ngẽma nüma naxüxü̃ erü tüxü̃́ ínanapi i tórü pecadugü. Rü ngẽmaãcü tüxü̃ nüxü̃ nadauxẽẽ na nhu̱xma rü ta aixcumacü jiĩxü̃ i ngẽxguma tüxü̃ jaxuxgu na nape̱xewa marü timexü̃ ja guxãma ja jíxema Ngechuchuaxü̃́ jaxõgüxe. 26  Nüü̃ nadau 3:25 27  Rü ngẽmaca̱x i nhu̱xma rü taxucürüwama jigü ticua̱xüü̃gü rü nüxü̃ tixu na jixematama jigü imexẽẽgüxü̃ i nape̱xewa. Erü taxucürüwama texé tügü tamexẽẽ i Tupanape̱xewa. Rü tama ngẽma na naxaurexü̃ca̱x i ngẽma mugü nixĩ i imexü̃, rü tama ngẽma na mexü̃ ixügüxü̃ca̱x nixĩ i imexü̃. Notürü Tupanape̱xewa time i nhu̱xma, erü Cristuaxü̃́ tajaxõgü. 28  Rü jixema nüxü̃ tacua̱x rü ngẽxguma Cristuaxü̃́ jaxõgügu nixĩ i Tupanape̱xewa imexü̃, rü tama ngẽma mugü na ixauregüxü̃ca̱x nixĩ i nape̱xewa imexü̃. 29  ¿E̱xna pexca̱x rü Tupana rü Judéugüarü Tupanaxĩcatama jiĩxü̃? ¿Rü tama e̱xna i ngẽma togü i duü̃xü̃güarü Tupana rü ta jiĩxü̃? Ngẽmáãcüx, ngẽma togü i duü̃xü̃gü i tama Judéugü ixĩgüxü̃ãrü Tupana ta nixĩ. 30  Rü nüxü̃ tacua̱xgü na nangẽxmaxü̃ ja wüxitama ja Tanatü ja Tupana. Rü guxü̃ma i duü̃xü̃gü i Cristuaxü̃́ jaxõgüxü̃, rü nüma ja Tupana rü najamexẽẽ na nape̱xewa jamexü̃ca̱x. Rü ngẽmaãcü i nüma ja Tupana rü Judéugüxü̃ nimexẽẽ i ngẽxguma jaxõgüãgu. Rü ngẽxgumarüü̃ ta najamexẽẽ i guxü̃ma i togü i duü̃xü̃gü i ngẽxguma Cristuaxü̃́ jaxõgüãgu. 31  Rü nhu̱xma na Cristuaxü̃́ jaxõgüxü̃, rü bexmana nagu perüxĩnüẽ na ngẽmaãcü ijanaxoxẽẽxü̃ i ngẽma mugü. Notürü tama ngẽmaãcü nixĩ. Erü nhu̱xma na Cristuaxü̃́ jaxõgüxü̃ rü aixcuma tajanguxẽẽ i ngẽma Tupana tüxü̃ muxü̃.

Notas