Romacü̃ãʼ 2:1-29

2  Rü ngẽmaca̱x, Pa Duü̃xü̃x, rü woo texé cuixĩgu rü taxuacüma Tupanape̱xewa cugüétüwa cuchogü, ega togüxü̃ cuixuechagu. Erü ngẽxguma togüxü̃ cuixuechagu na nachixexü̃ rü cugütama cupocu, erü cuma na cumücüxü̃ cuixuechaxü̃ rü cuma rü ta cunaxü i ngẽma chixexü̃ i cumücüxü̃ naxca̱x cuixuechaxü̃.  Rü nüxü̃ tacua̱x rü Tupana tá nanapocue i ngẽma duü̃xü̃gü i namücügüxü̃ ixugüechaxü̃. Rü ngẽxguma napocueãgu, rü tama chixexü̃ naxü ja Tupana, erü ngẽma duü̃xü̃gü rü norü chixexü̃gagutama nixĩ i napocueãxü̃.  Rü dücax, Pa Duü̃xü̃x, rü ngẽxguma togüxü̃ cuixuechagu, notürü cuma rü ta cunaxü̱xgu i ngẽmatama chixexü̃ i nüma naxüxü̃, ¿rü nhuxũcürüwa tá i nagu curüxĩnüxü̃ na Tupanachaxwa icuicúxü̃ na tama cuxü̃ napocuxü̃ca̱x?  ¿Rü tü̱xcüü̃ tama nagu curüxĩnü i ngẽma mexü̃ i Tupana cuxca̱x üxü̃? Nüma rü poraãcüxü̃chi cumaã namecüma rü jaxna cumaã naxĩnü rü tama paxa curü chixexü̃ca̱x cuxü̃ napocuchaü̃. ¿Rü nhu̱xma rü tü̱xcüü̃ nüxü̃ cuxo? ¿Tama e̱xna nüxü̃ cucua̱x na Tupana ngẽmaãcü cumaã mecümaxü̃ na nüxü̃ curüxoxü̃ca̱x i curü chixexü̃ rü naxca̱x na cumaxü̃xü̃ca̱x ja Tupana?  Notürü cuma rü tama Tupanaxü̃ cucuáxchaü̃ rü tama nüxü̃ curüxoxchaü̃ i curü chixexü̃. Rü ngẽmaãcü cugüca̱xtama cunajexeraxẽẽ i curü pocu i tá cujaxuxü̃ i ngẽma ngunexü̃ i nagu Tupana napocuexü̃ i ngẽma chixexü̃ ügüxü̃. Rü ngẽma ngunexü̃gu rü Tupana tá aixcuma ngẽma duü̃xü̃gümaã nanaxuegu na nhuxãcü tá na napocueãxü̃.  Rü ngẽxguma tá nixĩ i Tupana nüxü̃́ jaxügütanüxü̃ i wüxichigü i duü̃xü̃ naxca̱x i ngẽma naxügüxü̃.  Rü maxü̃ i taguma gúxü̃maã Tupana tá tüxü̃́ nanaxütanü ja jíxema guxü̃guma mexü̃ taxügüãcüma naxca̱x daugüxe na Tupana tümamaã taãẽxü̃ rü naxca̱x daugüxe na aixcuma Tupanaxü̃tawa tangugüxü̃.  Notürü Tupana tá tümamaã nanu rü tá tüxü̃ napocu ja jíxema tügüguxicatama rüxĩnüẽxẽ rü tama naga ĩnüẽchaü̃xẽ i ore i aixcuma ixĩxü̃ rü naxca̱x daugüxe na ngẽma chixexü̃ taxügüxü̃.  Rü guxü̃ma i ngẽma duü̃xü̃gü i chixexü̃ ügüxü̃ rü tá ngúxü̃ ningegü rü poraãcü tá chixexü̃ nüxü̃ naxüpetü. Rü ngẽma Judéugü i chixexü̃ ügüxü̃xĩra tá nixĩ i Tupana inapocuexü̃. Rü ngẽmawena rü tá nanapocue i guxü̃ma i ngẽma togü i duü̃xü̃gü i chixexü̃ ügüxü̃. 10  Notürü ngẽma duü̃xü̃gü i mexü̃ ügüxü̃, rü Tupana tá namaã nataãẽ, rü tá nanatachigaxẽẽ, rü tá nanataãẽxẽẽ. Rü ngẽma Judéugü i mexü̃ ügüxü̃ca̱xira tá nixĩ i ngẽma. Rü ngẽxgumarüü̃ i guxü̃ma i togü i duü̃xü̃gü i mexü̃ ügüxü̃ca̱x rü tá ta nixĩ. 11  Erü Tupanape̱xewa rü nawüxigu i ngẽma duü̃xü̃gü i Judéugü ixĩgüxü̃ rü ngẽma togü i duü̃xü̃gü i tama Judéugü ixĩgüxü̃. Rü guxãma ja texé ja chixexü̃ ügüxe rü tá tanajaxu i tümaãrü pocu, notürü guxãma ja texé ja mexü̃ ügüxe rü tá Tupana tümamaã nataãẽ. 12  Rü guxü̃ma i duü̃xü̃gü i pecadu ügüxü̃ i tama nüxü̃ cua̱xgüxü̃ i ngẽma mugü ga Muĩsé ümatüxü̃, rü tá inajarütauxe. Rü ngẽxgumarüü̃ ta i guxü̃ma i ngẽma pecaduã̱xgüxü̃ i nüxü̃ cua̱xgüxü̃ i ngẽma mugü ga Muĩsé ümatüxü̃, rü ngẽma mugü nüxü̃ ixuxü̃ãcüma Tupana tá nanapocue. 13  Erü Tupanape̱xewa rü taxuwama name i ngẽma duü̃xü̃gü i nüxü̃ ĩnüẽmarexü̃ notürü tama nagu maxẽxü̃ i norü mugü. Notürü ngẽma duü̃xü̃gü i Tupanaãrü mugüga ĩnüẽxü̃ nixĩ i aixcuma Tupanape̱xewa imexü̃. 14  Dücax, i ngẽma duü̃xü̃gü i tama Judéugü ixĩgüxü̃. Nümagü rü tama nüxü̃ nacua̱xgü i Tupanaãrü mugü. Notürü ngẽxguma nüẽchamatama naxügümareãgu i ngẽma Tupana tüxü̃ muxü̃, rü tüxü̃ nüxü̃ nadauxẽẽ na nüxü̃ nacua̱xgüxü̃ i ṯacü na jiĩxü̃ i mexü̃ rü ṯacü na jiĩxü̃ i chixexü̃, woo tama nüxü̃ na nacua̱xgüchiréxü̃ i Tupanaãrü mugü. 15  Erü nacümagüwatama nixĩ i tüxü̃ nüxü̃ nadauxẽẽxü̃ na nüxü̃ nacua̱xgüxü̃ na ṯacü jiĩxü̃ i mexü̃ rü ṯacü na jiĩxü̃ i chixexü̃. Rü ngẽma duü̃xü̃gü rü ngẽxguma chixexü̃ naxügügu, rü naãẽwatama nixĩ i nüxü̃ nacua̱xgüxü̃ na nachixexü̃ i ngẽma naxügüxü̃. Rü ngẽxgumarüü̃ ta i ngẽxguma mexü̃ naxügügu, rü naãẽwatama nixĩ i nüxü̃ nacua̱xgüxü̃ na namexü̃ i ngẽma naxügüxü̃. 16  Rü ngẽma ngunexü̃ i nagu Tupana Cristuxü̃ namuxü̃ na guxü̃ i duü̃xü̃güxü̃ jacagüxü̃ca̱x i norü maxü̃chiga, rü ngẽma duü̃xü̃gü i tama Tupanaãrü mugüxü̃ cua̱xgüxü̃ rü naãẽwa tátama nixĩ i nüxü̃ nacua̱xgüxü̃ na chixexü̃ naxügüxü̃ rü e̱xna mexü̃ naxügüxü̃. Rü ngẽxguma tá nixĩ i nangóxü̃ i guxü̃ma i ngẽma chixexü̃ i cúãcüma naxügüxü̃ i duü̃xü̃gü, rü ngẽma chixexü̃ i nüxĩcatama nagu naxĩnüẽxü̃. Rü Tupanaãrü ore i pemaã nüxü̃ chixuxü̃ nixĩ i tüxü̃ nüxü̃ cua̱xẽẽxü̃ i ngẽma. Judéugüchiga rü mugü ga Muĩsé ümatüxü̃chiga 17  Notürü pema Pa Chaueneẽgü i Judéugüx, rü nhaperügügü: “Toma rü Judéugü tixĩgü rü meãma nüxü̃ tacua̱x i Tupanaãrü mugü ga Muĩsé ümatüxü̃”, nhaperügügü. Rü ngẽmaãcü nagu perüxĩnüẽ na Tupanape̱xewa peimexü̃ erü meãma nüxü̃ pecua̱x i ngẽma Tupanaãrü mugü ga Muĩsé ümatüxü̃. Rü ngẽmaãcü Tupanamaã pegü peicua̱xüü̃gü erü nagu perüxĩnüẽ na Tupana pexü̃ nangechaü̃xü̃ erü Judéugü peixĩgü. 18  Rü nüxü̃ peixu na meãma nüxü̃ pecuáxü̃ i ṯacü nixĩ i Tupanaãrü ngúchaü̃ rü ṯacü nixĩ i mexü̃ rü ṯacü nixĩ i chixexü̃. Rü Tupanaãrü mugüwa naxca̱x pengúe na naxca̱x pedauxü̃ i ngẽma aixcuma mexü̃ ixĩxü̃. 19  Rü pema rü nhaperügügü: “Toma rü meãma nüxü̃ tacua̱x na tanaxucu̱xẽxü̃ i ngẽma togü i duü̃xü̃gü i tama Tupanaxü̃ cua̱xgüxü̃. Rü meãma nüxü̃ tacua̱x na itajanawe̱xãchixẽẽxü̃ i ngẽma togü i chixexü̃wa ngẽxmagüxü̃”, nhaperügügü. 20  Rü pema nagu perüxĩnüẽgu rü nüxü̃ pecua̱x na nhuxãcü penaxucu̱xẽxü̃ i ngẽma togü i duü̃xü̃gü i tama Tupanaxü̃ cua̱xgüxü̃ rü nhuxãcü penangúexẽẽxü̃ i ngẽma duü̃xü̃gü i ngexwacax jaxõgüxü̃. Rü ngẽmaãcü nagu perüxĩnüẽ na togüarü ucu̱xẽruü̃gü peixĩgüxü̃, erü Tupanaãrü mugüwa pengúe rü ngẽmaca̱x meãma nüxü̃ pecua̱x i ṯacü nixĩ i mexü̃ rü ṯacü nixĩ i ore i aixcuma ixĩxü̃. 21  Rü dücax, Pa Chaueneẽgü i Judéugüx, pema na togüxü̃ pengúexẽẽxü̃, ¿rü tü̱xcüü̃ tama pegütama pengúexẽẽ? Pema nüxü̃ peixu na tama namexü̃ na ingĩ́xü̃, ¿rü tü̱xcüü̃ i pema ipengĩ́ẽxü̃? 22  Rü pema nüxü̃ peixu na tama namexü̃ na naĩ i ngemaã ipexü̃, ¿rü tü̱xcüü̃ i pema i ngẽmaãcü pemaxẽxü̃? Rü pema na nachi pexaiexü̃ i togüarü tupanagünetachicüna̱xãgü, ¿rü tü̱xcüü̃ i naxca̱x pengĩ́ẽxü̃ i norü tupaucagüarü ngẽmaxü̃gü? 23  Pema nüxü̃ peixu na namexü̃ i Tupanaãrü mugü i ümatüxü̃, rü petaãẽ erü meã nüxü̃ pecua̱xgü i ngẽma mugü. Notürü Tupanamaã chixexü̃ pexüe, erü tama naga pexĩnüẽ i ngẽma pexü̃ namuxü̃ i norü mugüwa. 24  Rü ngẽmaca̱x i Tupanaãrü ore i ümatüxü̃wa rü nhanagürü:“Rü pegagu nixĩ na chixri Tupanachiga jadexagüxü̃ i ngẽma duü̃xü̃gü i tama Judéugü ixĩgüxü̃”, nhanagürü. 25  Pema rü pegü ípewiecha̱xmüpe̱xechiraü̃gü na Tupanaãrü duü̃xü̃gü peixĩgüxü̃ca̱x. Rü name nixĩ na penaxüxü̃ i ngẽma, ega aixcuma naga pexĩnüẽgu i Tupanaãrü mugü. Notürü ngẽxguma chi tama naga pexĩnüẽgu i Tupanaãrü mugü, rü woo Judéugü peixĩgügu, notürü Tupanape̱xewa rü taxuwama pexü̃́ name i ngẽma na pegü ípewiecha̱xmüpe̱xechiraü̃güxü̃. 26  Rü ngẽma togü i duü̃xü̃gü i tama nügü íwiecha̱xmüpe̱xechiraü̃güxü̃, rü woo tama ngẽma naxügügu, notürü Tupanaãrü duü̃xü̃gü tá nixĩgü ega naga naxĩnüẽgu i norü mugü. 27  Rü dücax, Pa Chaueneẽgü i Judéugüx, rü ngẽma duü̃xü̃gü i tama íwiecha̱xmüpe̱xechiraü̃güxü̃ notürü naga ĩnüẽxü̃ i Tupanaãrü mugü, rü ngẽma duü̃xü̃ rü tá Tupanape̱xewa pexü̃ nixu na nhuxãcü pechixexü̃. Rü ngẽmaãcü tá pexü̃ naxüpetü erü tama naga pexĩnüẽ i Tupanaãrü mugü i woochire̱x na nüxü̃ pecuáxü̃ i ngẽma mugü, rü woochire̱x na ípewiecha̱xmüpe̱xechiraü̃güxü̃. 28  Rü dücax, rü tama ngẽma na Judéuxacügü peixĩgüxü̃ca̱x nixĩ na aixcuma Tupanaxãcügü peixĩgüxü̃. Rü tama ngẽma na ípewiecha̱xmüpe̱xechiraü̃güxü̃ca̱x nixĩ na Tupanaãrü duü̃xü̃gü peixĩgüxü̃. 29  Erü jíxema aixcuma tümaãrü maxü̃newa Tupanaga ĩnüxẽ tixĩ ja aixcuma Tupanaxãcü ixĩxẽ. Rü ngẽxguma aixcuma taãẽwa jaxõ̱xgu nixĩ i aixcuma Tupanaãrü ixĩxü̃. Rü Tupanaãẽ i Üünexü̃ nixĩ i tüxü̃ rüngü̃xẽẽxü̃ na jaxõxü̃ca̱x, rü tama ngẽma mugü ga Muĩsé ümatüxü̃gagu nixĩ. Rü jíxema aixcuma Tupanaãrü ixĩxẽ, rü Tupana rü tümamaã nataãẽ woo duü̃xü̃gü tama tümamaã taãẽgügu.

Notas