Romacü̃ãʼ 15:1-33

15  Rü jixema na meã jaxõgüxü̃ rü namaã iporaexü̃ i guxchaxü̃gü, rü name nixĩ i nüxü̃ tarüngü̃xẽẽ i ngẽma taeneẽgü i turaexü̃ i norü õwa rü tama guxchaxü̃gümaã jaxna ĩnüẽxü̃. Rü tama name i jigüguxicatama tarüxĩnüẽ rü tóxrüca̱xicatama tadaugü.  Notürü wüxichigü i jixema rü name nixĩ i taeneẽãxü̃́ tanangúchaü̃xẽẽ na ngẽmaãcü nüxü̃ rüngü̃xẽẽxü̃ca̱x na jexeraãcü jaxõõxü̃ca̱x.  Jerü woo ga Cristu rü tama noxrütama ngúchaü̃ naxü. Notürü najanguxẽẽ ga jema Tupanaãrü ore ga nhaxü̃:“Pa Chaunatüx, rü ngẽma duü̃xü̃gü i cumaã guxchigagüxü̃, rü chamaã nixĩ i naguxchigagüxü̃”, nhaxü̃.  Rü guxü̃ma ga jema nuxcüma ümatüxü̃ ga Tupanaãrü orewa, rü naxümatü na tüxü̃ nangu̱xẽẽxü̃ca̱x na taguma nüxü̃ rüxoexü̃ ega woo ṯacü rü guxchaxü̃ tüxü̃ üpetügu. Rü jema Tupanaãrü ore rü naxümatü na tüxü̃ nataãẽxẽẽxü̃ca̱x rü tüxü̃ nüxü̃ nacua̱xẽẽxü̃ca̱x na aixcuma Tupanaãrü ixĩgüxü̃.  Rü Tupana nixĩ ja tüxü̃ rüngü̃xẽẽcü na jaxna namaã ixĩnüẽxü̃ca̱x i guxü̃ma i guxchaxü̃gü. Rü nüma nixĩ i tüxü̃ nataãẽxẽẽxü̃. Rü chanaxwa̱xe i nüma ja Tupana pexü̃ narüngü̃xẽẽ na aixcuma pegü pengechaü̃güechaxü̃ca̱x i ngẽma Ngechuchu ja Cristu pexü̃́ naxwa̱xexü̃rüü̃.  Rü chanaxwa̱xe na ngẽmaãcü pemaxẽxü̃ na guxãma i pema rü wüxigu nüxü̃ peicua̱xüü̃güxü̃ca̱x ja Tupana ja Nanatü ja tórü Cori ja Ngechuchu ja Cristu. Duü̃xü̃gü i tama Judéugü ixĩgüxü̃maã nüxü̃ nixu i ore i mexü̃  Rü ngẽmaca̱x, jema Cristu pexü̃ na dexü̃rüü̃ rü name nixĩ i wüxichigü meã pegü pejaxu na ngẽmaãcü Tupanaxü̃ jacua̱xüü̃güxü̃ca̱x i duü̃xü̃gü.  Rü pemaã nüxü̃ chixu rü Cristu núma naxũ na Judéugüxü̃ janangü̃xẽẽxü̃ca̱x, na jemaãcü janguxẽẽãxü̃ca̱x ga jema uneta ga nuxcümaxü̃güxü̃ ga tórü o̱xigümaã nüxü̃ jaxuxü̃ ga Tupana. Rü jemaãcü ga Cristu rü tüxü̃ nüxü̃ nadauxẽẽ na aixcumacü na jiĩxü̃ ja Tupana rü aixcuma janguxẽẽãxü̃ i ngẽma norü uneta.  Rü jexgumarüü̃ ta ga Cristu rü núma naxũ naxca̱x i ngẽma duü̃xü̃gü i tama Judéugü ixĩgüxü̃ na nümagü rü ta Tupanaxü̃ jacua̱xüü̃güxü̃ca̱x naxca̱x na poraãcü Tupanaãxü̃́ nangechaü̃tümüü̃güxü̃. Rü jemachiga nixĩ ga jema Tupanaãrü ore ga Dawí ümatüxü̃ ga nhaxü̃:“Rü ngẽmaca̱x guxü̃ i nachiü̃ãnecü̱̃ã̱x i duü̃xü̃güpe̱xewa tá cuxü̃ chicua̱xüü̃. Rü tá chorü wijaewa cuxü̃ chataxẽẽ”, nhaxü̃. 10  Rü toxnamana i Tupanaãrü ore i ümatüxü̃wa rü nhanagürü:“Pa Duü̃xü̃gü i Tama Judéugü Ixĩgüxü̃, rü name nixĩ i pema rü wüxigu chorü duü̃xü̃gü i Judéugümaã petaãẽgü”, nhanagürü. 11  Rü toxnamana, rü nhanagürü ta:“Pa Duü̃xü̃gü i Tama Judéugü Ixĩgüxü̃x, rü name nixĩ i nüxü̃ peicua̱xüü̃gü ja tórü Cori. Rü Pa Guxü̃ma i Nachiü̃ãnecü̱̃ã̱x i Duü̃xü̃güx, rü name nixĩ i penataxẽẽ”, nhanagürü. 12  Rü Ichaía rü ta nanaxümatü rü nhanagürü:“Rü Dawí nanatü ja Jesíwa tá ne naxũ i wüxi i nataa i tá Cristu ixĩxü̃. Rü nüma tá nixĩ i norü ãẽ̱xgacü jiĩxü̃ i guxü̃ma i ngẽma duü̃xü̃gü i tama Judéugü ixĩgüxü̃. Rü ngẽma duü̃xü̃gü rü tá aixcuma nüxü̃́ najaxõgü rü tá ínanaṉg̱uxẽẽgü na jimagagu Tupana nüxü̃ rüngü̃xẽẽgüxü̃”, nhanagürü. 13  Rü nhu̱xma i pema na nüxü̃́ pejaxõgüxü̃ rü chanaxwa̱xe i poraãcü pexü̃ nataãẽxẽẽ ja jima Tupana ja pexü̃ rüngü̃xẽẽcü na meã Cristuxü̃ ípenaṉg̱uxẽẽgüxü̃ca̱x. Rü ngẽmaãcü i Tupanaãẽ i Üünexü̃ rü tá pexü̃ naporaexẽẽ na jexeraãcü Cristuxü̃ ípenaṉg̱uxẽẽgüxü̃ca̱x. 14  Pa Chaueneẽgüx, meãma nüxü̃ chacua̱x na guxü̃ i duü̃xü̃gümaã pemecümaxü̃, rü aixcuma Tupanaxü̃ na pecuáxü̃, rü aixcuma meãma pegü peixucu̱xẽgüxü̃. 15  Notürü nhaã poperawa rü meãma pexca̱x chanaxümatü i nhuxre i Tupanaãrü ucu̱xẽgü, erü tama chanaxwa̱xe i nüxü̃ ipejarüngümaẽ. Rü tama chamuü̃ na pexca̱x chanaxümatüxü̃ i ngẽmachiga jerü Tupana nixĩ ga choxü̃ mucü na pemaã nüxü̃ chixuxü̃ca̱x. 16  Rü nüma nixĩ ga choxü̃ namuxü̃ na Ngechuchu ja Cristuarü puracü chaxüxü̃ca̱x i natanüwa i ngẽma duü̃xü̃gü i tama Judéugü ixĩgüxü̃. Rü ngẽma puracü ga nawa choxü̃ namuxü̃ nixĩ na ngẽma duü̃xü̃gümaã nüxü̃ chixuxü̃ i ore i mexü̃ na Tupanaxü̃tawa chanagagüxü̃ca̱x, na wüxi i ãmare i Tupana namaã taãẽxü̃ i ngẽma duü̃xü̃gü i Naãẽ i Üünexü̃ imexẽẽgüxü̃. 17  Rü nhu̱xma na Ngechuchu ja Cristuarü duü̃xü̃ na chiĩxü̃, rü ngẽmaca̱x chataãẽ namaã i ngẽma puracü i Tupanaãxü̃́ chaxüxü̃. 18  15:18-19 Rü nhu̱xma rü jema Cristu chorü maxü̃wa üxü̃chigaxü̃xĩcatama nixĩ i chixuxü̃. Rü nüma nixĩ ga choxü̃ nangü̃xẽẽxü̃ na Tupanaxü̃tawa chanagagüxü̃ca̱x ga jema duü̃xü̃gü i tama Judéugü ixĩgüxü̃, na nümagü rü ta Tupanaga naxĩnüẽxü̃ca̱x. Rü jemaãcü chorü oremaã, rü chorü puracümaã, rü cua̱xruü̃gü ga taxü̃ ga Tupana üxü̃maã, rü Naãẽ i Üünexü̃ãrü poramaã Tupanaxü̃tawa chanagagü ga jema duü̃xü̃gü. Rü jemaãcü Jerucharéü̃wa rü guxü̃wama nhu̱xmata Iríricuarü naãnewa meãma chajanguxẽẽ na nüxü̃ chixuxü̃ ga jema ore i tüxü̃ maxẽxẽẽxü̃ i Cristuchiga. 19  Nüü̃ nadau 15:18 20  Rü jemaãcü chapuracü na nüxü̃ chixuxü̃ca̱x ga Tupanaãrü ore i mexü̃ ga ngextá taguma nhuxgu Cristuchigaxü̃ ínaxĩnüẽxü̃wa ga duü̃xü̃gü. Jerü tama chanaxwa̱xe ga marü togü nüxü̃ íxuxü̃wa rü duü̃xü̃gü marü nüxü̃ ícuáxü̃wa nüxü̃ na chixuxü̃ ga jema ore. 21  Rü jemachiga nixĩ ga Tupanaãrü ore ga Ichaía ümatüxü̃ ga nhaxü̃:“Rü jíxema taguma Cristuchigaxü̃ cua̱xgüxe, rü taguma nachigaxü̃ ĩnüẽxẽ, rü tá nüxü̃ tacua̱xgü i nachiga”, nhaxü̃. Pauru rü Romawa naxũxchaü̃ 22  Rü jema toxnamana na chapuracüxü̃ca̱x nixĩ ga taxucürüwa petanüwa chaxũxü̃ woo muẽ̱xpü̱xcünachire̱x jéma chaxũxchaü̃. 23  Notürü nhu̱xma na marü chanagu̱xẽẽxü̃ i ngẽma puracü i toxnamana, rü nagu charüxĩnü na petanüwa chaxũxü̃. Jerü nhuxgumamatama nixĩ ga nagu charüxĩnüẽchaxü̃ na petanüwa chaxũxchaü̃xü̃. 24  Rü ngẽxguma Espanhawa chaxũxgu, rü nagu charüxĩnü na woe pexü̃tagu íchidauxü̃. Rü nagu charüxĩnü na nhuxre i ngunexü̃ ngẽxma petanügu charüxã́ũxü̃. Rü wüxi i chorü taãẽ tá nixĩ i ngẽma. Rü ngẽmawena rü chanaxwa̱xe i choxü̃ perüngü̃xẽẽ na Espanhawa chaxũxü̃ca̱x. 25  Notürü i nhu̱xma rü Jerucharéü̃wa tá chaxũ, na ngẽ́ma chanangexü̃ca̱x i nhuxre i dĩẽru naxca̱x i taeneẽgü i ngẽ́ma ngẽxmagüxü̃. 26  Erü ngẽma taeneẽgü i jaxõgüxü̃ i Machedóniããnewa rü Acajaanewa ngẽxmagüxü̃, rü norü ngúchaü̃maã nagu narüxĩnüẽ na ngĩxü̃ nanutaque̱xegüxü̃ i nhuxre i dĩẽru na ngẽmaãcü nüxü̃ nangü̃xẽẽgüxü̃ca̱x i taeneẽgü i nüxü̃́ nataxuxü̃ i Jerucharéü̃wa ngẽxmagüxü̃. 27  Rü ngẽma taeneẽgü i Machedóniãcü̱̃ã̱x rü Acajacü̱̃ã̱x rü norü me nixĩ na ngẽmaãcü naxügüãxü̃. Rü ngẽma duü̃xü̃gü rü aixcuma nüxü̃́ nangẽxma i norü ngetanü i taeneẽgü i Judéugütanüwa. Erü ngẽma taeneẽgü i Judéugügagu nixĩ i ngẽma togü i duü̃xü̃gütanüwa nanguxü̃ i Tupanaãrü ore. Rü nhu̱xma rü name nixĩ i ngẽma togü i duü̃xü̃gü rü norü ngẽmaxü̃maã taeneẽgü i Judéugü i jaxõgüxü̃xü̃ narüngü̃xẽẽgü. 28  Rü ngẽxguma chanagu̱xẽẽgu i ngẽma puracü, rü ngẽxguma taeneẽgü i Judéugüna marü ngĩxü̃ chaxãxgu i ngẽma dĩẽru, rü Espanhawa tá chaxũ. Rü ngẽxguma ngẽ́ma chaxũxgu, rü tá woe pexü̃tagu íchidau. 29  Rü nüxü̃ chacua̱x rü ngẽxguma petanüwa changuxgu, rü wüxigu tá tataãẽgü, erü nüma ja Cristu tá tüxü̃ nataãẽxẽẽ i ngẽxguma ngẽmaãcü wüxiwa ingẽxmagügu. 30  Pa Chaueneẽgüx, tórü Cori ja Ngechuchu ja Cristuégagu, rü ngẽma na Naãẽãrü ngü̃xẽẽmaã choxü̃ pengechaü̃xü̃gagu pexü̃ chaca̱a̱xü̃ na Tupanana chauxca̱x pec̱axü̃ i perü jumuxẽwa. Rü ngẽmaãcü tá choxü̃ perüngü̃xẽẽ nawa i nhaã puracü i Tupana choxna ãxü̃. 31  ¡Rü Tupanana pec̱a na choxü̃ ínapoxü̃xü̃ca̱x nüxna i ngẽma Judéugü i Judéaanewa ngẽxmagüxü̃ i tama jaxõgüxü̃! ¡Rü nüxna pec̱a naxca̱x i ngẽma taeneẽgü i jaxõgüxü̃ i Jerucharéü̃wa ngẽxmagüxü̃, na taãẽãcüma najauxgüãxü̃ca̱x i ngẽma dĩẽru i ngẽ́ma naxca̱x changexü̃! 32  Rü ngẽmaãcü ngẽxguma Tupana naxwa̱xegu, rü taãẽãcüma petanüwa tá changu, na wüxigu pemaã chataãẽxü̃ca̱x. 33  Rü chanaxwa̱xe na pemaã inaxã́ũxü̃ ja Tupana ja tüxü̃ taãẽxẽẽcü. Rü ngẽmaãcü jiĩxü̃.

Notas