Romacü̃ãʼ 14:1-23

14  Rü ngẽxguma petanügu naxãxchaü̃gu i wüxi i peeneẽ i tama perüü̃ meã Tupanaãrü orexü̃ cuáxü̃, rü name nixĩ i meã penajaxu. Notürü tama name i namaã pegü pechoxü̃ga naxca̱x i nacümagü i nagu jaxũxü̃ i Tupanape̱xewa.  Rü dücax, nangẽxma i nhuxre i taeneẽgü i nagu rüxĩnüẽxü̃ na namexü̃ na guxü̃raü̃xü̃ i õna nangõ̱xgüxü̃. Notürü nangẽxma i togü i taeneẽgü i tama aixcuma meã Tupanaãrü orexü̃ cua̱xgüxü̃ i tama namachi ngõ̱xgüchaü̃xü̃. Rü nümagü nüxü̃ nacua̱xgügu rü Tupanape̱xewa nachu̱xu na ṯacü rü namachi nangõ̱xgüxü̃, rü ngẽmaca̱x nixĩ i nabü rü origüxicatama nangõ̱xgüxü̃.  Rü ngẽxguma tangẽxmagu ja texé ja namachi ngṍxẽ, rü tama name i nüxü̃ taxoo̱x i ngẽma togü i duü̃xü̃gü i tama namachi ngõ̱xgüxü̃. Rü ngẽxgumarüü̃ ta ja jíxema tama namachi ngṍxẽ, rü tama name na nüxü̃ tixuxü̃ i ngẽma duü̃xü̃gü i namachi ngõ̱xgüxü̃, erü nümagü rü ta Tupanaãrü duü̃xü̃gü nixĩgü.  ¿Rü texé cuixĩ i cuma rü ngẽmaca̱x nüxü̃ cuixu i to i coriarü duü̃xü̃gü? Rü dücax, pemaã nüxü̃ chixu rü ngẽma norü cori tá nixĩ i nangugüxü̃ rü ngoxi mexü̃ naxü̱x i ngẽma norü duü̃xü̃, rü e̱xna tama. Rü ngẽma duü̃xü̃ rü Tupanape̱xewa rü tá name, erü nüma ja tórü Cori ja Cristu rü nüxü̃́ nangẽxma i pora na nügüca̱x namexẽẽãxü̃ i ngẽma duü̃xü̃.  Rü dücax, nangẽxma i nhuxre i duü̃xü̃gü i nagu rüxĩnüẽxü̃ na ngü̃xchigaarü ngunexü̃ rü togü i ngunexü̃ãrü jexera namexü̃ na nagu Tupanaxü̃ jacua̱xüü̃güxü̃. Rü nangẽxma i togü i duü̃xü̃gü i nagu rüxĩnüẽxü̃ na guxü̃ma i ngunexü̃gü rü nawüxiguxü̃ i Tupanape̱xewa. Notürü wüxichigü i jixema rü tanaxwa̱xe i meã taãẽwa nüxü̃ tacua̱x na aixcuma Tupanape̱xewa namexü̃ i ngẽma taxüxü̃ rü tixõxü̃.  Rü jíxema duü̃xẽ ja ṯacü rü ngunexü̃ Tupanaca̱x íxüxüchixe, rü ngẽmaãcü tanaxü na ngẽma ngunexü̃gu tórü Corixü̃ ticua̱xüü̃xü̃ca̱x. Rü jíxema namachi ngṍxẽ, rü ngẽmaãcü tanangõ̱x na tórü Corixü̃ ticua̱xüü̃xü̃ca̱x, rü Tupanana moxẽ taxã naxca̱x i ngẽma tangṍxü̃. Rü jíxema tama namachi ngṍxẽ, rü ngẽmaãcü tanaxü na tórü Corixü̃ ticua̱xüü̃xü̃ca̱x, rü tüma rü ta Tupanana moxẽ taxã naxca̱x i ngẽma nabü i tangṍxü̃.  Rü nhu̱xma na nhama i naãnewa imaxẽxü̃, rü taxúema tügüca̱xtama tamaxü̃ rü e̱xna tügüca̱xtama taju.  Erü nhu̱xma na imaxẽxü̃, rü tórü Coriarü ngúchaü̃ na ixügüxü̃ca̱x nixĩ i imaxẽxü̃. Rü ngẽxguma ijuegu, rü ngẽma rü ta tórü Corime̱xẽwa nangẽxma. Rü ngẽmaãcü nüxü̃ tadau rü woo imaxẽgu rü e̱xna woo ijuegu, rü tórü Coriarü duü̃xü̃gü tixĩgü, rü name̱xwa tangẽxmagü.  Rü jemaca̱x nixĩ ga najuxü̃ ga tórü Cori ja Cristu rü wenaxãrü namaxü̃xü̃ na tümaãrü Cori jiĩxü̃ca̱x ja guxãma ja guxema jaxõgüxe ga marü juexe rü guxãma ja jíxema jaxõgüxe ja nhu̱xma rü ta maxẽxẽ. 10  Rü ngẽmaca̱x Pa Chaueneẽx, ¿rü tü̱xcüü̃ i nüxü̃ cuixuxü̃ i cueneẽ i jaxõxü̃? Rü cumax, Pa To i Chaueneẽx, ¿rü tü̱xcüü̃ i nüxü̃ cuxoxü̃ i cueneẽ? Erü guxãtáma i jixema rü Tupanape̱xewa tá tangugü na nüma tüxü̃ nangugüxü̃ca̱x rü ngoxi ime rü e̱xna tama. 11  Erü Tupanaãrü ore i ümatüxü̃wa rü nhanagürü ja tórü Cori:“Ngẽma aixcuma na chamaxü̃xü̃rüü̃ tá ta nixĩ i aixcuma guxü̃táma i duü̃xü̃gü chape̱xegu caxã́pü̱xügüxü̃, rü guxü̃táma choxü̃ icua̱xüü̃güxü̃”, nhanagürü. 12  Rü ngẽmaãcü nüxü̃ tacua̱x na wüxichigü i jixema rü aixcuma tá Tupanape̱xewa na ingugüxü̃ na namaã nüxü̃ ixuxü̃ca̱x na nhuxãcü imaxẽxü̃ rü ṯacü na ixüxü̃. Tama name i chixexü̃gu cunanguxẽẽ i cueneẽ i jaxõxü̃ 13  Rü ngẽmaca̱x nixĩ, Pa Chaueneẽgüx, i tama namexü̃ na tamücügüxü̃ ixuechaü̃. Notürü narümemaẽ nixĩ i nüxü̃ perüxoe i guxü̃ma i ṯacü i peeneẽgüxü̃ pecadugu jixẽẽxü̃ rü e̱xna norü õxü̃ chixexẽẽxü̃. 14  Chama nüxü̃ chacua̱x rü nataxuma i õna i Tupanape̱xewa chixexü̃. Rü aixcumaxü̃chi nüxü̃ chacua̱x i ngẽma erü tórü Cori ja Ngechuchu ja Cristuarü duü̃xü̃ chixĩ, rü nüma choxü̃ nüxü̃ nacua̱xẽẽ i ngẽma. Notürü ngẽxguma chi texé nagu rüxĩnügu na tama Tupanape̱xewa namexü̃ i ṯacü rü õna na tangṍxü̃, rü name nixĩ i noxtacüma tama na tanangṍxü̃ ega nagu tarüxĩnügu na tama namexü̃ i ngẽma. 15  Rü ngẽxguma ngẽma cungṍxü̃ca̱x tümaãẽwa cunangu̱xẽẽgu ja cueneẽ, rü cumaã nüxü̃ chixu rü tama aixcuma tüxü̃ cungechaü̃. Rü tama name i ngẽma cungṍxü̃gagu chixexü̃gu tüxü̃ cunguxẽẽ rü tüxü̃ icujarütauxẽẽ ja jíxema cueneẽ ja Cristu tümaca̱x juxe. 16  Rü ngẽmaca̱x, woo cuxca̱x namexgu i ngẽma cuxüxü̃, notürü tama name na cunaxüamaxü̃ ega ngẽmaca̱x togü tá cuxü̃ ixuxgu na pecadu jiĩxü̃ i ngẽma cuxüxü̃. 17  Rü ngẽma Tupanape̱xewa na imexü̃ca̱x rü tama ṯacü rü õna na ingṍxü̃ rü e̱xna ṯacü rü axexü̃ na ixaxüxü̃gagu nixĩ. Notürü nape̱xewa na imexü̃ca̱x rü tanaxwa̱xe i Naãẽ i Üünexü̃ãrü ngü̃xẽẽmaã meã tajanguxẽẽ i ngẽma Tupana naxwa̱xexü̃ rü jigümaã itarüngüxmüẽ rü aixcuma tataãẽgü nape̱xewa ja Tupana. 18  Rü jíxema ngẽmaãcü Cristuca̱x maxü̃́xẽ, rü Tupana rü tümamaã nataãẽ, rü guxü̃ma i duü̃xü̃gü rü ta tümamaã nataãẽgü. 19  Rü ngẽmaca̱x, ¡ngĩxã naxca̱x tadaugü i guxü̃ma i nacüma i mexü̃ i jigümaã tüxü̃ rüngüxmüẽxẽẽxü̃! ¡Rü ngĩxã jigü tarüngü̃xẽẽ na jexeraãcü ijaexü̃ca̱x i tórü õwa rü Tupanaãrü orewa! 20  Rü tama name i ṯacü rü õna na cungṍxü̃gagu icujanaxoxẽẽ i Tupanaãrü puracü i cueneẽãrü maxü̃wa. Rü aixcuma nixĩ i guxü̃ma i õnagü i namexü̃ i Tupanape̱xewa. Notürü wüxi i chixexü̃ nixĩ ega ngẽma õna i ingṍxü̃gagu chixexü̃gu najixẽẽgu i taeneẽgü. 21  Rü ngẽmaca̱x tama name i cunangõ̱x i namachi, rü e̱xna cujaxaxü ja wĩũ, rü e̱xna cunaxü i ṯacü i to, ega ngẽmagagu chixexü̃gu cunanguxẽẽgu i cueneẽ i jaxõxü̃. 22  Rü ngẽxguma cuma nagu curüxĩnügu na namexü̃ na cunangṍxü̃ i ngẽxü̃rüüxü̃mare i õna, rü Tupanape̱xewa rü name nixĩ i cuxicatama nüxü̃ cucua̱x i ngẽma. Rü tataãẽ ja jíxema tümaãẽwa nüxü̃ cuáxe na Tupanape̱xewa namexü̃ i ngẽma taxüxü̃. 23  Notürü ngẽxguma wüxie nagu rüxĩnügu na tama namexü̃ i Tupanape̱xewa na ṯacü rü õna na tangṍxü̃, rü pemaã nüxü̃ chixu rü chixexü̃ taxü ega tanangõ̱xomagu, erü tümaãẽwa nagu tarüxĩnü na tama aixcuma namexü̃ i ngẽma taxüxü̃. Rü guxü̃ma i ngẽma tümaãẽwa nagu tarüxĩnüxü̃ na nachixexü̃ rü aixcuma pecadu taxü ega tanaxüamagu.

Notas