Romacü̃ãʼ 13:1-14

13  Rü name nixĩ i guxü̃ma i duü̃xü̃gü rü meã nórü ãẽ̱xgacüga naxĩnüẽ. Erü Tupana nixĩ i jangucuchixẽẽcü i guxü̃ma i ãẽ̱xgacügü. Erü nataxuma i ãẽ̱xgacü i tama Tupana ingucuchixẽẽxü̃.  Rü ngẽmaca̱x, texé ja tama tümaãrü ãẽ̱xgacüga ĩnüchaü̃xẽ, rü Tupanaga nixĩ i tama taxĩnüxü̃. Rü jíxema tama naga ĩnüẽchaü̃xẽ, rü tá tapocue.  Erü ngẽma ãẽ̱xgacügü rü tama ngẽma mexü̃ ügüxü̃ãrü pocuruü̃ nixĩ, notürü ngẽma chixexü̃ ügüxü̃ãrü pocuruü̃ nixĩ. Rü ngẽxguma cunaxwa̱xegu na tama nüxü̃ cumuü̃xü̃ i wüxi i ãẽ̱xgacü, rü name nixĩ i meã cumaxü̃. Rü nüma i ãẽ̱xgacü rü tá cumaã nataãẽ.  Erü nüma i ãẽ̱xgacü rü Tupanaãrü ngü̃xẽẽruü̃ nixĩ rü ngẽmaca̱x nanamu na cuxü̃ nangü̃xẽẽxü̃ca̱x. Notürü ngẽxguma chixri cumaxü̃gu, rü ngẽxguma tá waxi nixĩ i nüxü̃ cumuü̃xü̃. Erü nüma i ãẽ̱xgacü rü tama notüca̱xma nixĩ na nüxü̃́ nangẽxmaxü̃ i pora na cuxü̃ napocuxü̃. Erü woetama Tupana nanamu na napocuãxü̃ca̱x i ngẽma duü̃xü̃ i chixri maxü̃xü̃.  Rü ngẽmaca̱x name nixĩ i naga cuxĩnü i curü ãẽ̱xgacügü. Rü tama ngẽma pocuxü̃ na cumuü̃xü̃ca̱xicatama nixĩ i namexü̃ na naga cuxĩnüxü̃, notürü name nixĩ i naga cuxĩnü erü marü nüxü̃ cucua̱x na namexü̃ i ngẽma.  Rü ngẽmaca̱x name nixĩ i meã nüxü̃́ penaxütanü i ngẽma dĩẽru i perü ãẽ̱xgacügüca̱x ixĩxü̃ i ngẽma nümagü nagu naxunetaxü̃ẽ̱xpü̱x na nüxü̃́ penaxütanüxü̃ca̱x. Erü ngẽma ãẽ̱xgacügü rü Tupanaãxü̃́ nixĩ i napuracüexü̃ i ngẽxguma naxüãgu i ngẽma puracü na pemaã inacuáxü̃.  Rü wüxichigü i ngẽma ãẽ̱xgacügü, rü name nixĩ i nüxna penaxã i ngẽma nüxna üxü̃. ¡Rü nüxü̃́ penaxütanü i ngẽma dĩẽru i perü ãẽ̱xgacügü nagu unetaxü̃ẽ̱xpü̱x na nüxü̃́ penaxütanüxü̃! ¡Rü penaxü̱x i ngẽma ĩãneãrü puracü i perü ãẽ̱xgacügü pexü̃ muxü̃ na penaxüxü̃ca̱x! ¡Rü nüxü̃ pengechaü̃gü rü naga pexĩnüẽ i ngẽma perü ãẽ̱xgacügü! Erü ngẽmaãcü nixĩ i namexü̃ na penaxüxü̃.  Rü tama name i texéaxü̃́ ṯacü pengetanü. Notürü nangẽxma i wüxitama i ngetanü i taguma tüxü̃́ ingutanüxü̃. Rü ngẽma nixĩ na jigü ingechaü̃güxü̃. Rü ngẽmaca̱x ja jíxema aixcuma tümamücüxü̃ ngechaü̃xẽ rü marü tajanguxẽẽ i guxü̃ma i ngẽma Tupana tüxü̃ muxü̃.  Rü nhanagürü i Tupanaãrü mugü:“¡Rü tãũxü̃táma naĩ i ngemaã icupe! ¡Rü tãũxü̃táma cumáẽta! ¡Rü tãũxü̃táma cungĩ̱x! ¡Rü tãũxü̃táma ṯoguã̱xãrü ngẽmaxü̃ cuxü̃́ nangúchaü̃!” nhanagürü. Notürü ngẽma mugü rü guxü̃ma i togü i Tupanaãrü mugümaã rü wüxigu nanu nagu i norü ore i nhaxü̃:“¡Rü nüxü̃ nangechaü̃ i cumücü na cugütama cungechaü̃xü̃rüü̃!” nhaxü̃. 10  Rü jíxema tümamücüxü̃ ngechaü̃xẽ, rü taxuü̃ma i chixexü̃ namaã taxü. Rü ngẽmaca̱x i ngẽxguma tamücüxü̃ ingechaü̃gu, rü aixcuma tajanguxẽẽ i Tupanaãrü mugü. 11  Rü name nixĩ i tanaxü i guxü̃ma i ngẽma, erü nhamaü̃cüü rü nangẽxma i muxü̃ma i guxchaxü̃gü. Rü name nixĩ i pegü ípemexẽẽ rü paxa penaxü i tórü Coriarü puracü. Erü nhu̱xma rü noxri jaxõgüguarü jexera ningaicamachigü i ngẽma ngunexü̃ i nagu tá taxca̱x nataeguxü̃ ja tórü Cori. 12  Rü woo na naporaxü̃ i Chataná i nhama i naãnewa i nhu̱xmax, notürü paxa tá nagu̱x i ngẽma, rü paxa tá ínangu ja Cristu na nügüxü̃tawa tüxü̃ nagagüxü̃ca̱x. Rü ngẽmaca̱x name nixĩ i nüxü̃ tarüxoe i guxü̃ma i chixexü̃ ixügüxü̃. Rü nhu̱xma na nüxü̃ icuáxü̃ i Tupanaãrü ore, ¡rü ngĩxã jigüna tadaugü na tama nagu ij̱ixü̃ca̱x i ṯacü rü chixexü̃gü! ¡Rü ngĩxã meã tamaxẽ na ngẽmaãcü nüxü̃ rüjexeragüxü̃ca̱x i guxü̃ma i chixexü̃! 13  ¡Rü ngĩxã mexü̃ taxügü rü meã tamaxẽ! Erü aixcuma Cristuarü duü̃xü̃gü tixĩgü, rü tanaxwa̱xe i nüma nanaxwa̱xexü̃ãcüma tamaxẽ. Rü tama name na ingãxẽxü̃ rü na naxügüxü̃ i petagü i chixexü̃ i duü̃xü̃gü nawa ãũgatanüxü̃. Rü tama name i tingẽãẽmare rü e̱xna to i chixexü̃ taxügü, rü bai na jigü ichoxü̃gagüxü̃, rü bai i togüchi ixaiexü̃ naxca̱x i norü ngẽmaxü̃gü. 14  Notürü name nixĩ i nacümagu pexĩ ja tórü Cori ja Ngechuchu ja Cristu, rü nüxna naxca̱x peca na pexü̃ nangü̃xẽẽxü̃ca̱x na meã naxca̱x pemaxẽxü̃ca̱x. Rü tama name i naxca̱x pedaugü na nhuxãcü pexeneãrü ngúchaü̃ na pexügüxü̃.

Notas