Romacü̃ãʼ 12:1-21

12  Rü dücax, Pa Chaueneẽgüx, nhuxãcü Tupana poraãcüxü̃chima tamaã namecüma. Rü ngẽmaca̱x pexü̃ chaca̱a̱xü̃ na pegütama Tupanana pexãgüxü̃ na wüxi i ãmare i maxü̃xü̃ na peixĩgüxü̃ca̱x. Rü ngẽma ãmare nixĩ i aixcuma nape̱xewa üünexü̃ rü namaã nataãẽxü̃. Rü ngẽmaãcü nixĩ ja Tupana i nanaxwa̱xexü̃ na nüxü̃ peicua̱xüü̃güxü̃.  Rü tama name i nhama i naãnecü̱̃ã̱x i duü̃xü̃gücümagu pexĩ. Notürü name nixĩ i Tupanana pegü pexãgü na nüma pexü̃ naxüchicüüxü̃ca̱x rü ngexwacaxü̃xü̃ i peãẽ pexü̃́ ngẽxmaxü̃ca̱x rü ngẽmaãcü naxca̱xicatama pemaxẽxü̃ca̱x. Rü ngẽmaãcü tá nüxü̃ pecua̱x i ṯacü nixĩ i Tupana pexü̃́ naxwa̱xexü̃ na penaxüxü̃, rü ṯacü nixĩ i aixcuma mexü̃ i nape̱xewa, rü ṯacü nixĩ i namaã nataãẽxü̃.  Rü Tupana ja chamaã mecümacü, rü choxü̃ namu na pemaã nüxü̃ chixuxü̃ca̱x i guxãma i pema na tama namexü̃ na texé i petanüwa tügü írütaxü̃ rü tügügu tarüxĩnüxü̃ na togüarü jexera tiĩxü̃. Notürü name nixĩ na wüxichigü meã tügü ngugüarü maxü̃ã́xü̃ rü tügügu rüxĩnüxü̃ na nhuxãcü Tupana tüxna naxãxü̃ i tümaãrü cua̱x wüxigu namaã i tümaãrü õ.  Rü dücax, rü taxünewa nangẽxma i taeru rü tachacüügü rü taparagü rü muxü̃ma i to i taxüneãrü ngẽmaxü̃gü. Rü wüxichigü i ngẽma taxüneãrü ngẽmaxü̃gü rü nüxü̃́ nangẽxma i noxrütama puracü.  Rü ngẽxgumarüü̃ ta i jixema na jaxõgüxü̃, rü woo na imuxü̃ notürü wüxitama i duü̃xü̃gü tixĩgü, erü Cristuarü duü̃xü̃gü tixĩgü. Rü ngẽmaca̱x i guxãma i jixema rü jigümücügü tixĩgü, erü woetama wüxitama i duü̃xü̃gü tixĩgü.  Rü wüxichigü i jixema, rü Tupana tüxna nanaxã i tórü cua̱x i nüma nanaxwa̱xexü̃ na tüxü̃́ nangẽxmaxü̃. Rü tanaxwa̱xe i meãma nagu taxĩ i ngẽma cua̱x i Tupana tüxna ãxü̃. Rü ngẽxguma tüxna naxããgu i tórü cua̱x na norü orearü uruü̃ ixĩgüxü̃ca̱x, rü name nixĩ i ngẽma õ i tüxü̃́ ngẽxmaxü̃maã tanaxü i ngẽma puracü.  Rü ngẽxguma tüxna naxããgu i tórü cua̱x na togüxü̃ rüngü̃xẽẽgüxü̃ca̱x, rü name nixĩ i meãma tanaxü i ngẽma. Rü ngẽxguma texéna naxããgu i tümaãrü cua̱x na togüxü̃ tangúexẽẽxü̃ca̱x, rü name nixĩ i meãma tanaxü i ngẽma.  Rü jíxema nüxü̃ cuáxe na Tupanaãrü oremaã togüxü̃ tataãẽxẽẽxü̃, rü name nixĩ i meãma tanaxü i ngẽma. Rü jíxema nüxü̃ cuáxe na togümaã taṉg̱auxü̃ i tümaãrü ngẽmaxü̃, rü name nixĩ i tümaãrü ngúchaü̃maã tanaxü i ngẽma. Rü jíxema ãẽ̱xgacü ixĩxẽ rü name nixĩ i meãma tajanguxẽẽ i ngẽma puracü. Rü jíxema nüxü̃ cuáxe na togü tüxü̃́ ngechaü̃tümüü̃güxü̃, rü name nixĩ i taãẽãcüma tanaxü i ngẽma. Nhuxãcü nanaxwa̱xe na namaxẽxü̃ i duü̃xü̃gü i Cristuaxü̃́ jaxõgüxü̃  Rü name nixĩ i aixcuma meãma pegü pengechaü̃gü i wüxichigü. ¡Rü nüxü̃ pexo i guxü̃ma i ṯacü i chixexü̃ ixĩxü̃! ¡Rü nagu pexĩ i ngẽma aixcuma mexü̃ ixĩxü̃! 10  Rü name nixĩ i wüxichigü pegü pengechaü̃gü, ngẽma pegüeneẽxü̃chixü̃ pengechaü̃xü̃rüü̃. Rü name nixĩ i naxca̱x pedaugü na nhuxãcü peeneẽgüxü̃ petaxẽẽxü̃ rü nhuxãcü pegü perüngü̃xẽẽxü̃. 11  Rü tama name i cuxo ega ṯacü rü puracü cuxü̃ namu̱xgu ja tórü Cori. Notürü name nixĩ i curü ngúchaü̃maã cunaxü i norü puracü. 12  Rü name nixĩ i petaãẽgü erü ípenaṉg̱uxẽẽ na Tupanaxü̃tawa pengugüxü̃. Rü ngẽxguma ṯacü rü ngúxü̃ pexü̃ ngupetügu, rü name nixĩ i jaxna namaã pexĩnüẽ. ¡Rü tama name i nüxü̃ perüchaue na pejumuxẽgüxü̃! 13  Rü ngẽxguma nüxü̃ peda̱xgu na ṯacü nüxü̃́ taxuxü̃ i ngẽma togü i jaxõgüxü̃, rü name nixĩ i nüxü̃ perüngü̃xẽẽ. ¡Rü meã penajaxu i ngẽma duü̃xü̃gü i pexü̃tagu naxĩãnexü̃! 14  Rü ngẽxguma chi texé chixri pemaã üpetügu, rü name nixĩ i tümaca̱x pejumuxẽgü na meã tüxü̃ naxüpetüxü̃ca̱x. Rü ngẽmaãcü name nixĩ i Tupanana tümaca̱x peca na tüxü̃ nangü̃xẽẽxü̃ca̱x rü tama tüxü̃ napocuxü̃ca̱x. 15  ¡Rü wüxigu tümamaã petaãẽgü ja jíxema taãẽgüxe! ¡Rü wüxigu tümamaã pexauxe ja jíxema ngechaü̃güxe rü auxexe! 16  ¡Rü meã pegümaã pemaxẽ i wüxichigü! ¡Rü tama pegü peicua̱xüü̃gü, notürü name nixĩ i pegü íperüxíragü! ¡Rü tama pegügu perüxĩnüẽ na togüarü jexera nüxü̃ cua̱xü̃chigüxü̃ na peixĩgüxü̃! 17  Rü ngẽxguma texé chixexü̃ pemaã ü̱xgux, ¡rü tãũxü̃táma chixexü̃maã pexütanü! Notürü name nixĩ i naxca̱x pedau na mexü̃ pexüxü̃ i guxü̃ i duü̃xü̃güpe̱xewa. 18  ¡Rü naxca̱x pedau na guxü̃ma i duü̃xü̃gümaã meã pemaxẽxü̃ rü namaã na iperüngüxmüxü̃ca̱x i guxü̃guma! 19  Pa Chaueneẽgü ja Pexü̃ Changechaü̃güxe, tama name i pegütama pexütanü ega texé ṯacü rü chixexü̃ pemaã ü̱xgu. Notürü name nixĩ i Tupaname̱xẽgu penaxü i ngẽma na nüma napocuãxü̃ca̱x. Erü Tupanaãrü ore i ümatüxü̃wa rü nhanagürü:“Rü cha̱xme̱xwa nangẽxma na duü̃xü̃güxü̃ chapocuxü̃ i norü chixexü̃ca̱x. Rü chama tá nüxü̃́ chanaxütanü i ngẽma duü̃xü̃ i chixexü̃ üxü̃”, nhanagürü ja tórü Cori. 20  Rü ngẽxguma ṯacü rü chixexü̃ cumaã naxü̱xgu i togü, rü tama name i chixexü̃maã cunataeguxẽẽ. Notürü name nixĩ i nagu cuixũ i Tupanaãrü ore i nhaxü̃,“Rü ngẽxguma curü uwanü taija̱xgu, ¡rü nachibüxẽẽ! Rü ngẽxguma jaṯawaxgu, ¡rü naxaxexẽẽ! Erü ngẽxguma ngẽmaãcü cunaxü̱xgu, rü poraãcü tá cunaxãnexẽẽ”, nhaxü̃. 21  Rü ngẽxguma togü chixexü̃ cumaã ü̱xgux, rü name nixĩ i cuxuãẽ na tama chixexü̃gu cunguxü̃ca̱x. Rü name nixĩ na mexü̃ cuxüxü̃ namaã i ngẽma duü̃xü̃. Rü ngẽmaãcü tá icujanaxoxẽẽ i ngẽma chixexü̃ i cumaã naxüxchaü̃xü̃.

Notas