Romacü̃ãʼ 11:1-36

11  Nhu̱xma pexna chaca rü, ¿pexca̱x e̱xna ja Tupana rü marü nüxü̃ naxo i norü duü̃xü̃gü i Judéugü? Tama nixĩ i nüxü̃ naxoxü̃. Erü chama i Pauru rü Judéu chixĩ. Rü Abrã́ũtanüxü̃ chixĩ, rü Abrã́ũtaa ja Bejamítanüxü̃ chixĩ.  Rü nuxcümamatama Tupana Judéugümaã inaxuneta na norü duü̃xü̃gü jixĩgüxü̃ca̱x, rü nhu̱xma rü tama Judéugüxü̃ naxo. ¿Tama e̱xna nüxü̃ pecua̱x na nhuxũ nhaxü̃ ga Tupanaãrü orearü uruü̃ ga Ería? Rü Tupanaãrü orewa nüxü̃ tadaugü rü Ería rü Tupanape̱xewa poraãcü jema Judéugüxü̃ ínaxuaxü̃.  Rü nhanagürü ga Ería:“Pa Corix, ngẽma Judéugü rü marü nanadai i curü orearü uruü̃gü. Rü nagu napogüe i ngẽma nachicagü i ngextá duü̃xü̃gü cuxü̃ íicua̱xüü̃güxü̃wa. Rü chaxicatama íchajaxüãchi. Rü choxü̃ rü ta nima̱xgüchaü̃”, nhanagürü ga Ería.  Notürü Tupana nanangãxü̃, rü nhanagürü:“Dücax, chama rü marü choxü̃́ nangẽxma i 7000 i jatügü i chaugüca̱x chidexechixü̃. Rü nümagü rü taguma nüxü̃ nicua̱xüü̃gü i ngẽma tupananetachicüna̱xã i Baáu”, nhanagürü.  Rü ngẽxgumarüü̃ ta nixĩ i nhu̱xmax. Rü woo muxü̃ma i Judéugü tama najaxõgü, notürü nangẽxma i nhuxre i Tupana namaã mecümaxü̃gagu jadexechixü̃.  Rü nhu̱xma na Tupana namaã mecümaxü̃gagu jadexechixü̃ i ngẽma duü̃xü̃gü, rü ngẽmaca̱x taxucürüwama texé nüxü̃ tixu na ṯacü rü puracü i mexü̃ca̱x na jadexechiãxü̃. Erü ngẽxguma chi ngẽma duü̃xü̃güarü puracü i mexü̃ca̱x jadexechiãgu, rü taxuü̃ca̱x chima tü̱xcüü̃ Tupana namaã namecüma.  ¿Rü nhuxãcü jiĩxü̃ i nhu̱xmax? Rü ngẽma rümumaẽxü̃ i Judéugü rü tama nüxü̃ inajangaugü i ngẽma maxü̃ i naxca̱x nadaugüxü̃. Notürü ngẽma noxretama i Judéugü i Tupana idexechixü̃, rü ngẽmáãcü nüxü̃ inajangaugü i ngẽma maxü̃. Rü guxü̃ma i ngẽma togü i Judéugü rü Tupana nüxü̃́ nanaguxchaxẽẽ.  Rü ngẽmachiga nixĩ i Tupanaãrü ore i ümatüxü̃ i nhaxü̃:“Tupanatama ngẽma duü̃xü̃güaxü̃́ nanaguxchaxẽẽ. Rü ngẽmaca̱x woo nüxü̃ nadaugügu i ngẽma ore i aixcuma ixĩxü̃, rü tama nüxü̃ nacua̱xgüéga. Rü woo nüxü̃ naxĩnüẽgu i ngẽma ore, rü tama najaxõgü. Rü nhu̱xma rü ta ngẽmaãcü nixĩ”, nhanagürü.  Rü Dawí rü ta rü nhanagürü:“Rü ngẽma duü̃xü̃gü rü norü petaca̱x naxügüxü̃ i õnagügagu rü norü muxü̃ma i ngẽmaxü̃gügagu rü chixexü̃gu tá naji rü ngẽmaca̱x tá napocue. 10  Rü naãẽwa rü tãũxü̃táma nüxü̃ nacua̱xgü, rü guxchaxü̃gü tá nüxü̃́ nangẽxma. Rü nhama wüxi i duü̃xü̃ i ṯacü i jaxü̃ ípaxixü̃rüü̃ tá nixĩgü namaã i norü guxchaxü̃gü”, nhanagürü. Tupana nanamaxẽxẽẽ i ngẽma togü i tama Judéugü ixĩgüxü̃ 11  Rü pexna chaca, rü nhu̱xma na Cristuxü̃ naxoexü̃ i ngẽma Judéugü, ¿rü pexca̱x e̱xna rü ngẽmaca̱x ja Tupana rü tá nüxü̃ naxoxochixü̃? Tama nüxü̃ naxo. Notürü nhu̱xma na tama Cristuaxü̃́ jaxõgüãxü̃ i ngẽma Judéugü, rü ngẽmaca̱x ja Tupana rü nüxü̃ narüngü̃xẽẽ rü nanamaxẽxẽẽ i ngẽma togü i tama Judéugü ixĩgüxü̃. Rü ngẽmaãcü nanaxü ja Tupana na jaxãũxãchiexü̃ca̱x i ngẽma Judéugü, rü Cristuaxü̃́ na jaxõgüãxü̃ca̱x. 12  Rü jema na ínatüexü̃ ga jema Judéugü, rü jemagagu muxü̃ma ga togü ga duü̃xü̃gü nanajauxgü ga Tupanaãrü ngü̃xẽẽ i taxü̃. Rü jema na noxretama ga Judéugü najaxõgüxü̃, rü jemagagu Tupana nanamaxẽxẽẽ ga jema tama Judéugü ixĩgüxü̃. Notürü ngẽxguma tá Tupanaca̱x nawoegu̱xgu i guxü̃ma i Judéugü, rü Tupana rü tá jexeraãcü nüxü̃ narüngü̃xẽẽ i guxü̃ma i ngẽma duü̃xü̃gü i tama Judéugü ixĩgüxü̃. 13  11:13-14 Rü nhu̱xma Pa Duü̃xü̃gü i Tama Judéugü Ixĩgüxü̃x, rü choxü̃́ nangẽxma i wüxi i ore i pemaã nüxü̃ chixuxchaü̃xü̃. Rü dücax, petanüwa nixĩ i choxü̃ namuxü̃ ja Tupana na pemaã nüxü̃ chixuxü̃ca̱x i norü ore. Rü nhu̱xma rü aixcuma meã chajanguxẽẽ i ngẽma puracü, erü chanaxwa̱xe na pexü̃ nadaugüxü̃ i ngẽma chautanüxü̃ i Judéugü na nhuxãcü Tupana pexü̃ na rüngü̃xẽẽxü̃. Rü ngẽmaãcü tá nixãũxãchie i nhuxre i nümagü, rü tá Cristuaxü̃́ najaxõgü, rü ngẽmaãcü tá nanajauxgü i maxü̃ i taguma gúxü̃. 14  Nüü̃ nadau 11:13 15  Nüxü̃ tacua̱x rü ngẽma Judéugü rü tama Cristuaxü̃́ najaxõgüchaü̃ i nhu̱xmax. Rü ngẽmaca̱x ja Tupana rü nanade i ngẽma togü i duü̃xü̃gü i tama Judéugü ixĩgüxü̃. Notürü nhu̱xma na ngẽmaãcü jiĩxü̃, ¿rü nhuxãcü tá nixĩ i ngẽxguma Cristuaxü̃́ jaxõgüãgu i ngẽma Judéugü, rü wena Tupana nadexgu? Rü wüxi i mexẽchixü̃ tá nixĩ naxca̱x i ngẽma Judéugü. Erü nhama wüxi i duü̃xü̃ i juxü̃ rü wenaxãrü maxü̃xü̃rüü̃ tá nixĩgü. 16  Rü Tupana rü wena tá nanade i ngẽma Judéugü i ngẽxguma jaxõgüãgu. Rü ngẽmaãcü tá nixĩ, jerü nuxcümaxü̃cü ga nanatü ga Abrã́ũ rü Tupanaãrü duü̃xü̃ nixĩ. Rü ngẽmaca̱x i nataagü i Judéugü rü Tupanaãrü duü̃xü̃gü ta nixĩgü. Rü nhama wüxi i põũ i Tupanana ixãxü̃rüü̃ tá nixĩ. Erü ngẽxguma ngẽma põũwa íraxü̃ Tupanaãrü jixĩgu, rü ngẽmawa nüxü̃ tacua̱x na guxü̃ma i ngẽma põũ rü noxrü na jiĩxü̃. Rü ngẽma wüxi i nanetü i Tupanana ixãxü̃rüü̃ tá nixĩ. Rü ngẽxguma ngẽma nanetüchuma̱xã rü Tupanaãrü jixĩgu, rü ngẽmawa nüxü̃ tacua̱x na guxü̃ma i ngẽma nanetü rü noxrü na jiĩxü̃. Rü ngẽmaãcü tá nixĩ i ngẽma Judéugümaã nangupetüxü̃, erü wüxi i ngunexü̃gu rü guxü̃ma i nümagü rü Tupanaca̱x tá nawoegu. 17  Tupana nüxü̃ naxo ga jema Judéugü ga tama jaxõgüchaü̃xü̃. Rü nhama wüxi i orichacüü i idaexü̃rüü̃ nixĩ ga jema Judéugüxü̃ naxoxü̃. Notürü nachicüü Tupana pexü̃ nade woo tama Judéugü na peixĩgüxü̃. Rü wüxi i naĩxnecücü̱̃ã̱x i orichacüü rü ori i toxü̃wa jarünhaxcuchixü̃rüü̃ peixĩgü. Rü nhu̱xma i pema rü ta pexü̃́ nangẽxma i pechica i natanüwa i ngẽma duü̃xü̃gü i Tupanaãrü ixĩgüxü̃. Rü Tupana rü pexü̃ narüngü̃xẽẽ rü pexü̃ rü ta namaxẽxẽẽ. 18  Notürü pema i tama Judéugü na peixĩgüxü̃, rü tama name i pegü peicua̱xüü̃ rü nüxü̃ peixu na ngẽma Judéugüarü jexera peixĩgüxü̃. Rü ngẽxguma chi ngẽmaãcü pegü peicua̱xüü̃güchaü̃gu, rü name nixĩ i nüxna pecua̱xãchie na tama petanüwa ne naxũxü̃ ga Cristu ja pexü̃ maxẽxẽẽcü, notürü Judéugütanüwa nixĩ ga ne naxũxü̃. Rü ngẽma Judéugügagu nixĩ i Tupana pexü̃ dexü̃ rü pexü̃ namaxẽxẽẽxü̃ i nhu̱xmax. 19  Notürü bexmana tá nhaperügügü: “Tupana rü marü nüxü̃ naxo ga jema Judéugü rü jemaca̱x nachicüü tüxü̃ nade”, nhaperügügü tá. 20  Ngẽmáãcü aixcuma nixĩ ga Tupana nüxü̃ oxü̃ ga jema Judéugü jerü tama najaxõgü. Rü ngẽma na pejaxõgüxü̃ca̱xicatama nixĩ i nachicüü Tupana pexü̃ dexü̃ i nhu̱xmax. Rü ngẽmaca̱x tama name i pegü peicua̱xüü̃gü. ¡Notürü pexuãẽgü na tama jema Judéugüxü̃ üpetüxü̃rüü̃ pexü̃ üpetüxü̃ca̱x! 21  Jerü jema Judéugü ga noxri Tupanaãrü ixĩgüxü̃, rü Tupana nüxü̃ naxo jerü tama najaxõgü. Rü jexguma jemaãcü Tupana nüxü̃ oxgu ga jema duü̃xü̃gü rü pexü̃ rü tá ta naxo ega tãũxü̃táma pejaxõgüechagu. 22  Dücax, na nhuxãcü namecümaxü̃ ja Tupana. Notürü tüxü̃ napocu ta ega tama aixcuma jaxõgügu. Rü nanapocue ga jema duü̃xü̃gü ga chixexü̃gu j̱ixü̃, notürü pemaã rü namecüma. Notürü penaxwa̱xe i guxü̃guma nüma nanaxwa̱xexü̃ãcüma pemaxẽ rü pejaxõgü na guxü̃guma pemaã namecümaẽchaxü̃ca̱x. Erü ngẽxguma tama nüma nanaxwa̱xexü̃ãcüma pemaxẽgu rü tama pejaxõgüechagu, rü tãũxü̃táma pemaã namecüma. Rü pexü̃ rü tá ta naxo, rü tá pexü̃ ínawogü. 23  Notürü ngẽxguma jaxõgüãgu i ngẽma Judéugü i nhu̱xma maxẽxü̃, rü woo Tupana na nüxü̃ oxü̃ ga noxrix, notürü wena táxarü nanade erü nüxü̃́ nangẽxma i pora na wenaxãrü nadeãxü̃ca̱x ega aixcuma jaxõgüãgu. 24  Rü pema na tama Judéugü na peixĩgüxü̃, rü tama Tupanaãrü duü̃xü̃gü peixĩgü ga noxrix. Notürü Tupana pexü̃ nade na noxrü peixĩgüxü̃ca̱x. Rü nhu̱xma na jemaãcü Tupana pexü̃ dexü̃, rü ngẽxguma jaxõgüãgu i ngẽma Judéugü, rü Tupana rü pexü̃ nadexü̃ãrü jexera tá nüxü̃́ natauxcha na nadeãxü̃ i ngẽma Judéugü, jerü woetama norü duü̃xü̃güchire̱x nixĩgü ga noxrix. Wüxi i ngunexü̃ rü guxü̃ma i Judéugü tá nanajauxgü i maxü̃ i taguma gúxü̃ 25  Pa Chaueneẽgü i Jaxõgüxü̃x, nangẽxma i wüxi i ore ga noxri tama duü̃xü̃güxü̃ nüxü̃ nacua̱xẽẽxü̃ ga Tupana. Notürü chanaxwa̱xe i nüxü̃ pecua̱x i ngẽma ore na tama nagu perüxĩnüẽxü̃ca̱x na duü̃xü̃gü i nüxü̃ cua̱xü̃chixü̃ peixĩgüxü̃, rü pexicatama Tupana pexü̃ dexü̃. Rü dücax, noxretama nixĩ i ngẽma Judéugü i aixcuma jaxõgüxü̃. Rü ngẽmaãcü tá nixĩ nhu̱xmatáta jaxõgüã i guxü̃ma i ngẽma togü i duü̃xü̃gü i Tupana idexechixü̃. 26  Notürü ngẽmawena rü guxü̃táma i Judéugü rü tá ta najaxõgü, rü tá nanajauxgü i maxü̃ i taguma gúxü̃. Erü Tupanaãrü ore i ümatüxü̃wa rü nhanagürü:“Jima Cristu ja ínanguxü̃xẽẽcü, rü Judéugütanüwatama ne naxũ. Rü nüma rü tá Judéugüxü̃ chixexü̃wa ínanguxü̃xẽẽ. 27  Rü aixcuma norü pecaduwa tá íchananguxü̃xẽẽ i ngẽma Judéugü. Rü ngẽxguma tá nixĩ na aixcuma chajanguxẽẽxü̃ i ngẽma chorü uneta ga ü̃paxü̃chima Abrã́ũmaã nüxü̃ chixuxü̃”, nhanagürü ga Tupana. 28  Notürü i nhu̱xma ja Tupana rü Judéugüxü̃ nadau na norü uwanügü jiĩxü̃ erü tama najaxõgü i ngẽma ore i mexü̃. Notürü ngẽmaãcü naxüpetü na pexü̃́ natauxchaxü̃ca̱x na pejaxõgüxü̃ i pema i tama Judéugü na peixĩgüxü̃. Notürü nüma ja Tupana rü nhu̱xma rü ta ngẽma Judéugüxü̃ nangechaü̃ jerü nuxcümaxü̃güxü̃ ga norü o̱xigümaã inaxuneta na nüxü̃ tá nangü̃xẽẽxü̃. 29  Rü ngẽxguma Tupana rü ṯacü i mexü̃maã inaxunetagu, rü aixcuma najanguxẽẽ i ngẽma, rü taguma nüxü̃ inajarüngüma. Rü ngẽxgumarüü̃ ta i ngẽxguma texéca̱x nacaxgu, rü taguma nüxü̃ inajarüngüma i ngẽma. 30  Rü pema na tama Judéugü peixĩgüxü̃, rü ü̃pa rü tama Tupanaga pexĩnüẽ. Notürü nhu̱xma na tama naga naxĩnüẽxü̃ i Judéugü, rü ngẽmaca̱x Tupanaãxü̃́ pengechaü̃tümüü̃gü erü pejaxõgü i pemax. 31  Rü ngẽma pexü̃ ngupetüxü̃rüü̃ nixĩ i ngẽma Judéugüxü̃ nangupetüxü̃. Nümagü rü tama Tupanaga naxĩnüẽ i nhu̱xmax, notürü ngẽmaãcü nüxü̃ nangupetü na Tupanaãxü̃́ pengechaü̃tümüü̃güxü̃ca̱x, rü nümagü rü ta Tupanaãxü̃́ nangechaü̃tümüü̃güxü̃ca̱x i nhu̱xmax. 32  Jerü nüma ga Tupana rü guxü̃ma ga duü̃xü̃gümaã nanaxuegu na chixexü̃wa nangẽxmagüxü̃ nagagu ga norü pecadugü. Notürü jemaãcü namaã nanaxuegu ga Tupana na nüxü̃́ nangechaü̃tümüü̃güxü̃ca̱x i guxü̃ma i duü̃xü̃gü. 33  Rü namexẽchi ja tórü Tupana, rü poraãcüxü̃chima tüxü̃ narüngü̃xẽẽ. Rü nüma rü nüxü̃ nacua̱xüchi erü guxü̃xü̃ma nacua̱x. Rü jixema rü taxucürüwama nüxü̃ tacua̱x i tü̱xcüü̃ jiĩxü̃ i tüxü̃ jadexechixü̃, rü taxucürüwama nüxü̃ tacua̱x i guxü̃ma i ngẽma naxüxü̃ i nümax. 34  ¿Erü texé i tatanüwa nüxü̃ tacua̱x i guxü̃ma i ngẽma tórü Cori nagu rüxĩnüxü̃? ¿Rü texé nüxü̃ tacua̱x na tórü Corixü̃ taxucu̱xẽxü̃? 35  ¿Rü texé tüxira ṯacü rü ãmare tórü Corina taxã, na jixcama nüxĩ ṯacümaã tüxü̃́ nataeguxẽẽãxü̃ca̱x? 36  Erü guxü̃ma i ṯacü ingẽxmaxü̃ rü Tupanaxü̃tawa ne naxĩ. Rü nüma nixĩ ga naxüãxü̃ ga guxü̃ma na noxrü jiĩxü̃ca̱x. Rü name nixĩ i guxü̃guma nüxü̃ ticua̱xüü̃gü rü tanataxẽẽ. Rü ngẽmaãcü jiĩxü̃.

Notas