Romacü̃ãʼ 1:1-32

1  Pa Chaueneẽgüx, chama i Pauru nixĩ i pexca̱x chanaxümatüxü̃ i nhaã popera. Rü chama nixĩ i Ngechuchu ja Cristuarü duü̃xü̃ chiĩxü̃. Rü chama nixĩ ga Tupana choxü̃ jaxuxü̃ na choxü̃ jamuxü̃ca̱x na duü̃xü̃gümaã nüxü̃ chixuxü̃ca̱x i norü ore i mexü̃ i tüxü̃ maxẽxẽẽxü̃.  Rü nuxcümaxü̃chima Tupana nanamu ga norü orearü uruü̃gü na naxümatügüãxü̃ca̱x ga norü ore i mexü̃. Rü jemaãcü tüxü̃ nüxü̃ nacua̱xẽẽ ga nhaã ore i mexü̃.  Rü nhaã ore i mexü̃ rü tórü Cori ja Ngechuchu ja Cristuchiga nixĩ. Rü nüma rü woo Tupana Nane na jiĩxü̃, notürü duü̃xü̃gürüü̃ nabu ga jexguma nhama ga naãnewa nanguxgu. Rü nuxcümaü̃cü ga ãẽ̱xgacü ga Dawítaa nixĩ.  Notürü nümatama ja Ngechuchu rü üünecü nixĩ. Rü jexguma juwa ínadaxgu rü Tupana tüxü̃ nüxü̃ nadauxẽẽ na aixcuma Nanexü̃chi na jiĩxü̃. Rü nüxna nanaxã ga guxü̃ma ga pora.  Rü Ngechuchu ga Cristugagu nixĩ ga chamaã namecümaxü̃ rü choxü̃ naxunetaxü̃ ga Tupana na norü puracü chaxüxü̃ca̱x. Rü jemaca̱x Ngechuchuégagu choxü̃ namu na guxü̃ i nachiü̃ãnewa nüxü̃ chixuxü̃ca̱x i norü ore na jaxõgüãxü̃ca̱x i duü̃xü̃gü rü Tupanaga naxĩnüẽxü̃ca̱x.  1:6-7 Rü pema rü ta, Pa Romacü̱̃ã̱xgüx, rü ngẽma duü̃xü̃gütanüwa pengẽxmagü jerü Tupanaãxü̃́ pejaxõgü rü naga pexĩnüẽ. Rü nüma rü pexü̃ nangechaü̃ rü marü pexü̃ naxuneta na Ngechuchu ja Cristuarü duü̃xü̃gü peixĩgüxü̃ca̱x rü ngẽma norü duü̃xü̃gütanüxü̃ na pexĩgüxü̃ca̱x. Rü nhu̱xmax, Pa Chaueneẽgü i Romacü̱̃ã̱xgüx, rü chanaxwa̱xe i nüma ja Tanatü ja Tupana rü tórü Cori ja Ngechuchu ja Cristu pemaã namecümagü rü pexü̃ narüngü̃xẽẽgü na meã pexü̃ naxüpetüxü̃ca̱x rü aixcuma petaãẽgüxü̃ca̱x.  Nüü̃ nadau 1:6 Pauru rü nüxü̃́ nangúchaü̃ na íjadauãxü̃ ga jema jaxõgüxü̃ ga Romawa jexmagüxü̃  Rü nhu̱xma rü Ngechuchu ja Cristuégagu Tupanana moxẽ chaxã pexca̱x, erü guxü̃wama i guxü̃ i naãnewa rü duü̃xü̃gü nüxü̃ nixugügü na aixcuma Cristuaxü̃́ pejaxõgüxü̃ rü Tupanaca̱x pemaxẽxü̃.  Rü nüma ja Tupana choxü̃ nadau rü nüxü̃ nacua̱x na aixcuma guxü̃guma pexca̱x chajumuxẽxü̃. Rü jimaãxü̃́ nixĩ i guxü̃ma i chorü ngúchaü̃maã chapuracüxü̃ rü nüxü̃ chixuxü̃ i norü ore i mexü̃ i Nanechiga. 10  Rü guxü̃guma nüxna chaca na choxü̃ ngẽ́ma namuxü̃ca̱x rü ngẽmaãcü düxwa pexü̃ íchajadauxü̃ca̱x ega norü ngúchaü̃ jixĩgu. 11  Erü aixcuma choxü̃́ nangúchaü̃ na pexü̃ chadauxü̃ na pemaã nüxü̃ chixuxü̃ca̱x i Tupanaãrü ore na aixcuma meã pejaxõgüxü̃ca̱x rü jexeraãcü peporaexü̃ca̱x. 12  Rü ngẽxguma ngẽmaãcü wüxiwa ingẽxmagügu, rü tá wüxichigü jigü tataãẽgüxẽẽ rü jigüaxü̃́ tanangúchaü̃xẽẽ. Erü chama rü tá nüxü̃ chadau na nhuxãcü tórü Coriaxü̃́ pejaxõgüxü̃ rü pema rü tá ta nüxü̃ pedau na nhuxãcü chajaxõxü̃. 13  Pa Chaueneẽgüx, chanaxwa̱xe i nüxü̃ pecua̱x na muẽ̱xpü̱xcüna pexü̃ íchajadauxchaü̃xü̃, notürü nhu̱xmarüta rü choxü̃́ naguxcha. Notürü ngẽ́ma petanüwa chaxũxchaü̃, erü chanaxwa̱xe na pemaã nüxü̃ chixuxü̃ i Tupanaãrü ore jema toxnamana jexmagüxü̃ ga duü̃xü̃gümaã nüxü̃ chixuxü̃rüü̃. Erü chanaxwa̱xe i ngẽma duü̃xü̃gürüü̃ meã pejaxõgü na ngẽmaãcü Cristuwe naxĩxü̃ca̱x i ngẽma petanüxü̃gü i nhu̱xma tama jaxõgüxü̃. 14  Rü aixcuma ngẽ́ma changuxchaü̃ erü nümatama ja Tupana choxü̃ namu na guxü̃ i duü̃xü̃gümaã nüxü̃ na chixuxü̃ca̱x i norü ore. Rü nanaxwa̱xe i duü̃xü̃gü i meã poperaxü̃ icuáxü̃maã nüxü̃ na chixuxü̃ rü duü̃xü̃gü i tama poperaxü̃ icuáxü̃maã ta nüxü̃ chixuxü̃ i ngẽma norü ore. Rü ngẽxgumarüü̃ ta nanaxwa̱xe na ngẽma duü̃xü̃gü i cua̱x nüxü̃́ ngẽxmaxü̃maã nüxü̃ na chixuxü̃ rü ngẽma duü̃xü̃gü i taxuguma rüxĩnüẽxü̃maã nüxü̃ na chixuxü̃. 15  Rü ngẽmaca̱x, Pa Chaueneẽgü i Romagu Ãchiü̃güxü̃, rü chama rü marü íchamemare na petanüwa na chaxũxü̃, na pemaã rü ta nüxü̃ chixuxü̃ca̱x i Tupanaãrü ore i mexü̃. Tupanaãrü ore rü napora 16  Rü taxuü̃ca̱xma naxca̱x chaxãne i ngẽma ore i mexü̃. Erü ngẽma ore rü napora, rü ngẽmamaã nixĩ i napuracüxü̃ ja Tupana na guxãma ja jixema Cristuaxü̃́ jaxõgüxe rü tüxü̃́ nangẽxmaxü̃ca̱x i maxü̃ i taguma gúxü̃. Rü ngẽma maxü̃, rü Judéugüca̱xirachire̱x nixĩ, notürü i nhu̱xma rü guxü̃ma i ngẽma tama Judéugü ixĩgüxü̃ca̱x rü ta nixĩ. 17  Rü ngẽma norü orewa nixĩ i tamaã nüxü̃ jaxuxü̃ ja Tupana na tórü õgaguxicatama jiĩxü̃ na nape̱xewa imexü̃. Erü norü ore i ümatüxü̃wa rü nhanagürü:“Rü jíxema tümaãrü õgagu Tupanape̱xewa mexẽ, rü tá tüxü̃́ nangẽxma i maxü̃ i taguma gúxü̃”, nhanagürü. Nagagutama nixĩ i duü̃xü̃gü inapocuexü̃ 18  Rü nüxü̃ tadaugü na Tupana dauxü̃guxü̃ i naãnewa ne namuxü̃ i norü pocu i ãũcümaxü̃ naxca̱x i guxü̃ma i ngẽma duü̃xü̃gü i tama naga ĩnüẽxü̃ rü chixexü̃ ügüxü̃ rü ngẽma norü chixexü̃maã togüaxü̃́ naguxchaxẽẽgüxü̃ na tama nüxü̃ nacua̱xgüxü̃ca̱x i ngẽma ore i aixcuma ixĩxü̃. 19  Rü ngẽma duü̃xü̃gü i chixexü̃ ügüxü̃ rü meã nüxü̃ nacua̱xgüchire̱x na nhuxãcü jiĩxü̃ ja Tupana jerü nümatama ga Tupana rü marü nüxü̃ nüxü̃ nadauxẽẽ ga jema. 20  Rü woo tama nüxü̃ idaugügu ja Tupana, notürü guxü̃ma i ṯacü i naxüxü̃wa nixĩ i nüxü̃ idaugüxü̃. Rü jexguma noxri naãne naxü̱xgumama nixĩ ga meãma duü̃xü̃güxü̃ nüxü̃ nadauxẽẽxü̃ na aixcuma Tupana na jiĩxü̃ rü guxü̃guma na naporaxü̃. Rü ngẽmaca̱x i ngẽma duü̃xü̃gü i chixexü̃ ügüxü̃, rü taxucürüwama ṯacümaã nügü ínapoxü̃gü i Tupanape̱xewa. 21  Jerü woo nüxü̃ nacua̱xgüchire̱x na nhuxãcü jiĩxü̃ ga Tupana, notürü tama nanajauxgüchaü̃ na norü Tupana jiĩxü̃ca̱x, rü bai na moxẽ nüxna naxãgüxü̃. Notürü jema ore ga taxuwama mexü̃guama narüxĩnüẽ, rü jemaãcü naẽchitamare namaxẽ rü jexeraãcü chixexü̃gu narüxĩnüẽ. 22  1:22-23 Rü nügü jaxugüegu rü duü̃xü̃gü i nüxü̃ icuáxü̃ nixĩgü notürü taxuguma narüxĩnüẽ. Jerü nüxna nixĩgachitanü ga Tanatü ja Tupana ja mexẽchicü ja taguma jucü, na nawe naxĩxü̃ca̱x ga norü naxchicüna̱xãgümare ga duü̃xü̃gü i juxwa̱xexü̃chicüna̱xãmare ixĩgüxü̃ rü werigüchicüna̱xãmare ixĩgüxü̃ rü naẽxü̃güchicüna̱xãmare ixĩgüxü̃ rü ãxtapegüchicüna̱xãmare ixĩgüxü̃. 23  Nüü̃ nadau 1:22 24  Rü jemaca̱x ga Tupana rü düxwa jemawa nanawogü ga jema duü̃xü̃gü na naxügüãxü̃ca̱x ga guxü̃ma ga jema chixexü̃ ga nüxü̃́ ngúchaü̃güxü̃ rü nügümaã na naxügüãxü̃ca̱x ga naxü̃neãrü ngúchaü̃gü i ãne tüxna ãxü̃. 25  Rü jemaãcü nüxna nixĩgachi ga guma aixcumaxü̃chi Tupana ixĩcü na nawe naxĩxü̃ca̱x ga norü tupanagü ga tama aixcuma ixĩgüxü̃. Rü jema Tupana üxü̃pe̱xewa najumuxẽgü rü jemaxü̃ nicua̱xüü̃gü, notürü tama nüxü̃ nicua̱xüü̃gü ga Tanatü ja Tupana ga naxücü rü inaxwa̱xecü na guxü̃guma nüxü̃ icua̱xüü̃güxü̃. Rü ngẽmaãcü jixĩ. 26  Rü jemaca̱x ga Tupana rü düxwa jemawa nanawogü ga jema duü̃xü̃gü na naxügüãxü̃ca̱x ga naxü̃neãrü ngúchaü̃ i ãne tüxna ãxü̃. Rü a̱i̱xrüü̃ ga ngexü̃gü rü naxrüü̃ ngexü̃gümaãtama nangẽãẽgü rü tama jatügümaã. 27  Rü jexgumarüü̃ ta ga jatügü rü naxrüü̃ jatüxü̃maãtama nangẽãẽgü, rü tama ngexü̃gümaã. Rü jema naxü̃neãrü ngúchaü̃ ga chixexü̃gü rü nüxü̃ napora na naxrüü̃ jatüxü̃maã namaxẽxü̃. Rü jemaãcü ga jema jatügü rü nügümaã nanaxügü ga jema naxü̃neãrü ngúchaü̃ i ãne tüxna ãxü̃, rü düxwa jemagagu niḏaawee rü naturaxü̃negü. 28  Rü jema na tama Tupanaxü̃ nacua̱xgüchaü̃xü̃, rü jemaca̱x ga nüma ga Tupana rü düxwa jemawa nanawogü ga jema duü̃xü̃gü na norü chixexü̃gu na naxĩnüẽẽchaxü̃ca̱x rü na naxügüãxü̃ca̱x ga jema chixexü̃. 29  Rü düxwa ga jema duü̃xü̃gü rü guxü̃raü̃xü̃ ga chixexü̃ naxügü ga Tupanape̱xewa. Rü tama aixcuma meã naxma̱xmaã rü natemaã namaxẽ. Rü naxaü rü nügünaxĩcatama nananuãchigüchaü̃ i guxü̃ma i ṯacü. Rü ṯoguã̱xü̃ nachixexẽẽgüchaü̃. Rü nixãũxãchiwa̱xegü, rü namáẽtagü, rü nanuẽwa̱xe, rü nawomüxẽẽwa̱xegü, rü naxü̃neãrü ngúchaü̃ nüxü̃ napora, rü naxoregüta̱a̱xgü. 30  Rü chixexü̃maã ṯoguã̱xü̃ nixugüe, rü Tupanachi naxaie, rü ṯoguã̱xmaã naguxchigagü. Rü nügügu naxĩnüẽgu rü togüarü jexera nixĩgü, rü nügü nicua̱xüü̃gü. Rü naxca̱x nadaugü na jexera chixexü̃ naxügüxü̃. Rü tama nanatüga rü naẽga naxĩnüẽchaü̃. 31  Rü tama inarüxĩnüẽchaü̃. Rü tama aixcuma najanguxẽẽ i ngẽma nüxü̃ jaxugüxü̃. Rü taxúexü̃ma nangechaü̃gü. Rü tama togüaxü̃́ nüxü̃ nangechaü̃ i ṯacü rü guxchaxü̃. Rü tama ṯoguã̱x nüxü̃́ tangechaü̃tümüü̃gü. 32  Rü nümagü i ngẽma duü̃xü̃gü rü meãma nüxü̃ nacua̱xgüchire̱x rü Tupana rü marü namaã nanaxuegu na noxtacüma najuexü̃ i ngẽma duü̃xü̃gü i ngẽmaãcü maxẽxü̃. Notürü woo meãma nüxü̃ nacua̱xgüchire̱x i guxü̃ma i ngẽma, notürü nanaxügüama i ngẽma chixexü̃, rü nataãẽgü ega togü naxü̱xgu.

Notas