Nehemías 1:1-11

1  Rü nhaa nixĩ i chauchiga i chama i Neemía ya Acaría nane nax chixĩxü̃. Rü yexguma 20 ga taunecü ãẽ̱xgacü yixĩxgu ga Artayére rü meama Quiréuarü tauemacügu (desẽbru), rü chama ga Neemía rü ĩane ga Chuchã́wa chayexma.  Rü chauxü̃tawa nangu ga chauenexẽ ga Ananí namaxã ga nhuxre ga yatügü ga Yudáanewa ne ĩxü̃. Rü yexguma chayoxnie ga nüxna nax chaca̱xaxü̃ nachiga nax nhuxãcü ínangupetüxü̃ ga Yerucharéü̃wa, rü nhachagürü: “¿Nhuxãcü nüxü̃ ínangupetüxü̃ i ngẽ́ma? ¿Rü yema Yudéutanüxü̃gü ga Yudáanegu rüchoxü̃, rü mea nüxü̃ nangupetüxü̃ rü ẽ̱xna tama?” nhachagürü.  Rü nümagü rü choxü̃ nangãxü̃gü rü nhanagürügü: “Ngẽ́ma rü tama aixcuma mea inixũ. Rü ngẽma duü̃xü̃gü i Yudáanegu rüchoxü̃ rü poraãcü ngúxü̃ ningegü rü chixexü̃ nüxü̃ naxüpetü. Rü ngẽma natapü̱x ya yima tórü ĩane ya Yerucharéü̃ rü nanaxa̱ixrügumaraxü̃tama ga nagu nax napogüexü̃, rü yema natapü̱xarü ĩã̱xgü ga ínaguxü̃ rü tautama nimexẽẽgü”, nhanagürügü.  Rü yexguma yemaxü̃ chaxĩnügu rü poraãcü choxü̃́ nangu̱x rü chaxaxu. Rü nhuxre ga ngunexü̃ rü chaxaure rü Cori ya Tupanamaxã chidexa.  Rü nhachagürü nüxü̃: “Pa Cori Pa Tupana ya Daxũcüã̱x, cuma rü Tupana ya guxãétüwa ngẽxmacü quixĩ, rü cuxãũcüma. Rü taguma naxüchicüxü i ngẽma nüxü̃ quixuxü̃, erü cuma rü namaxã quixaixcuma i ngẽma duü̃xü̃gü i cuxü̃ ngechaü̃güxü̃ rü yanguxẽẽgüxü̃ i curü mugü.  Rü ngẽmaca̱x i nhu̱xmax rü cuxü̃ chaca̱a̱xü̃ nax choxü̃́ nüxü̃ cuxĩnüxü̃ i nhaa chorü yumüxẽ i chütacü rü ngunecü cumaxã nüxü̃ chixuxü̃ naxca̱x i ngẽma curü duü̃xü̃gü i Iraéutanüxü̃gü. Rü nüxü̃ chacua̱x nax cupe̱xewa chixexü̃ taxüxü̃ i toma i Iraéutanüxü̃gü, rü woo i chama rü chautanüxü̃gü rü cupe̱xewa chixexü̃ taxügü.  Rü cupe̱xewa poraãcü chixexü̃ taxügü, erü tama tayanguxẽxẽ i ngẽma curü mugü rü curü ucu̱xẽgü ga curü duü̃ ga Moichéwa tomaxã nüxü̃ quixuxü̃.  1:8-9 ¡Rü nüxna nacua̱xãchi i curü ore i Moichémaxã nüxü̃ quixuxü̃! Erü cuma rü nüxü̃ quixu rü ngẽxguma toma chixexü̃ cupe̱xewa taxü̱xgu rü tá togü i nachixü̃anegügu toxü̃ cuwoonemare, notürü ngẽxguma chi wena cuxca̱x tawoegu̱xgu rü aixcuma nagu tamaxẽgu i curü mugü, rü woo nhama i naane íyacuáxü̃gu tawoonegu, rü cuma rü chi tochixü̃aneca̱x toxü̃ cuyagagü, rü ngẽma nachica i üünexü̃ i cumatama nüxü̃ cuxunetaxü̃ nax nawa cungexmaxü̃wa wenaxarü toxü̃ cugagüxü̃ca̱x.  Nüü̃ nadau 1:8 10  Toma rü curü duü̃xü̃gü i curü puracütanüxü̃ tixĩgü, yerü cuma rü curü poramaxã torü uanügüme̱xẽwa toxü̃ ícunguxü̃xẽxẽ. 11  Pa Corix, cuxü̃ chachixewe nax choxü̃́ nüxü̃ cuxĩnüxü̃ca̱x i nhaa chorü yumüxẽ i cumaxã nüxü̃ chixuxü̃ i chamax nax curü duü̃xü̃ chixĩxü̃. Erü ngẽma chorü ngúchaü̃ i nagu charüxĩnüxü̃ nixĩ nax cuxü̃ chicua̱xüüxü̃. Rü ngẽxgumarüxü̃ ta cuxna naxca̱x chaca nax choxü̃ curüngü̃xẽẽxü̃ nax chamaxã namecümaxü̃ca̱x ya ãẽ̱xgacü”, nhachagürü.

Notas