Juã́ũ 9:1-41

9  Rü jexguma namagu tomaã jaxũxgu ga Ngechuchu, rü jéma nüxü̃ nadau ga wüxi ga jatü ga woetama norü bucüma ngexetücü.  Rü toma ga norü ngúexü̃gü rü nüxna tacagü, rü nhatarügügü: —Pa Ngúexẽẽruü̃x, ¿Tü̱xcüü̃ ngexetücüma nabu ja daa jatü? ¿E̱xna nanatü rü naẽãrü pecadugagu rü e̱xna norü pecadugagutama? —nhatarügügü.  Rü Ngechuchu toxü̃ nangãxü̃, rü nhanagürü toxü̃: —Tama norü pecadugagu rü tama i nanatü rü naẽãrü pecadugagu nixĩ i ngẽmaãcü nabuxü̃. Notürü ngẽmaãcü nabu na nawa nüxü̃ pedauxü̃ca̱x na nhuxãcü Tupana tüxü̃ na rümexẽẽxü̃.  —Rü nhama rü ta nangune rü name nixĩ na paxama na naxüxü̃ i ngẽma puracü ja Chaunatü ga núma choxü̃ mucü tüxna ãxü̃. Erü paxa tá nachüta rü ngẽxguma rü taxucürüwama texé tá tapuracü.  —Rü nhu̱xma na nhama i naãnewa changẽxmaxü̃ rü nhama i naãneãrü ngóonexẽẽruü̃ chixĩ —nhanagürü.  Rü jexguma jema nhaxguwena rü Ngechuchu waixü̃müãnewa nacuaxi. Rü jema waixü̃mü ga iwaixü̃maã nanachaxetü ga guma jatü ga ngexetücü.  Rü jexguma guma ngexetücüxü̃ nhanagürü: —¡Dexámaã cugü jajauxetü i Chiruéarü puchuwa! —nhanagürü. Rü ngẽma naẽ́ga rü “Tüxü̃ muxü̃”, nhaxü̃chiga nixĩ. Rü jéma naxũ ga guma ngexetücü rü nügü dexámaã najauxetü. Rü jexguma nataegugu rü marü nidauchixetü.  Rü jexguma ga jema duü̃xü̃gü ga guma ngexetücüpataarü ngaicamagu pegüxü̃ rü jema duü̃xü̃gü ga ü̃paacü nüxü̃ daugüxü̃ ga na nangexetüxü̃, rü nhanagürügü: —¿Taux e̱xna i nhaã jiĩxü̃ ga jema jatü ga ngexetüchiréxü̃ ga duü̃xü̃güxü̃ dĩẽruca̱x ca̱a̱xü̃xü̃? —nhanagürügü.  Rü nümaxü̃ rü nhanagürügü: —Ngẽmáãcü nüma nixĩ —nhanagürügü. Rü togü rü nhanagürügü: —Tama nixĩ i jima jiĩxü̃, notürü nanangẽxgumaraü̃xü̃chi —nhanagürügü. Notürü nümatama ga guma jatü ga ngexetüchirécü, rü nhanagürü: —Ngẽmáãcü chama chixĩ —nhanagürü. 10  Rü jexguma ga jema duü̃xü̃gü rü nüxna nacagü rü nhanagürügü: —¿Rü nhuxãcü nixĩ i marü cuidauchixü̃ i nhu̱xmax? —nhanagürügü. 11  Rü nüma nanangãxü̃ rü nhanagürü: —Jima jatü ja Ngechuchugu ãẽ́gacü rü jima waixü̃müãnewa nacuaxi. Rü jema waixü̃mü ga iwaixü̃maã choxü̃ nachaxetü. Rü nhanagürü choxü̃: “¡Jéa Chiruéarü puchuwa naxũ rü ngẽ́ma dexámaã cugü jajauxetü!” nhanagürü choxü̃. Rü jéma chaxũ, rü jexguma dexámaã chaugü chajauxetügu rü chidauchi —nhanagürü ga guma jatü. 12  Rü jexguma nüxna nacagüe, rü nhanagürügü: —¿Ngextá nangẽxmaxü̃ i nhu̱xma ja jima jatü ja cuxü̃ rümexẽẽcü? —nhanagürügü. Rü nüma ga guma jatü ga ngexetüchirécü rü nhanagürü: —Tama nüxü̃ chacua̱x —nhanagürü. Parichéugü rü guma ngexetücü ga Ngechuchu namexẽẽcüna nacagüe 13  9:13-14 Notürü jema ngunexü̃ ga Ngechuchu nagu namexẽẽxü̃ ga guma ngexetücü, rü ngü̃xchigaarü ngunexü̃ nixĩ. Rü jemaca̱x ga duü̃xü̃gü rü Parichéugüxü̃tawa nanagagü ga guma jatü ga ngexetüchirécü. 14  Nüü̃ nadau 9:13 15  Rü jexguma ga jema Parichéugü rü nüxna nacagüe ga guma jatü, rü nhanagürügü: —¿Nhuxãcü i marü curümexẽtüxü̃ i nhu̱xmax? —nhanagürügü. Rü nüma nanangãxü̃ rü nhanagürü: —Waixü̃mü ga naxbüxágümaã jawaixẽẽxü̃maã choxü̃ nachaxetü ga Ngechuchu, rü nhu̱xmachi dexámaã chaugü chajajauxetü, rü ngẽmaca̱x marü chidauchi —nhanagürü. 16  Rü jexguma ga nhuxre ga Parichéugü rü nhanagürügü: —Jema jatü ga cuxü̃ rümexẽẽxü̃ rü tama Tupanaãrü duü̃xü̃ nixĩ, erü tama nanaxaure i ngü̃xchigaarü ngunexü̃ —nhanagürügü. Notürü togü ga Parichéugü rü nhanagürügü: —¿Nhuxãcü nanaxü i ngẽma cua̱xruü̃ i mexü̃ i taxü̃ ega wüxi i pecaduã́xü̃ jixĩxgux? —nhanagürügü. Rü jemaãcü nügü nitoje ga nagu naxĩnüẽxü̃wa ga jema Parichéugü. 17  Rü wena nüxna nacagüe ga guma jatü ga ngexetüchirécü, rü nhanagürügü: —¿Notürü cuma rü nhuxũ nhacuxü̃ nachiga i ngẽma jatü ga cuxü̃ rümexẽẽxü̃? —nhanagürügü. Rü nüma nanangãxü̃, rü nhanagürü: —Chauxca̱x rü wüxi i Tupanaãrü orearü uruü̃ nixĩ —nhanagürü. 18  Notürü ga jema Judéugüarü ãẽ̱xgacügü rü tama nüxü̃́ najaxõgüchaü̃ ga nüma na jiĩxü̃ ga na nangexetüchiréxü̃ ga noxrix, rü nhu̱xma rü marü na jadauchixü̃. Rü jemaca̱x ga jema ãẽ̱xgacügü rü tümaca̱x nangemagü ga nanatü rü naẽ ga guma jatü ga rümexẽtücü. 19  Rü tüxna nacagü, rü nhanagürügü: —¿Daa jiĩxü̃ ga guma pene ga nüxü̃ peixucü ga woetama ngexetüãcü bucü? ¿Nhuxãcü i nhu̱xma i jadauchixü̃? —nhanagürügü. 20  Rü nanatü rü naẽ tanangãxü̃gü rü nhatarügügü: —Ngẽmáãcü nüxü̃ tacua̱x rü daa nixĩ ja tone ga ngexetüãcüma buchirécü. 21  Notürü tama nüxü̃ tacua̱x ga nhuxãcü na jadauchixü̃ i nhu̱xmax. Rü tama nüxü̃ tacua̱x ga texé na namexẽtüxẽẽxü̃. ¡Ẽcü nüxnatama pecagü! Erü nüma rü marü naja, rü nümatama pemaã nüxü̃ na jaxuxü̃ca̱x —nhatarügügü. 22  Rü jema nhatarügügü ga nanatü rü naẽ, jerü tamuü̃ẽ. Jerü ga Judéugüarü ãẽ̱xgacügü rü marü nügümaã nanamexẽẽgü na tüxü̃ ínata̱xüchigüxü̃ca̱x ga ngutaque̱xepataü̃wa ga texé ga Ngechuchuaxü̃́ jaxṍxẽ na Cristu jiĩxü̃. 23  Rü jemaca̱x nixĩ ga nanatü rü naẽ ga nhatagügüxü̃: “¡Ẽcü, nüxnatama pecagü! Erü nüma rü marü naja rü nümatama pemaã nüxü̃ na jaxuxü̃ca̱x”, nhatagügüxü̃. 24  Rü jexguma ga jema Judéugüarü ãẽ̱xgacügü rü wenaxãrü naxca̱x nacagü ga guma ngexetüchirécü. Rü nhanagürügü nüxü̃: —Rü nhu̱xma tanaxwa̱xe i Tupanape̱xewa rü aixcuma tomaã nüxü̃ cuixu na texé cuxü̃ rümexẽẽxü̃. Erü toma rü meãma nüxü̃ tacua̱x i ngẽma Ngechuchu rü wüxi i pecaduã́xü̃ na jiĩxü̃ —nhanagürügü. 25  Rü nüma nanangãxü̃ rü nhanagürü nüxü̃: —Chama rü tama nüxü̃ chacua̱x ega wüxi i pecaduã́xü̃ jixĩgu rü e̱xna tama. Rü ngẽma nüxü̃ chacuáxü̃ nixĩ ga na changexetüchiréxü̃ ga noxrix rü nhu̱xma rü na chidauchixü̃ —nhanagürü. 26  Rü wenaxãrü nüxna nacagüe, rü nhanagürügü: —¿Rü ṯacü nixĩ ga cumaã naxüxü̃? ¿Rü nhuxãcü ga naxüãxü̃ ga cuxü̃ na jadauchixetüxẽẽxü̃? —nhanagürügü. 27  Rü nanangãxü̃ rü nhanagürü nüxü̃: —Marü pemaã nüxü̃ chixu, rü tama choxü̃́ iperüxĩnüẽchaü̃. ¿Tü̱xcüü̃ penaxwa̱xe na wena pemaã nüxü̃ chixuxü̃? ¿E̱xna pema rü ta nüxü̃́ pejaxõgüchaü̃? —nhanagürü. 28  Rü jexguma rü guma jatümaã chixexü̃ nixugüe, rü nhanagürügü: —Cumaẽrü nixĩ i nüxü̃́ cujaxõxü̃ i ngẽma jatü, notürü i toma rü Muĩséarü oreaxü̃́ nixĩ i tajaxõgüxü̃. 29  —Toma rü nüxü̃ tacua̱x ga Tupana rü aixcuma Muĩsémaã na jadexaxü̃, notürü ngẽma Ngechuchu rü tama nüxü̃ tacua̱x na ngextá na ne naxũxü̃ —nhanagürügü. 30  Rü guma jatü nanangãxü̃, rü nhanagürü nüxü̃: —¿Nhuxãcü nixĩ i ngẽma? Nüma rü marü choxü̃ narümexẽtüxẽẽ, notürü ¿nhuxãcü i pema i tama nüxü̃ pecuáxü̃ na ngextá ne naxũxü̃? 31  —Rü guxãma i jixema rü meãma nüxü̃ tacua̱x rü Tupana tama nüxü̃ naxĩnü i pecaduã̱xgüxü̃ãrü jumuxẽ. Notürü Tupana rü tüxü̃́ nüxü̃ naxĩnü i tümaãrü jumuxẽ ja jíxema nüxü̃ icua̱xüü̃güxe rü naxǘxe i Tupanaãrü ngúchaü̃. 32  —Taguma nhuxgu nüxü̃ taxĩnüchiga i wüxi i jatü na jadauchixẽẽãxü̃ i wüxi i duü̃xü̃ i norü bucüma ngexetüxü̃. 33  —Rü ngẽxguma chi tama Tupana núma namu̱xgux ja daa jatü ja choxü̃ rümexẽẽcü, rü taxuacü chima mexü̃ naxü —nhanagürü ga guma jatü ga ngexetüchirécü. 34  Rü jexguma ga jema Judéugüarü ãẽ̱xgacügü, rü nhanagürügü nüxü̃: —Cuma na pecadugu na cubuxü̃, ¿rü nhuxãcü cunaxwa̱xe na toxü̃ cungúexẽẽchaü̃xü̃? —nhanagürügü. Rü nhu̱xmachi ínanata̱xüchigü ga ngutaque̱xepataü̃wa. Duü̃xü̃gü i tama jaxõgüxü̃ rü ngexetüxü̃rüü̃ nixĩgü 35  Rü Ngechuchu rü nüxü̃ nacuáchiga ga na ínata̱xüchigüãxü̃ ga guma ngexetüchirécü. Rü jexguma nüxü̃ nada̱xgu, rü nhanagürü nüxü̃: —¿Nüxü̃́ cujaxõxü̃ ja Tupana Nane ja duü̃xü̃xü̃ ixĩcü? —nhanagürü. 36  Rü jexguma ga nüma rü Ngechuchuxü̃ nangãxü̃ rü nhanagürü: —Pa Corix, ¡chamaã nüxü̃ ixu na texe jiĩxü̃ na nüxü̃́ chajaxõxü̃ca̱x! —nhanagürü. 37  Rü Ngechuchu nanangãxü̃, rü nhanagürü: —Marü nüxü̃ cudau ja Tupana Nane. Rü chamatama nixĩ i cumaã na íchidexaxü̃ chiĩxü̃ —nhanagürü. 38  Rü jexguma ga guma jatü ga ngexetüchirécü rü Ngechuchupe̱xegu nacaxã́pü̱xü, rü nüxü̃ nicua̱xüü̃, rü nhanagürü nüxü̃: —Ngẽmáãcü cuxü̃́ chajaxõ, Pa Corix —nhanagürü. 39  Rü jexguma ga Ngechuchu rü nhanagürü: —Rü nhama i naãnewa chaxũ na chajadexechixü̃ca̱x i chorü duü̃xü̃gü nüxna i ngẽma duü̃xü̃gü i tama choxrü ixĩgüxü̃. Rü nuã chaxũ na chanameẽxẽẽxü̃ca̱x i ngẽma duü̃xü̃gü i noxri tama Tupanaxü̃ cua̱xgüxü̃. Rü ngẽxgumarüü̃ ta núma chaxũ na duü̃xü̃gü i tama choxü̃ cua̱xgüchaü̃xü̃xü̃ chanawéxü̃ na duü̃xü̃gü i ngexetüxü̃rüü̃ na jixĩgüxü̃, erü tama choxü̃́ najaxõgüchaü̃ —nhanagürü. 40  Rü nhuxre ga Parichéugü ga jéma Ngechuchumaã jexmagüxü̃, rü jexguma jema orexü̃ naxĩnüẽgu, rü Ngechuchuna nacagü, rü nhanagürügü: —¿E̱xna toma rü ta tama Tupanaxü̃ tacua̱xgü nhacuxü̃? —nhanagürügü. 41  Rü Ngechuchu nanangãxü̃ rü nhanagürü nüxü̃: —Ngẽxguma chi tama aixcuma Tupanaxü̃ pecua̱xgügu rü tau chima pegagu nixĩ na pepecaduã̱xgüxü̃. Notürü ngẽma na pegü peixuxü̃ na Tupanaxü̃ pecuáxü̃ rü ngẽmaca̱x pegagutama nixĩ na pepecaduã̱xgüxü̃ i nhu̱xmax —nhanagürü.

Notas