Juã́ũ 7:1-53

7  Rü jemawena ga Ngechuchu rü Gariréaanewa jexmagüne ga ĩãnegügu nixũãgüchigü. Rü tama Judéaanewa najexmachaü̃ jerü jémacü̱̃ã̱x ga Judéugüarü ãẽ̱xgacügü rü naxca̱x nadaugü ga na jama̱xgüchaü̃ãxü̃ca̱x.  Notürü marü ningaica ga jema Judéugüarü peta ga nagu norü düxenügü jaxügüxü̃ na jemawa nüxna nacua̱xãchiexü̃ca̱x ga nhuxãcü nuxcümaxü̃güxü̃ ga norü o̱xigü na naxügüxü̃ ga norü düxenügü ga naĩxã́tünaxca̱x ga jexguma Muĩséwe naxĩxgu ga ngextá taxúema íxãpataxü̃wa. Rü jemaca̱x nixĩ ga Düxenügüarü Petagu naxãẽ́gaxü̃.  Rü naẽneẽgü ga Ngechuchu rü nhanagürügü nüxü̃: —Tama name i nuxã Gariréaarü naãnegu curüxã̱ũ̱x. Rü name nixĩ i petaca̱x Judéawa cuxũ, na ngẽma duü̃xü̃gü i cuwe rüxĩxü̃ i ngẽ́ma ngẽxmagüxü̃ nüxü̃ daugüxü̃ca̱x i ngẽma cua̱xruü̃gü i mexü̃gü i Tupanaãrü poramaã cuxüxü̃.  —Erü ngẽxguma chi wüxi ja jatü rü duü̃xü̃güxü̃ nügü nacua̱xẽẽchaü̃gu rü tama cúãcü nanaxü i ṯacü i naxüxü̃. Rü nhu̱xma na cunaxüxü̃ i muxü̃ma i mexü̃gü i Tupanaãrü poramaã cuxüxü̃, rü name nixĩ i guxü̃ i duü̃xü̃güpe̱xewa cunaxü —nhanagürügü.  Rü jema nhanagürügü ga naẽneẽgü jerü woo ga nümagü rü ta tama nüxü̃́ najaxõgü.  Rü jexguma ga Ngechuchu rü nanangãxü̃, rü nhanagürü nüxü̃: —Taũta nawa nangu i ngunexü̃ na petawa chaxũxü̃. Notürü pexca̱x rü ngẽxü̃rüüxü̃mare i ngunexü̃ nixĩ i mexü̃ na petawa nagu pexĩxü̃.  —Ngẽma duü̃xü̃gü i nhama i naãnecü̱̃ã̱x rü tama pechi naxaie. Notürü chauchi naxaie erü chanango̱xẽẽ i ngẽma naxügüxü̃ rü na nachixexü̃.  —Name nixĩ i petawa pexĩ i pemax. Chama rü taũta ngẽ́ma chaxũ erü taũta nawa nangu i ngunexü̃ i nagu ngẽ́ma chaxũxü̃ —nhanagürü ga Ngechuchu.  Rü jexguma jema nhaxguwena, rü Gariréaanegu narüxã̱ũ̱x. Ngechuchu rü Düxenügüarü Petawa naxũ 10  Notürü nawena ga naẽneẽgü ga petawa na naxĩxü̃, rü Ngechuchu rü ta jéma naxũ. Notürü cúãcü jéma naxũ, rü tama poraãcü duü̃xü̃güxü̃ nügü nadauxẽẽ. 11  Rü jema Judéugüarü ãẽ̱xgacügü rü naxca̱x nadaugü ga jema petawa, rü nhanagürügü: —¿Ngextá nangẽxma i ngẽma jatü? —nhanagürügü. 12  Rü nügütanüwa ga jema duü̃xü̃gü ga jéma jexmagüxü̃, rü poraãcü Ngechuchuchiga ínidexagü. Rü nhuxre ga jema duü̃xü̃gü rü nhanagürügü: —Jima rü wüxi ja jatü ja mecü nixĩ —nhanagürügü. Notürü ga togü rü nhanagürügü: —Ngẽma jatü rü tama name erü duü̃xü̃güxü̃ nawomüxẽẽ —nhanagürügü. 13  Notürü taxuü̃ma ga duü̃xü̃gü rü mea togüpe̱xewa Ngechuchuxü̃ nicua̱xüü̃güchaü̃, jerü jema Judéugüarü ãẽ̱xgacügüxü̃ namuü̃ẽ. 14  Rü jexguma marü jema petaarü ngãxü̃wa nanguxgu, rü nixücu ga Ngechuchu nawa ga tupauca ga taxü̃ne. Rü inanaxügü ga na nangu̱xẽẽtaexü̃. 15  Rü jema Judéugüarü ãẽ̱xgacügü, rü naḇaixãchiãẽgü namaã ga jema ore ga Ngechuchu nüxü̃ ixuxü̃. Rü nhanagürügü: —¿Nhuxãcü i ngẽmaãcü poraãcü nüxü̃ nacuáxü̃, rü taguma texé nangu̱xẽẽ? —nhanagürügü. 16  Rü Ngechuchu nanangãxü̃ rü nhanagürü nüxü̃: —Nhaã chorü ngu̱xẽẽtae rü tama choxrü nixĩ, erü Chaunatü ja núma choxü̃ mucüarü nixĩ. 17  —Ngẽxguma texé naxüxchaü̃gu i Tupanaãrü ngúchaü̃ rü jíxema tá nüxü̃ tacua̱x ngoxi aixcuma Tupanaxü̃tawa chanajaxu i ngẽma chorü ngu̱xẽẽtae rü e̱xna chaugüxü̃tawatama chajaxuxü̃ jixĩ i ngẽma. 18  —Jíxema texé ja mexü̃ i tümachigaxü̃tama ixuxe rü ngẽmaãcü tanaxü erü tanaxwa̱xe i duü̃xü̃gü na tüxü̃ icua̱xüü̃güxü̃. Notürü texé nüxü̃ tixu i ore i mexü̃ nachiga i ngẽma tüxü̃ muxü̃, rü aixcuma nixĩ i tümaãrü ore. Rü tama dora nixĩ i ngẽma nüxü̃ tixuxü̃. 19  —¿Tama e̱xna aixcuma jiĩxü̃ ga Muĩsé pexna naxãxü̃ ga Tupanaãrü mugü? Notürü taxúema i pema naga pexĩnüẽ i ngẽma mugü. ¿Rü nhu̱xma rü tü̱xcüü̃ nixĩ i choxü̃ peima̱xgüchaü̃xü̃? —nhanagürü. 20  Rü jema duü̃xü̃gü nanangãxü̃gü, rü nhanagürügü: —Cuma rü ṉg̱oxo cuwa nangẽxmamare. ¿E̱xna texé cuxü̃ tima̱xgüchaü̃? —nhanagürügü. 21  Notürü ga Ngechuchu rü nhanagürü nüxü̃: —Chama rü ngü̃xchigaarü ngunexü̃gu chanamexẽẽ ga wüxi ga jatü. Rü guxãma i pema rü penuãẽgü naxca̱x ga jema wüxitama ga mexü̃ ga ngü̃xchigaarü ngunexü̃gu chaxüxü̃. 22  —Notürü pema rü ta ngü̃xchigaarü ngunexü̃gu pepuracüe na nagu pexĩxü̃ca̱x ga Muĩséarü mugü. Rü Muĩsé pemaã nüxü̃ nixu na tüxü̃ ípewiecha̱xmüpe̱xechiraü̃xü̃ ja guxãma ja jatüxe ja buxe. Notürü tama Muĩsé nixĩ ga inaxügücü ga jema, jerü nuxcümaxü̃güxü̃ ga perü o̱xigüwa nixĩ ga ne naxũxü̃. Rü nhu̱xma i pema rü jema mugagu rü tüxü̃ ípewiecha̱xmüpe̱xechiraü̃ ja guxãma ja buxe ja jatüxe woo ngü̃xchigaarü ngunexü̃ jixĩgu. 23  —Rü ngẽmaãcü i pema rü ngü̃xchigaarü ngunexü̃gu buxexü̃ ípewiecha̱xmüpe̱xechiraü̃ erü naga pexĩnüẽchaü̃ i Muĩséarü mugü. ¿Rü nhu̱xma rü tü̱xcüü̃ jiĩxü̃ i chamaã penuẽxü̃ naxca̱x na ngü̃xchigaarü ngunexü̃gu chanamexẽẽxü̃ ga wüxi ga jatü ga iḏaaweecü? 24  —Rü ngẽmaca̱x tama name i ngürümare penangugü i ngẽma chaxüxü̃. Rü penaxwa̱xe i meã nagu perüxĩnüẽxira, na aixcuma meã penangugüxü̃ca̱x —nhanagürü ga Ngechuchu. Ngechuchu rü Tupana Nane nixĩ 25  Rü nhuxre ga jema duü̃xü̃gü ga Jerucharéü̃gu ãchiü̃güxü̃ rü nügüna nacagüe, rü nhanagürügü: —¿Taux e̱xna daa jiĩxü̃ ja jima jatü ja ãẽ̱xgacügü naxca̱x daugücü na jama̱xgüchaü̃ãxü̃ca̱x? 26  —¡Dücax! Gua nixĩ rü jéa guxü̃ i duü̃xü̃güpe̱xewa nidexa rü taxúema nhuxũ nhatarügü nüxü̃. ¿Taux e̱xna i tórü ãẽ̱xgacügü i marü nüxü̃́ jaxõgüãxü̃ na aixcuma Cristu na jiĩxü̃ i nümax? 27  —Notürü i jixema rü nüxü̃ tacua̱xgü na ngextá ne naxũxü̃ i nümax. Notürü ngẽxguma aixcuma Cristu núma ũxgu rü taxúetáma nüxü̃ tacua̱x na ngextá na ne naxũxü̃ —nhanagürügü. 28  Rü nüma ga Ngechuchu rü tupauca ga taxü̃newa ínanangúexẽẽ ga duü̃xü̃gü. Rü jexguma nüxü̃ naxĩnügu ga jema ore ga Judéugü nüxü̃ ixugüexü̃ ga nachiga, rü tagaãcü nhanagürü: —Pema rü marü choxü̃ pecua̱x rü nüxü̃ pecua̱x na ngextá na ne chaxũxü̃. Notürü tama chaugagu nixĩ i núma chaxũxü̃. Chama núma chaxũ jerü núma choxü̃ namu ga Tupana ja naxwa̱xecü na nüxü̃́ jaxõgüxü̃ notürü i pema rü tama nüxü̃ pecua̱x ja jima. 29  —Chama rü nüxü̃ chacua̱x jerü naxü̃tawa ne chaxũ, rü nüma nixĩ i núma choxü̃ namuxü̃ —nhanagürü. 30  Rü jexguma ga jema ãẽ̱xgacügü rü Ngechuchuxü̃ nijauxgüchaü̃. Notürü taxuü̃ma najajauxgü, jerü taũta nawa nangu ga ngunexü̃ ga na jajauxgüãxü̃ rü na jama̱xgüãxü̃ca̱x. 31  Notürü muxü̃ma ga duü̃xü̃gü rü nüxü̃́ najaxõgü. Rü nhanagürügü: —¿Ngẽxguma ínanguxgu ja Cristu rü ṯacü rü cua̱xruü̃ i taxü̃ tá naxü ja daa jatü tama üxü̃ i nhu̱xmax? —nhanagürügü. Parichéugü rü Ngechuchuxü̃ nijauxgüchaü̃ 32  Rü jema Parichéugü rü duü̃xü̃güxü̃ naxĩnüẽ ga jemaãcü Ngechuchuchiga na jadexagüxü̃. Rü jemaca̱x ga nümagü rü paigüarü ãẽ̱xgacügü rü jéma nanamugü ga tupauca ga taxü̃neãrü purichíagü na Ngechuchuxü̃ janajauxgüxü̃ca̱x. 33  Rü jexguma ga Ngechuchu rü nhanagürü nüxü̃: —Paxaãchi tátama nixĩ i petanüwa changẽxmaxü̃, rü nhu̱xmachi tá chataegu naxü̃tawa ja jima núma choxü̃ mucü. 34  —Pema rü tá chauxca̱x pedaugü, notürü tãũxü̃táma choxü̃ ipejangaugü. Erü ngẽma ngextá tá íchangẽxmaxü̃wa rü taxuacü ngẽ́ma pengugü. 35  Rü jexguma ga jema Judéugüarü ãẽ̱xgacügü rü nügüna nacagüe, rü nhanagürügü: —¿Ngextá tá naxũ ega taxuacütáma nüxü̃ ijarüngaugügu? ¿E̱xna ngẽma Judéugü i to i nachiü̃ãnewa ngẽxmagüxü̃tanüwa tá naxũ rü e̱xna ngẽma tama Judéugü ixĩgüxü̃tanüwa tá naxũ na jangúexẽẽãxü̃ca̱x? 36  —¿Rü ṯacüchiga nixĩ i ngẽma na ngẽma nhaxü̃: “Tá chauxca̱x pedaugü notürü tãũxü̃táma choxü̃ ipejangaugü, erü taxuacütáma ngẽ́ma pexĩ i ngẽma tá íchangẽxmaxü̃wa”, nhaxü̃? —nhanagürügü. Dexá i maxẽẽruü̃chiga nidexa ga Ngechuchu 37  Rü jema nawa ijacuáxü̃ ga petaarü ngunexü̃ nixĩ ga guxü̃ ga togü ga ngunexü̃ãrü jexera rümemaẽxü̃ naxca̱x ga Judéugü. Rü jema ngunexü̃gu nixĩ ga inachixü̃ ga Ngechuchu rü tagaãcü nhaxü̃: —Rü ngẽxguma texé iṯawaxgu rü ¡nuã chauxü̃tawa taxũ rü tajaxaxe! 38  —Rü “texé ja choxü̃́ jaxṍxẽ rü tümaãrü maxü̃newa tá nibaibe i taxü̃ i dexá i maxẽẽruü̃” ngẽma Tupanaãrü ore i ümatüxü̃ nüxü̃ ixuxü̃rüü̃ —nhanagürü. 39  Rü jexguma jema nhaxgu ga Ngechuchu rü Tupanaãẽ i Üünexü̃chiga nixĩ ga jadexaxü̃. Rü nüxü̃ nixu ga guxü̃ma ga jema nüxü̃́ jaxõgüxü̃ rü tá na najauxgüãxü̃ i Naãẽ i Üünexü̃. Notürü tama jexgumatama nanajauxgü, jerü taũta wenaxãrü dauxü̃guxü̃ ga naãneca̱x nataegu ga Ngechuchu na guxü̃ãrü ãẽ̱xgacü na jiĩxü̃ca̱x. Ngechuchugagu nügü nitoje ga duü̃xü̃gü 40  Rü nümaxü̃ ga jema duü̃xü̃gü rü jexguma nüxü̃ naxĩnüẽgu ga jema Ngechuchu nüxü̃ ixuxü̃, rü nhanagürügü: —Aixcuma nhaã jatü nixĩ i ngẽma Tupanaãrü orearü uruü̃ i ínguxchaü̃xü̃ —nhanagürügü. 41  Rü togü rü nhanagürügü: —Daa nixĩ ja Cristu —nhanagürügü. Notürü togü rü nhanagürügü: —Tama nixĩ, erü taxucürüwa Gariréaanecü̱̃ã̱x nixĩ ja Cristu. 42  —Erü Tupanaãrü ore i ümatüxü̃wa rü nhanagürü:“Cristu rü tá Dawítaa nixĩ, rü tá nango̱x i ĩãne i Beréü̃wa ga ngextá Dawí íbuxü̃wa”, nhanagürügü. 43  Rü jemaãcü Ngechuchugagu nügü nitoje ga duü̃xü̃gü. 44  Rü nhuxre ga jema duü̃xü̃gü rü Ngechuchuxü̃ nijauxgüchaü̃, notürü taxuü̃ma najajauxgü. Judéugüarü ãẽ̱xgacügü rü tama Ngechuchuaxü̃́ najaxõgüchaü̃ 45  Rü jema tupauca ga taxü̃neãrü purichíagü, rü Parichéugüca̱x rü paigüarü ãẽ̱xgacügüca̱x nawoegu. Rü jema ãẽ̱xgacügü rü nüxna nacagü, rü nhanagürügü: —¿Tü̱xcüü̃ tama nuã penaga? —nhanagürügü. 46  Rü jema purichíagü rü nanangãxü̃gü rü nhanagürügü: —Taguma texé tidexa i nhaã jatü idexaxü̃rüü̃ —nhanagürügü. 47  Rü jexguma ga Parichéugü rü nhanagürügü nüxü̃: —¿E̱xna pexü̃ rü ta marü nawomüxẽẽ i nümax? 48  —Dücax, rü taxúema i tomax i Parichéugü rü taxuü̃ma i tórü ãẽ̱xgacügü rü nüxü̃́ najaxõgü i ngẽma Ngechuchu. 49  —Notürü nhaã duü̃xü̃gü i tama Tupanaãrü mugüxü̃ cua̱xgüxü̃ rü marü nachixexü̃gugü —nhanagürügü. 50  Notürü Nicudému ga Parichéu ixĩcü ga wüxicana Ngechuchuxü̃tagu naxũãnecü, rü nhanagürü nüxü̃: 51  —Ngẽma tórü mugü i ümatüxü̃wa rü nhanagürü: “Taxuacüma wüxi i jatüxü̃ tapocu ega tama nüxü̃ ixĩnüẽxĩragu i norü dexa na nüxü̃ icuáxü̃ca̱x na ṯacü na naxüxü̃”, nhanagürü. 52  Rü jexguma ga natanüxü̃gü rü nanangãxü̃gü, rü nhanagürügü nüxü̃: —¿E̱xna cuma rü ta Gariréaanecü̱̃ã̱x cuixĩ? ¡Nawa nangu̱x i Tupanaãrü ore i ümatüxü̃ rü ngẽ́ma tá nüxü̃ cudau rü taxuü̃táma i Tupanaãrü orearü uruü̃ rü Gariréaanecü̱̃ã̱x nixĩ! —nhanagürügü. 53  Rü jexguma ga wüxichigü rü nachiü̃wa naxĩ.

Notas