Juã́ũ 5:1-47

5  Rü nhuxre ga ngunexü̃gü ngupetüguwena rü najexma ga wüxi ga peta ga Judéugü auregüxü̃ na jemaãcü Tupanaxü̃ jacua̱xüü̃güxü̃ca̱x. Rü jemaca̱x ga Ngechuchu rü Jerucharéü̃ca̱x nataegu.  Rü guma ĩãneãrü poxeguxü̃ rü nüxü̃́ najexma ga wüxi ga ĩã̱x ga Carneruarü Choxü̃chicagu ãẽ́gaxü̃. Rü jema ĩã̱xãrü ngaicamana najexma ga wüxi ga puchu ga Judéugügawa Betesagu ãẽ́gaxü̃. Rü guma puchuanacüwa najexma ga wüxime̱ẽ̱xpü̱x ga chopetüchica ga ãxpataü̃ẽ́tügüxü̃.  Rü jema chopetüchicagu nacagü ga muxü̃ma ga duü̃xü̃gü ga iḏaaweexü̃. Rü nümaxü̃ rü nangexetügü, rü togü rü nachixeparagü, rü togü rü nanaw̱ãĩxãchigü. Rü jema iḏaaweexü̃ rü jéma nanaṉg̱uxẽẽgü ga guma puchu ga na naxĩã̱xãchichiüxü̃ca̱x.  Jerü nhuxguacü rü guma puchugu ínarüxĩĩxü̃ ga wüxi ga dauxü̃cü̱̃ã̱x ga Tupanaãrü orearü ngeruü̃, rü najaxĩã̱xchiücüüxẽẽxü̃. Rü guxema tüxira tügü jéma táexe nachiüwa ga guma puchu ga jexguma jaxĩã̱xchiücüügu, rü tümaca̱x nitaane woo ga ngẽxü̃rüü̃mare ga ḏaawe tüxü̃́ jexmaxẽ.  Rü jéma natanüwa najexma ga wüxi ga jatü ga marü 38 ga taunecü iḏaawecü.  Rü jexguma Ngechuchu nüxü̃ da̱xgu ga guma jatü ga jexma na nacaxü̃, rü nüxü̃ nacuáchiga ga marü mucüma ga taunecü na jaḏaawexü̃. Rü jemaca̱x nüxna naca rü nhanagürü nüxü̃: —¿Cunaxwa̱xexü̃ i cuxca̱x na jataanexü̃? —nhanagürü.  Rü Ngechuchuxü̃ nangãxü̃ ga guma iḏaawecü, rü nhanagürü: —Pa Corix, tataxuma ja texé ja choxü̃ rüngü̃xẽẽxẽ na ngẽ́ma choxü̃ tatáexü̃ca̱x i ngẽxguma naxĩã̱xãchichiügu ja daa puchu. Rü guxü̃guma i ngẽxguma ngẽ́ma chaugü chatáechaü̃gu, rü joxni i togü rü marü nüxĩra nügü ngẽ́ma natáegü —nhanagürü.  Rü Ngechuchu rü nhanagürü nüxü̃: —¡Inachi, rü najaxu i curü caruü̃, rü íixũ! —nhanagürü.  5:9-10 Rü jexgumatama naxca̱x nitaane ga guma jatü. Rü nanajaxu ga norü caruü̃, rü ínixũ. Notürü ga jema ngunexü̃ rü ngü̃xchigaarü ngunexü̃ nixĩ. Rü jemaca̱x ga jémacü̱̃ã̱xgü ga Judéugüarü ãẽ̱xgacügü rü nhanagürügü nüxü̃ ga guma jatü ga naxca̱x itaanecü: —Nhama nixĩ i ngü̃xchigaarü ngunexü̃. Rü ngẽmaca̱x nachu̱xu nixĩ na cujangexü̃ i curü caruü̃ erü jemaãcü tamaã nüxü̃ nixu ga Muĩsé —nhanagürügü. 10  Nüü̃ nadau 5:9 11  Notürü ga guma jatü rü jema Judéugüarü ãẽ̱xgacügüxü̃ nangãxü̃, rü nhanagürü: —Jima choxü̃ rümexẽẽcü rü nhanagürü choxü̃: “¡Najaxu i curü caruü̃ rü íixũ!” nhanagürü. 12  Rü jexguma ga jema ãẽ̱xgacügü rü nüxna nacagü, rü nhanagürügü: —¿Texé ngẽma nhatarügü cuxü̃: “¡Najaxu i curü caruü̃ rü íixũ!” nhatarügü cuxü̃? —nhanagürügü. 13  Notürü ga guma jatü rü tama nüxü̃ nacua̱x ga texé naxca̱x na jataanexẽẽxü̃, jerü namuxũchi ga duü̃xü̃gü ga jéma, rü jexma najarütaxu ga Ngechuchu. 14  Notürü jixcama ga Ngechuchu rü tupauca ga taxü̃negu nüxü̃ najangau ga guma jatü, rü nhanagürü nüxü̃: —¡Dücax i nhu̱xma marü cuxca̱x na jataanexü̃, rü tãũxü̃táma wena chixexü̃ cuxü na tama cuiḏaawexü̃ca̱x namaã i wüxi i ḏaawe i ngẽma marü cuxü̃ ngupetüxü̃ãrü jexera ixĩxü̃! —nhanagürü. 15  Rü ínixũ ga guma jatü, rü Judéugüarü ãẽ̱xgacügümaã nüxü̃ najarüxu ga Ngechuchu na jiĩxü̃ ga guma namexẽẽcü. 16  Rü jemaca̱x nixĩ ga jema ãẽ̱xgacügü ga Ngechuchuca̱x nadaugüxü̃ na jama̱xgüãxü̃ca̱x, jerü ngü̃xchigaarü ngunexü̃gu napuracü. 17  Notürü ga Ngechuchu rü nhanagürü nüxü̃: —Chaunatü ja Tupana rü guxü̃ i ngunexü̃gu napuracü rü mexü̃ naxü. Rü ngẽmaca̱x i chama rü ta naxrüü̃ chapuracü —nhanagürü. 18  Rü jemaca̱x ga jema Judéugüarü ãẽ̱xgacügü rü jexeraãcü Ngechuchuxü̃ nima̱xgüchaü̃. Jerü tama naxrüü̃ nanaxaure ga ngü̃xchigaarü ngunexü̃ rü nhu̱xmachi nüxü̃ nixu ga Nanatüxü̃chi na jiĩxü̃ ga Tupana, rü jemaãcü nügü nixu ga Nanatü ga Tupanamaã na nawüxiguxü̃. Nüma ga Tupanatama nixĩ ga Nanena naxããxü̃ ga pora 19  Rü jexguma ga Ngechuchu rü nhanagürü nüxü̃ ga jema ãẽ̱xgacügü: —Aixcuma pemaã nüxü̃ chixu rü chama i Tupana Nane rü tama chorü poramaã chanaxü i ṯacü rü puracü i mexü̃. Notürü ngẽma nüxü̃ chadauxü̃ i Chaunatü üxü̃xĩcatama nixĩ ichaxüxü̃. Rü guxü̃ma i ngẽma Chaunatü üxü̃, rü chama ja Nane rü ta chanaxü. 20  —Chaunatü ja Tupana rü choxü̃ nangechaü̃, rü ngẽmaca̱x choxü̃ nüxü̃ nadauxẽẽ i guxü̃ma i ṯacü i nüma naxüxü̃. Rü ngẽma nhu̱xma choxü̃ nüxü̃ nadauxẽẽxü̃ãrü jexera tá choxü̃ nüxü̃ nadauxẽẽ i jixcüra. Rü ngẽxguma i pema ega ngẽmaxü̃ pedaugügu, rü tá peḇaixãchiãẽgü namaã. 21  —Rü Chaunatü rü ínanadagüxẽẽ i juexü̃gü rü wena nanamaxẽxẽẽ. Rü ngẽxgumarüü̃ ta i chama i Nane rü tüxna chanaxã i maxü̃ ja jíxema chatümawa̱xéxe na tüxna chanaxãxü̃. 22  5:22-23 —Rü tama Chaunatü nixĩ ja duü̃xü̃güxü̃ icagücü i norü maxü̃chiga. Notürü choxü̃ nixĩ i namuxü̃ na chanaxüxü̃ca̱x i ngẽma, na choxü̃ jacua̱xüü̃güxü̃ca̱x i duü̃xü̃gü, ngẽma Chaunatüxü̃ na jacua̱xüü̃güxü̃rüü̃. Rü jíxema tama choxü̃ icua̱xüxü̃́xẽ, rü tama nüxü̃ ticua̱xüü̃ ta ja Chaunatü ja choxü̃ nuã mucü. 23  Nüü̃ nadau 5:22 24  —Aixcuma pemaã nüxü̃ chixu rü jíxema texé ja choxü̃́ irüxĩnüxẽ i chorü ore, rü nüxü̃́ jaxṍxẽ ja jima Chaunatü ja núma choxü̃ mucü, rü tüxü̃́ nangẽxma i maxü̃ i taguma gúxü̃. Rü Chaunatü rü tãũxü̃táma tümamaã nanaxuegu na tapocuxü̃ erü marü nawa ítanguxuchi na tajuxü̃, rü tüxü̃́ nangẽxma i maxü̃ i taguma gúxü̃. 25  —Rü aixcuma pemaã nüxü̃ chixu rü marü nawa tá nangu i ngunexü̃ rü nhu̱xmatama nixĩ i chauga naxĩnüẽxü̃ tá i ngẽma duü̃xü̃gü i norü pecadugu juexü̃ rü ijarütauxexü̃. Rü texé ja chauga ĩnüẽxẽ rü tá tamaxẽ. 26  —Nüma ja Chaunatü rü nüxü̃́ nangẽxma i pora na namaxẽxẽẽãxü̃ca̱x i duü̃xü̃gü. Rü ngẽma pora rü choxna nanaxã ja Chaunatü na chama rü ta duü̃xü̃güxü̃ chamaxẽxẽẽxü̃ca̱x. 27  —Rü Chaunatü ja Tupana choxü̃ namu na duü̃xü̃güna chac̱axü̃ca̱x naxca̱x i norü maxü̃chiga, erü chama nixĩ i Nane i duü̃xü̃xü̃ chiĩxü̃. 28  —¡Tãṹ i peḇaixãchiãẽgüxü̃ namaã i nhaã ore i pemaã nüxü̃ chixuxü̃! Erü tá ínangu i ngẽma ngunexü̃ i nagu guxü̃ma i duü̃xü̃gü i juexü̃ rü tá na nüxü̃ naxĩnüẽxü̃ i chauga. 29  —Rü naxmaü̃güwa tá ínachoxü̃. Rü ngẽma meã maxẽxü̃, rü tá ínarüdagü na najauxgüãxü̃ca̱x i maxü̃ i taguma gúxü̃. Notürü ngẽma chixexü̃ ügüxü̃, rü tá ínarüdagü na napocuexü̃ca̱x. Nawa nüxü̃ icuáxü̃ na Tupana jiĩxü̃ ga Ngechuchuna naxãcü ga pora 30  —Chama rü taxucürüwa ṯacü chaxü chauechamatama ega tama choxü̃ naxüxẽẽãgu ja Chaunatü. Rü Chaunatü chamaã nüxü̃ ixuxü̃ãcüma nixĩ i nüxna chac̱axü̃ i duü̃xü̃gü i norü maxü̃chiga. Rü ngẽxguma nüxna chacaxgu rü aixcuma meãma chanangugü i duü̃xü̃gü. Erü tama choxrütama ngúchaü̃ nixĩ i ngẽma chaxüxü̃, notürü Chaunatü ja nuã choxü̃ mucüarü ngúchaü̃ nixĩ i ngẽma chaxüxü̃. 31  —Rü ngẽxguma chi chauchigaxü̃tama chixuxgu rü taxuwama name i ngẽma. 32  —Notürü nangẽxma i to i chauchigaxü̃ ixuxü̃. Rü nüxü̃ chacua̱x rü aixcuma nixĩ i norü ore i pemaã nüxü̃ jaxuxü̃. 33  Pema rü Juã́ũ ja baiü̃xẽẽruü̃xü̃tawa penamugü ga perü duü̃xü̃gü na nüxü̃ pecuáxü̃ca̱x ga ore ga aixcuma ixĩxü̃ ga chauchiga. Rü jema ore ga Juã́ũ pexü̃ namaã ngãxü̃xü̃ rü aixcuma nixĩ. 34  —Notürü i chama rü tama chanaxwa̱xe i ṯacü rü jatü chauétüwa nachogü, erü chama tátama chaugüna chadau. Notürü pemaã nüxü̃ chixu i ngẽma Juã́ũãrü ore na choxü̃́ pejaxõgüxü̃ca̱x rü na penajauxgüxü̃ca̱x i maxü̃ i taguma gúxü̃. 35  —Juã́ũ rü wüxi ga omü ga ij̱auracüüxü̃ rü pexü̃ báxixü̃rüü̃ nixĩ ga pexca̱x. Rü pema rü paxaãchi namaã petaãẽgü. 36  —Notürü nangẽxma i ṯacü i Juã́ũãrü orearü jexera chauétüwa íchogüxü̃. Rü ngẽma nixĩ ga jema taxü̃gü ga cua̱xruü̃gü ga Chaunatü choxü̃ muxü̃ na norü poramaã chanaxüxü̃ca̱x. Rü jemawa pexü̃ nüxü̃ chadauxẽẽ na aixcuma Chaunatü ja Tupana jiĩxü̃ ga núma choxü̃ mucü. 37  —Rü ngẽxgumarüü̃ ta ja Chaunatü ga guma núma choxü̃ mucü, rü marü chauétüwa ínachogü, woo taguma nüxü̃ pexĩnüẽ ga naga rü taguma nüxü̃ pedau. 38  —Rü ngẽma Chaunatüarü ore rü ta tama peãẽwa nixücu, erü tama choxü̃́ pejaxõgü woo Chaunatü núma choxü̃ na muxü̃. 39  5:39-40 —Pema meãma nawa pengúe i Tupanaãrü ore i ümatüxü̃, erü nagu perüxĩnüẽ rü ngẽmawa tá nüxü̃ ipejangau i perü maxü̃ i taguma gúxü̃. Notürü woo ngẽmatama Tupanaãrü ore i ümatüxü̃wa rü chauchiga meã na jadexaxü̃, notürü i pema rü tama choxü̃́ pejaxõgüchaü̃ na ngẽmaãcü penajauxgüxü̃ca̱x i ngẽma maxü̃. 40  Nüü̃ nadau 5:39 41  5:41-42 —Rü chama rü tama chanaxwa̱xe na choxü̃ peicua̱xüü̃güxü̃ erü meãma pexü̃ chacua̱x, rü nüxü̃ chacua̱x na tama aixcuma Tupanaxü̃ pengechaü̃güxü̃. 42  Nüü̃ nadau 5:41 43  —Chaunatü ja Tupana nixĩ ga núma choxü̃ mucü, notürü i pema rü tama choxü̃ pejauxgüchaü̃. Notürü ngẽxguma chi tomare i jatü nagagutama núma ũxgu, rü ngẽma chi nixĩ i taãẽãcüma pejauxgüxü̃. 44  —¿Rü nhuxãcü chi choxü̃́ pejaxõgü ega penaxwa̱xegu na pemücügütama pemaã taãẽxü̃ rü tama naxca̱x pedaugügu na Tupanaxü̃chi pemaã taãẽxü̃? 45  —¡Tãṹ i nagu perüxĩnüẽxü̃ na chama tá jiĩxü̃ na pexü̃ chixugüxü̃ i Chaunatüxü̃tawa! Erü Muĩsé ga guma perü maxü̃ca̱x nüxü̃́ pejaxõgücü tátama nixĩ ja jima pexü̃ ixugücü i Chaunatüxü̃tawa. 46  —Rü ngẽxguma chi pejaxõgügu i ngẽma ore ga Muĩsé ümatüxü̃, rü choxü̃́ rü chi ta pejaxõgü. Jerü ga Muĩsé rü chauchigagu nixĩ ga naxümatüãxü̃ ga norü poperawa. 47  —Notürü ngẽxguma tama pejaxõgügu i ngẽma Muĩsé ümatüxü̃ i ore, ¿rü nhuxãcü tá pejaxõgü i ngẽma chama pemaã nüxü̃ chixuxü̃? —nhanagürü ga Ngechuchu.

Notas