Juã́ũ 20:1-31

20  Rü jüxüarü pa̱xmamaxü̃chi ga taũta meã jangóonegu, rü María ga Magadácü̱̃ã̱x rü Ngechuchuxü̃ íjaxücuchigüxü̃wa ixũ. Rü nüxü̃ idau ga guma nuta ga Ngechuchumaxü̃ namaã rüngũxtaü̃cü, rü marü na ínaxügachixü̃.  Rü jexgumatama iinhaãchi, rü jema chama rü Chimáũ ga Pedrumaã ítajexmagüxü̃wa inha. Rü ngĩgürügü toxü̃: —Rü marü nanajauxgü ja Cori ja Ngechuchu i naxmaxü̃wa. Rü tama nüxü̃ tacua̱x na ngexta na naxügüãxü̃ —ngĩgürügü.  Rü jexguma ga chama rü Pedru rü Ngechuchuxü̃ íjaxücuchigüxü̃wa taxĩ.  Rü wüxigu itaxü̃ãchi ga tomax, notürü ga chama rü poraãcü Pedruarü jexera ichanhaãchi. Rü chaxira Ngechuchuxü̃ íjaxücuchixü̃wa changu.  Rü ichajarümaxãchi na nagu chidacuchixü̃ca̱x. Rü nüxü̃ chadau ga naxchiru ga namaã janáĩxpüxü̃güãxü̃ ga jexma na naxüxü̃. Notürü tama aixepegu chaxücu.  Rü chaweama ínangu ga Chimáũ ga Pedru. Rü nüma rü jema naxmaxü̃gu naxücu. Rü nüma rü ta nüxü̃ nadau ga jema naxchiru ga namaã janáĩxpüxü̃chiréxü̃.  Rü nüxü̃ nadau ta ga naxchiru ga namaã jana̱ĩ̱xẽrugüãxü̃ ga meãma dixcumüxü̃ ga noxrüguma üxü̃. Rü tama wüxigu namaã nanu ga jema naxchiru ga namaã janáĩxpüxü̃güãxü̃.  Rü jexguma ga chama ga chaxiraxüchi jéma na changuxü̃, rü chama rü ta chixücu. Rü nüxü̃ chadau ga guxü̃ma, rü chajaxõ ga Ngechuchu rü marü wena na namaxü̃xü̃.  Jerü noxri rü tama nüxü̃ tacua̱xgüéga ga jema Tupanaãrü ore ga ümatüxü̃ ga nhaxü̃:“Cristu rü tá wena namaxü̃”, nhaxü̃. 10  Rü jexguma ga toma rü tochiü̃ca̱x tawoegu. Ngechuchu rü ngĩxca̱x nango̱x ga María ga Magadácü̱̃ã̱x 11  Notürü ga María rü jexma irüxã̱ũ̱x naxü̃tagu ga Ngechuchumaxü̃. Rü jéma ixaxu. Rü naxauxãcüma ijarüm̱axãchi, rü nagu ijadacuchi ga naxmaxü̃. 12  Rü nüxü̃ idau ga taxre ga dauxü̃cü̱̃ã̱x ga Tupanaãrü orearü ngeruü̃gü ga icómüchiruxü̃. Rü Ngechuchuxü̃ne ixüchiréxü̃wa narütogü, rü wüxi ga Ngechuchueru ixüxü̃waama rü to ga nacütawaama. 13  Rü jema dauxü̃cü̱̃ã̱x ga duü̃xü̃gü rü ngĩxna nacagüe, rü nhanagürügü: —Pa Ngecüx, ¿ṯacüca̱x cuxaxu? —nhanagürügü. Rü ngĩma rü inangãxü̃, rü ngĩgürügü: —Chaxaxu erü najangegü i naxü̃ne ja chorü Cori, rü tama nüxü̃ chacua̱x na ngexta naxügüãxü̃ —ngĩgürügü. 14  Rü jexgumatama jema ngĩxgu, rü ngĩgüweama idau. Rü nüxü̃ idau ga Ngechuchu ga ngĩxü̃tawa na najexmaxü̃. Notürü tama nüxü̃ icua̱x ga Ngechuchu na jiĩxü̃ ga guma. 15  Rü jexguma ga Ngechuchu rü ngĩxna naca, rü nhanagürü: —Pa Ngecüx, ¿ṯacüca̱x cuxaxu? ¿Rü texéca̱x nixĩ i cudauxü̃? —nhanagürü. Rü ngĩma nüxü̃ nacua̱xgu rü jema nixĩ ga jema nanetünecüarü daruü̃. Rü jemaca̱x ngĩgürügü nüxü̃: —Pa Corix, ega cuma cujangexgu i naxü̃ne ja Ngechuchu, rü ¡chamaã nüxü̃ ixu na ngexta na cunaxüxü̃ na chama chajajaxuxü̃ca̱x! —ngĩgürügü. 16  Rü jexguma ga Ngechuchu rü nhanagürü ngĩxü̃: —Pa Maríax —nhanagürü. Rü ngĩma rü naxca̱x idaueguãchi, rü togawa ngĩgürügü nüxü̃: —Pa Rabonix —ngĩgürügü. Rü ngẽma rü “Pa Ngúexẽẽruü̃x”, nhaxü̃chiga nixĩ. 17  Rü Ngechuchu rü nhanagürü ngĩxü̃: —¡Tãṹ i choxü̃ cuingõgüxü̃, erü taũta Chaunatüxü̃tawa chaxũ! ¡Notürü ngẽ́ma chaueneẽgütanüwa naxũ rü namaã nüxü̃ jarüxu na chama rü tá Chaunatü ja chorü Tupana ja Penatü ja perü Tupanaxü̃tawa chaxũxü̃! —nhanagürü. 18  Rü jexguma ga María ga Magadácü̱̃ã̱x rü tomaã nüxü̃ ijarüxu ga marü nüxü̃ na nadauxü̃ ga Cori ga Ngechuchu. Rü nhu̱xmachi tomaã nüxü̃ ijaxu ga jema ore ga Ngechuchu ngĩmaã nüxü̃ ixuxü̃. Norü ngúexü̃güca̱x nango̱x ga Ngechuchu 19  Rü jema jüxüarü ngunexü̃ãrü chütacü, rü tangutaque̱xegü ga toma ga Ngechuchuarü ngúexü̃gü. Rü togü tarüwãtaü̃gü, jerü jema Judéugüarü ãẽ̱xgacügüxü̃ tamuü̃ẽ. Rü Ngechuchu rü ngürüãchi jéma nango̱x, rü torü ngãxü̃tanügu nachi. Rü toxü̃ narümoxẽ, rü nhanagürü: —¡Petaãẽgü! —nhanagürü. 20  Rü jema nhaxguwena rü toxü̃ nügü nawéme̱x, rü nügü inawépacütüxü̃. Rü tomagü ga norü ngúexü̃gü rü tataãẽgü, jerü nüxü̃ tadaugü ga guma torü Cori. 21  Rü jexguma rü wenaxãrü nhanagürü toxü̃: —¡Petaãẽgü! Rü jema Chaunatü núma choxü̃ na muxü̃rüü̃ tátama nixĩ i pexü̃ chamuxü̃ i chamax —nhanagürü. 22  Rü jexguma rü toétü “cue” nhanagürü ga Ngechuchu. Rü nhu̱xmachi nhanagürü toxü̃: —¡Penajauxgü i Tupanaãẽ i Üünexü̃! 23  Rü ngẽxguma duü̃xü̃gü nüxü̃ rüxoegu i norü pecadugü, rü pema rü pexü̃́ nangẽxma i pora na namaã nüxü̃ peixuxü̃ na Tupana marü nüxü̃́ nüxü̃ nangechaü̃xü̃ i norü pecadugü. Notürü ngẽxguma duü̃xü̃gü tama nüxü̃ rüxoegu i norü pecadugü, rü pema rü pexü̃́ nangẽxma i pora na namaã nüxü̃ peixuxü̃ na marü ngẽma norü pecadugüwatama nangẽxmagüxü̃ —nhanagürü ga Ngechuchu. Tumé nüxü̃ nadau ga Cori ga wena maxü̃cü 24  Notürü totanüxü̃ ga Tumé ga Wüxigu Buexü̃maã taxugüxü̃, rü tama totanüwa najexma ga jexguma Ngechuchu toxca̱x ngo̱xgu. 25  Rü jixcama ga toma rü Tumémaã nüxü̃ tixugüe, rü nhatarügügü: —Marü nüxü̃ tadau ja tórü Cori ja Ngechuchu —nhatarügügü. Notürü ga Tumé rü toxü̃ nangãxü̃ rü nhanagürü: —Ngẽxguma tama nüxü̃ chada̱xgu i norü itapuamaxü̃ i naxme̱xwa rü tama nüxü̃ chingõgügu i ngẽma itapuamaxü̃ rü ngẽma norü canapacütüxü̃, rü tãũxü̃táma chajaxõ i ngẽma ore i chamaã nüxü̃ peixuxü̃ —nhanagürü. 26  Rü 8 ga ngunexü̃guwena rü wenaxãrü tangutaque̱xegü ga toma ga wüxi ga ĩpatawa. Rü totanüwa najexma ga Tumé ga jexguma. Rü woo ga na nawãxtaxü̃ ga ĩã̱x, rü ngürüãchi jéma nango̱x ga Ngechuchu, rü torü ngãxü̃tanügu nachi. Rü toxü̃ narümoxẽ, rü nhanagürü: —¡Petaãẽgü! —nhanagürü. 27  Rü jexguma Tuméxü̃ nhanagürü ga Ngechuchu: —¡Nüxü̃ ingõgü i nhaã chorü itapuamaxü̃ i cha̱xme̱xwa ngẽxmaxü̃, rü nüxü̃ nadau ja daa cha̱xme̱x! ¡Rü nuxa chorü canapacütüxü̃gu ingõgü! ¡Rü nüxü̃ rüxo na tama cujaxõxü̃! ¡Rü meãma jaxõ i nhu̱xmax! —nhanagürü. 28  Rü jexguma ga Tumé rü Ngechuchuxü̃ nangãxü̃, rü nhanagürü: —Pa Chorü Corix, cuma nixĩ i chorü Tupana cuiĩxü̃ —nhanagürü. 29  Rü Ngechuchu rü nhanagürü nüxü̃: —Pa Tuméx, cuma cujaxõ i nhu̱xma erü choxü̃ cudau. Notürü tataãẽgü ja jíxema tama choxü̃ daugüãcüma jaxõgüxe —nhanagürü. Ṯacüca̱x naxümatü i nhaã popera 30  Rü Ngechuchu rü tope̱xewa nanaxü ga muxü̃ma ga to ga mexü̃gü ga cua̱xruü̃gü i tama nhaã poperagu ümatüxü̃. 31  Notürü guxü̃ma i nhaã poperagu ümatüxü̃, rü naxümatü na pejaxõgüxü̃ca̱x na Ngechuchu rü Cristu ja Tupana Nane na jiĩxü̃. Rü ngẽxguma nüxü̃́ pejaxõgügu rü tá pexü̃́ nangẽxma i maxü̃ i taguma gúxü̃.

Notas