Juã́ũ 2:1-25

2  Rü jemawena ga tamaẽ̱xpü̱x ga ngunexü̃gu, rü najexma ga wüxi ga ngĩgüarü peta ga Gariréaanewa jexmane ga ĩãne ga Canáwa. Rü jéma ijexma ga naẽ ga Ngechuchu.  Rü Ngechuchuna rü toxna rü ta naxugüe na jéma taxĩxü̃ca̱x.  Rü nagu̱x ga norü axexü̃ ga wĩũ. Rü Ngechuchu naẽ ngĩgürügü nüxü̃ ga Ngechuchu: —Marü nagúarü wĩũã̱xgü —ngĩgürügü.  Notürü Ngechuchu ngĩxü̃ nangãxü̃, rü nhanagürü: —Pa Mamax, ¿tü̱xcüü̃ chamaã nüxü̃ cuixu i ngẽma? Erü taũta nawa nangu na chanaxüxü̃ca̱x i ṯacü rü mexü̃ i Tupanaãrü poramaã üxü̃ —nhanagürü.  Notürü ga ngĩma ga naẽ rü ngĩgürügü nüxü̃ ga jema baegüxü̃ namaã ga wĩũchiü: —¡Penaxü̱x i guxü̃ma i ngẽma nüma pemaã nüxü̃ jaxuxü̃! —ngĩgürügü.  Rü jéma ijexma ga 6 ga tü̃xü̃ ga nutagüngĩxca̱x. Rü wüxichigü ga jema tü̃xü̃wa rü maneca jexma name ga 50 rü e̱xna 70 litrugü ga dexá. Rü jema tü̃xü̃gü ijixĩ ga jema Judéugü ngĩxü̃ ixügüãcugücü ga jexguma dexámaã nügü jajauxme̱xgüchaü̃gu na Tupanaca̱x nügü jamexẽẽgüxü̃ca̱x.  Rü Ngechuchu rü jema baegüxü̃xü̃ namu, rü nhanagürü: —¡Dexámaã ngĩxü̃ pixügüãcu i nhaã tü̃xü̃gü! —nhanagürü. Rü nümagü ga jema baegüxü̃ rü meãma ngĩxü̃ nixügüãcu.  Rü Ngechuchu nhanagürü nüxü̃: —Rü nhu̱xma chanaxwa̱xe i íraxü̃ pejaxu, rü petaarü joraxü̃tawa penange —nhanagürü. Rü jemaãcü nanaxügü ga jema baegüxü̃.  Rü jema petaarü jora nüxü̃ naxaxneta ga jema dexá ga wĩũxü̃ naca̱xichixü̃. Notürü tama nüxü̃ nacua̱x ga ngextá na najauxgüãxü̃. Rü jema baegüxü̃xĩcatama nixĩ ga nüxü̃ cua̱xgüxü̃ ga dexámare na jiĩxü̃ ga noxrix. Rü jexgumatama ga jema petaarü jora rü jema jatü ga ingĩxü̃ca̱x naca. 10  Rü nhanagürü nüxü̃: —Guxü̃ i naãnewa rü duü̃xü̃gü rü noxri rü namaã nabae ja mecü ja wĩũ. Rü ngẽxguma marü meãma guxü̃ma axegügu i ngẽma nüxna naxuxü̃, rü ngẽmawena rü nüxna nanaxã ja ngexcürüücümare ja wĩũ. Notürü i cuma rü marü nagúxchaü̃gu i peta, rü mexẽchicü ja wĩũmaãtama cujaxaxegüxẽẽ i duü̃xü̃gü —nhanagürü. 11  Rü guma Gariréaanewa jexmane ga ĩãne ga Canáwa nixĩ ga jema naxüxü̃ ga Ngechuchu. Rü jema nixĩ ga nüxĩraü̃xü̃ ga cua̱xruü̃ ga Tupanaãrü poramaã üxü̃ ga nawa nügü inawéxü̃ ga Tupana Nane na jiĩxü̃. Rü toma ga norü ngúexü̃gü rü nüxü̃́ tajaxõgü. 12  Rü jemawena rü Caparnáũ ga ĩãnewa naxũ ga Ngechuchu. Rü naẽ rü naẽneẽgü rü toma ga norü ngúexü̃gü rü ta ítajaxümücügü. Rü jéma guma ĩãnewa tajexmagü ga nhuxre ga ngunexü̃. Ngechuchu rü tupauca ga taxü̃newa ínanawoxü̃ ga jema duü̃xü̃gü ga jéma taxegüxü̃ 13  Rü marü ningaica ga torü peta ga Üpetüchiga ga nawa nüxna tacua̱xãchiexü̃ ga nhuxãcü nuxcüma ga Ejituanewa Tupanaãrü orearü ngeruü̃ nüxü̃ naxüpetüxü̃ ga guma torü o̱xigüpata rü tama jaxücuxü̃ na jamáãxü̃ca̱x ga torü o̱xigü nane ga jacü. Rü jemaca̱x ga Ngechuchu rü toma ga norü ngúexü̃gü rü Jerucharéü̃ãrü ĩãnewa taxĩ. 14  Rü jexma tupauca ga taxü̃negu nüxü̃ najangau ga duü̃xü̃gü ga jéma norü wocagümaã rü carnerugümaã rü muxtucugümaã taxegüxü̃. Rü jéma nüxü̃ nadau ta ga duü̃xü̃gü ga jéma norü taxechicawa rütogüxü̃ rü dĩẽruca̱x taxegüxü̃. 15  Rü jexguma jemaxü̃ nada̱xgu ga Ngechuchu, rü nanaxü ga wüxi ga c̱uaixruü̃ ga naxcha̱xmünaxca̱x. Rü jemamaã tupauca ga taxü̃newa ínanawoxü̃ ga jema duü̃xü̃gü guxü̃ma ga norü carnerugümaã rü wocagümaã. Rü jema dĩẽruca̱x taxegüxü̃ãrü dĩẽru rü ngĩxü̃ narüwoü̃ nhaxtüanegu. Rü norü mechagü rü ta nüxü̃ nawoneta. 16  Rü jema muxtucugümaã taxegüxü̃xü̃ nhanagürü: —¡Ípejana i ngẽma perü muxtucugü i nuã! Tama name i taxepataü̃xü̃ pejaxĩxẽẽ ja daa Chaunatüpata —nhanagürü. 17  Rü jexguma ga toma ga norü ngúexü̃gü rü nüxna tacua̱xãchie ga nuxcümaxü̃xü̃ ga ümatüxü̃ ga nhaxü̃:“Duü̃xü̃gü rü tá chauchi naxaie erü chanachu̱xu i ṯacü i chixexü̃ na naxügüxü̃ i Tupanapatawa”, nhaxü̃. 18  Rü jexguma ga jema ãẽ̱xgacügü rü Ngechuchuna nacagü, rü nhanagürügü: —¿Ṯacü rü cua̱xruü̃xü̃ toxü̃ cudauxẽẽ na nawa nüxü̃ tacuáxü̃ca̱x na aixcuma Tupana jiĩxü̃ ja cuxü̃ mucü na ícunawoxü̃xü̃ca̱x i nhaã duü̃xü̃gü i nuã? —nhanagürügü. 19  Rü Ngechuchu nanangãxü̃, rü nhanagürü: —¡Nagu pepogüe ja daa tupauca ja taxü̃ne! Rü chama rü tamaẽ̱xpü̱x i ngunexü̃gu rü tá wena íchanadaxẽẽ —nhanagürü. 20  Rü jexguma ga jema ãẽ̱xgacügü rü nanangãxü̃gü, rü nhanagürügü: —Rü 46 ga taunecü nawa napuracüe ga duü̃xü̃gü na naxügüãxü̃ca̱x ga daa tupauca ja taxü̃ne. ¿Rü nhuxãcü tá i cuma i tamaẽ̱xpü̱x i ngunexü̃ tátama wena ícunadaxẽẽxü̃? —nhanagürügü. 21  Notürü guma Tupanapata ga Ngechuchu nachiga idexane rü naxü̃nechigatama nixĩ. 22  Rü jemaca̱x ga toma ga norü ngúexü̃gü, rü jexguma Ngechuchu juwa írüdaxgu, rü nüxna tacua̱xãchie ga jema ore ga Ngechuchu nüxü̃ ixuxü̃. Rü aixcuma tajaxõgü ga jema ore ga nüxü̃ jaxuxü̃ rü jema Tupanaãrü ore ga nuxcümaxü̃güxü̃ ga orearü uruü̃gü Ngechuchuchigagu ümatügüxü̃. Ngechuchu rü nüxü̃ nacua̱x i guxü̃ma i duü̃xü̃gü 23  Rü jexguma Ngechuchu Üpetüchigaarü petaca̱x Jerucharéü̃wa jexmagu, rü muxü̃ma ga duü̃xü̃gü rü nüxü̃́ najaxõgü, jerü nüxü̃ nadaugü ga jema taxü̃ ga mexü̃gü ga Tupanaãrü poramaã naxüxü̃. 24  Notürü ga nüma ga Ngechuchu rü tama jema duü̃xü̃güme̱xẽwa nügü najexmaxẽẽchaü̃, jerü woetama marü nüxü̃ nacua̱x ga ṯacügu na naxĩnüẽxü̃ ga guxü̃ma ga jema duü̃xü̃gü. 25  Rü jemaca̱x ga nüma rü taxuü̃ca̱xma texé namaã nüxü̃ tixu na ṯacügu naxĩnüẽxü̃ ga jema duü̃xü̃gü. Jerü nümatama marü nüxü̃ nacua̱x ga ṯacügu na naxĩnüẽxü̃ ga naãẽwa ga wüxichigü.

Notas