Juã́ũ 16:1-33

16  Rü Ngechuchu rü nhanagürü nüxü̃: —Rü pemaã nüxü̃ chixu i nhaã ore na tama nüxü̃ na perüxoexü̃ca̱x na choxü̃́ pejaxõgüxü̃.  —Rü ngutaque̱xepataü̃güwa tá pexü̃ ínawoxü̃. Rü aixcuma tá nawa nangu na texé pexü̃ ḏaixü̃ rü tá nagu tarüxĩnüxü̃ na ngẽmaãcü mexü̃ Tupanaca̱x taxüxü̃.  —Rü ngẽmaãcü tá pemaã namaxẽ i duü̃xü̃gü, erü taguma nüxü̃ nacua̱xgü ja Chaunatü, rü choxü̃ rü ta tama nacua̱xgü.  —Rü pemaã nüxü̃ chixu i nhaã ore i nhu̱xmax, na nüxna pecua̱xãchiexü̃ca̱x i ngẽxguma jixcüra ngẽmaãcü pexü̃ nangupetügu. —Noxri rü tama pemaã nüxü̃ chixu i nhaã ore, jerü petanügu charüxã̱ũ̱x. Tupanaãẽ i Üünexü̃ãrü puracüchiga  —Notürü i nhu̱xma rü tá pexna íchixũ na Chaunatü ga núma choxü̃ mucüxü̃tawa na changẽxmaxü̃ca̱x. Rü pema rü taxúema choxna peca na ngextá tá na chaxũxü̃.  —Notürü poraãcü pengechaü̃güama erü pemaã nüxü̃ chixu i ngẽma ore.  —Notürü aixcuma pemaã nüxü̃ chixu rü pexca̱x narümemaẽ nixĩ na Chaunatüca̱x chataeguxü̃. Rü ngẽxguma chi tama Chaunatüxü̃tawa chaxũxgu rü tau chima núma naxũ i Naãẽ i Üünexü̃ i pexü̃ rüngü̃xẽẽxü̃. Notürü ngẽxguma ngẽ́ma chaxũxgu rü chama tá núma chanamu i Naãẽ i Üünexü̃.  —Rü ngẽxguma Naãẽ i Üünexü̃ núma ũxgu rü tá guxü̃ i duü̃xü̃güxü̃ nüxü̃ nacua̱xẽẽ na japecaduã̱xgüxü̃. Rü tá nanango̱xẽẽ i nhuxãcü na jiĩxü̃ i ngẽma maxü̃ i Tupanape̱xewa aixcuma mexü̃. Rü tá duü̃xü̃güxü̃ nüxü̃ nacua̱xẽẽ na Tupana tá napocuexü̃ i duü̃xü̃gü naxca̱x i norü pecadugü.  —Rü nüma i Naãẽ i Üünexü̃ tá duü̃xü̃güxü̃ nüxü̃ nacua̱xẽẽ na pecaduã̱xgüxü̃ jiĩxü̃ erü tama choxü̃́ najaxõgü. 10  —Rü tá nanangúexẽẽ i nhuxãcü na jiĩxü̃ i ngẽma maxü̃ i Tupanape̱xewa aixcuma mexü̃, erü chama rü tá Chaunatüxü̃tawa chaxũ, rü pema rü tãũxü̃táma marü choxü̃ pedaugü. 11  —Rü Naãẽ i Üünexü̃ tá duü̃xü̃güxü̃ nüxü̃ nacua̱xẽẽ na Tupana tá napocuexü̃ i duü̃xü̃gü i chixexü̃ ügüxü̃, erü Tupana rü namaã nanaxuegu na marü napocuãxü̃ i Chataná i nhama i naãnemaã icuáxü̃. 12  —Chama rü choxü̃́ nangẽxma i muxü̃ma i to i ore i pemaã nüxü̃ chixuxchaü̃chiréxü̃. Notürü ega nhu̱xma chi pemaã nüxü̃ chixuxgu rü tau chima nüxü̃ pecua̱xgü. 13  —Rü Tupanaãẽ i Üünexü̃ rü nüxü̃ nixu i ore i aixcuma ixĩxü̃xĩcatama. Rü ngẽxguma núma naxũxgu rü nüma tá pexü̃ nangúexẽẽ i guxü̃ma i ore i aixcuma ixĩxü̃. Erü nüma rü tama nüẽchama tá nidexa, notürü ngẽma ore i Chaunatüxü̃tawa rü chauxü̃tawa nüxü̃ naxĩnüxü̃xü̃xica tátama nixu. Rü tá pexü̃ nüxü̃ nacua̱xẽẽ i guxü̃ma i ṯacü i jixcüra tá ngupetüxü̃. 14  —Rü nüma rü tá choxü̃ nicua̱xüxü̃ erü chauxü̃tawa tá nanajaxu i norü ngu̱xẽẽtae, rü nhu̱xmachi tá pexü̃ nangúexẽẽ namaã i ngẽma ngu̱xẽẽtae. 15  —Guxü̃ma i Chaunatüaxü̃́ ngẽxmaxü̃ rü choxrü ta nixĩ. Ngẽmaca̱x pemaã nüxü̃ chixu rü Naãẽ i Üünexü̃ rü chauxü̃tawa tá nanajaxu i norü ngu̱xẽẽtae, rü nhu̱xmachi pexü̃ tá namaã nangúexẽẽ. 16  —Rü paxa rü tãũxü̃táma choxü̃ pedau. Notürü ngẽmawena rü wena táxarü choxü̃ pedau erü Chaunatüxü̃tawa tá chaxũ —nhanagürü ga Ngechuchu. Ngechuchuarü ngúexü̃güarü ngechaü̃ rü tá taãẽxü̃ nananguxuchi 17  Rü jexguma nhuxre ga toma ga Ngechuchuarü ngúexü̃gü rü togüna tacagü, rü nhatarügügü: —¿Ṯacüchiga nixĩ na ngẽma nhaxü̃: “Rü paxa rü tãũxü̃táma choxü̃ pedaugü. Notürü ngẽmawena rü wena táxarü choxü̃ pedaugü”, nhaxü̃? ¿Rü ṯacüchiga ta nixĩ na nhaxü̃: “Chama rü Chaunatüxü̃tawa tá chaxũ”, nhaxü̃? 18  —¿Rü ṯacüchiga ta nixĩ na nhaxü̃: “Rü paxa rü tãũxü̃táma choxü̃ pedaugü”, nhaxü̃? Rü jixema rü tama nüxü̃ tacua̱xgüéga na ṯacüchigaxü̃ tamaã jaxuxü̃ —nhatarügügü. 19  Rü Ngechuchu rü nüxü̃ nacua̱xama ga nüxna na tacagüchaü̃xü̃ ga tomax. Rü jemaca̱x nhanagürü toxü̃: —Chama rü marü pemaã nüxü̃ chixu rü paxa rü tãũxü̃táma choxü̃ pedau, notürü ngẽmawena rü wena táxarü choxü̃ pedau. ¿Rü ngẽma dexaca̱xtama i pegüna pecagüxü̃? 20  —Rü aixcuma pemaã nüxü̃ chixu rü pema rü tá pexauxe, rü tá pengechaü̃gü. Notürü nhama i naãnecü̱̃ã̱x i duü̃xü̃gü rü tá nataãẽgü. Notürü woo pema tá pengechaü̃gü, rü ngẽma perü ngechaü̃ rü tá taãẽxü̃ nananguxuchi. 21  —Ngẽxguma wüxi i nge íraxacüchaü̃gu rü inaxi̱xãchiãẽ, erü ingu̱xneca. Notürü ngẽxguma marü tabuxgu ja ngĩrü õxchana, rü nüxü̃ ijarüngüma na nhuxãcü poraãcü ngĩxü̃́ na nangu̱xchiréxü̃ i noxrix, erü tümamaã itaãẽ ja ngĩrü õxchana. 22  —Rü ngẽxgumarüü̃ tá ta pexü̃ nangupetü i pemax, erü nhu̱xma rü penaxi̱xãchiãẽgü. Notürü wena táxarü chataegu rü pexü̃ íchajadau. Rü ngẽxguma rü tá pexü̃́ nangẽxma i wüxi i taãẽ i taxucürüwama texé pexna jaxuxü̃. 23  —Rü ngẽxguma ínanguxgu tá i ngẽma ngunexü̃ na janguxü̃ i nhaã pemaã nüxü̃ chixuxü̃, rü taxuü̃ca̱xtáma ṯacüca̱x choxna pecagü erü aixcuma Chaunatü tá nixĩ ja pexna naxãcü i guxü̃ma i ṯacü i chauégagu nüxna naxca̱x pec̱axü̃. 24  —Nhu̱xmarüta i pema rü taxuü̃ca̱xma chauégagu ípecagü. ¡Naxca̱x ípeca rü tá penajaxu i ngẽma naxca̱x ípec̱axü̃! Rü ngẽmaãcü rü tá aixcuma petaãẽgü. Ngechuchu rü marü nüxü̃ narüjexera i guxü̃ma i ṯacü i nhama i naãnewa ngẽxmaxü̃ 25  —Nhu̱xma rü cua̱xruü̃gügu chajaxuãcüma pemaã nüxü̃ chixu i ore. Notürü nawa tá nangu i ngunexü̃ i marü tãũxü̃táma ngẽmaãcü pemaã nüxü̃ chixu. Rü ngẽxguma rü tá noxtacüma meã pemaã chanango̱xẽẽ i Chaunatüchiga. 26  16:26-27 —Rü ngẽma ngunexü̃gu i pema rü Chaunatüxü̃tawa tá chauégagu naxca̱x ípeca i ṯacü i penaxwa̱xexü̃. Rü taxuü̃ca̱xma tü̱xcüü̃ chama tá Chaunatüxü̃tawa pexü̃́ naxca̱x íchaca, erü nümatama ja Chaunatü rü woetama pexü̃ nangechaü̃, erü pema rü choxü̃ pengechaü̃ rü pejaxõgü na naxü̃tawa ne chaxũxü̃. 27  Nüü̃ nadau 16:26 28  —Chaunatüxü̃tawa ne chaxũ na nhama ga naãnewa chaxũxü̃ca̱x. Rü nhu̱xma rü tá nüxna chataegu i nhama i naãne na wenaxãrü Chaunatüxü̃tawa chaxũxü̃ca̱x —nhanagürü. 29  Rü jexguma ga toma ga norü ngúexü̃gü rü nhatarügügü: —Nhu̱xma waxi nixĩ i meãxü̃chima tomaã cunango̱xẽẽxü̃ i curü ore i tomaã nüxü̃ cuixuxü̃. Rü tama ṯacügu ixuxü̃ãcüma tomaã nüxü̃ cuixu. 30  —Rü nhu̱xma rü nüxü̃ tacua̱x na aixcuma guxü̃xü̃ma na cucuáxü̃. Rü taxuacüma texé nhuxũ nhatagürü cuxü̃. Rü ngẽmaca̱x nixĩ i tajaxõgüxü̃ na aixcuma Tupanaxü̃tawa na ne cuxũxü̃ —nhatarügügü. 31  Rü Ngechuchu toxü̃ nangãxü̃ rü nhanagürü: —¿Aixcuma pejaxõgüxü̃ i nhu̱xmax? 32  —Rü nawa tá nangu i ngunexü̃ rü nhu̱xmatátama nixĩ i na pegü pewoonexü̃. Rü wüxichigü i pema rü tá pepatawa pexĩ, rü chaxica tá nuã choxü̃ peta̱x. Notürü tama chaxica tá icharüxã̱ũ̱x, erü Chaunatü rü chauxü̃tawa nangẽxma. 33  —Rü guxü̃ma i nhaã ore rü pemaã nüxü̃ chixu na chaugagu petaãẽgüxü̃ca̱x. Rü nhama i naãnewa rü tá ngúxü̃ peinge. Notürü ¡peporae! erü chama rü marü nüxü̃ charüjexera i guxü̃ma i ṯacü i nhama i naãnewa ngẽxmaxü̃ —nhanagürü.

Notas