Juã́ũ 12:1-50

12  Rü 6 ga ngunexü̃ naxü̃pa ga Üpetüchigaarü peta, rü Ngechuchu rü tomaã Betániãwa naxũ. Rü guma ĩãne nixĩ ga nagu naxãchixü̃ne ga Lázaru ga Ngechuchu wena namaxẽẽcü.  Rü jéma Lázarupatawa rü nanamexẽẽgü ga wüxi ga taxü̃ ga õna ga Ngechuchuca̱x ixĩxü̃. Rü totanüwa ga jema mechawa jexmagüxe rü Lázaru nixĩ ga Ngechuchuxü̃tawaama chibücü. Rü Marta ijixĩ ga inaxücü ga õna.  Rü jexguma ga María rü jéma inange ga wüxi ga taxüraweü̃xü̃ ga pumara ga paacaxüchixü̃ rü tatanüxü̃chixü̃. Rü Ngechuchuxü̃ namaã ichacutü. Rü nhu̱xmachi ngĩjaemaã íinapicutü. Rü guma ĩ rü guxü̃wama napaacamachĩã namaã ga jema pumara.  12:4-5 Rü jexguma ga Juda ga Icarióti ga wüxi ga totanüxü̃chire̱x ixĩxü̃ ga jixcama bexma cúãcü Ngechuchuxü̃ íxuaxü̃xü̃, rü nhanagürü: —¿Tü̱xcüü̃ tama tatanüxü̃gu namaã itaxe i ngẽma pumara na ngẽma dĩẽrumaã nüxü̃ nangü̃xẽẽxü̃ca̱x i ngẽma duü̃xü̃gü i ngearü dĩẽruã̱xgüxü̃? —nhanagürü.  Nüü̃ nadau 12:4  Notürü ga Juda rü tama aixcuma nagu narüxĩnü ga jema ngearü dĩẽruã̱xgüxü̃. Notürü jema nhanagürü jerü nüma rü wüxi ga ngĩ́ta̱xáxü̃ nixĩ. Rü naxme̱xwa najexma ga jema chacu ga dĩẽru ngĩxü̃ nagu taxügüxü̃ ga guxãma ga toma ga Ngechuchuarü ngúexü̃gü. Rü Juda rü nhuxguacü rü noxrüxü̃tama ngĩxne nangĩ̱xĩxü̃.  Rü jexguma ga Ngechuchu rü nhanagürü nüxü̃: —¡Tãṹ i ngĩxü̃ cuchixewexü̃! Erü chama rü paxa tá chaju rü tá ichata̱x. Rü ngẽmaca̱x nixĩ i ngẽma pumaramaã choxü̃ nachaxü̃.  —Ngẽma ngearü dĩẽruã̱xgüxü̃ rü guxü̃gutáma petanüwa nangẽxmagü. Notürü i chama rü tãũxü̃táma guxü̃gu petanüwa changẽxma —nhanagürü. Paigüarü ãẽ̱xgacügü rü nügümaã nanamexẽẽgü ga nhuxãcü Lázaruxü̃ tá na jama̱xgüxü̃  Rü muxü̃ma ga Judéugü rü nüxü̃ nacuáchiga ga Betániãwa na najexmaxü̃ ga Ngechuchu. Rü jéma naxĩ na nüxü̃ nadaugüxü̃ca̱x. Rü tama Ngechuchuxü̃xĩcatama nadaugüchaü̃ notürü nüxü̃ nadaugüchaü̃ ta ga Lázaru ga Ngechuchu wena namaxẽẽcü. 10  Rü jexguma ga paigüarü ãẽ̱xgacügü rü nügümaã nanamexẽẽgü ga Lázaruxü̃ rü ta na jama̱xgüxü̃ca̱x. 11  Jerü Lázarugagu nixĩ ga muxü̃ma ga Judéugü ga Ngechuchuaxü̃́ jaxõgüãxü̃ rü jema paigüna naxĩgüxü̃. Ngechuchu rü Jerucharéü̃gu naxücu 12  Rü muxü̃ma ga duü̃xü̃gü rü Jerucharéü̃wa naxĩ naxca̱x ga Üpetüchigaarü peta. Rü moxü̃ãcü duü̃xü̃gü nüxü̃ nacuáchigagü ga Ngechuchu rü guma ĩãnewa na nanguxchaü̃xü̃. 13  Rü jexguma moruátüta nadaü̃gü rü jemamaã Ngechuchuxü̃ najatüxgütanüãchi. Rü tagaãcü nhanagürügü: —¡Namexẽchi ja jima Tupana núma namucü! ¡Namexẽchi ja daa tachiü̃ãneãrü ãẽ̱xgacü! ¡Namaxü̃ i nümax! —nhanagürügü. 14  Rü Ngechuchu nüxü̃ inajangau ga wüxi ga buru, rü naẽ́tügu naxaunagü ga jema Tupanaãrü ore ga ümatüxü̃ nüxü̃ ixuxü̃rüü̃ ga jexguma nhaxgu: 15  “¡Tãṹ i pemuü̃ẽxü̃, Pa Jerucharéü̃cü̱̃ã̱xgüx! ¡Rü iperüdaunü na ngẽ́ma ne naxũxü̃ ja perü ãẽ̱xgacü ja wüxi i buru i íraxü̃ẽ́tügu aunagücü!” nhaxü̃. 16  Rü noxri ga toma ga norü ngúexü̃gü rü tama nüxü̃ tacua̱xgüéga ga Ngechuchuchiga na jiĩxü̃ ga jema ore. Notürü jixcüra marü Ngechuchu Tupanaxü̃tawa ũxgu, rü jexguma nixĩ ga nüxna tacua̱xãchiexü̃ ga guxü̃ma ga jema Ngechuchuxü̃ ngupetüxü̃, rü jema Tupanaãrü ore nüxü̃ ixuxü̃ãcütama nüxü̃ na nangupetüxü̃. 17  Rü jema duü̃xü̃gü ga Ngechuchuxü̃tawa jexmagüxü̃ ga jexguma Lázaruxü̃ wena namaxẽẽgu, rü nüxü̃ nixugüe ga jema nüxü̃ nadaugüxü̃. 18  Rü jemaca̱x nixĩ ga duü̃xü̃gü ga Ngechuchuxü̃ íjatuãchitanüxü̃xü̃, jerü nüxü̃ nacuáchigagü ga jema taxü̃ ga mexü̃ ga Tupanaãrü poramaã naxüxü̃ ga Ngechuchu. 19  Notürü ga jema Parichéugü rü nügümaã nhanagürügü: —Marü nüxü̃ pedauxü̃ i nhu̱xma na taxucürüwama ṯacü namaã ixüxü̃. ¡Rü dücax, guxü̃ma i duü̃xü̃gü rü nawe narüxĩ! —nhanagürügü. Nhuxre ga Gregugü rü Ngechuchuxü̃ nadaugüchaü̃ 20  Rü muxü̃ma ga duü̃xü̃gü rü petaca̱x Jerucharéü̃wa naxĩ na jéma Tupanaxü̃ na janacua̱xüü̃güxü̃ca̱x. Rü jema duü̃xü̃gütanüwa najexma ga nhuxre ga Gregugü. 21  Rü jema Gregugü rü Piripica̱x naxĩ. Rü nüma ga Piripi rü Gariréaaneãrü ĩãne ga Bechaídacü̱̃ã̱x nixĩ. Rü nüxü̃ naca̱a̱xü̃gü rü nhanagürügü: —Pa Corix, nüxü̃ tadauxchaü̃ ja Ngechuchu —nhanagürügü. 22  Rü Piripi rü Ãdrémaã nüxü̃ najarüxu. Rü jema taxre rü wüxigu Ngechuchuxü̃tawa naxĩ, rü namaã nüxü̃ najarüxugü. 23  Rü jexguma ga Ngechuchu rü nhanagürü nüxü̃: —Rü marü nawa nangu tá na chajuxü̃ rü wenaxãrü Chaunatüxü̃tawa tá na chaxũxü̃ i chama i Tupana Nane i duü̃xü̃xü̃ chiĩxü̃. 24  —Rü aixcuma pemaã nüxü̃ chixu rü ngẽxguma chi wüxipü̱xü i trigu tama waixü̃müãnegu toxgu rü wüxipü̱xüechatama nixĩ. Notürü ega waixü̃mügu natoxgu, rü ngẽ́ma naxüxgu, rü muxũchinema ínanguxuchi. [Rü ngẽxgumarüü̃ tá ta Tupanaxü̃tawa nangugü i muxü̃ma i duü̃xü̃gü ega chaju̱xgux.] 25  —Rü pemaã nüxü̃ chixu rü texé ja jíxema tümaãrü maxü̃xü̃ ngechaü̃xẽ i nhama i naãnewa rü tá itajarütaxu. Notürü texé ja jíxema tama tümaãrü maxü̃xü̃ ngechaü̃xẽ rü tama juxü̃ muü̃xẽ i nhama i naãnewa, rü tá tüxü̃́ nangẽxma i maxü̃ i taguma gúxü̃. 26  —Rü ngẽxguma texé choxü̃́ puracüchaü̃gu rü name nixĩ i chawe tarüxũ. Rü ngẽma chama tá íchangẽxmaxü̃wa rü ngẽ́ma rü tá ta tangẽxma i tümax. Rü ngẽxguma texé choxü̃́ puracügu rü Chaunatü ja Tupana rü tá tümamaã nataãẽ —nhanagürü. Ngechuchu nanaxunagü ga norü juxchiga 27  —Rü Ngechuchu nhanagürü: —Rü nhu̱xma rü poraãcü changechaü̃ rü chanaxi̱xãchiãẽ. ¿Rü ṯacüxü̃ tá Chaunatümaã chixuxü̃? Taxucürüwa namaã nüxü̃ chixu na choxü̃ ínanguxuchixẽẽxü̃ca̱x na tama chajuxü̃ca̱x, erü woetama ngẽmaca̱x núma chaxũ —nhanagürü. 28  Rü nhanagürü: —Pa Chaunatüx, ¡Choxü̃ rüngü̃xẽẽ na duü̃xü̃güpe̱xewa cuxü̃ chataxẽẽxü̃ca̱x! —nhanagürü. Rü jexguma ga jema duü̃xü̃gü ga jéma jexmagüxü̃ rü nüxü̃ naxĩnüẽ ga wüxi ga naga ga dauxü̃wa inaxũxü̃ ga nhaxü̃: —Marü cuxü̃ charüngü̃xẽẽ na choxü̃ cutaxẽẽxü̃ ga noxrix, rü wena táxarü cuxü̃ charüngü̃xẽẽ na choxü̃ cutaxẽẽxü̃ca̱x —nhanagürü ga jema naga. 29  Rü jema duü̃xü̃gü ga jéma jexmagüxü̃ ga nüxü̃ ĩnüẽxü̃ ga jema naga, rü nhanagürügü: —Wüxi i duruanexü̃ nixĩ —nhanagürügü. Notürü togü rü nhanagürügü: —Wüxi i Tupanaãrü orearü ngeruü̃ i dauxü̃cü̱̃ã̱x nixĩ i namaã idexaxü̃ —nhanagürügü. 30  Rü jexguma ga Ngechuchu rü nhanagürü nüxü̃: —Tama chauxca̱x nixĩ i nüxü̃ pexĩnüẽxü̃ i ngẽma naga. Rü pexca̱xtama nixĩ i nüxü̃ pexĩnüẽxü̃. 31  —Rü nhu̱xma tá nixĩ i Tupana inaxügüãxü̃ na tüxü̃ napocuexü̃ ja duü̃xẽ naxca̱x i tümaãrü pecadugü. Rü nhu̱xma tá nixĩ i Tupana ínata̱xüchixü̃ i ngẽma nhama i naãnewa poraxü̃ i Chataná. 32  —Rü ngẽxguma curuchawa chipotagu rü chaugüxü̃tawa tá chanagagü i guxü̃ma i duü̃xü̃gü —nhanagürü ga Ngechuchu. 33  Rü jema orewa duü̃xü̃gümaã nüxü̃ nixu ga nhuxãcü tá na najuxü̃. 34  Rü jema duü̃xü̃gü nanangãxü̃gü, rü nhanagürügü: —Torü mugü i ümatüxü̃wa nüxü̃ tadaugü na guxü̃gutáma namaxẽchaxü̃ ja Cristu. ¿Rü nhuxãcü i cuma rü nhacurügü: “Rü Tupana Nane ja duü̃xü̃xü̃ ixĩcü rü curuchawa tá nipota”, nhacurügü? ¿Rü texé tixĩ ja jíxema Tupana Nane ja duü̃xü̃xü̃ ixĩxẽ? —nhanagürügü. 35  Rü jexguma ga Ngechuchu rü nhanagürü nüxü̃: —Nhama rü ta petanüwa changẽxma na nhama i naãnewa pexü̃ changúexẽẽxü̃ca̱x rü ngẽmaãcü pexü̃ changóonetanüxẽẽxü̃ca̱x. Notürü paxaãchica̱xicatama petanüwa changẽxma. Rü name nixĩ i paxa choxü̃́ pejaxõgü nhama rü ta pexca̱x chanangóonexẽẽ naxü̃pa na naxẽãnexü̃. Erü jíxema ẽãnexü̃wa ngẽxmaxẽ rü tama nüxü̃ tacua̱x na ngextá taxũxü̃. 36  —Rü nhama rü ta petanüwa changẽxma rü name nixĩ i paxa choxü̃́ pejaxõgü na chorü ngóonexü̃wa pengẽxmagüxü̃ca̱x —nhanagürü. Rü jema nhaxguwena rü natanüwa ínaxũxü̃ ga Ngechuchu. Rü naxchaxwa inicu̱x. Ṯacüca̱x nixĩ ga Judéugü ga tama Ngechuchuaxü̃́ jaxõgüãxü̃ 37  Rü woo ga Ngechuchu rü duü̃xü̃güpe̱xewa nanaxü ga muxü̃ma ga taxü̃ ga mexü̃ ga cua̱xruü̃gü ga Tupanaãrü poramaã naxüxü̃, notürü jexguma rü ta tama nüxü̃́ najaxõgü ga duü̃xü̃gü. 38  Rü jemaãcü Tupana najanguxẽẽ ga jema ore ga Ichaía ümatüxü̃ ga nhaxü̃:“Pa Corix, taxúema tajaxõ ga jema ore ga tüxü̃ tangúexẽẽxü̃. Rü woo nüxü̃ tadaugü na nhuxãcü naporaxü̃ ja Tupana, rü tama tajaxõgü”, nhaxü̃. 39  12:39-40 Rü jemaãcü ga jema duü̃xü̃gü rü tama najaxõgü jema Ichaía ümatüxü̃wa nüxü̃ jaxuxü̃rüü̃, rü:“Jema duü̃xü̃gü rü tama nüxü̃ nadaugüchaü̃ rü tama najaxõgüchaü̃ rü tama Tupanaca̱x nawoeguchaü̃. Rü jemaca̱x ga Tupana rü nüxna nixũ na tama nüxü̃ nadaugüxü̃ca̱x rü tama jaxõgüãxü̃ca̱x rü tama naxca̱x nawoeguxü̃ca̱x na nüma nüxna naxããxü̃ca̱x i maxü̃ i ngexwacaxü̃xü̃”,nhaxü̃. 40  Nüü̃ nadau 12:39 41  Rü jema nhanagürü ga Ichaía jerü nango̱xetügu marü nüxü̃ nadau na nhuxãcü ãẽ̱xgacü ja tacüxü̃chi na jiĩxü̃ ja Ngechuchu ja Cristu. Rü jemaãcü nachiga nidexa. 42  Notürü muxü̃ma ga jema Judéugüarü ãẽ̱xgacügü rü Ngechuchuaxü̃́ najaxõgü, rü woo ga nhuxre ga naẽrugü rü ta najaxõgü, notürü tama nügü nixugüchaü̃ ga duü̃xü̃güpe̱xewa, jerü namuü̃ẽ na Parichéugü ngutaque̱xepataü̃wa ínawoxü̃xü̃. 43  Rü jemaãcü tama nügü nixugüchaü̃, jerü norü me nixĩ ga duü̃xü̃gü namaã nataãẽgüxü̃ rü tama aixcuma naxca̱x nadaugü na Tupana namaã taãẽxü̃. Texé ja tama Ngechuchuarü oreaxü̃́ jaxṍxẽ rü tá tapocu 44  Rü tagaãcü nhanagürü ga Ngechuchu: —Texé ja choxü̃́ jaxṍxẽ rü tama choxü̃́xĩcatama tajaxõ. Notürü Chaunatü ja núma choxü̃ mucüaxü̃́ rü ta tajaxõ. 45  —Rü texé ja choxü̃ dauxe, rü Chaunatü ja núma choxü̃ mucüxü̃ rü ta tadau. 46  —Chama na ngóonexẽẽruü̃ chiĩxü̃, rü nhama i naãnewa changu na guxãma ja texé ja choxü̃́ jaxṍxẽ rü tama ẽãnexü̃wa na tangẽxmagüechaxü̃ca̱x. 47  —Notürü ngẽxguma texé nüxü̃ ĩnügu i chorü ore rü tama tajaxõ̱xgu rü tama chama nixĩ i tüxü̃ chapocuxü̃. Erü tama nhama i naãnewa changu na chanapocuexü̃ca̱x i duü̃xü̃gü, notürü núma chaxũ na chanamaxẽxẽẽxü̃ca̱x. 48  —Jíxema texé ja tama choxü̃́ jaxṍxẽ rü tama chauga ĩnüxẽ rü marü tüxü̃́ nangẽxma na ṯacüca̱x tá Tupana tüxü̃ pocuxü̃. Erü ngẽma ore i nüxü̃ chixuxü̃gagu tátama nixĩ ja Tupana i tüxü̃ napocuxü̃ i naãneãrü gu̱xgu, erü tama tajaxõ i ngẽma ore i nüxü̃ chixuxü̃. 49  —Tama chaugagutama chidexa, notürü guma Chaunatü ga núma choxü̃ mucü, rü guma nixĩ ga chamaã nüxü̃ ixucü na ṯacüxü̃ tá duü̃xü̃gümaã chixuxü̃ rü nhuxãcü tá chanangúexẽẽxü̃. 50  —Rü nüxü̃ chacua̱x na Chaunatüarü orewa nangẽxmaxü̃ i maxü̃ i taguma gúxü̃. Rü ngẽmaca̱x i ngẽma ore i nüxü̃ chixuxü̃, rü ngẽmatama ore nixĩ i Chaunatü choxü̃ muxü̃ na nüxü̃ chixuxü̃ —nhanagürü ga Ngechuchu.

Notas