Juã́ũ 10:1-42

10  Rü jexguma ga Ngechuchu rü nhanagürü: —Rü aixcuma pemaã nüxü̃ chixu rü ngẽma jatü i tama carnerupǘxü̃ãrü ĩã̱xwa ixücuxü̃ rü wüxi i ngĩ́ta̱xáxü̃ nixĩ i ngẽma, erü ngextámare nixücu.  —Notürü ngẽma carnerupǘxü̃ãrü ĩã̱xwa meãma ixücuxü̃, rü ngẽma nixĩ i norü daruü̃xü̃chi i carnerugü.  —Rü ngẽma jatü i carnerupǘxü̃ãrü ĩã̱xna dauxü̃ rü najawãxna i ĩã̱x na jaxücuxü̃ca̱x i carnerugüarü daruü̃. Rü nüma i carnerugü rü nüxü̃ nacua̱xgü i naga i ngẽma norü daruü̃. Rü ngẽma norü daruü̃ rü wüxichigü i norü carneru rü naẽ́gamaã naxca̱x naca na ínamuxü̃ãxü̃ca̱x i naxpǘxü̃wa.  —Rü ngẽxguma ínamuxü̃ã̱xgu i guxü̃ma i norü carnerugü, rü nüma i norü daruü̃ rü nape̱xegu nixũchigü. Rü nümagü i carnerugü rü nawe narüxĩ, erü nüxü̃ nacua̱xgü i naga.  —Notürü ngẽxguma wüxi i jatü i tama aixcuma norü daruü̃ ixĩxü̃, rü tama nawe narüxĩ i ngẽma carnerugü. Rü nüxna naxĩgü, erü tama nüxü̃ nacua̱xgü i naga i ngẽma tama norü daruü̃ ixĩxü̃ —nhanagürü ga Ngechuchu.  Rü Ngechuchu rü duü̃xü̃gümaã nüxü̃ nixu ga jema ore ga cua̱xruü̃, notürü ga nümagü rü tama nüxü̃ nacua̱xgüéga ga ṯacüchiga na jiĩxü̃. Ngechuchu rü carneruarü daruü̃ ja mecü nixĩ  Rü jexguma ga Ngechuchu rü wenaxãrü nhanagürü nüxü̃: —Aixcuma pemaã nüxü̃ chixu rü chama nixĩ i carnerupǘxü̃ãrü ĩã̱x i nawa jachocuxü̃xü̃ i carnerugü.  Guxü̃ma ga jema chauxü̃pa núma ĩxü̃ rü ngĩ́ta̱a̱xgüxü̃ rü máẽtagüxü̃ nixĩgü. Notürü jema carnerugü rü tama naga naxĩnüẽ.  Chama nixĩ i ĩã̱x. Rü texé ja chawa ixücuxe rü tá tamaxü̃. Rü meãma tá tüxü̃ naxüpetü ngẽxgumarüü̃ i wüxi i carneru i naxpǘxü̃gu ücuxü̃ rü íxũxũxü̃xü̃ rü nüxü̃ ijaṉg̱aucü ja mecü ja maxẽ. 10  Ngẽma ngĩ́ta̱xáxü̃ rü núma naxũ na jangĩ́xü̃ca̱x rü namáẽtaxü̃ca̱x rü nachixexẽẽãxü̃ca̱x. Rü ngẽmaca̱xicatama núma naxũ. Notürü i chama rü núma chaxũ na chanamaxẽxẽẽxü̃ca̱x i duü̃xü̃gü rü na aixcuma nüxü̃́ nangẽxmaxü̃ca̱x i maxü̃ i taguma gúxü̃. 11  Chama nixĩ i carneruarü daruü̃ ja mecü chiĩxü̃. Erü wüxi i carneruarü daruü̃ ja mecü rü norü carnerugüxü̃ ínapoxü̃ rü nhu̱xmata naxca̱x naju̱x. 12  Notürü ngẽma dĩẽruca̱xmare puracüxü̃, rü ega ngẽxguma aixü̃ nada̱xgux rü carnerugüna ngẽ́ma ninha. Rü ngẽmaãcü nanaxü erü tama aixcuma norü daruü̃ nixĩ i nümax, rü tama noxrü nixĩ i ngẽma carnerugü. Rü ngẽma ai rü carnerugüxü̃ ínajauxü̃ rü ngẽxma tüxü̃ naxüanexẽẽmare. 13  Rü ngẽma jatü rü ninha, erü norü dĩẽruca̱xicatama ngẽ́ma napuracü. Rü tama aixcuma carnerugügu narüxĩnü. 14  10:14-15 Chama nixĩ i carnerugüarü daruü̃ ja mecü chiĩxü̃. Rü ngẽxgumarüü̃ ja Chaunatü na choxü̃ nacuáxü̃ rü chama rü Chaunatüxü̃ na chacuáxü̃, rü ngẽxgumarüü̃ ta nüxü̃ chacua̱x i chorü carnerugü, rü nümagü rü choxü̃ nacua̱xgü. Rü chama rü naxca̱x chaju i chorü carnerugü. 15  Nüü̃ nadau 10:14 16  Rü choxü̃́ nangẽxmagü ta i togü i carnerugü i tama nhaã naxpǘxü̃wa ngẽxmagüxü̃. Rü ngẽmagü rü tá ta nuã chanagagü, rü tá chauga naxĩnüẽ. Rü wüxitücumü tátama nixĩ rü chama tátama nixĩ i norü daruü̃ chiĩxü̃. 17  Chaunatü rü choxü̃ nangechaü̃, erü chorü carnerugüca̱x chaju rü wena táxarü chamaxü̃. 18  Taxúema choxü̃ tajuxẽẽ, notürü chamatama chorü ngúchaü̃maãtama ichanaxã i chorü maxü̃. Erü cha̱xme̱xwa nangẽxma na ichanaxãxü̃ca̱x, rü wena na chanajaxuxü̃ca̱x, jerü jemaãcü choxü̃ namu ga Chaunatü —nhanagürü. 19  Rü jexguma jema orexü̃ naxĩnüẽgu ga jema Judéugüarü ãẽ̱xgacügü rü wenaxãrü nügü nitoje ga jema nagu naxĩnüẽxü̃wa. 20  Rü muxü̃ma ga nümagü rü nhanagürügü: —¿Tü̱xcüü̃ nüxü̃́ iperüxĩnüẽ i nhaã jatü i ngẽãẽxü̃ i ṉg̱oxo nawa ngẽxmaxü̃? —nhanagürügü. 21  Notürü ga togü rü nhanagürügü: —Taxuü̃ma i jatü i ṉg̱oxo nawa ngẽxmaxü̃ rü nhaãrüü̃ meã nidexa. ¿Nhuxãcü i wüxi i jatü i ṉg̱oxo nawa ngẽxmaxü̃ rü tüxü̃ narümexẽtüxẽẽ ja wüxi ja ngexetüxe? —nhanagürügü. Judéugüarü Ãẽ̱xgacügü rü Ngechuchuxü̃ naxoe 22  Rü nawa nangu ga jema peta ga gucü ga taunecügu norü tupauca ga taxü̃neca̱x naxügüxü̃ ga Judéugü na nüxna nacua̱xãchigüxü̃ca̱x ga jema ngunexü̃ ga nagu janguxü̃ ga guma tupauca. Rü nagáuane ga Jerucharéü̃wa ga jexguma. 23  Rü guma tupauca ga taxü̃newa najexma ga wüxi ga chopetüchica ga Charumáũãrü Chopetüchicagu ãẽ́gaxü̃. Rü jemagu najarüxũũxü̃ ga Ngechuchu. 24  Rü ga jema Judéugüarü ãẽ̱xgacügü rü nüxü̃ ínachomaẽguãchi, rü nhanagürügü nüxü̃: —¿Nhuxguratáta tomaã cuixaixcuma na cugü cuixuxü̃ na texé na cuiĩxü̃? Ega aixcuma cuma rü Cristu cuixĩgu, rü ¡meã noxtacüma tomaã nüxü̃ ixu! —nhanagürügü. 25  Rü Ngechuchu nanangãxü̃, rü nhanagürü nüxü̃: —Marü pemaã nüxü̃ chixu, notürü i pema rü tama choxü̃́ pejaxõgü. Guxü̃ma i ṯacü i chaxüxü̃ rü Chaunatüarü poramaã nixĩ i chanaxüxü̃, rü ngẽmawa meãma pexü̃ nüxü̃ chadauxẽẽ na chama rü Cristu na chiĩxü̃. 26  —Notürü pema rü tama pejaxõgü, erü tama chorü carnerugütanüxü̃ peixĩgü. 27  —Chorü carnerugü rü nüxü̃ nacua̱x i chauga, rü chama rü chorü carnerugüxü̃ chacua̱x, rü nüma rü chawe narüxĩ. 28  —Rü chama rü nüxna chanaxã i maxü̃ i taguma gúxü̃. Rü nümagü rü tagutáma inajarütauxe, rü taxúetáma choxna tanapuxü̃ i cha̱xme̱xwa. 29  —Rü jíxema Chaunatü choxna tüxü̃ mugüxe ja chorü carnerugü, rü guxü̃ãrü jexera tixĩ i nape̱xewa. Rü taxúema texé nüxna tüxü̃ tapuxü̃. 30  —Chaunatü rü chama rü wüxitama tixĩgü —nhanagürü. 31  Rü jexguma ga jema Judéugüarü ãẽ̱xgacügü rü wenaxãrü nutane nanajauxgü na gumamaã Ngechuchuxü̃ ínamuxũchigüxü̃ca̱x. 32  Notürü ga Ngechuchu rü nhanagürü nüxü̃: —Pepe̱xewa chanaxü i muxü̃ma i mexü̃gü i Chaunatüarü poramaã chaxüxü̃. ¿Rü ngẽxü̃rüüxü̃ i ngẽma mexü̃ i chaxüxü̃ca̱x nixĩ i choxü̃ nutamaã ípemuxũchigüchaü̃xü̃? —nhanagürü. 33  Rü jema Judéugüarü ãẽ̱xgacügü rü Ngechuchuxü̃ nangãxü̃gü, rü nhanagürügü: —Tama wüxi i puracü i mexü̃ca̱x cuxü̃ ítamuxũchigüchaü̃. Notürü cuxü̃ ítamuxũchigüchaü̃ erü Tupanamaã rü ṯacü cuixugü. Cuma rü wüxi i duü̃xü̃mare cuixĩ rü cugü Tupanaxü̃ cuixĩxẽẽchaü̃ —nhanagürügü. 34  Rü nüma ga Ngechuchu rü nhanagürü nüxü̃: —Perü mugüpanewa rü naxümatü i Tupanaãrü ore i nhaxü̃:“Rü pematama nixĩ i tupanagü peixĩgüxü̃”, nhaxü̃. 35  —Rü ngẽma Tupanaãrü ore i ümatüxü̃wa nüxü̃ jaxuxü̃, rü nüxü̃ tacua̱x rü taxucürüwama texé itajanaxoxẽẽ. Rü ngẽma orewa rü Tupana rü nhanagürü:“Guxãma ja jíxema texé janajauxgüxe i chorü ore rü tupanagü tixĩgü”, nhanagürü i ngẽma orewa. 36  —Rü Tupana choxü̃ najaxu na chanaxüxü̃ca̱x i norü puracü, rü jemaca̱x nhama ga naãnewa choxü̃ namu. ¿Rü nhuxãcü i pema nagu perüxĩnüẽgu rü chixexü̃ Tupanamaã chaxüxü̃ i ngẽxguma Tupana Nane chixĩ —nhachagu pemaã? 37  —Rü ngẽxguma chi tama chanaxü̱xgu i ngẽma mexü̃ i Chaunatü üxü̃, rü marü name ega woo tama choxü̃́ pejaxõgügu. 38  —Notürü ngẽxguma chanaxü̱xgu i ngẽma Chaunatü üxü̃, rü woo tama choxü̃́ pejaxõgügu, rü chanaxwa̱xe i nüxü̃́ pejaxõgü i ngẽma taxü̃ i mexü̃gü i Chaunatüarü poramaã chaxüxü̃. Erü ngẽmawa tá nüxü̃ pecua̱x na Chaunatü rü chawa nangẽxmaxü̃ rü chama i nawa —nhanagürü. 39  Rü wenaxãrü Ngechuchuxü̃ nijauxgüchaü̃ ga jema Judéugüarü ãẽ̱xgacügü. Notürü nüma ga Ngechuchu rü naxchaxwa ninha. 40  Rü jexguma ga Ngechuchu rü natü ga Judã́ũãrü tocutüca̱x tomaã nataegu. Rü jema nachica ga Juã́ũ duü̃xü̃güxü̃ ü̃paacü nawa íbaiü̃xẽẽxü̃gu tomaã narüxã̱ũ̱x. 41  Rü muxü̃ma ga duü̃xü̃gü rü Ngechuchuxü̃ ínajadaugü, rü nhanagürügü: —Juã́ũ rü taxuü̃ma ga taxü̃ ga mexü̃ ga cua̱xruü̃ naxü ga Tupanaãrü poramaã. Notürü guxü̃ma ga ore ga Juã́ũ tamaã nüxü̃ ixuxü̃ ga nhaã jatüchiga rü aixcuma nixĩ —nhanagürügü. 42  Rü jema nachicawa rü muxü̃ma ga duü̃xü̃gü rü Ngechuchuaxü̃́ najaxõgü.

Notas