2 Timúteu 1:1-18

1  Pa Timúteux, chama i Pauru nixĩ i cuxca̱x chanaxümatüxü̃ i nhaã popera. Rü choxü̃ nixĩ ga namuxü̃ ga Ngechuchu ja Cristu, jerü jemaãcü nanaxwa̱xe ga Tupana. Rü nüma choxü̃ namu na nüxü̃ chixuxü̃ca̱x na nhuxãcü tüxü̃́ nangẽxmaxü̃ i maxü̃ i taguma gúxü̃, ega aixcuma Ngechuchu ja Cristuaxü̃́ jaxõgügu.  Cuxü̃ changechaü̃, Pa Chaune, Pa Timúteux. Rü chanaxwa̱xe ja Tanatü ja Tupana rü Ngechuchu ja Cristu ja tórü Cori na cuxü̃ nangü̃xẽẽgüxü̃ rü nüxü̃́ cungechaü̃tümüü̃güxü̃ rü cuxü̃ nataãẽxẽẽgüxü̃. Tama name i taxãne na Cristuchigaxü̃ ixuxü̃  Guxü̃guma i chütacü rü ngunecü rü cuxna chacua̱xãchixü̃ i chorü jumuxẽwa, rü poraãcü cuxca̱x moxẽ Tupanana chaxã. Rü nüxü̃́ nixĩ i chapuracüxü̃ i mexü̃ i chauãẽmaã, jexgumarüü̃ ga nuxcümaxü̃güxü̃ ga chorü o̱xigü naxügüxü̃rüü̃.  Chama rü nüxna chacua̱xãchi ga na nhuxãcü poraãcü chauxca̱x cungechaü̃xü̃ rü chauxca̱x cuxaxuxü̃ ga jexguma cuxna íchixũxgu. Rü wenaxãrü cuxü̃ chadauxchaü̃ na aixcuma chataãẽxü̃ca̱x.  Erü nüxna chacua̱xãchi na nhuxãcü meã aixcuma Tupanaãxü̃́ cujaxõxü̃. Rü curü noxẽ ga Roí rü cue ga Euníchia rü tüxira aixcuma meã Tupanaãxü̃́ tajaxõgü rü nüxü̃ chacua̱x i cuma rü ta na meãma nüxü̃́ cujaxõxü̃.  Rü ngẽmaca̱x cuxna nüxü̃ chacua̱xãchixẽẽ na cugü cuporaxẽẽxü̃ na jexeraãcü cunaxüamaxü̃ca̱x i ngẽma Tupanaãrü puracü ga naxca̱x cuxna naxããxü̃ ga cua̱x ga jexguma noxri cuxü̃ chingõgüãcüma cumaã chajumuxẽgu.  Erü ngẽma Naãẽ i Üünexü̃ i Tupana tüxna ãxü̃ rü tama nanaxwa̱xe na imuü̃ẽxü̃, notürü tüxü̃ naporaexẽẽ na aixcuma duü̃xü̃güxü̃ ingechaü̃güxü̃ca̱x rü meã jigümaã icuáxü̃ca̱x.  Rü tama chanaxwa̱xe na cuxãnexü̃ na nüxü̃ cuixuxü̃ i nachiga ja tórü Cori. Rü ngẽxgumarüü̃ ta tama chanaxwa̱xe i chauxca̱x cuxãne i ngẽma na chapocuxü̃ naxca̱x i Tupanaãrü ore. Rü name nixĩ i jaxna namaã cuxĩnü i ngẽma ngúxü̃ i cuxca̱x ínguxü̃ nagagu i ngẽma ore i mexü̃ i nüxü̃ cuixuxü̃. Rü Tupana tá cuxü̃ naporaxẽẽ.  1:9-10 Rü Tupana tüxü̃ namaxẽxẽẽ rü tüxü̃ nidexechi na naxca̱xicatama imaxẽxü̃ca̱x. Notürü tama ṯacü rü mexü̃ na ixüxü̃gagu nixĩ ga jemaãcü tamaã namecümaxü̃ ga Tupana. Notürü jemaãcü tüxü̃ narüngü̃xẽẽ jerü woetama jema nixĩ ga nanaxwa̱xexü̃ jerü Ngechuchu ja Cristugagu tüxü̃ nangechaü̃. Rü nüma ja Tupana ga tautama naãne ü̱xgumama tüxü̃ ngechaü̃cü, rü jexguma ínanguxgu ga tórü maxẽxẽẽruü̃ ga Ngechuchu ja Cristu, rü jexguma nixĩ ga Tupana tüxü̃ nüxü̃ dauxẽẽxü̃ na nhuxãcü poraãcü tüxü̃ nangechaü̃xü̃. Rü nüma ga Cristu nixĩ ga ijanaxoxẽẽãxü̃ na ijuxuchixü̃ jerü nüma rü juwa ínarüda rü wena namaxü̃. Rü norü orewa tüxü̃ nüxü̃ nacua̱xẽẽ na jixema rü ta tüxü̃́ nangẽxmaxü̃ i ngẽma maxü̃ i taguma gúxü̃ ega nüxü̃́ jaxõ̱xgu. 10  Nüü̃ nadau 1:9 11  Rü Tupana choxü̃ ningucuchixẽẽ na nüxü̃ chixuxü̃ca̱x i ngẽma norü ore i mexü̃. Rü choxü̃ namu na ngẽma oremaã chanangúexẽẽxü̃ca̱x i duü̃xü̃gü i guxü̃wama. 12  Rü ngẽmaca̱x nixĩ i poraãcü ngúxü̃ chingexü̃ rü chapocuxü̃ i nhu̱xmax. Notürü tama naxca̱x chaxãne i ngẽma, erü chama nüxü̃ chacua̱x na texéaxü̃́ chajaxõxü̃. Rü nüxü̃ chacua̱x na naporaxü̃ i nüma na nüxna nadauxü̃ca̱x i ngẽma puracü i choxna naxãxü̃ rü namaã inacuáxü̃ca̱x i chauãẽ i guxü̃gutáma nhu̱xmatáta ngẽma ngunexü̃ i nagu wena núma naxũxü̃. 13  Rü chanaxwa̱xe i meãma nagu cuixũ i ngẽma ngu̱xẽẽtae i mexü̃ ga chauxü̃tawa naxca̱x cungúxü̃. Rü name nixĩ i meã nüxü̃́ cujaxõõma ja Ngechuchu ja Cristu rü meã nüxü̃ cungechaü̃ i guxü̃ma i duü̃xü̃gü, erü Cristuarü duü̃xü̃ cuixĩ. 14  Rü name nixĩ i Tupanaãẽ i Üünexü̃ i tawa maxü̃xü̃ãrü ngü̃xẽẽmaã ícunapoxü̃ i ngẽma ngu̱xẽẽtae i mexü̃ i Tupana cuxna ãxü̃. 15  Cuma marü nüxü̃ cucua̱x rü guxü̃ma ga jema jaxõgüxü̃ ga Áchiaarü naãnewa ne ĩxü̃ rü marü choxna naxĩgü. Rü jematanüwa najexma ga Figueru rü Ermóquene. 16  Onesíferu rü muẽ̱xpü̱xcüna choxü̃ nataãẽxẽẽ, rü tama chauxca̱x naxãne i ngẽma na chapocuxü̃. Rü ngẽmaca̱x chanaxwa̱xe i tórü Coriaxü̃́ nangechaü̃tümüü̃gü i guxü̃ma i natanüxü̃gü. 17  Rü jexguma noxritama Romawa nanguxgu ga nümax, rü chauxca̱x nadauecha rü nhu̱xmata choxü̃ ijaṉg̱au. 18  Cuma meãma nüxü̃ cucua̱x ga nhuxãcü tüxü̃ na nangü̃xẽẽxü̃ ga Onesíferu ga Epéchiuarü ĩãnewa. Rü ngẽmaca̱x chorü jumuxẽwa naxca̱x íchaca na Tupanaãxü̃́ nangechaü̃tümüü̃xü̃ca̱x i ngẽxguma wena nhama i naãnewa naxũxgu ja tórü Cori ja Ngechuchu.

Notas