1 Corĩ́tiucü̃ãʼ 8:1-13

8  Nhu̱xma rü tá pemaã nüxü̃ chixu i nachiga i ngẽma õnagü i ngẽma duü̃xü̃gü i tama Ngechuchuaxü̃́ jaxõgüxü̃ norü tupananetachicüna̱xãgüna uaxü̃güxü̃. Rü aixcuma nixĩ i wüxichigü i jixema i meãma nüxü̃ icuáxü̃ i ngẽmachiga. Notürü ngẽma nüxü̃ na icuáxü̃gagu rü nhuxguacü rü jigü namaã ítarüta. Notürü ngẽma na jigü ingechaü̃xü̃ rü tüxü̃ narüngü̃xẽẽ na jexeraãcü meã jaxõgüchigüxü̃.  Rü ngẽxguma chi texé nagu rüxĩnügu na ṯacüxü̃ tacuáxü̃, rü name nixĩ i nüxna tacua̱xãchi na ngẽxguma rü ta tama aixcuma nüxü̃ tacuáxü̃ i guxü̃ma i ngẽma cua̱x i aixcuma ixĩxü̃.  Notürü ngẽxguma texé aixcuma Tupanaxü̃ ngechaü̃gu, rü Tupana rü tüxü̃ nacua̱x ja jíxema.  Rü ngẽma na nangṍxü̃ i ngẽma õnagü i tupananetachicüna̱xãgüna naxuaxü̃güxü̃ i duü̃xü̃gü, rü meãma nüxü̃ tacua̱x na taxuwama namexü̃ i ngẽma tupananetachicüna̱xãgü rü tama aixcuma Tupanaxü̃chi nixĩgü. Erü wüxixicatama nixĩ ja aixcuma Tupana ixĩcü, rü nataxuma ja naĩ.  Rü togü nüxü̃ ixugügügu rü nangẽxma i muxũchixü̃ i tupanagü i dauxü̃guxü̃ i naãnewa rü nhama i naãnewa.  Notürü jixema nüxü̃ tacua̱x na nangẽxmaxü̃ i wüxitama ja Tupana, rü jima nixĩ ja Tanatü ixĩcü. Rü nüma ja Tanatü nixĩ i naxüãxü̃ i guxü̃ma i ṯacü i ngẽxmaxü̃, rü naxca̱x nixĩ i imaxẽxü̃ i jixemax. Rü ngẽxgumarüü̃ ta nangẽxma i wüxitama ja tórü Cori ja Ngechuchu ja Cristu. Rü jimagagu nixĩ na nangẽxmaxü̃ i guxü̃ma, rü jimagagu nixĩ i tüxü̃́ nangẽxmaxü̃ i maxü̃.  Notürü tama guxü̃ma i jaxõgüxü̃ nüxü̃ nacua̱x na nangẽxmaxü̃ i wüxitama ja Tupana rü wüxitama ja tórü Cori. Rü nhuxre i nümagü ga ü̃pa rü nüxü̃ najapue na nüxü̃́ jaxõgüãxü̃ i ngẽma tupananetachicüna̱xãgü, rü nhu̱xma rü ta tama aixcuma nüxü̃ nacua̱xgü i ngẽma mexü̃ i Tupana nüxü̃́ naxwa̱xexü̃. Rü ngẽmaca̱x nixĩ i nhu̱xma i nagu naxĩnüẽxü̃ na chixexü̃ naxügüxü̃ i ngẽxguma nangõ̱xgüãgu i ngẽma naxü̃namachi i togü i duü̃xü̃gü norü tupananetachicüna̱xãgüna uaxü̃güxü̃ na nüxü̃ namaã jacua̱xüü̃güxü̃ca̱x.  Rü jixema nüxü̃ tacua̱x na tama ṯacü rü namachi na ingṍxü̃gagu jiĩxü̃ na Tupana tüxü̃ dexü̃. Rü tãũxü̃táma jexera time i nape̱xewa ega nangõ̱xgügu i ngẽma namachi. Rü tãũxü̃táma jexera tichixe i nape̱xewa ega tama nangõ̱xgügu.  Notürü i pema i nüxü̃ na pecuáxü̃ na tama pecadu jiĩxü̃ na nangṍxü̃ i ngẽma namachi, ¡rü pexuãẽgü erü ngürüãchi ngẽma na pengṍxü̃gagu chixexü̃gu tá penajixẽẽ i ngẽma peeneẽgü i taũta aixcuma meã nüxü̃ cua̱xgüxü̃ na ṯacü jiĩxü̃ i Tupana nüxü̃́ naxwa̱xexü̃! 10  Erü cuma na meã Tupanaxü̃ cucuáxü̃, rü ngẽxguma chi cunangõ̱xgu i ngẽma namachi i ngextá tupananetachicüna̱xãgüxü̃ íjacua̱xüü̃güxü̃wa, rü ngürüãchi wüxi i cueneẽ i taũta meã Tupanaxü̃ cuáxü̃ tá cuxü̃ nadau. Rü ngürüãchi nüma rü tá ta nanangõ̱x i ngẽma namachi woo naãẽwa nagu naxĩnügu na wüxi i chixexü̃ jiĩxü̃ na nangṍxü̃ i ngẽma namachi. 11  Rü ngẽmaãcü i cuma na meã Tupanaxü̃ cucuáxü̃, rü tá icujanatauxẽẽ i ngẽma cueneẽ i Cristu naxca̱x juxü̃ i taũta meã Tupanaxü̃ cuáxü̃. 12  Rü ngẽmaca̱x i ngẽxguma chixexü̃gu cunanguxẽẽ̱xgu i ngẽma cueneẽ i taũta meã Tupanaxü̃ cuáxü̃, rü Cristumaã rü ta chixexü̃ cuxü. 13  Rü ngẽmaca̱x i ngẽxguma ngẽma namachi i changṍxü̃gagu chixexü̃gu chananguxẽẽ̱xgu i chaueneẽ, rü narümemaẽ nixĩ i noxtacüma taguma namachi changõ̱x na tama pecadugu chananguxẽẽxü̃ca̱x i ngẽma chaueneẽ.

Notas