1 Corĩ́tiucü̃ãʼ 5:1-13

5  Rü duü̃xü̃gü nüxü̃ nixugügü rü wüxi i jatü i petanüwa rü naẽrücümaãtama naxãma̱x. Rü ngẽma nixĩ i pecadu i poraãcü chixexü̃chixü̃, erü woo ngẽma duü̃xü̃gü i tama jaxõgüxü̃tanüwa rü tama ngẽmaãcü nangupetü.  ¿Rü nhuxãcü i pema i ngẽxguma i pegü peicua̱xüü̃güamaxü̃? Rü narümemaẽ chi nixĩ na poraãcü pengechaü̃güxü̃. Rü ngẽma jatü i ngẽma chixexü̃ üxü̃ rü name nixĩ na ípenamuxũchixü̃ i petanüwa.  Rü woo tama petanüwa changẽxmagu i chamax, notürü guxü̃guma pegu charüxĩnü. Rü nhama pexü̃tawa changẽxmaxü̃rüü̃ rü tórü Cori ja Ngechuchu ja Cristuégagu pemaã nüxü̃ chixu na ṯacü tá namaã pexüxü̃ i ngẽma duü̃xü̃.  Rü name nixĩ i tórü Cori ja Ngechuchu ja Cristuégagu pengutaque̱xegü. Rü nüma ja tórü Cori ja Ngechuchu rü tá napetanügu na pexü̃ naporaexẽẽxü̃ca̱x. Rü chama rü tá pexna chacua̱xãchi i chorü jumuxẽwa.  Rü ngẽma norü pocu i tá nüxna pexãxü̃ i ngẽma jatü, rü ngẽma tá nixĩ na ípenamuxũchixü̃ i petanüwa na Chataná ngúxü̃ nüxü̃ ingexẽẽxü̃ca̱x. Rü ngẽmaãcü tá inajarüxo i naxü̃neãrü ngúchaü̃ i chixexü̃, notürü naãẽ rü tá namaxü̃ i ngẽxguma wena núma naxũxgu ja tórü Cori ja Ngechuchu.  ¡Rü tama name i pema rü pegü peicua̱xüü̃ naxca̱x i ngẽma pexüxü̃! ¿Tama e̱xna nüxü̃ pecua̱x i ngẽma ore i nhaxü̃: “Wüxi i íraxü̃ i põũãrü puxẽẽruü̃ rü taxü̃ma i põũchara nipuxẽẽ”, nhaxü̃?  Rü ngẽmaca̱x name nixĩ i nüxü̃ perüxoe i guxü̃ma i nuxcümaxü̃xü̃ i pecüma i pexü̃ chixexẽẽxü̃. Rü ngẽxguma ngẽmaãcü penaxü̱xgu, rü nhama ngexwacaxü̃xü̃ i põũ i ngearü puxẽẽruü̃ã́xü̃ i Üpetüchigaarü petawa ingṍxü̃rüü̃ tá peime. Rü nhu̱xma i pema rü aixcuma ngexwacaxü̃xü̃ i duü̃xü̃gü peixĩgü, jerü Cristu rü nhama wüxi i carnerurüü̃ marü tachicüü tórü pecaduca̱x naju.  Rü ngẽmaca̱x name nixĩ i nüxü̃ tarüxoe i nuxcümaxü̃xü̃ i tacüma i chixexü̃gü rü aixcuma Tupanagu tarüxĩnüẽ rü meã naxca̱x tamaxẽ, erü ngexwacaxü̃xü̃ i norü duü̃xü̃gü tixĩgü.  Nüxĩraü̃xü̃ ga chorü poperawa rü pemaã nüxü̃ chixu na tama natanügu pexãgüxü̃ i ngẽma duü̃xü̃gü i naĩ i ngemaã naxü̃neãrü ngúchaü̃ ügüxü̃. 10  Notürü na jema nhachaxü̃ pexü̃, rü tama pemaã nüxü̃ chixu na nüxna peixĩgachitanüxü̃chixü̃ i ngẽma duü̃xü̃gü i tama jaxõgüxü̃ i naĩ i ngemaã maxẽmarexü̃, rü e̱xna ngẽma duü̃xü̃gü i guxü̃ma i ṯacü nügüna nuãchigüchaü̃güxü̃, rü e̱xna ngĩ́ta̱a̱xgüxü̃, rü e̱xna ngẽma duü̃xü̃gü i tupananetachicüna̱xãxü̃ icua̱xüü̃güxü̃. Erü ngẽxguma chi naxchaxwa ípechoxü̃gu i ngẽma duü̃xü̃gü, rü chi taxucürüwa i nhama i naãnewa pengẽxmagü. 11  Notürü jexguma pemaã nüxü̃ chixuxgu na tama natanügu pexãgüxü̃ i ngẽma duü̃xü̃gü i chixri maxẽxü̃, rü nachiga chidexa i ngẽma duü̃xü̃gü i nügü ixugüxü̃ na peeneẽgü i jaxõgüxü̃ na jixĩgüxü̃ notürü naĩ i ngemaã maxẽ, rü e̱xna aüexü̃, rü e̱xna tupananetachicüna̱xãxü̃ icua̱xüü̃güxü̃, rü e̱xna oregüta̱a̱xgüxü̃, rü e̱xna ngãxẽwa̱xegüxü̃, rü e̱xna ngĩ́ta̱a̱xgüxü̃. Rü ngẽma duü̃xü̃gü nixĩ i pemaã nüxü̃ chixuxü̃ na tama namexü̃ na natanügu pexãgüxü̃ rü bai i namaã na pechibüexü̃. 12  5:12-13 Erü tama cha̱xme̱xwa nangẽxma na nüxna chac̱axü̃ i ngẽma duü̃xü̃gü i tama Tupanaãxü̃́ jaxõgüxü̃. Rü Tupana tá nixĩ ja nüxna c̱acü i ngẽma duü̃xü̃gü. Notürü i pema rü peme̱xwa nangẽxma na nüxna pec̱axü̃ i ngẽma peeneẽgü i jaxõgüxü̃ i tama meã maxẽxü̃. Rü name nixĩ na petanüwa ípenamuxũchixü̃ i ngẽma duü̃xü̃ i chixri maxẽchaxü̃. 13  Nüü̃ nadau 5:12

Notas