1 Corĩ́tiucü̃ãʼ 4:1-21

4  Rü ngẽmaca̱x tanaxwa̱xe i tomaã nagu perüxĩnüẽ na Cristuarü puracütanüxü̃mare na tixĩgüxü̃. Rü nüma nixĩ i toxü̃ namuxü̃ na pexü̃ tangúexẽẽxü̃ca̱x ga jema ore ga noxri Tupanaxĩcatama nüxü̃ cuáxü̃.  Rü ngẽxguma texé ṯacü rü puracü tüxü̃ üxẽẽgu, rü tanaxwa̱xe i aixcuma tajanguxẽẽ i ngẽma puracü i tüxna taxãxü̃ na ngẽmaãcü inawéxü̃ca̱x na aixcuma wüxi i duü̃xü̃ i mexü̃ ixĩxü̃.  Rü ngẽmaca̱x i nhu̱xma na meã chajanguxẽẽchaü̃xü̃ i ngẽma puracü i Tupana choxna ãxü̃, rü taxuü̃ca̱xma chaugüca̱x chaxoegaãẽ ega woo choxna pecagu rü e̱xna ṯacü rü ãẽ̱xgacügü choxna caxgu naxca̱x i ngẽma puracü i chaxüxü̃. Rü woo i chamatama rü taxuxü̃ca̱xma íchicua̱x na ngextá chixri chanaxüxü̃ i ngẽma puracü.  Notürü nhu̱xma na chamatama nagu charüxĩnüxü̃ na nataxuü̃ma i chorü chixexü̃ i Tupanape̱xewa, rü tama ngẽmaca̱x Tupana choxü̃ nadau na changearü pecaduã́xü̃. Erü nümatama ja tórü Cori ja Tupana nixĩ i aixcuma choxü̃ nacuáarü maxü̃ã́xü̃.  Rü ngẽmaca̱x tama name na texéxü̃ pengugüarü maxü̃ã́xü̃ naxü̃pa na núma naxũxü̃ ja tórü Cori. Notürü name nixĩ i meã nüxü̃ ípenaṉg̱uxẽẽ, erü nüma tá nixĩ i nango̱xẽẽãxü̃ i guxü̃ma i ngẽma nhu̱xma icúxü̃ rü guxü̃ma i ngẽma duü̃xü̃gü naãẽwa nagu rüxĩnüẽxü̃. Rü ngẽxguma tá nixĩ ja Tupana i tümamaã nataãẽxü̃ ja wüxichigü ja jíxema aixcuma mexü̃ ügüxe.  Pa Chaueneẽgüx, perü mexü̃ca̱x nixĩ i pemaã nüxü̃ tixuxü̃ i ngẽma ore na nhuxãcü Tupana naxwa̱xexü̃ na pemaxẽxü̃. Rü chama rü Aporu nixĩ i perü cua̱xruü̃gü tixĩgüxü̃ na towa pengúexü̃ na Tupanaãrü ore pemaã nüxü̃ ixuxü̃rüü̃ penaxüxü̃. Rü ngẽmaca̱x tama name na wüxi i perü ngu̱xẽẽtaexü̃maã petaãẽgüxü̃ rü to rü nüxü̃ pexoexü̃.  Rü nhu̱xma rü pexna chaca, ¿rü texé tixĩ ja jíxema togüarü jexera pexü̃ ixĩxẽẽ́xẽ? ¿Rü ṯacü rü cua̱x i pexü̃́ ngẽxmaxü̃ i tama Tupana nügüchiga pexna ãxü̃? Rü nhu̱xma na nüma pexna naxããxü̃ i ngẽma cua̱x ¿rü tü̱xcüü̃ pegü peicua̱xüü̃gü nhama pematama perü poramaã penajaxuxü̃rüü̃?  Rü pegügu perüxĩnüẽgu rü aixcuma marü meãma Tupanaxü̃ peicua̱xüchi rü marü pexü̃́ nangẽxma i guxü̃ma i ṯacü i penaxwa̱xexü̃ na naxü̃tawa pengugüxü̃ca̱x. Rü pegügu perüxĩnüẽgu rü ãẽ̱xgacügü i taxü̃rüü̃ peixĩgü rü taxuü̃ma i toxü̃tawa penaxwa̱xe i nhu̱xmax. ¡Chierü aixcuma Tupanape̱xewa ãẽ̱xgacügü peixĩgügu na toma rü ta wüxigu pemaã ãẽ̱xgacügü na tixĩgüxü̃ca̱x!  Rü toma na Ngechuchu toxü̃ imugüxü̃, rü chauxca̱x rü wixwe toxü̃ nawogü ja Tupana. Rü nhama pocuexü̃ i juewa ĩxü̃rüü̃ tixĩgü. Rü nhama wüxi i ṯacü i nüxü̃ nacugüexü̃rüü̃ tixĩgü i nape̱xewa i Tupanaãrü orearü ngeruü̃gü i dauxü̃cü̱̃ã̱x, rü nape̱xewa i nhama i naãnecü̱̃ã̱x i duü̃xü̃gü, rü nape̱xewa i guxü̃ma i ṯacü i Tupana üxü̃. 10  Rü nhu̱xma na Cristuwe tarüxĩxü̃, rü ngẽmaca̱x taxuü̃ma icuáxü̃ toxü̃ nawogü i duü̃xü̃gü, notürü i pema rü pegügu perüxĩnüẽgu rü guxü̃xü̃ma pecua̱x i Cristuchiga. Toma nüxü̃ tacua̱x na duü̃xü̃güpe̱xewa taturaexü̃, notürü i pema rü pegügu perüxĩnüẽ na aixcuma peporaexü̃. Rü duü̃xü̃gü toxü̃ naxo, notürü pexü̃ nangechaü̃gü. 11  Rü nhu̱xma rü ta tama inajacua̱x na ngúxü̃ tingegüxü̃, erü nhu̱xma rü ta taija toxü̃́ nangu̱x, rü tiṯawae, rü tangexchiru. Rü duü̃xü̃gü rü chixri tomaã nachopetü, rü tangepata. 12  Rü tipae na jeü̃cürü toxme̱xmaã tapuracüeechaxü̃. Rü duü̃xü̃gü rü ṯacü tomaã nixugüe, notürü i toma rü mexü̃ i oremaã tanangãxü̃gü. Rü towe ningẽxü̃tanü, notürü jaxna namaã taxĩnüẽ. 13  Rü chixexü̃maã tochiga nidexagü, notürü i toma rü meã nachiga tidexagü. Rü nhama guxchirexü̃ nadaugüxü̃rüü̃ãcüma tomaã namaxẽ, rü nhama i duü̃xü̃gü i taxuwama mexü̃rüü̃ tomaã nixĩgü. Rü nhu̱xma rü ta rü ngẽmaãcü tomaã namaxẽ. 14  Tama pexca̱x chanaxümatü i nhaã popera na pexü̃ chaxãneẽxẽẽxü̃ca̱x. Notürü pexca̱x chanaxümatü na pexü̃ chixucu̱xẽgüxü̃ca̱x chauxacügüxü̃chirüü̃, erü pexü̃ changechaü̃. 15  Erü woo nangẽxmagu i muxü̃ma i perü ngu̱xẽẽruü̃gü i Cristuchiga pexü̃ ngúexẽẽxü̃, notürü chaxicatama nixĩ i penatü chiĩxü̃ ga Cristuxü̃ na pejaxuxü̃wa. Jerü chauxü̃tawa nixĩ ga noxri ga penajaxuxü̃ ga Ngechuchu ja Cristuarü ore i tüxü̃ maxẽxẽẽxü̃. Rü ngẽmaca̱x chaxicatama nixĩ i penatü chiĩxü̃ i perü õwa. 16  Rü ngẽmaca̱x pexü̃ chaca̱a̱xü̃ na chama chamaxü̃xü̃ãcüma meã na pemaxẽxü̃ca̱x. 17  Rü ngẽmaca̱x pexü̃tawa chanamu ja Timúteu ja poraãcü nüxü̃ changechaü̃cü ja chaune ixĩcü i tórü Coriarü orewa. Rü nüma rü aixcuma meã najanguxẽẽ i guxü̃ma i ngẽma nawa chanamuxü̃. Rü nüma tá pexna nüxü̃ nacua̱xãchixẽẽ na nhuxãcü Ngechuchu ja Cristu naxwa̱xexü̃ãcüma meã chamaxü̃xü̃ ngẽma guxü̃nema ja tupauca i íchixũgüxü̃wa chanangúexẽẽxü̃rüü̃. 18  Rü nhuxre i pemagü rü pegü peicua̱xüü̃gü, erü nagu perüxĩnüẽ na tãũxü̃táma pexü̃tawa íchajadauxü̃. 19  Notürü ngẽxguma nanaxwa̱xegu ja tórü Cori, rü paxa tá ngẽ́ma chaxũ na pexü̃ íchajadauxü̃ca̱x. Rü ngẽxguma rü tá chamaxü̃chi nüxü̃ chadau ngoxi aixcuma nüxü̃́ nangẽxma i Tupanaãrü pora rü e̱xna nidexagümare i ngẽma duü̃xü̃gü i nügü icua̱xüü̃güxü̃. 20  Erü Tupana ãẽ̱xgacü íjiĩxü̃wa rü tama dexagümare nixĩ notürü ngẽ́ma nangẽxma i pora. 21  ¿Rü nhu̱xma rü ṯacü e̱xna nixĩ i penaxwa̱xexü̃ i pemagü? ¿Penaxwa̱xe na pexü̃ chingagüxü̃ i ngẽxguma ngẽ́ma changuxgu, rü e̱xna penaxwa̱xe na pexü̃ changechaü̃ãcüma rü pemaã chamecümaãcüma pexü̃ na íchajadauxü̃?

Notas