1 Corĩ́tiucü̃ãʼ 2:1-16

2  Pa Chaueneẽgüx, jexguma noxri petanüwa chaxũxgu na pemaã nüxü̃ chixuxü̃ca̱x ga Tupanaãrü ore i aixcuma ixĩxü̃ i Cristuchiga, rü tama nhama nüxü̃ cua̱xü̃chixü̃rüü̃ãcüma pemaã chidexa, rü tama ore ga guxchaxü̃maã nixĩ ga pemaã nüxü̃ chixuxü̃.  Jerü jexguma petanüwa chajexmagu, rü Cristuchigaxü̃xĩcatama pemaã chixu. Rü taxuü̃ma ga ṯacü ga togu charüxĩnü. Rü jemaãcü Ngechuchu ja Cristu ga curuchawa ipotacüguxicatama nixĩ ga charüxĩnüxü̃.  Rü jexguma petanüwa chaxũxgu rü chauxca̱x rü nataxuma ga chorü pora, rü chorü muü̃maã pepe̱xewa chidu̱ru̱x.  Rü jexguma pemaã chidexagu rü pemaã nüxü̃ chixuxgu ga Tupanaãrü ore, rü tama nhama nüxü̃ cua̱xü̃chixü̃rüü̃ãcüma pemaã nüxü̃ chixu na jemaãcü pexü̃́ chanangúchaü̃xẽẽxü̃ca̱x na pejaxõgüxü̃ca̱x. Notürü Tupanaãẽ i Üünexü̃ãrü ngü̃xẽẽmaã rü Tupanaãrü poramaã nixĩ ga pexü̃́ chanangúchaü̃xẽẽxü̃.  Rü jemaãcü Tupanaãrü poramaã pemaã nüxü̃ chixu ga jema ore na Tupanagagu jiĩxü̃ na nüxü̃́ pejaxõgüxü̃, rü tama nhama i naãnecü̱̃ã̱x i duü̃xü̃güarü cuágagu na jiĩxü̃. Tupana rü Naãẽ i Üünexü̃wa nügü tüxü̃ nacua̱xẽẽ  Notürü pemaã nüxü̃ chixu, rü ngẽxguma natanüwa changẽxmagu i ngẽma duü̃xü̃gü i marü meãma jaxõgüxü̃, rü ngẽxguma nixĩ i chanangúexẽẽxü̃ i ngẽma aixcuma taxü̃ i cua̱x i maxü̃ i üünexü̃chiga ixĩxü̃. Notürü ngẽma cua̱x rü tama nhama i naãnewa ne naxũ, rü bai i nhama i naãneãrü ãẽ̱xgacügü i paxa tá ijarüxoxü̃wa ne naxũ.  Notürü ngẽma cua̱x rü Tupanawa nixĩ i ne naxũxü̃. Rü ngẽma cua̱x nixĩ ga noxri taũta naãne ü̱xgu Tupanaxĩcatama nüxü̃ cuáxü̃ ga na nhuxãcü tá tüxna naxããxü̃ i maxü̃ i taguma gúxü̃.  Notürü jema Tupana nagu rüxĩnüxü̃, rü taxuü̃ma ga nhama ga naãnecü̱̃ã̱x ga ãẽ̱xgacü nüxü̃ nacua̱x. Jerü jexguma chi aixcuma nüxü̃ nacua̱xgügu ga jema Tupana nagu rüxĩnüxü̃ rü tau chima curuchawa najapotagü ga guma mecü ja tórü Cori.  Notürü jema Tupanaãrü ore i ümatüxü̃ nüxü̃ ixuxü̃rüü̃ãcü nangupetü. Erü norü orewa rü nhanagürü:“Rü ngẽma duü̃xü̃gü i Tupanaxü̃ ngechaü̃güxü̃ca̱x, rü nüma nanamexẽẽ i ṯacü i taxúema nüxü̃ dauxü̃, rü taguma texé nüxü̃ ĩnüxü̃, rü bai i texé nagu rüxĩnüxü̃”, nhanagürü i norü orewa. 10  Rü ngẽma Tupana mexẽẽxü̃ naxca̱x i ngẽma duü̃xü̃gü i nüxü̃ ngechaü̃güxü̃, rü nhu̱xma rü tüxü̃ nüxü̃ nacua̱xẽẽ i ngẽma, jerü núma nanamu ga Naãẽ i Üünexü̃ na taxca̱x nango̱xẽẽãxü̃ca̱x. Rü ngẽma Naãẽ i Üünexü̃ rü guxü̃xü̃ma nacua̱x, rü a̱i̱xrüxü̃ i ngẽma Tupanaxĩcatama nüxü̃ cuáxü̃ rü ta nüxü̃ nacua̱x. 11  Rü duü̃xü̃gütanüwa rü ¿texé nüxü̃ tacua̱x na ṯacügu naxĩnüxü̃ ja wüxi ja jatü? Rü naãẽxĩcatama nixĩ i nüxü̃ cuáxü̃ i ngẽma nagu naxĩnüxü̃ i ngẽma jatü. Rü ngẽxgumarüü̃ ta Tupanaãẽ i Üünexü̃xĩcatama nixĩ i nüxü̃ cuáxü̃ na ṯacügu naxĩnüxü̃ ja Tupana. 12  Rü jixema rü tama nhama i naãnecü̱̃ã̱x i naãẽ nixĩ i ijauxgüxü̃. Notürü Naãẽ i Üünexü̃ ga Tupana núma muxü̃ nixĩ ga ijauxgüxü̃, na aixcuma nüxü̃ icuáxü̃ca̱x i guxü̃ma i ngẽma mexü̃gü ga Tupana norü ngechaü̃maã tüxna ãmarexü̃. 13  Rü nhu̱xma na pemaã nüxü̃ tixuxü̃ i ngẽmachiga, rü Tupanaãẽ i Üünexü̃ toxna ãxü̃ i oremaã nixĩ i pemaã nüxü̃ tixuxü̃. Rü tama ore i torü cua̱xwa tajaxuxü̃maã nixĩ i pemaã nüxü̃ tixuxü̃. Rü ngẽmaãcü nüxü̃ tixu i Tupanaãẽ i Üünexü̃ãrü ore namaã i ngẽma duü̃xü̃gü i aixcuma Tupanaãẽ nawa ngẽxmagüxü̃. 14  Rü texé ja tama Tupanaãẽ i Üünexü̃ tümawa ngẽxmaxẽ, rü taxucürüwa tanajaxu i ngẽma Tupanaãẽ i Üünexü̃ tüxü̃ ngu̱xẽẽxü̃, erü tümaca̱x ja jíxema duü̃xẽ rü notüca̱xmamare nixĩ. Rü tama nüxü̃ tacua̱xéga erü jíxema Tupanaãẽ i Üünexü̃ tümawa ngẽxmaxẽxĩcatama tixĩ ja nüxü̃ cuáxe na tanangugüxü̃ na nhuxũ nhaxü̃chiga jiĩxü̃ i ngẽma Tupanaãẽ i Üünexü̃ tüxü̃ ngu̱xẽẽxü̃. 15  Rü jíxema duü̃xẽ ja Tupanaãẽ i Üünexü̃ tümawa ngẽxmaxẽ, rü meã tanangugü i guxü̃ma. Notürü ngẽma togü i duü̃xü̃gü i tama Tupanaxü̃ cua̱xgüxü̃, rü taxucürüwama tümaãrü maxü̃xü̃ nangugü ja jíxema duü̃xẽ ja aixcuma Tupanaãẽ tümawa ngẽxmaxẽ. 16  Erü Tupanaãrü ore i ümatüxü̃wa rü nhanagürü:“¿Texé nüxü̃ tacua̱x na ṯacügu naxĩnüxü̃ ja tórü Cori? ¿Rü texé nüxü̃ tacua̱x na Tupanaxü̃ taxucu̱xẽxü̃?” nhanagürü. Notürü jixema nixĩ i aixcuma nüxü̃ icuáxü̃ i ngẽma Cristu nagu rüxĩnüxü̃.

Notas