1 Corĩ́tiucü̃ãʼ 13:1-13

13  Rü woo ngẽma chama tama nüxü̃ chacuáxü̃ i nagawa chidexagu, rü woo Tupanaãrü orearü ngeruü̃gü i dauxü̃cü̱̃ã̱xgawa chidexagu, notürü wüxi i ṯacü i ãgaxü̃rüü̃mare chixĩ ega tama chamücüxü̃ changechaü̃gu.  Rü woo nüxü̃ chacua̱xgu na meã duü̃xü̃gümaã nüxü̃ chixuxü̃ i Tupanaãrü ore, rü woo nüxü̃ chacua̱xgu i guxü̃ma i ṯacü i ẽxü̃guxü̃ i Tupanachiga, rü woo chamaã nanguxü̃gu na ngẽma chorü õmaã chajaxĩgachixẽẽxü̃ ja ma̱xpǘnegü, notürü taxuwama chame ega tama chamücüxü̃ changechaü̃gu.  Rü woo ngẽma duü̃xü̃gü i ngearü dĩẽruã̱xgüxü̃xü̃ chajanuxgu i guxü̃ma i ṯacü i choxü̃́ ngẽxmaxü̃, rü woo Tupanaãrü oreca̱x chaugü ichaxãxgu na üxüwa choxü̃ jagugüxü̃ca̱x, rü taxuwama choxü̃́ name i ngẽma ega tama chamücüxü̃ changechaü̃gu.  Rü jíxema tümamücüxü̃ ngechaü̃xẽ, rü jaxna namaã taxĩnü, rü namaã tamecüma. Rü tama tixãũxãchiwa̱xe, rü tama tügü ítarüta, rü tama tügü ticua̱xüü̃.  Rü jíxema tümamücüxü̃ ngechaü̃xẽ, rü tama taguxchigawa̱xe, rü tama tügüguxicatama tarüxĩnü, rü tama tanuxwa̱xe, rü tama nagu tarüxĩnüẽcha ega texé chixexü̃ tümamaã ü̱xgu.  Rü tama namaã tataãẽ i chixexü̃gü, notürü namaã tataãẽ i ngẽma ore i aixcuma ixĩxü̃.  Rü jíxema aixcuma tümamücüxü̃ ngechaü̃xẽ, rü jaxna namaã taxĩnü, rü guxü̃guma nüxü̃́ tajaxõ, rü guxü̃guma mexü̃gu namaã tarüxĩnü, rü taguma nachi taxai woo ṯacü tümamaã naxü̱xgu i tümamücü.  Rü ngẽma jigü na ingechaü̃xü̃ rü tagutáma inajacua̱x. Notürü ngẽma na nüxü̃ ixuxü̃ i Tupanaãrü ore rü wüxi i ngunexü̃gu tá inajacua̱x. Rü ngẽma tama nüxü̃ icuáxü̃ i nagawa na idexaxü̃, rü tá ta inajacua̱x. Rü ngẽma nhu̱xma nüxü̃ icuáxü̃ rü wüxi i ngunexü̃gu rü marü taxuwatáma tüxü̃́ name.  Erü ngẽma tórü cua̱x i nhu̱xma tüxü̃́ ngẽxmaxü̃, rü Tupanape̱xewa rü naxíra. Rü ngẽxgumarüü̃ ta i ngẽma norü orexü̃ na ixuxü̃, rü wüxi i íramarexü̃tama nixĩ. 10  Rü guxü̃ma i ngẽma rü tá inajarüxo i ngẽxguma Tupanape̱xewa ingugügu rü nüma guxü̃xü̃ma tüxü̃ nacua̱xẽẽgu. 11  Jexguma chabuxgu ga chamax, rü wüxi ga buxü̃rüü̃ chidexa, rü buxü̃ nagu rüxĩnüxü̃gu charüxĩnü, rü tama meã chauãẽxü̃ chacua̱x. Notürü jexguma marü chaja̱xgu, rü nüxü̃ charüxo ga guxü̃ma ga jema chorü bucüma. 12  Rü ngẽma nhu̱xma nüxü̃ idauxü̃ i Tupanachiga, rü nhama wüxi ja worua ja üxachametüxewa jigü idauxü̃rüü̃ nixĩ na taxca̱x naxẽxü̃. Notürü jixcüra rü tá aixcuma meã nüxü̃xü̃chi tadau ja Tupana. Rü nhu̱xma rü íraruwatama nüxü̃ chacua̱x i Tupanachiga. Notürü wüxi i ngunexü̃gu rü tá meã nüxü̃ chacua̱x i guxü̃ma i nachiga, ngẽma na Tupana meãma choxü̃ cuáxü̃rüü̃. 13  Rü nhu̱xma rü nangẽxma i tamaẽ̱xpü̱x i nacümagü i guxü̃guca̱x ixĩxü̃. Rü ngẽma nixĩ: 1 Rü Tupanaãxü̃́ tajaxõgü 2 Rü nüxü̃ ítanaṉg̱uxẽẽ na nataeguxü̃ ja Cristu 3 Rü nüxü̃ tacua̱x na tamücüxü̃ ingechaü̃xü̃. Notürü ngẽma tamaẽ̱xpü̱xtanüwa rü ngẽma guxü̃ãrü jexera ixĩxü̃, rü ngẽma nixĩ na tamücüxü̃ ingechaü̃xü̃.

Notas