1 Corĩ́tiucü̃ãʼ 11:1-34

11  Rü name nixĩ i nagu pexĩ i chaucüma ngẽxgumarüü̃ i chama na Cristucümagu chixũxü̃rüü̃. Nhuxãcü meã nügümaã inacua̱xgü i ngexü̃gü i ngutaque̱xegüwa  Pa Chaueneẽgüx, pemaã chataãẽ erü guxü̃guma chagu perüxĩnüẽ rü nagu pexĩ ga jema ngu̱xẽẽtae ga pexü̃ changúexẽẽxü̃.  Notürü chanaxwa̱xe i nüxü̃ pecua̱x na Cristu rü wüxichigü i jatüeru na jiĩxü̃. Rü jatüxü̃gü rü naxma̱xẽru nixĩgü ngẽxgumarüü̃ ja Tupana rü Cristueru na jiĩxü̃.  Rü ngẽmaca̱x i ngẽxguma wüxi ja jatü ngutaque̱xewa jumuxẽgu rü e̱xna Tupanaãrü orexü̃ jaxuxgu, rü tama ínanga̱xüchipate̱xegu, rü ngẽma rü wüxi i chixexü̃ nixĩ i Cristupe̱xewa naxüxü̃.  Notürü ngẽxguma chi wüxi i ngecü ngutaque̱xewa jumuxẽgu rü e̱xna Tupanaãrü orexü̃ jaxuxgu, rü chi tama ngĩgü natüerugu, rü ngẽma rü wüxi i chixexü̃ nixĩ i ngĩtepe̱xewa naxüxü̃. Rü nhama ngĩgü jadüeruxü̃rüü̃ ijixĩ.  Erü ngẽxguma chi tama ngĩgü natüeruchaü̃gu, rü narümemaẽ nixĩ i noxtacüma ngĩgü iba̱i̱xeru. Notürü ngẽxguma chi wüxi i ngĩrü ãne jixĩgu i ngẽma na ngĩgü naba̱i̱xeruxü̃ rü e̱xna ngĩgü jadüeruxü̃, rü narümemaẽ nixĩ i ngĩgü itüeru.  Notürü jatügü rü tama name na nügü natüerugüxü̃. Jerü ga Tupana rü nügüraü̃ãcü nanaxü ga jatü rü Tupanachipeta nixĩ. Rü jima jatüwa nixĩ i nangóxü̃ na nhuxãcü namexẽchixü̃ ja Tupana. Rü ngẽma ngecüwa nixĩ i nangóxü̃ na nhuxãcü namexü̃ ja jatü.  Jerü jexguma noxri Tupana naxü̱xgu ga jatü, rü tama ngecüwa nixĩ ga naxüãxü̃. Rü ngĩma waxi nixĩ ga jatüwa ngĩxü̃ naxüxü̃.  Rü jatüca̱x nixĩ ga Tupana ngĩxü̃ üxü̃ ga ngecü, rü tama ngecüca̱x nixĩ ga Tupana naxüxü̃ ga jatü. 10  Rü ngẽmaca̱x name nixĩ i ngĩgü itüeru na duü̃xü̃güpe̱xewa rü Tupanaãrü orearü ngeruü̃gü i dauxü̃cü̱̃ã̱xgüpe̱xewa nangóxü̃ca̱x na ngĩteme̱xẽwa nangẽxmaxü̃. 11  Notürü Tupanape̱xewa rü taxuü̃ma nixĩ ja jatü ega natau̱xgu i ngecü. Rü ngẽxgumarüü̃ ta i ngecü rü taxuü̃ma ijixĩ ega natau̱xguma ja jatü. 12  Jerü jexguma noxri Tupana ngĩxü̃ ü̱xgu ga ngecü, rü jatüwa nixĩ ga ngĩxü̃ naxüxü̃. Rü ngẽxgumarüü̃ ta ja jatü rü ngecüwa nixĩ i nabuxü̃. Notürü Tupana nixĩ ja naxücü i guxü̃ma i duü̃xü̃gü. 13  Rü pematama tá penangugü rü ngoxi name na wüxi i ngecü rü tama ngĩgü natüeruãcüma najumuxẽxü̃. 14  Rü woetama tórü bucüma nixĩ i nüxü̃ na icuáxü̃ na wüxi i ãne jiĩxü̃ na nügü nama̱xjaexẽẽxü̃ i wüxi i jatüxü̃. 15  Notürü ngecüca̱x rü wüxi i mexẽchixü̃ nixĩ na nama̱xjaexü̃. Erü Tupana rü ngĩxna nanaxã i ngĩjae na ngẽmamaã ngĩgü natüeruxü̃ca̱x. 16  Notürü ngẽxguma chi texé ngẽmachiga tügü choxü̃gagügu, rü name nixĩ i nüxü̃ tacua̱x na ngẽmatama jiĩxü̃ i tacüma rü nacüma i guxü̃ma i jaxõgüxü̃ i guxü̃nema ja tupaucagüwa. Duü̃xü̃gü rü chixri namaã inacua̱xgü ga Coriarü õna i üünexü̃ 17  Rü nhu̱xma i nhaã popera i pexca̱x chaxümatüxü̃wa rü pemaã nüxü̃ chixu rü nangẽxma i wüxi i pecüma i chixexü̃ i tama namaã chataãẽxü̃. Erü chauxca̱x i ngẽma perü ngutaque̱xegü rü pexü̃ nachixexẽẽ, rü tama aixcuma perü meruü̃gü nixĩgü. 18  Erü duü̃xü̃gü chamaã nüxü̃ nixugügü rü ngẽxguma tórü Corica̱x pengutaque̱xegüü̃xgu rü pegü peitoje. Rü ngãxü̃gu chajaxõ na aixcuma jiĩxü̃ i ngẽma nüxü̃ jaxugügüxü̃. 19  Chama rü nüxü̃ chacua̱x na aixcuma woe tátama jiĩxü̃ i pegü peitojexü̃ na ngẽmawa nüxü̃ icuáxü̃ca̱x na texégü tiĩxü̃ ja jíxema aixcuma Cristuarü duü̃xü̃gü ixĩgüxe. 20  Rü ngẽma pegü na peitojexü̃gagu nixĩ na tama aixcuma tórü Corixü̃ peicua̱xüü̃güãcüma jiĩxü̃ i penangṍxü̃ i tórü Coriarü õna i Üünexü̃ i ngẽxguma pengutaque̱xegüxü̃gu. 21  Erü ngẽxguma penangõ̱xgu i ngẽma õna i Üünexü̃ rü wüxichigü rü penhuxãẽgü na pexira na penajaxuxü̃ca̱x i ngẽma õna. Rü joxni i ngẽma togü rü ngẽxma nataijae, rü togü rü najaxaxgü ja wĩũ nhu̱xmata nangãxẽ. 22  ¿E̱xna pengechiü̃gü eca̱x tama ngẽ́ma pechibüexü̃ rü pexaxegüxü̃? ¿Tü̱xcüü̃ nüxü pexoe i ngẽma togü i jaxõgüxü̃ rü penaxãneẽxẽẽ i ngẽma jaxõgüxü̃ i ngearü ngẽmaxü̃ã̱xgüxü̃? ¿Rü ṯacüxü̃ tá pemaã chixu i nhu̱xmax? ¿Pexca̱x rü tá pemaã chataãẽxü̃? Dücax, pemaã nüxü̃ chixu rü tama pemaã chataãẽ naxca̱x i ngẽma pexügüxü̃. Tórü Coriarü õna i üünexü̃chiga 23  Jerü tórü Corixü̃tawatama chanajaxu ga jema ngu̱xẽẽtae ga pemaã nüxü̃ chixuxü̃. Rü jexguma bexma tórü Cori ga Ngechuchuxü̃ ínaxuaxü̃gu, rü jematama chütaxü̃gu rü tórü Cori nanajaxu ga wüxi ga põũ. 24  Rü Tupanana moxẽ naxca̱x naxã, rü jemawena rü inanabücu, rü nhanagürü: “Nhaã nixĩ i chaxune i pexca̱x ichaxãxü̃chiga. ¡Rü penangṍ i nhaã põũ na ngẽmaãcü peãẽwa choxna pecua̱xãchiexü̃ca̱x!” nhanagürü. 25  Rü jexgumarüü̃ ta ga chibüwena rü Ngechuchu nanajaxu ga wüxi ga copu ga wĩũchiümaã ããcuxü̃, rü nhanagürü: “Rü daa wĩũ rü wüxi i cua̱xruü̃ nixĩ na ngexwacax Tupana duü̃xü̃gümaã ixunetaxü̃ i maxü̃ i taguma gúxü̃chiga. Rü chaugü ja pexca̱x ibacümaã nixĩ i Tupana pexü̃ nüxü̃ cua̱xẽẽxü̃ i ngẽmachiga. Rü ngẽxguma nhuxguacü daa wĩũ peixaxgügu rü nhu̱xma chama na chanaxüxü̃rüü̃ tá penaxü na peãẽwa choxna pecua̱xãchiexü̃ca̱x”, nhanagürü ga Ngechuchu. 26  Rü guxü̃guma i ngẽxguma penangõ̱xgu i nhaã põũ rü pejaxaxgügu ja daa wĩũ rü ngẽmawa tá duü̃xü̃güxü̃ nüxü̃ peicua̱xẽẽ na nhuxãcü tórü pecaduca̱x najuxü̃ ga tórü Cori. Rü ngẽmaãcü tá penaxü nhu̱xmatáta wena nataegu i nümax. Nhuxãcü nixĩ i namexü̃ na nangṍxü̃ i tórü Coriarü õna i üünexü̃ 27  Rü ngẽxguma chi ngexerǘxe ja duü̃xẽ rü tachixearü maxü̃ã̱xãcüma tanangõ̱xgu i nhaã põũ rü e̱xna tajaxaü̱xgu ja daa wĩũ, rü wüxi i chixexü̃ taxü namaã i naxü̃ne rü nagü ja tórü Cori. 28  Rü ngẽmaca̱x naxü̃pa na tanangṍxü̃ i ngẽma põũ rü na tajaxaxüxü̃ ja jima wĩũ, rü name nixĩ i wüxichigü meã tügü tangugü ngoxi nataxuma i ṯacü rü chixexü̃ i tümaãrü maxü̃wa. 29  Erü ngẽxguma chi tanangõ̱xgu rü tajaxaü̱xgu rü tama meã nagu tarüxĩnügu na tórü Corixü̃nechiga jiĩxü̃ i ngẽma, rü tügütama pocuwa taga i ngẽxguma tanangõ̱xgu rü tajaxaü̱xgu. 30  Rü ngẽmaca̱x nixĩ i muxũchixe i petanüwa rü peiḏaaweexü̃ rü peturaexü̃, rü nhuxre i togü rü marü najuexü̃. 31  Notürü ngẽxguma chi jigütama ingugügu naxü̃pa na nangṍxü̃ i ngẽma õna, rü tórü Cori rü taxuü̃ca̱x chima tüxü̃ napocue. 32  Notürü ngẽxguma tórü Cori nhama i tórü maxü̃wa tüxü̃ pocugu, rü ngẽmaãcü tüxü̃ inajarüwe̱xãchixẽẽ na tama jixcüra naãneãrü gu̱xgu tüxü̃ napocuxü̃ca̱x wüxigu namaã i ngẽma duü̃xü̃gü i tama jaxõgüxü̃. 33  Rü ngẽmaca̱x, Pa Chaueneẽgüx, rü ngẽxguma pengutaque̱xegügu na penangṍxü̃ca̱x i ngẽma õna i üünexü̃, rü name nixĩ i pegü ípenaṉg̱uxẽẽ na guxãma wüxigu meã penangṍxü̃ca̱x. 34  Rü ngẽxguma chi texé taija̱xgu, rü name nixĩ i tümapatawatama tachibü na tama Tupana pexü̃ pocuexü̃ca̱x naxca̱x na chixexü̃ pexüexü̃ i perü ngutaque̱xegüwa. Rü ngẽma to i guxchaxü̃gü i pexü̃́ ngẽxmaxü̃, rü chama tá chanamexẽẽ i ngẽxguma petanüwa chaxũxgu.

Notas