1 Corĩ́tiucü̃ãʼ 1:1-31

1  1:1-2 Pa Chaueneẽgü i Corĩ́tiucü̱̃ã̱xgüx, chama i Pauru rü namaã i taeneẽ i Chótene nixĩ i pexca̱x tanaxümatüxü̃ i nhaã popera. Rü Tupana nixĩ ga choxü̃ jaxucü na Ngechuchu ja Cristu choxü̃ imuxü̃ na duü̃xü̃gümaã nüxü̃ chixuxü̃ca̱x i norü ore. Pa Chaueneẽgü ja Tupanaãrü Ixĩgüxe, pema rü marü Tupanape̱xewa peixüüne jerü Ngechuchu ja Cristu marü pexü̃ nixüünexẽẽ. Rü Tupana rü marü pexü̃ nade na norü duü̃xü̃gü peixĩgüxü̃ca̱x wüxigu namaã i guxü̃ma i ngẽma duü̃xü̃gü i guxü̃wama tórü Cori ja Ngechuchu ja Cristuxü̃ icua̱xüü̃güxü̃. Rü nüma ja Ngechuchu ja tórü Cori ixĩcü, rü ngẽma duü̃xü̃güarü Cori ta nixĩ.  Nüü̃ nadau 1:1  Rü chanaxwa̱xe ja Tanatü ja Tupana rü tórü Cori ja Ngechuchu ja Cristu poraãcü pexü̃ narüngü̃xẽẽ rü pexü̃ nataãẽxẽẽ. Tupana tüxü̃ narüngü̃xẽẽ erü Cristuarü duü̃xü̃gü tixĩgü  1:4-5 Rü guxü̃guma pexca̱x Tupanana moxẽ chaxã, jerü Ngechuchu ja Cristugagu Tupana poraãcü pexü̃ narüngü̃xẽẽ, rü pexna nanamu ga Naãẽ i Üünexü̃ na guxü̃gutáma pemaã inaxã́ũxü̃ca̱x. Rü jima Cristugagu pexü̃́ nanatauxchaxẽẽ na nüxü̃ peixuxü̃ca̱x i norü ore, rü pexna nanaxã i cua̱x na meã ngẽma orexü̃ pecuáxü̃ca̱x.  Nüü̃ nadau 1:4  Rü jemaãcü ga jexguma nüxü̃ pexĩnüẽgu ga jema ore ga Cristuchiga rü aixcuma pejaxõgü.  Rü ngẽmaca̱x i nhu̱xma na ípenaṉg̱uxẽẽxü̃ na wena táxarü núma naxũxü̃ ja tórü Cori ja Ngechuchu ja Cristu, rü Tupana pexna nanaxã i taxü̃ i cua̱x na taxuü̃ma pexü̃́ taxuxü̃ca̱x na naxca̱x pemaxẽxü̃.  Rü ngẽmaãcü tá pexna nadau ja Tupana nhu̱xmatáta nagú i naãne, rü guxü̃gutáma pexü̃ naporaexẽẽ na aixcuma pejaxõgüamaxü̃ca̱x rü naxca̱x pemaxẽxü̃ca̱x, na taxúema chixexü̃maã pexü̃ ixugüxü̃ca̱x i ngẽxguma wenaxãrü núma naxũxgu ja tórü Cori ja Ngechuchu ja Cristu.  Rü Tupana rü guxü̃guma najanguxẽẽ i norü uneta. Rü nüma nixĩ ga pexü̃ jadexechixü̃ na aixcuma Nane ja tórü Cori ja Ngechuchu ja Cristumücügü peixĩgüxü̃ca̱x. Nügü nitoje ga jaxõgüxü̃ 10  Pa Chaueneẽgüx, tórü Cori ja Ngechuchu ja Cristuégagu pexü̃ chaca̱a̱xü̃ na wüxigu pegümaã perüxĩnüẽxü̃ rü tama pegü peitojexü̃ca̱x. Rü name nixĩ i aixcuma pegü pengechaü̃gü rü aixcuma wüxigutama perüxĩnüẽ i peãẽwa. 11  Pa Chaueneẽgüx, pemaã nüxü̃ chixu i ngẽma ore, jerü Cróetanüxü̃tanüwa nüxü̃ chacuáchiga ga pegümaã na penuẽxü̃, rü tama aixcuma wüxigu na perüxĩnüẽxü̃. 12  Rü pemaã nüxü̃ chixu i ngẽma erü nhuxre i pema rü: “Chama rü Pauruwe charüxũ”, nhaperügügü. Rü togue rü: “Chama rü Aporuwe charüxũ”, nhaperügügü. Rü togue rü: “Chama rü Pedruwe charüxũ”, nhaperügügü. Rü togue rü: “Chama rü Cristuwe charüxũ”, nhaperügügü. 13  ¿Rü nhuxãcü nixĩ i ngẽma? ¿Pexca̱x rü Cristu rü marü nijauxje? ¿E̱xna pema nüxü̃ pecua̱xgu rü chama i Pauru chiĩxü̃ ga curuchawa pexca̱x chipotaxü̃ rü chajuxü̃? ¿Rü e̱xna pema nüxü̃ pecua̱xgu rü chauégagu jiĩxü̃ ga ípebaiü̃xü̃? 14  Rü Tupanana moxẽ chaxã, jerü taxúema pexü̃ íchabaiü̃xẽẽ ga pemax. Rü Crispu rü Gajuxicatama nixĩ ga íchabaiü̃xẽẽxü̃. 15  Rü ngẽmaca̱x taxucürüwa texé tügü tixu na chauégagu ítabaiexü̃. 16  Rü jemáãcü aixcuma íchanabaiü̃xẽẽ ga Estéfanatanüxü̃gü ta, notürü chauxca̱x rü taxúema ga togue tüxü̃ íchabaiü̃xẽẽ. 17  Jerü nüma ga Cristu rü tama choxü̃ namu ga duü̃xü̃güxü̃ na íchabaiü̃xẽẽxü̃ca̱x, notürü choxü̃ namu na duü̃xü̃gümaã nüxü̃ chixuxü̃ca̱x i norü ore i mexü̃ i tüxü̃ maxẽxẽẽxü̃. Rü nanaxwa̱xe i tauxchaxü̃ i oremaã nüxü̃ chixu i ngẽma ore. Erü ngẽxguma chi nhama nüxü̃ cua̱xü̃chixü̃rüü̃ nüxü̃ chixuxgu i ngẽma ore, rü ngürüãchi i duü̃xü̃gü rü tá chaguama narüxĩnüẽ rü tá nüxü̃ inajarüngümaẽ na Cristu jiĩxü̃ ga tüxü̃ maxẽxẽẽcü ga jexguma curuchagu naju̱xgux. Cristuwa nixĩ ga Tupana inawéxü̃ ga norü pora rü norü cua̱x 18  Rü ngẽma ore na nhuxãcü tórü pecaduca̱x curuchagu najuxü̃ ga Cristu, rü wüxi i notüca̱xmamare nixĩ naxca̱x i ngẽma duü̃xü̃gü i pocuwa ĩxü̃. Notürü jixema na Tupana tüxü̃ maxẽxẽẽxü̃, rü nüxü̃ tacua̱x na ngẽma ore rü Tupanaãrü pora jiĩxü̃. 19  Erü norü ore i ümatüxü̃wa rü nhanagürü ga Tupana:“Rü tá ichajanaxoxẽẽ i guxü̃ma i norü cua̱x i ngẽma duü̃xü̃gü i nüxü̃ cua̱xü̃chixü̃. Rü tá nüxü̃ chaxo i ngẽma duü̃xü̃güarü cua̱x”, nhanagürü. 20  Rü nhu̱xmax, Pa Chaueneẽgüx, ¿Tupanape̱xewa rü ṯacüwa namexü̃ i ngẽma duü̃xü̃gü i poraãcü nüxü̃ cua̱xü̃chixü̃? ¿Rü ṯacüwa namexü̃ i ngẽma duü̃xü̃gü i Muĩsé ümatüxü̃ i mugüwa ngu̱xẽẽtaegüxü̃? ¿Rü ṯacüwa namexü̃ i ngẽma duü̃xü̃gü i meã nüxü̃ cua̱xgüxü̃ i nhama i naãneãrü cuáchigagu na jadexagüxü̃? Erü guxü̃ma i ngẽma cua̱x i duü̃xü̃gü nagu rüxĩnüẽxü̃ rü Tupanaca̱x rü taxuwama name. 21  Notürü nüma ja Tupana ja guxü̃xü̃ma cuácü, rü tama nanaxwa̱xe na nhama i naãnecü̱̃ã̱x i duü̃xü̃güarü cuágagu na jiĩxü̃ i naxü̃tawa nangugüxü̃ i nümagü. Notürü nanaxwa̱xe na ngẽma norü ore i mexü̃gagu na jiĩxü̃ i namaxẽxẽẽãxü̃ i ngẽma duü̃xü̃gü i jaxõgüxü̃ woo togüca̱x rü notüca̱xmamare jixĩgu i ngẽma ore. 22  Ngẽma Judéugü rü nüxü̃ nadaugüchaü̃ i cua̱xruü̃gü i Tupanaãrü poramaã üxü̃ na ngẽmawa nüxü̃ nacua̱xgüxü̃ca̱x na aixcuma jiĩxü̃ i ngẽma ore i nüxü̃ ixugüxü̃. Rü ngẽma Gregugü rü naxca̱x nadaugü i nhama i naãneãrü cua̱x na meã nüxü̃ nacua̱xgüxü̃ca̱x. 23  Notürü ngẽma ore i toma nüxü̃ tixuxü̃, rü Cristu ga curuchawa ipotacüchiga nixĩ. Rü ngẽma ore rü naãẽwa nangu̱x i Judéugü. Rü ngẽma duü̃xü̃gü i tama Judéugü ixĩgüxü̃ca̱x rü wüxi i notüca̱xmamare nixĩ. 24  Notürü ngẽma duü̃xü̃gü i Tupana idexechixü̃ i Judéugü rü e̱xna tama Judéugü ixĩgüxü̃ rü ngẽma duü̃xü̃güca̱x rü Cristuwa nixĩ ga Tupana inawéxü̃ ga norü pora rü norü cua̱x. 25  Rü jema Tupana üxü̃ ga jexguma naju̱xgu ga Cristu rü muxü̃ma i duü̃xü̃güca̱x rü wüxi i ngẽãẽmarexü̃rüü̃ nixĩ. Notürü ngẽma Tupana nagu rüxĩnüxü̃ rü guxü̃ma i nhama i naãnecü̱̃ã̱x i duü̃xü̃güarü cua̱xarü jexera nixĩ. Rü jexguma curuchagu naju̱xgu ga Cristu rü muxü̃ma ga duü̃xü̃güca̱x rü natura ga Tupana ga jexguma. Notürü jexguma nixĩ ga inawéãxü̃ ga nhuxãcü guxü̃ i duü̃xü̃güarü jexera na naporaxü̃chixü̃. 26  Pa Chaueneẽgüx, name nixĩ i nagu perüxĩnüẽ na nhuxãcü Tupana pexü̃ idexechixü̃ na norü duü̃xü̃gü peixĩgüxü̃ca̱x. Rü noxretama peixĩgü na nüxü̃ pecua̱xüchixü̃ ega duü̃xü̃gü pexü̃ ngugügu, rü noxretama peixĩgü na ãẽ̱xgacügü peixĩgüxü̃, rü noxretama peixĩgü i ngẽma itaarü dĩẽruã́xü̃tanüxü̃ peixĩgüxü̃. Notürü woo ngẽmaãcü peixĩgügu rü Tupana rü pexü̃ nidexechi na norü duü̃xü̃gü peixĩgüxü̃ca̱x. 27  Rü Tupana najadexechi ga jema duü̃xü̃gü ga togü ga duü̃xü̃gü nüxü̃ ixuxgu rü taxuü̃ma icuáxü̃. Rü jemaãcü nanaxü ga Tupana na naxãneẽxẽẽãxü̃ca̱x i ngẽma duü̃xü̃gü i nüxü̃ icua̱xüchixü̃. Rü Tupana najadexechi ga jema duü̃xü̃gü ga togü nüxü̃ ixuxgu rü turaexü̃. Rü jemaãcü nanaxü ga Tupana na naxãneẽxẽẽãxü̃ca̱x i ngẽma duü̃xü̃gü i poraexü̃. 28  Rü Tupana najadexechi ga jema duü̃xü̃gü ga togü nüxü̃ oexü̃, rü nhama i naãnewa taxuü̃ma ixĩgüxü̃. Rü jemaãcü nanaxü ga Tupana na taxuü̃ma jixĩgüxü̃ca̱x i ngẽma duü̃xü̃gü i ṯacü ixĩgüxü̃. 29  Rü ngẽmaca̱x taxucürüwama texé tügü ticua̱xüü̃ i Tupanape̱xewa. 30  Rü nümatama ga Tupana nixĩ ga Ngechuchu ja Cristuarü duü̃xü̃güxü̃ pexü̃ jaxĩgüxẽẽxü̃. Rü tatanüwa nanamu ga Cristu na nüma tüxna naxããxü̃ca̱x i cua̱x i aixcuma ixĩxü̃, rü pecaduwa tüxü̃ ínanguxü̃xẽẽxü̃ca̱x. Rü nüma ja Cristu nixĩ i tüxü̃ namaxẽxẽẽxü̃ rü tüxü̃ jamexẽẽgüxü̃ na aixcuma ixüünexü̃ca̱x i nape̱xewa ja Tupana. 31  Rü ngẽmaca̱x i Tupanaãrü ore i ümatüxü̃wa rü nhanagürü:“Rü ngẽxguma texé tügü icua̱xüü̃chaü̃gu rü name nixĩ i tórü Corixü̃ ticua̱xüü̃, erü nüma nixĩ i tüxü̃ nangü̃xẽẽxü̃”, nhanagürü.

Notas