Inea japi nirú echoná

Inea echi okuá menú

Inea: Jena’í mi riwimea

Testigo Jeobá

ralámuli

Wénwala binérisi emi kúchuwala

 BINELÍWAMI 13

Timoteo ma binérnali echi pagótami Onorúami kitra

Timoteo ma binérnali echi pagótami Onorúami kitra

Timoteo ko taa ka jona we kanili bineria echi pagótami. Wikaná ayé iyénali bineria. Echi ko we kanílika biteili. ¿Ami che machinali?...

Loida alí Eunice ko raʼíchili Timoteo yúa

Timoteo ko Listra mi biteili. Echi iyela ko Eunice riwéami nili, echi usúala ko, Loida. Echi Timoteo taa jona, echi iyela alí echi usúala binerili echi Timoteo. Kiti bela, taa ka jona, Timoteo ko iʼwírinali echi pagótami kiti machimea Onorúami.

Japalí Timoteo ma ochérami ke Pablo ko yúrili japi yúa simea raʼichasia Onorúami kitra jaréanacho mi. Pablo ko jéaneli echi Timoteo: “¿Ami tamí yúa simínali?”. Echi ko we kanílika jéaneli japi we  kanílika si simea, kiti we inili ma binérnala echi pagótami Onorúami kitra.

Timoteo ko Pablo yúa simili Grecia mi, bilé ciudad Tesalónica riwéami alí bárkochi ma simíali. Ma sisaa echomí, wiká pagótami yúa raʼíchali Onorúami kitra. Jaré pagótami ko we naʼáwali Pablo alí Timoteo yúa risoa ma olánali. Kiti bela jaréanacho mi simíala ko.

Timoteo ko we kaníliami nili echi riká bitea

Pe aminana Pablo ko jéaneli Timoteo japi ku simea Tesalónica mi inesia echi rejimá acha aʼlá muchuwa. We be nalí jaré echi pagótami Tesalónica piréami, risoa olali jaré japi biné Jesús kitra. ¡Timoteo ko tasi majasa riké simiyá echomí! ¿Chu isíliré Timoteo? Echi ko a ku simili kiti machinali chúriká muchuwa echi rejimá. Japalí ku simili japomí atiké Pablo jériká ku ruyeli japi ¡echi rejimá Tesalónica piréami we aʼlá nóchilia muchuwi Jeobá!

Pablo alí Timoteo wiká bamíali járili, bineria echi pagótami Jeobá kitra. Kiti bela Pablo osáala ko: “Timoteo ni julama kiti iʼwírima echi rejimá. Kiti tasi che nirú bilé rejoy japi riká echi. Echi ko we kaleli Jeobá alí pagótami si”.

¿Kecha ko mujé ayénachó mi kalé echi pagótami? ¿Ami kanilisa nili bineria jarecho pagótami kiti machimea Jeobá?... Ami echi riká isíisaká we mi kaníliami nímalé japi riká Timoteo.

LEERIPO ECHI BIBLIA:

  • 2 Timoteo 1:5; 3:15

  • Hechos 16:1-5; 17:1-10

  • 1 Tesalonicenses 3:2-7

  • Filipenses 2:19-22