Inea japi nirú echoná

Inea echi okuá menú

Inea: Jena’í mi riwimea

Testigo Jeobá

ralámuli

Wénwala binérisi emi kúchuwala

 BINELÍWAMI 2

Rebeca ko nakiyé japi Jeobá we kanílima echi yúa

Rebeca ko nakiyé japi Jeobá we kanílima echi yúa

Rebeca ko we aʼlá nijéwami nili Jeobá, echi kunala Isaac ayénachó. ¿Kumi machili Rebeca echi Isaac? ¿Ami machí piri isili echi mukí kiti Jeobá we kalema? Jenaʼí che binepa piri che isila echi Rebeca.

Echi Isaac wénwala ko nili Abrahán alí Sara. Abrahán ko nakiyé japi echi Isaac upema bilé mukí yúa aʼlá nijéwami Jeobá. We nalí we miká pireili, Canaán anilíachi, echi pagótami echoná piréami ko tasi nijéwami nili Jeobá. Kiti bela júala ko bilé echi yúa nóchami (a mayeliwa japi Eliezer nili) kiti simea echomí Harán anilíachi. ¿Chúsiá echomí julari? Kiti echomí Harán pireili Abrahán téemala, echomí mayeli japi riwimea bilé mukí japi Isaac upila nima.

Rebeca ko we nóchili baʼwí roʼéwia echi camello

We miká simíali Eliezer alí echi Abrahán pióniwala. Makoy camello me ka simíali echi koʼwáami apérika alí jaré namuti si ka simíali chiliweba ruyá echomí. ¿Piri isili Eliezer kiti machimea jépuká nima riká Isaac upila? Eliezer ko a machiyé japi siyé jaré iwé turusia baʼwí echoná payéwichi. Ma simeya, echi ko Jeobá yúa raʼíchili alí jéaneli: “Ani anema bilé tiwé japi tamí iyama baʼwí. A tamí iyásaká baʼwí turuka ayénachó si bajírisaká echi camello, a nijísaká baʼwí echi ju mukí japi mi chapili”.

Ma aníachi echi Rebeca ko ma rikiina inárili echoná payéwichi. Echi Biblia ko  aní japi echi tiwé we baʼóami nili. Eliezer ko baʼwí tánili alí echi Rebeca we sapuka jéaneli: “Ayena we kanílika ni mi iyama echi baʼwí ayénachó ni bajírima echi camello mujé bukuli”. Kiti waʼlú baʼwí bajíami ju echi camello, Rebeca ko waʼlú baʼwí turuka bajírili. ¡Wisabé roʼiká iyénali turua baʼwí! Iné echi dibujo upaka chukúami. ¿Piri isiá chukú Rebeca echoná?... Eliezer ko we kaníliami nili kiti Rebeca we nóchami nili alí kiti ¡Jeobá kipuli japalí Eliezer raʼíchali!

Eliezer ko jaré namuti we baʼóami chiliweli Rebeca, alí echi mukí ko bayeli echi Eliezer japi simea japoná pireili echi wénwala, ayénachó bayérili echi japi Eliezer yúa éenili. Eliezer ko ruyeli chúsiá Abrahán júali echomí Harán. Ayénachó jéaneli japi Jeobá kipuli kiti riwimea we aʼlá mukí japi Isaac upila nima. Ma echi riká anésaká, echi Rebeca téemala ko we kanili. Jéaneli Eliezer: “Aʼlá nímalé echi Isaac yúa unesa”.

Rebeca ko Eliezer yúa simili Canaán mi alí Isaac yúa niwili

¿Ami ko mayé japi Rebeca Isaac yúa kunenili?... Echi wénwala ko nárili acha yúa niwima echi Isaac, echi ko jéaneli japi a. ¿Chúsiá? Kiti Rebeca ko a machili japi Jeobá júali Eliezer. Alí okuaka simíali echomí Canaán, ma sisaa, echi mukí ko Isaac yúa niwili.

Rebeca ko we aʼlá nijéwami nili Onorúami, kiti bela Jeobá ko we aʼlá tibula ko. Ayénachó ma wiká bamíali simirsa Jesús ko Rebeca téemala nili. Ami aʼlá nijéwami nísaká japi riká Rebeca, Jeobá ayénachó mi tibuma alí we kanílima kiti mi aʼlá nijéwami ju.

LEERIPO ECHI BIBLIA:

  • Génesis 12:4, 5; 24:1-58, 67