Inea japi nirú echoná

Inea echi okuá menú

Inea: Jena’í mi riwimea

Testigo Jeobá

ralámuli

Wénwala binérisi emi kúchuwala

 BINELÍWAMI 4

Echi tiwé we kaníliti onolá alí Jeobá si

Echi tiwé we kaníliti onolá alí Jeobá si

¿Piri aneli Jefté Jeobá?

A we jilí nili nijewia, echi Jefté ranala aʼlá nijéwili binói onolá

¿Ami machí jépuká ju echi taa tiwé japi mi ritiwá jenaʼí?... Echi Biblia ko tasi aní chu riwéami ju, echi onolá nalí kitra raʼicha, Jefté riwéami nili. Jeobá alí Jefté si we kanili kiti echi tiwé we simá isíiami ke. ¿Ami che machinali piri ka isila Jefté alí echi tiwé?

Jefté ko we aʼláala nili; kiti sinibí binérili echi ranala Jeobá kitra. Ayénachó Jefté jiwérami nili alí we machíami kiti machili chúriká nulema echoná pueblo pireami. Kiti bela echi israelitas ko bayela ko Jefté jéaneka: “Japalí ta ma simabo réachi nakosia, ¿ami walúala nuláami nínali?”.

Jefté ko bachá Jeobá yúa raʼíchili, jéaneli japi Jeobá iwírima kiti nayúrima nakowa, jéaneli: “Ata nayúrisaká nakowa, echi japi bachá machiini tamí ku buwesia echi nalí nima japi mujé níwala nima”. ¿Chúsiá  echi riká anili? Kiti chabé ko tabernáculo aniwáami niruili kalí, japoná napawili echi pagótami binesia Jeobá kitra. Jefté ko aniyá ruli japi bachá machiini bitichí jonsa, japi tabernáculo mi simea bitélisia alí echoná bitélika nochama. ¿Ami ko nayúrila mayé nakowa? Ayena. Japalí Jefté ma ku nawayá chukúachi bitélachi, ¿ami machí jépuká nili japi machíinili ku buwesia?...

¡Jefté ranala nili! Bilepi kúchuwami nili. Jipi ko Jefté julama echi tiwé echomí tabernáculo kiti echomí bitélima. Jefté ko we omónali ba, we nalí ma bachá echi riká aneli Jeobá, ¿ami newayé? Kiti bela echi tiwé ko aneli binói onolá: “Mujé binói mi echi riká anélirú Jeobá jipi ko nijí japi mi nijima ruyé.

Echi tiwé amígowala, bamíali niraa simibi echomí tabernáculo inesia echi tiwé

Ma simiyá echi tiwé echoná Tabernáculo ayénachó omónali. ¿Chúsiá? Kiti echoná tabernáculo nawásaká japi ke unéma kecho kúchima. Echi ko aʼlá nijéwinali japi nuleli binói onolá. Ayénachó we kanílitinali Jeobá. Echi ko ke me natéami niraa ineli kuuchi oliwá alí niwíwami nalí japi we natéami ju Jeobá nijewa. Kiti bela sinibí bitélisia simila ko echomí tabernáculo.

¿Ami ko mayé japi echi tiwé kanílitili Jeobá alí Jefté?... ¡Ayena a! Mujé ayénachó mi nima japi riká Jefté ranala. Ami nijéwami nísaká alí we mi nakisáaká Jeobá, we mi kanílitima. Mujé onolá alí mujé iyela ayénachó we kanílima.

LEERIPO ECHI BIBLIA:

  • Deuteronomio 6:4-6

  • Jueces 11:30-40

  • 1 Corintios 7:32-34